Matiyu 24 - Nyaa Shɔɔ Ɓɔɔ Laa a Ɓɛɛ

Naa ɓɔɔ Gãa Laa naa jili ɓɛɛ

¹ Yeesɔ nwang tɔ nɛɛ Gãa Laa, daa kana, a zang ɓɔɔ ri mantɛ vuu ka bii ɓiɓɛ ri naa a ka bii ɓiɓɛ, a ri tusu wu Gãa Laa ɓɔɔ zang mãa ɓɛɛ kati.

² A Yeesɔ kasɛ ri nyaa tɔɔ, “Nɔɔ zi vuu keɓe tɔ nandon niizang. N kɔɔ nɔɔ, zang naa yaa tari ɓɔɔ pãng ka yuu zɔɔ gbete kpang. Zang naa jili ditɔ ka tipi nandon.”

³ Yeesɔ daa nwang tɔ ka yuu Kɔpɔ Zeetung, a zang ɓɔɔ ri mantɛ vuu ka bii ɓiɓɛ, ri daa ka bii ɓiɓɛ ka naa ɓarɛ. A ri kɔɔ wu nɛɛ, “Kɔɔ ruu diki ɓɔɔ zang naa palɛ vuu keɓe ta. Mɔɔ ti kɔɔ ruu vuu ɓɔɔ ruu zi diki ɓɔɔ mɔɔ gbãayu kagn, nɛɛ diki ɓɔɔ koo keɓe naa waa nyaa ɓɛɛ.”

⁴ A Yeesɔ kasɛ ri nyaa tɔɔ, “Nɔɔ gãng jĩng kagn, zang ɓɔɔ wu nwãarɛ nɔɔ kpang.

⁵ Ka ruu ɓɔɔ, zang dɔɔli naa a nɛɛ nung mɛɛ, nɛɛ rikɔ Kirisi ɓɛɛ. Ri naa nwãarɛ zang dɔɔli.

⁶ Nɔɔ ti naa tãlɛ nyaa sĩiri tanang ditɔ nɛɛ ruu sĩiri ɓɔɔ zang kɔɔrɔ ɓɛɛ. Nɔ́ɔ kaa vɔrɔ kpang, vuu keɓe a ɓi katɔ, a ɓi gn diki ɓɔɔ koo waa nyaa kagn ɓɛɛ kpang.

⁷ Zang tipi ɓɔɔ naa gaa nyaa ditɔ nɛɛ zang tipi ɓɔɔgn. Kpanti ɓɔɔ ti naa gaa nyaa ditɔ nɛɛ Kpanti ɓɔɔgn. Nyɔkɔ bang, nɛɛ tipi ruutunang, ri ti naa nwang ditɔ ka tipi koo dɔɔli.

⁸ Vuu keɓe piti, ɓi doo jĩng dannang gaayu naa ɓɔɔ jaa gaa zang soro yuu kɔnang ɓɛɛ.

⁹ “Zang ti naa yiki nɔɔ ditɔ, zang a zang ɓɔɔ ri dang nɔɔ jĩng, tɔɔ ri nyɔ nɔɔ vɔrɔ kati. Zang koo keɓe piti naa bɛ̃ɛ nɔɔ ditɔ ka ruu nung mɛɛ.

¹⁰ Ka diki kaɓa, zang dɔɔli ri naa yaa danggn ɓɔɔ ri shing ka bii Kpanti Laa ditɔ. Ri naa kasɛ ruu zɔɔ takpang, ri naa malɛ yuu zɔɔ ditɔ.

¹¹ Zang ɓɔɔ ri suu sèé nɛɛ ri zang nyaa shonang Laa, ri naa arɛ ri nwãarɛ zang dɔɔli.

¹² Ka ruu vuu shi kpang ɓɔɔ naa shangkɛ ɓɛɛ, zang naa kasɛ ruu zɔɔ tɔ̀ɔ́ dɔɔli kpang.

¹³ A zang ɓɔɔ nɛɛ naa mã danggn sasak, wukɔ naa wɔrɛ.

