Rooma 15 - Nyaa Shɔɔ Ɓɔɔ Laa a Ɓɛɛ

Palɛ vuu ɓɔɔ shing zang ɓɔɔgn, wu tãa tĩnang

¹ Ɓɔɔ ruu shing danggn ɓuru tɔ gbãng gbãng ɓɛɛ, ruu yi zang ɓɔɔ ri shing danggn doo rɛ̃rɛkɛ naa ka bii, ri shing danggn jong gbãng gbãng. Rúu pálɛ̀ vuu ɓɔɔ shing ruu, rukɔ tãa tĩnang ka bm gbete kpang.

² Zang ɓu wu pàlɛ̀ ɓeezung ɓɔɔ dũng doo Laa kɔ, vuu ɓɔɔ shing wu tãa tĩnang ɓɛɛ, wu ti shing wu, wu zũng danggn.

³ Ka ruu ɓɔɔ, Kirisi palɛ ɓi vuu ɓɔɔ wu tãa tĩnang ka bm kpang ɓɛɛ. Naa ɓɔɔ labeenang Laa kɔɔ ɓɛɛ, “Dãanang ɓɔɔ zang dãa nɔɔ, zang dãa Nkɔ”.

⁴ Vuu ɓɔɔ zang bee ka yeti labeenang Laa piti, zang beeyi nɛɛ wu kpɛ̃ɛrɛ ruu, wu mã ruu danggn, tɔ̀ɔ, ruu shing gn kati.

⁵ Laa ɓɔɔ wukɔ shing nɔɔ, nɔɔ mã danggn, nɔɔ ti yi tĩng ka vuu ɓɔɔ nɔɔ shing gn palɛnang ɓɛɛ, wu shingnɛ nɔ́ɔ nwang ka nyaa zɔɔ. Nɔ́ɔ pálɛ́ shonang ɓɔɔ Yeesɔ Kirisi pálɛ́ ɓɛɛ.

⁶ Tɔ̀ɔ, nɔ́ɔ goo nyaa kaa gbete, nɔ́ɔ dɔɔ Làá kpanti ɓuru Yeesɔ Kirisi, ɓɔɔ wukɔ ti Daa ɓiɓɛ ɓɛɛ.

⁷ Nɔɔ ta zɔɔ katɔ nɛɛ tĩnang, tɔ̀ɔ, zang ri dɔɔ Laa kati. Naa ɓɔɔ Kirisi ta nɔɔ ɓɛɛ.

⁸ N kɔ̀ɔ nɔɔ, Kirisi nwàng zang ɓɔɔ palɛ zang Yahudi shonang, tɔɔ, wu tusu nɛɛ Laa palɛ vuu ɓɔɔ wu kɔɔyi nɛɛ wu pálɛ̀ ɓɛɛ katɔ. Tɔɔ, wu shingnɛ, nyaa ɓɔɔ wu a rɛɛ dabang ɓuru wu nwang kaa niizang.

⁹ Nɛɛ tɔɔ, wu ti shing zang ɓɔɔ ri zang Yahudi kpang ri dɔ̀ɔ Laa jong ka ruu gn ɓarɛ ɓɔɔ kɔng wu ɓɛɛ. Naa ɓɔɔ zang bee ka yeti labeenang Laa ɓɛɛ nɛɛ, “Ka ruu nɔngkɔ, n dɔ̀ɔ mɔɔ ka teteng zang ɓɔɔ ri zang Yahudi kpang, N gaa soo, n dɔɔ mɔɔ nɛɛ mani.”

¹⁰ Zang ti bee tɔkn nɛɛ, “Zang ɓɔɔ ri zang Yahudi kpang, nɔɔ ɓakɛ zɔɔ nɛɛ zang ɓɔɔ Laa shɛ̃ɛrɛ ri katɔ ɓɛɛ, nɔɔ tãa tĩnang.”

¹¹ Tɔkn nɛɛ, “Zang ɓɔɔ ri zang Yahudi kpang, nɔɔ dɔɔ Laa ta. Zang ɓɔɔ ri ka koo piti ri dɔɔ Laa ta.”

¹² Ishaya ti kɔɔyi nɛɛ, “Zɔ̃ng Jeesi gbete a ditɔ, zang naa nwangsɛ wu, wu nwang kpanti zang ɓɔɔ ri zang Yahudi kpang ɓɛɛ, a ri naa shing gn ɓarɛ ka bii ɓiɓɛ”.

