Rooma 11 - Nyaa Shɔɔ Ɓɔɔ Laa a Ɓɛɛ

Laa bɛ̃ɛ zang ɓiɓɛ katɔ kpang

¹ N hɛ̃ɛyi ɓɛɛ, Laa bɛ̃ɛ zang ɓiɓɛ tɔ ya? Kpang. N nɛɛ yuu mɛɛ, n zang Isirela, zɔ̃ng Ibirayi. N m nɛɛ doo laa Biliyaminu.

² Laa bɛ̃ɛ zang ɓiɓɛ ɓɔɔ wu zɔ̃́ng ri bɛ̀ɛ́ zang gaayu koo mãanang gn kpang, kpàng. Nɔɔ zi vuu ɓɔɔ labeenang Laa kɔɔ ka ɓɔɔ bɛ̀ɛ́ Iliya gaa Laa ka yuu zang Isirela kpang ya? Iliya kɔɔyi tɔɔ,

³ “Kpanti Laa, zang ri nyɔkɔ zang nyaa shonang ɓaaɓɛ tɔ nandon. Zang ri ti jili nɔng ɓɔɔ zang dɔ̀ɔ́ mɔɔ vuu kagn ɓɛɛ tɔ. Ɓi kaa nkɔ zang nyaa shonang ɓaaɓɛ gbete ɓɔɔ n yaa ɓɛɛ. Zang ri ti kãa m, nɛɛ ri nyɔ m vɔrɔ”.

⁴ Laa kasɛ wu nyaa nɛɛ viya? Laa tɔɔ, “N shɛ̃̀ɛrɛ̀ yuu mɛɛ zang doo kagn labang manziti ɓɔɔ ri bang vaka ɓɔɔ zang ɓaa nɛɛ Baal gn kpang ɓɛɛ”.

⁵ Kãntang keɓe doo nɔngkɔ, zang ɓɔɔ Laa zɔ̃ngkɔ ri katɔ, ka ruu ɓɔɔ, gn ɓarɛ kɔng wu katɔ ɓɛɛ, ri yaa doogn tɔkɔlɔng.

⁶ Zɔ̃ngkɔ ri ka ruu ɓɔɔ, gn ɓarɛ kɔng wu katɔ ɓɛɛ, wu ka ruu vuu ɓɔɔ ri palɛ ɓɛɛ kpang. Naa Laa nɛɛ zɔ̃ngkɔ zang ka ruu vuu tɔ̃ɔ ɓɔɔ ri palɛ ɓɛɛ, gn zang nɛɛ kɔng Laa ɓi katɔ niizang kpang.

⁷ Ruu keɓe, kɔɔ ɓu kaa nɛɛ viya? Zang Isirela ri ĩi vuu ɓɔɔ ri kãa ɓɛɛ kpang. Ɓi zang ɓɔɔ Laa zɔ̃ngkɔ rikɔ ri ĩiyi. Zang nimbang ri huuru shoo ɓarɛ katɔ, ri tãa nyaa ɓɔɔ Laa ɓayi ɓarɛ takpang.

⁸ Naa ɓɔɔ Labeenang Laa kɔɔ ɓɛɛ nɛɛ, “Vuu ɓɔɔ yirɛ, a nɔng ka lɛ̀ɛ́kɔ, Laa shing tɔ yeti ɓarɛ zi vuu ɓɔɔ kpang. Laa a ri jĩng ɓɔɔ zi nɔng kpang, nɛɛ shoo ɓɔɔ tãa nɔng kpang ɓɛɛ”.

^9-10 A Dawuda kɔɔyi tɔ, “Vuu shaanang ɓɔɔ ri shaayi wu nwang ri naa saka ɓɔɔ zang langnɛ nɛɛ wu yi ri ɓɛɛ. Ri watɛ ta, zang wu dang ri jĩng. Jĩng ɓarɛ wu zúurú, tɔ̀ɔ, ri zi nɔng kaa takpang. Jĩng ɓɔɔ ri dangnɛ, wu shing ri, ri lang gũntang dòndòng.”

¹¹ Ń hɛ̃ɛ kati ɓɛɛ, ɓɔɔ zang Yahudi ri kpaa doo, ri wàtɛ̀ gbinggbing ya? Nɔngkɔ kpang tingkiring. Ka ruu ɓɔɔ, ri palɛ vuu shi kpang, Laa ta yuu zang ɓɔɔ ri zang Yahudi kpang kati. Tɔ̀ɔ, wu shing zang Yahudi, ri kaa sũnyaa kaa nɛɛ ri.

¹² Vuu shi kpang ɓɔɔ zang Yahudi ri palɛ kɔ shingnɛ Laa a zang koo vuu tɔ̃ɔ dɔɔli. A ka ruu gbalang ɓɔɔ zang Yahudi ning ɓɛɛ, Laa shing zang ɓɔɔ ri zang Yahudi kpang ri tãa tĩnang dɔɔli. Laa nɛɛ ta yuu zang Yahudi tɔ jong nandon, tĩnang naa shang kaa dɔɔli kɔ jong kpang ya?