¹⁴ Zang naa rang zang koolaa keɓe Ruu Tɔ̃ɔ Kpanti Laa ditɔ nandon, tɔɔ zang ɓɔɔ ka rɛɛ tipi ɓɔɔ ka koo keɓe ri tãa ruu ɓɔɔ niizang kati. Tɔ̀ɔ, koo keɓe wu naa waa nyaa kati.”

Jĩng dannang bang ɓɔɔ naa a ɓɛɛ

¹⁵ “Ka ruu nɔngkɔ, nɔɔ naa zi vuu baabii ɓɔɔ Daninya zang nyaa shonang Laa kɔɔyi, shii tɔ ka nɔng nwannang Kpanti Laa ɓɔɔ ka yeti Gãa Laa.” (Zang ɓɔɔ bee Labeenang Laa katɔ, wu zi kati.)

¹⁶ Nɔɔ nɛɛ zi vuu keɓe tɔ, zang ɓɔɔ ri ka tipi Yahudi, ri yurɛ, ri daa ka kɔpɔ.

¹⁷ Zang ɓɔɔ ka yuu gãa, wu shooro tɔ̀ɔ́ tipi, nɛɛ wu naa ya vuu ɓɔɔ ka yeti gãa ɓiɓɛ kpang.

¹⁸ Zang ɓɔɔ ka jaa, wu ti gbãayu tɔ̀ɔ́ nɛɛ wu naa tuu fɔ̃ɔrɔ ɓiɓɛ kpang.

¹⁹ Vuu gn kɔnang kagn yuu zang soro ɓɔɔ jaa ka yeti nɛɛ ɓɔɔ jaa ka naa, ka diki kaɓa.

²⁰ Nɔɔ gaa Kpanti Laa nɛɛ, vuu keɓe wu palɛ nɛɛ gãmbang guusi, kɔ ka Diki Ɔ̃sɔnang manɛ kpang.

²¹ Ka ruu ɓɔɔ, jĩng dannang bang kagn diki kaɓa ɓɛɛ. Zang zi jĩng dannang ɓɔɔ naa weɓe gngn ka koo keɓe doo gbete kpang. Zang naa paasɛ jĩng dannang ɓɔɔ naa weɓe takpang.

²² Kpanti Laa nɛ̀ɛ́ sɔ́ɔrɔ̀ diki keɓe ka knti tɔkɔlɔng kpang, zang ɓɔɔ nɛɛ wɔ kagn gbete gãagãa kpang. A Kpanti Laa naa sɔ́ɔrɔ̀ diki keɓe, ka ruu zang ɓiɓɛ ɓɔɔ wu shɛ̃ɛrɛ ɓɛɛ.

²³ “Ka diki kaɓa, zang ɓɔɔ nɛɛ kɔɔ nɔɔ nɛɛ, ka nihn, kɔ ka kaaɓa, nɔɔ yee laa manɛ kagn kpang.

²⁴ Ka ruu ɓɔɔ, zang ɓɔɔ ri ɓaa yuu ɓarɛ nɛɛ Kirisi, nɛɛ zang ɓɔɔ ri suu sèé nɛɛ ri zang nyaa shonang Laa naa alɛ ditɔ, ri tusu vuu bang bang ɓɔɔ zang zirɛ, zang mã naa ka danggn, nɛɛ tɔɔ ri nwãarɛ zang kati. Naa ri zunung zang ɓɔɔ Laa shɛ̃ɛrɛ ri nwãarɛnang katɔ, ri nɛɛ nwáarɛ̀ ri katɔ.

²⁵ Nɔɔ shing danggn kagn, ka ruu ɓɔɔ, n kɔɔ nɔɔ tɔ ɓɛɛ.

