Rooma 3 - Nyaa Shɔɔ Ɓɔɔ Laa a Ɓɛɛ

¹ A zang Yahudi, ri ɓa zang ɓɔɔ ri zang Yahudi kpang ɓu kaa nɛɛ viya? Shaa yeenang nwǎng zang ɓu viya?

² Nwǎng zang vuu katɔ dɔɔli. Laa a zang Yahudi kɔ Ruu ɓiɓɛ ka naa, nɛɛ ri yiti.

³ A zang ɓɔɔ ri nɛɛ shing danggn kpang, ka teteng ɓarɛ ɓɛɛ? Ka ruu nɔngkɔ, Laa pálɛ̀ vuu ɓɔɔ wu a nyaa nɛɛ wu pálɛ̀ ɓɛɛ takpang ya?

⁴ Wu nɔngkɔ kpang. Naa zang piti ri suu sèé, Laa palɛ ɓi vuu ɓɔɔ niizang ɓɛɛ. Naa ɓɔɔ Labeenang Laa kɔɔyi ɓɛɛ nɛɛ, “Mɔɔ nɛɛ rang yee, zang piti ri zi katɔ nɛɛ yee ɓaaɓɛ niizang. Naa zang ɓàá mɔɔ nyaavaa, mɔkɔ mɔɔ shaayi.”

⁵ Naa vuu shi kpang ɓɔɔ ruu palɛ, shingnɛ, zang wu zi vuu tɔ̃ɔ ɓɔɔ Laa palɛ ɓɛɛ gbãng gbãng ɓɛɛ. Ruu kɔɔ ɓu kaa nɛɛ viya? Nɛɛ Laa nɛɛ dang ruu jĩng tɔ, pálɛ̀ shi kpang ya? (N rang yee m naa ɓɔɔ shɔnzang ri rangkɛ ɓɛɛ.)

⁶ Wu nɔngkɔ kpang. Naa Laa palɛ vuu gn dang gbete, palɛ biya wu jɛ̃ɛ zang koo ruu viya?

⁷ Zang ɓɔɔ kɔɔ katɔ nɛɛ, naa sèé ɓɔɔ n suuyi, shingnɛ, zang a Laa bannang a ti shingnɛ zang zi vuu niizang ɓɔɔ Laa palɛ kaa gbãng gbãng ɓɛɛ, ka ruu vi Laa dang m jĩng naa zang ɓɔɔ palɛ vuu shi kpang viya?

⁸ A ka ruu vi ruu pálɛ̀ vuu shi kpang tɔ̀ɔ, tɔ̃ɔ wu nwang ka nɛɛ mani kpang viya? Zang ɓɔɔgn ri rang ruu shi kpang ka yuu ɓuru nɛɛ ruu kɔɔrɔ nɔngkɔ. Zang naa dang ri jĩng ditɔ jong naa ɓɔɔ daa naa katɔ ɓɛɛ.

Zang ɓɔɔ palɛ vuu tɔ̃ɔ kagn kpang

⁹ Nɛɛ nɔngkɔ, ɓɔɔ ruu zang Yahudi ruu ɓa zang ɓɔɔ ri zang Yahudi kpang ɓu kaa tɔ ya? Nɔngkɔ kpang tingkiring. N kɔ̀ɔ nɔɔ ka tĩng nɛɛ zang Yahudi nɛɛ zang ɓɔɔ ri zang Yahudi kpang nandon, ri palɛ vuu shi kpang katɔ.

¹⁰ Naa ɓɔɔ labeenang Laa kɔɔyi ɓɛɛ nɛɛ, “Zang ɓɔɔ palɛ tɔ̃ɔ kagn gbete ka jĩng Laa kpang.

¹¹ Zang ɓɔɔ ti zi vuu ɓɔɔ kagn kpang, zang ɓɔɔ ti kãa nɔng Laa kagn gbete kpang.

¹² Zang piti ri ràa Laa yuu knti tɔ, ri nandon, ri palɛ vuu shi kpang tɔ. Zang ɓɔɔ palɛ vuu tɔ̃ɔ kagn teteng ɓarɛ gbete kpang tingkiring.

¹³ Nyaa ɓarɛ ɓi sàa ɓɔɔ nyaa bm ɓɛɛ Yee ɓɔɔ ri rangnɛ, ɓi zang nwãarɛnang kɔ shɛ̃ɛning Ruu ɓɔɔ nyɔ zang vɔrɔ nwàng nɛɛ nyaa ɓarɛ naa ɓɔɔ zɔ̃pɔ nwáng nɛɛ nyaa sɔkɔ ɓɛɛ.

¹⁴ Nyaa ɓarɛ ɓi nyaa rĩiti kɔ shɛ̃ɛning, nɛɛ yee ɓɔɔ la katɔ ɓɛɛ.

¹⁵ Ri wiiri kpang, ri shìng zang nyaa vuu waa ka bii, a ri nyɔ zang vɔrɔ.

¹⁶ Nɔng ɓɔɔ ri daa piti ri lasɛ nɔng, ri yáa zang nɛɛ yeti lasɛnang.

¹⁷ Ri zunung ɓɔɔ ri shing zang, zang ri nwang ka nyaa zɔɔ ɓɛɛ kpang.

¹⁸ Ri kaa vɔrɔ Laa ka vuu ɓɔɔ ri palɛ ɓɛɛ kpang tingkiring.”

¹⁹ Ruu zi ɓuru tɔ nɛɛ, vuu ɓɔɔ zang bèe ka yeti nyaa ɓɔɔ Laa dangnɛ, ɓi ɓɔ̀ɔ́ zang ɓɔɔ ri dũng ɓarɛ nyaa dannang keɓe ɓɛɛ. Tɔ̀ɔ, wu zãa shɔnzang nandon nyaa jãanang kati. Tɔ̀ɔ, wu shingnɛ Laa wu naa jɛ̃ɛ zang koo nandon ruu kati.