Laa tá yuu zang ɓɔɔ ri zang Yahudi kpang tɔ

¹³ N rang yee kaa nɛɛ nɔkɔ ɓɔɔ nɔɔ zang Yahudi kpang ɓɛɛ. Laa shong m nɛɛ n pálɛ́ shonang ka teteng manɛ ɓɛɛ, ka ruu nɔngkɔ, n dɔ̀ɔ́ bii ka ruu shonang ɓɔɔ wu a m nɛɛ n palɛ ɓɛɛ.

¹⁴ Naa n shíng zang zɔ̃̌ng mɛɛ katɔ, ri kaa sũnyaa, tɔ̀ɔ, Laa wu ta yuu zang ɓɔɔ ka teteng ɓarɛ.

¹⁵ Ka ɓɔɔ Laa bɛ̃ɛ ri, Laa raa zang koo ri yi wusang nɛɛ wu. A Laa nɛɛ ta ri tɔ tɔkn ɓɛɛ, naa nwang naa ɓɔɔ zang ɓɔɔ ri vɔlɔ tɔ, ri walɛ suru bii tɔ kpang ya?

¹⁶ Naa borodi ɓɔɔ zang gaayu zang sharɛ nɛɛ tɔ̃ɔ ka jĩng Laa, borodi ɓɔɔ nimbang keɓe, ɓi kaa doo tɔ̃ɔ kɔ. Naa zang a Laa dĩiri laa nɛɛ tɔ̃ɔ, rɛɛ nasãng laa ɓi doo ɓɔɔ ɓiɓɛ kɔ.

¹⁷ Zang dɔlɔ nasãng laa inabi ɓɔɔ zang ɓaa katɔ ɓɛɛ tɔ, a zang atɛ nasãng laa inabi ɓɔɔ ta nɛɛ yuu ɓiɓɛ ka waala zang naa tiisi ka nɔng ɓarɛ. A nɔɔ ɓɔɔ nɔɔ nwang naa laa inabi ɓɔɔ ta ka waala ɓɛɛ, kãntang keɓe nɔɔ wàlɛ́ manɛ kaa vuu tɔ̃ɔ ɓɔɔ a nɛɛ bii laa inabi ɓɔɔ zang ɓaa katɔ ɓɛɛ.

¹⁸ Ka ruu nɔngkɔ, nɔɔ risi nasãng ɓɔɔ zang dɔlɔ ri katɔ naa vuu ɓɔɔ kpang, kpang. Nɔ́ɔ tuu yuu manɛ kpang, nɔɔ manɛ nasãng waati. Wu nɔkɔ yiti dĩiri kpang, ɓi dĩiri laa kɔ yiti nɔɔ.

¹⁹ Nɔɔ kɔɔ katɔ nɛɛ, “Zang dɔlɔ nasãng nɛɛ tɔɔ zang yaa m nɔng n tèng nɔng ɓarɛ”.

²⁰ Nɔngkɔ niizang. Zang dɔlɔ ri, ka ruu ɓɔɔ ri shing danggn kpang ɓɛɛ. A nɔɔ tèng nɔng ɓarɛ ɓi kaa ruu ɓɔɔ nɔɔ shing danggn tɔ ɓɛɛ. Nɔ́ɔ tuu yuu manɛ ka ruu ɓɔɔ nɔɔ tèng nɔng ɓarɛ tɔ kpang, nɔɔ kaa vɔrɔ kɔ jong.

²¹ Laa nɛɛ yaa nasãng laa inabi ɓɔɔ zang ɓaa katɔ ɓɛɛ kpang. Nɔɔ kɔ̀ɔ́ ɓu nɛɛ naa yaa nɔɔ katɔ ya?

²² Ka ruu nɔngkɔ, nɔɔ zi naa ɓɔɔ Laa jɛ̃ɛ zang ruu nɛɛ gnvɔ, nɛɛ tɔ̃ɔ ɓɔɔ wu palɛ zang ɓɛɛ. Jɛ̃ɛ zang ɓɔɔ ri palɛ vuu shi kpang ruu nɛɛ gnvɔ ning, a pàlɛ́ ɓi kaa nɔkɔ tɔ̃ɔ, nɔɔ nɛɛ yaa tɔ̃ɔ ɓɔɔ wu palɛ nɔɔ kpang ɓɛɛ. Naa nɔngkɔ kpang, zang dɔlɔ nɔɔ ditɔ jong.

²³ Zang Yahudi ri nɛɛ shing danggn tɔ tɔkn zang sɔɔrɔ ri tɔkn ka nɔng ɓarɛ. Ka ruu ɓɔɔ Laa zunung ɓɔɔ wu sɔɔrɔ ri katɔ ɓɛɛ.