²⁶ “Ka ruu nɔngkɔ, zang nɛɛ naa kɔɔ nɔɔ nɛɛ, Kirisi ka jĩngti, nɔɔ daa kpang. Ri nɛɛ ti kɔɔyi nɛɛ, wee ka yeti jaka tĩng ɓee, nɔɔ yee láa kagn kpang,

²⁷ ka ruu ɓɔɔ, anang Jaa Shɔnzang nwang ɓi naa shala mii ɓɔɔ mangkɛ nɛɛ paa ɓɔɔ laa nwang nɔng, a zang ɓɔɔ ka dii ɓɔɔ laa hãa nyaa kagn ri ti zi katɔ jong ɓɛɛ.

²⁸ Nɔng ɓɔɔ vuu vɔ kagn, jãa kpalɛ zɔɔ ka nɔngkɔ.

Naa ɓɔɔ Jaa Shɔnzang naa gbãayu ɓɛɛ

²⁹ “Jĩng dannang bang kaɓa nɛɛ waa nyaa tɔ hn, “ ‘laa kɔ ruu zi ka lapa ɓee, naa tɔ̀ɔ katɔ, shala ti naa yàkɛ̀ nɔng takpang sang ri ti naa shili nɛɛ lapa, vuu ɓɔɔ ka lapa piti naa rùutú katɔ.’

³⁰ “Tɔ̀ɔ zang naa zi vuu ɓɔɔ zang zirɛ zang mã naa ka danggn ka lapa ɓɔɔ tusu zang nɛɛ n ɓɔɔ n Jaa Shɔnzang n a kana ɓɛɛ. Zɔ̃ng zang ɓɔɔ ka koo keɓe piti, ri naa kaa ditɔ. Ri ti naa zi m kati, ka ɓɔɔ n a ka yeti sãmbong nɛɛ naa vuu palɛnang mɛɛ, nɛɛ bannang mɛɛ ɓɛɛ.

³¹ N naa shong zang nyaa shonang mɛɛ ɓɔɔ lapa ditɔ nɛɛ vuukãng ɓɔɔ káa dɔɔli ɓɛɛ, tɔɔ ri kpalɛ m zang mɛɛ ɓɔɔ n shɛ̃ɛrɛ ka koo keɓe piti, nɛɛ paa ɓɔɔ laa nwang nɔng, a ɓɔɔ nɛɛ dii ɓɔɔ laa hãa nyaa kagn ɓɛɛ.

Vuu ɓɔɔ rúu laa sĩiri túsù ɓɛɛ

³² “Nɔɔ mantɛ vuu ta, ka bii laa sĩiri. “Nasãng laa sĩiri nɛɛ lɔ̀ɔ gɔpɔ tɔ, ɓɔɔ shɔɔ nɛɛ lusu tɔ, nɔɔ zi tɔ nɛɛ nɔng guusi a naabm tɔ.

³³ Nɔɔ nɛɛ ti zi vuu keɓe tɔ piti naa weɓe, nɔ́ɔ zi kati nɛɛ Jaa Shɔnzang a naabm tɔ, ka nyaa gãa.

³⁴ N kɔɔ nɔɔ ruu ɓɔɔ niizang kɔ nwani, koo jaa knti keɓe naa ɓa kpang, vuu keɓe naa palɛ tɔ niizang gbongkarɛ nandon.

³⁵ Lapa nɛɛ tipi ri naa shaarɛ ditɔ nandon, a ruu mɛɛ shaarɛ ɓi kpang.

Zang gbete ɓɔɔ zi diki, nɛɛ laa ɓɔɔ Yeesɔ gbãayu kagn kpang

³⁶ “Zang gbete ɓɔɔ zi diki, nɛɛ laa ɓɔɔ n gbãayu kagn kpang. Zang nyaa shonang Kpanti Laa ɓɔɔ ka lapa, nɛɛ n ɓɔɔ n Jaa Laa piti, ruu zi kpang, ɓi Kpanti Laa kɔ zi gbete.

³⁷ Diki ɓɔɔ Jaa Shɔnzang naa a kagn, nwang naa diki ɓɔɔ Nuhu nwang kagn ɓɛɛ.