¹³ Laa ɓɔɔ wukɔ shingnɛ nɔɔ shing gn ɓɛɛ, wu shingnɛ nɔɔ tãa tĩnang gbãng gbãng ka yeti manɛ, yeti manɛ wu ti valɛ. Tɔ̀ɔ, Suru Laa wu a nɔɔ naa, nɔɔ shing gn kaa gbãng gbãng.

Bulu kɔɔ vuu ɓɔɔ shingnɛ wu bee laa keɓe ɓɛɛ

¹⁴ Manzung ɓɔɔ ri dũng doo Laa kɔ ɓɛɛ, n nɛɛ yuu mɛɛ n zi tɔ, nɔɔ palɛ tɔ̃ɔ dɔɔli. Nɔɔ ti zi vuu ɓɔɔ nɔɔ palɛ tɔ nandon. Nɔɔ zunung naa ɓɔɔ nɔɔ tusu zɔɔ vuu tɔ.

¹⁵ Ka labeenang kɔ n bèé nɔɔ ɓee, n waasɛ nɔɔ vuu ɓɔɔ kpang ka yuu vuu ɓɔɔ, n kpaa nɔɔ danggn ɓarɛ ɓɛɛ. N waasɛ nɔɔ vuu ɓɔɔ kpang, ka ruu bannang ɓɔɔ Laa a m ɓɛɛ.

¹⁶ N nwàng zang shonang Yeesɔ Kirisi, nɛɛ n palɛ zang ɓɔɔ ri zang Yahudi kpang shonang. N kɔɔ ri Ruu Tɔ̃ɔ Laa, tɔ̀ɔ, zang ɓɔɔ ri zi Laa kpang, ri nwang kaa naa vuu ɓɔɔ zang a Laa, ɓɔɔ shing Laa wu tãa tĩnang ɓɛɛ. Ɓɔɔ Suru Laa risi nwang tɔ̃ɔ ɓɛɛ.

¹⁷ Ka ruu ɓɔɔ, n ɓakɛ bii nɛɛ Yeesɔ Kirisi n làkɛ́ jĩng katɔ ka ruu shonang ɓɔɔ n pàlɛ́ Laa ɓɛɛ.

¹⁸ N rang yee, n waasɛ vuu ɓɔɔ kpang ka yuu vuu ɓɔɔ Kirisi shing m n palɛ ɓɛɛ. Ka ɓɔɔ n shing zang ɓɔɔ ri zang Yahudi kpang, ri ɓaa shoo kaa tɔ ka nyaa Laa ɓɛɛ. N shing ri nɛɛ rúu ɓɔɔ n kɔɔ ri, nɛɛ vuu ɓɔɔ n palɛ ɓɛɛ.

¹⁹ Nɛɛ vuu ɓɔɔ zang zirɛ zang mã naa ka danggn, a ɓɔɔ vuu ɓɔɔ Suru Laa palɛ nɛɛ naa vuu palɛnang ɓiɓɛ ɓɛɛ. Ka rakɛnang ɓɔɔ n gaayu nɛɛ Urushalima, n riki nɔng nandon, n daa nɛɛ mani ka Ilirikum ɓɛɛ, n hangsɛ zang Ruu Laa kɔɔnang tɔ nandon ka yuu Kirisi.

²⁰ Vuu ɓɔɔ n kasɛ ka yeti mɛɛ gbete ɓɛɛ, ɓi nɛɛ ɓɔɔ n kɔɔ zang Ruu Tɔ̃ɔ Laa ka nɔng ɓɔɔ zang tãa ruu Yeesɔ Kirisi gn kpang ɓɛɛ. Ka ruu ɓɔɔ, nɛ̀ɛ́ nwang naa ɓɔɔ n mãa gãa m ka yuu doo gãa ɓɔɔ zang ɓɔɔgn loo ɓɛɛ, ɓɛɛ.

²¹ Naa ɓɔɔ zang bee ka yeti labeenang Laa ɓɛɛ nɛɛ, “Zang ɓɔɔ zang kɔ̀ɔ ri ruu ɓiɓɛ gn kpang, ri naa zi wu ditɔ, a zang ɓɔɔ ri tãa gn kpang, ri naa zi vuu ɓɔɔ kagn ɓɛɛ ditɔ”.