²⁴ Zang ɓɔɔ ri zang Yahudi kpang, nɔɔ nwàng manɛ naa nasãng laa inabi ɓɔɔ ta ka waala, zang tiisi nɔɔ ka bii laa inabi ɓɔɔ zang ɓaa katɔ ɓɛɛ. Vuu keɓe zang palɛ gngn kpang. Zang Yahudi ri nwàng naa nasãng laa inabi ɓɔɔ zang ɓaa katɔ ɓɛɛ. Naa Laa tɔɔ, wu tiisi nasãng kɔ zang dɔlɔ ɓee ka laa ɓɔɔ zang dɔlɔ ri kagn, kpãa wu kpang tingkiring.

Laa naa ta yuu zang Isirela ditɔ

²⁵ Rɛɛ manzung, ɓɔɔ nɔɔ zang Yahudi kpang, n kasɛ nɔɔ tuu yuu manɛ kpang. Tɔ̀ɔ n kɔɔ nɔɔ dĩiri vuu ɓɔɔ palɛ zang Isirela ɓɔɔ nɔɔ zi kpang ɓɛɛ. Zang ɓɔɔ ka teteng ɓarɛ ri taarɛ yuu dɔɔli. Ri nwáng nɔngkɔ sasak Laa wu ta yuu manɛ zang ɓɔɔ nɔɔ zang Yahudi kpang nandon.

²⁶ Naa ɓɔɔ zang naa ta yuu zang Isirela nandon keɓe. Labeenang Laa kɔɔyi tɔɔ, “Zang ɓɔɔ tá yuu zang naa nwang nyaa nɛɛ gari Siyona. Tɔɔ wu shingnɛ zɔ̃ng Yakubu ri yaa vuu shi kpang palɛnang kati.

²⁷ Wee vuu ɓɔɔ n a nyaa nɛɛ n palɛ nɛɛ ri ɓɛɛ kɔ, ka ɓɔɔ n naa yàá ri gbalang vuu shi kpang ɓarɛ ɓɛɛ”.

²⁸ Zang Yahudi ri ɓarɛ zang ɓɔɔ ri shing jĩng nɛɛ Laa kpang, ka ruu ɓɔɔ ri bɛ̃ɛ Ruu Tɔ̃ɔ Laa katɔ ɓɛɛ. A nɔɔ zang ɓɔɔ nɔɔ zi Laa kpang nɔɔ wàlɛ̀ Ruu Tɔ̃ɔ Laa tãanang kati. Ka ruu ɓɔɔ, Laa zɔ̃ng ri ɓarɛ katɔ ɓɛɛ, ri doo zang ɓɔɔ Laa kasɛ ri katɔ ɓɛɛ, ka ruu rɛɛ dabang dabang ɓarɛ ɓɛɛ.

²⁹ Ka ruu ɓɔɔ, Laa nɛɛ zɔ̃́ng zang tɔ, bɛ̃ɛ ri ɓi takpang, nɛɛ ti a zang vuu tɔ, tà ɓi tɔ̀ɔ́ tɔkn kpang.

³⁰ Ɓɔɔ nɔɔ zang ɓɔɔ nɔɔ zi Laa kpang ɓɛɛ, naa ɓɔɔ ka tĩng nɔɔ ɓaa shoo ka nyaa Laa kpang, kãntang keɓe gn manɛ kɔng Laa tɔ, ka ruu ɓɔɔ, zang Yahudi ri ɓaa shoo ka nyaa Laa kpang ɓɛɛ.

³¹ Zang Yahudi doo nɔngkɔ, kãntang keɓe, ri ɓaa shoo ɓarɛ tɔ̀ɔ́ ka nyaa Laa kpang. Tɔ̀ɔ, gn ɓarɛ wu kɔng Laa kaa jong, naa ɓɔɔ kɔng wu ka yuu manɛ ɓɛɛ.

³² Ka ruu ɓɔɔ, Laa risi zang piti naa zang ɓɔɔ wu mã ri ka sãa, ka ruu ɓɔɔ, ri ɓaa shoo ka nyaa ɓiɓɛ kpang ɓɛɛ. Nɛɛ tɔɔ, gn ɓarɛ wu kɔng wu kati.

³³ Laa pàlɛ́ zang tɔ̃ɔ dɔɔli, ti zũng dɔɔli, a zi vuu piti. Zang ɓɔɔ zi naa ɓɔɔ Laa shii ka yuu vuu kpang, ruu ti zi gbalang ɓiɓɛ kpang.

^34-35 Naa ɓɔɔ labeenang Laa kɔɔ ɓɛɛ tɔɔ, “Zang ɓɔɔ zi rɛɛ vuu ɓɔɔ Kpanti Laa rɛ̃rɛ kpang. Zang ɓɔɔ kɔɔ wu ruu kagn kpang. Wi á wu vuu tɔ gn, tɔ̀ɔ, wu sɔ̀ɔrɔ̀ zang kaɓa kati wiya?”

³⁶ Vuu piti a nɛɛ bii Laa. Mãa vuu piti ka ruu ɓiɓɛ kɔ, a vuu piti ti gbãayu ka bii ɓiɓɛ ka nɔng. Rúu dɔɔ nɔɔ Laa dòndòng. Nɔngkɔ.