²⁰ Ka ruu nɔngkɔ, zang nwàng zang tɔ̃ɔ ɓi jong ka tĩng Laa ka ruu ɓɔɔ zang palɛ vuu ɓɔɔ nyaa dannang Laa kɔɔyi nɛɛ zang wu palɛ ɓɛɛ kpang. Nyaa ɓɔɔ Laa dangnɛ pùú zang ɓi jĩng, zang zi vuu shi kpang ɓɔɔ zang palɛ ɓɛɛ.

Naa ɓɔɔ zang nwang zang tɔ̃ɔ ka tĩng Laa ɓɛɛ

²¹ Kãntang keɓe, Laa nwangsɛ gbalang ɓɔɔ wu shing zang, zang nwang zang tɔ̃ɔ ka tĩng ɓiɓɛ tɔ. Ruu gbalang keɓe, hãa ɓi kagn nɛɛ nyaa ɓɔɔ Laa dang ɓɛɛ kpang. Nyaa ɓɔɔ Laa dangnɛ, nɛɛ rɛɛ zang nyaa shonang Laa ri kɔɔ ruu ka yuu gbalang keɓe.

²² Laa shíng zang, zang nwáng zang tɔ̃ɔ ka tĩng ɓiɓɛ, ka ruu danggn ɓɔɔ zang shing ka bii Yeesɔ Kirisi ɓɛɛ. Ɓi ɓɔɔ zang piti ɓɔɔ ri shing danggn ka bii Kirisi ɓɛɛ, ka ruu ɓɔɔ, Laa shɛ̃ɛrɛ zang ɓi kpang ɓɛɛ.

²³ Zang piti ri palɛ vuu shi kpang tɔ, ri daa naa ɓɔɔ ri walɛ bannang ɓɔɔ Laa a zang ɓɛɛ takpang.

²⁴ A ka ruu tɔ̃ɔ ɓɔɔ Laa palɛ zang waati, Laa yaa ri gbalang vuu shi kpang ɓarɛ a shing ri tɔ, ri nwáng zang tɔ̃ɔ tɔ, ka tĩng ɓiɓɛ nɛɛ bii Yeesɔ Kirisi ɓɔɔ wukɔ ta yuu ɓarɛ ɓɛɛ.

²⁵ Laa a zang wu, nɛɛ zang nyɔ wu vɔrɔ, nɛɛ tɔ̀ɔ, wu nwang kaa gbalang ɓɔɔ Laa yàá shɔnzang nandon gbalang vuu shi kpang ɓarɛ ɓɛɛ. Ka ruu danggn ɓɔɔ ri shing ka bii ɓiɓɛ ɓɛɛ. Laa palɛ vuu keɓe, tɔ̀ɔ, wu tusu zang tɔ̃ɔ ɓiɓɛ. Ka tĩng, Laa mã danggn, a yee laa ka vuu shi kpang ɓɔɔ shɔnzang ri palɛ ɓɛɛ kpang.

²⁶ Kãntang keɓe, yée laa kaa tɔ, ka vuu shi kpang ɓɔɔ shɔnzang ri palɛ ɓɛɛ, tɔ̀ɔ, wu tusu zang tɔ̃ɔ ɓiɓɛ. Ka gbalang keɓe, Laa tusu zang nɛɛ wu ɓi zang tɔ̃ɔ, nɛɛ wu ti shing zang piti ɓɔɔ ri shing danggn ka bii Yeesɔ Kirisi, ri nwang zang tɔ̃ɔ ka tĩng ɓiɓɛ.

²⁷ Ruu rangkɛ yee bang bang ka yuu ɓuru ka yuu viya? Vuu kpang. Ka ruu vi nɔngkɔ viya? Ka ruu ɓɔɔ, ruu palɛ vuu ɓɔɔ nyaa dannang Laa kɔɔyi ɓɛɛ ya? Wu nɔngkɔ kpang, ɓi ka ruu ɓɔɔ, ruu shing danggn tɔ ɓɛɛ.

²⁸ Ka ruu ɓɔɔ, ruu di nyaa ruu tɔ nɛɛ, shɔnzang raa zang tɔ̃ɔ ka tĩng Laa ka ruu danggn ɓɔɔ wu shingnɛ kɔ gbete, wu ka ruu ɓɔɔ wu palɛ vuu ɓɔɔ nyaa dannang Laa kɔɔyi nɛɛ zang palɛ kpang ɓɛɛ.

²⁹ Laa ɓi Laa zang Yahudi kɔ shɛ̃ɛning ya? Ɓi doo Làá zang ɓɔɔ ri zang Yahudi kpang kɔ doori kpang ya? Ɓi doo Laa ɓarɛ kɔ.

³⁰ Laa ɓi gbete kak. Shing zang ɓɔɔ ri yee shaa katɔ, ri nwang zang tɔ̃ɔ ka tĩng ɓiɓɛ ka ruu danggn ɓɔɔ ri shing ɓɛɛ. Wu ti shing zang ɓɔɔ ri yee shaa kpang, ri nwáng zang tɔ̃ɔ doo ka ruu danggn ɓɔɔ ri shing ɓɛɛ kɔ.

³¹ Nɛɛ nɔngkɔ, ruu kɔsɔ nyaa dannang Laa kaa tɔ nɛɛ danggn ɓɔɔ ruu shing ɓɛɛ ya? Wu nɔngkɔ kpang tingkiring. Ruu shɔ nyaa dannang Laa ɓi kaa nɛɛ tɔɔsung kɔ jong.