Bulu kasɛ nɛɛ wu daa leng zang Gari Rooma

²² Vuu ɓɔɔ zãa m anang bii manɛ doo tɛ̃ɛ tɛ̃ɛ ɓɛɛ kɔ.

²³ Kãntang keɓe n hangsɛ shonang mɛɛ tɔ ka rɛɛ tipi keɓe. Ka ruu ɓɔɔ, bɛ̀ɛ́ n kasɛ n tɔɔ n daa ka bii manɛ ka rɛɛ saa kɔ tɛɛ ɓee.

²⁴ N shing gn anang tɔ kati kãntang. N nɛɛ yupaa tipi Asabaniya daanang tɔ, n naa leng nɔɔ ka gbalang. N nɛɛ nwang tɔ nɛɛ nɔɔ diki nɛɛ bee tɔ tɔkɔlɔng, nɔ́ɔ yi m naa kagn, n daa Asabaniya.

²⁵ A kãntang keɓe, n daa doo ka gari Urushalima, n daa a ri vuu ɓɔɔ yi ri naa ka bii ɓɛɛ.

²⁶ Ka ruu ɓɔɔ, zang ɓɔɔ ri dũng Laa ɓɔɔ ri ka Makidoniya nɛɛ Akaya ri zɔ̃ng nɛɛ yeti ɓarɛ nɛɛ ri yi zang ɓɔɔ vuu ka naa ɓarɛ kpang, ɓɔɔ ri ka teteng zang ɓɔɔ ri dũng Laa ka Urushalima ɓɛɛ naa ka bii.

²⁷ Rikɔ zɔ̃ng nɛɛ yeti ɓarɛ nɛɛ ri palɛ. Niizang, daa ɓɔɔ ri yi zang ɓɔɔ vuu ka naa ɓarɛ kpang naa katɔ ka bii. Zang ɓɔɔ ri zang Yahudi kpang, ri walɛ vuu tɔ̃ɔ ɓɔɔ Laa a zang Yahudi ka ruu suru ɓarɛ ɓɛɛ tɔ jong. Daa naa ɓɔɔ zang ɓɔɔ ri zang Yahudi kpang ri bàsɛ́ vuu naa ɓarɛ tɔ jong nɛɛ zang Yahudi.

²⁸ N nɛɛ hangsɛ shonang keɓe tɔ. N nɛɛ a ri vuu ɓɔɔ ri kpalɛ ri tɔ nandon. N yupaa daanang Asabaniya kati, n leng nɔɔ kaa gbalang.

²⁹ N zi tɔ nɛɛ n nɛɛ a tɔ ka bii manɛ, n shingnɛ Kirisi wu palɛ nɔɔ tɔ̃ɔ gbãng gbãng.

³⁰ Manzung ɓɔɔ ri dũng dòo Laa kɔ ɓɛɛ, n gaa nɔɔ nɛɛ nung Kpanti Yeesɔ Kirisi, a ɓɔɔ nɛɛ kasɛnang ɓɔɔ Suru Laa a ruu ɓɛɛ, nɔɔ ɓakɛ yuu nɛɛ n. Nɔɔ gaa m Laa jong gbãng gbãng

³¹ Nɔɔ gaayi nɛɛ, zang ɓɔɔ ri shing danggn ɓarɛ ka bii Laa kpang, ɓɔɔ ri ka tipi Yahudi, ri pálɛ̀ m vuu ɓɔɔ kpang. Nɛɛ zang ɓɔɔ ri dũng Laa ɓɔɔ ri ka Urushalima ri tãa tĩnang vuu ɓɔɔ n átɛ̀ ri ɓɛɛ.

³² Tɔ̀ɔ, n tãa tĩnang kaa ɓɔɔ n á ka bii manɛ ɓɛɛ. Laa nɛɛ kasɛ tɔ ɓɛɛ, tɔ̀ɔ, n tãa tĩnang jĩng ɓɔɔ n naa leng ka nɔɔ, n ɔ̃sɔ kati.

³³ Laa ɓɔɔ wukɔ shingnɛ ruu nwàng ka nyaa zɔɔ, wu nwang nɛɛ nɔɔ nandon. Nɔngkɔ.