³⁸ Ka diki ɓɔɔ mii lapa bang a gn kpang, zang shaa vuu shaanang, zang ɓoo ɓɔɔ ɓoonang, zang gee soro, a zang ti á zang wujɛ soro ɓarɛ, zang shingnɛ. Ri palɛ nɔngkɔ sasak, Nuhu naa daa nɔng ka yeti Laana.

³⁹ Ri zi vuu ɓɔɔ a nɛɛ knti kpang. A mii lapa bang naa arɛ, see ri nandon. Diki ɓɔɔ Jaa Shɔnzang naa arɛ nwang doo nɔngkɔ.

⁴⁰ Ka diki kaɓa, zang ziti ri lang jaa, Laa naa tuu zang gbete wu yaa ɓɔɔ gbete.

⁴¹ Zang soro ziti ɓɔɔ ri naa nang vuu ka yuu ree, Laa ti naa tuu gbete, wu yaa ɓɔɔ gbete.

⁴² “Ka ruu nɔngkɔ, nɔɔ gãng jĩng kagn, ka ruu ɓɔɔ, nɔɔ zi diki ɓɔɔ Kpanti manɛ a kagn kpang ɓɛɛ.

⁴³ Nɔɔ zi tɔ nɛɛ, naa zang gãa nɛ̀ɛ́ tãa nyaa diki ɓɔɔ shɔngɓɔ a vuu ɓɔɔnang kagn tɔ, nɛ̀ɛ́ gãng jĩng ka gãa ɓiɓɛ tɔ̃ɔ tɔ̃ɔ, ka ruu ɓɔɔ Shɔngɓɔ nɛ̀ɛ́ naa shɛ̃ɛ ka gãa ɓiɓɛ see wu vuu ɓɛɛ.

⁴⁴ Ka ruu nɔngkɔ, nɔɔ gãng jĩng kagn, ka ruu ɓɔɔ, Jaa Shɔnzang a ka làa ɓɔɔ nɔɔ shing danggn manɛ kpang ɓɛɛ.

Zang shonang ɓɔɔ tɔ̃ɔ nɛɛ ɓɔɔ shi kpang ɓɛɛ

⁴⁵ “A ɓu wi zang shonang tɔ̃ɔ ɓɔɔ zũng katɔ, ɓɔɔ dabang gãa ɓiɓɛ yaa wu zang ɓɔɔ ka gãa ɓiɓɛ nɛɛ wu alɛ ri vuu shaanang ka laa ɓɔɔ ri shaa vuu kagn wiya?

⁴⁶ Tĩnang tãanang ɓi ɓɔɔ, zang shonang kaɓa kɔ, dabang gãa ɓiɓɛ nɛɛ naa ĩi wu palɛ doo shonang ɓɔɔ wu yaa wu ɓɛɛ.

⁴⁷ N kɔɔ nɔɔ ruu ɓɔɔ niizang kɔ nwani, dabang ɓiɓɛ naa shing wu ka yuu vuu naa ɓiɓɛ nandon.

⁴⁸ A náa zang shonang kaɓa, yeti ɓiɓɛ shi kpang, a kɔɔyi tɔɔ, ‘Dabang gãa mɛɛ a ɓi pati kpang?’

⁴⁹ Ka ruu nɔngkɔ, a gaa tɔɔsung ɓeezung shonang nyɔkɔnang kati. A shaa vuu shaanang, a ti ɓoo sàa nɛɛ zang ɓɔɔ sàa palɛ ri katɔ ɓɛɛ.

⁵⁰ A dabang gãa zang shonang kaɓa, naa a ka diki ɓɔɔ zang shonang kaɓa shing danggn anang ɓiɓɛ kpang nɛɛ laa ɓɔɔ wu zi kpang ɓɛɛ.

⁵¹ Dabang ɓiɓɛ naa dang wu jĩng ditɔ, wu ti shing wu nɛɛ zang ɓɔɔ ri nwãarɛ zang nɛɛ vuu palɛnang ka nɔng ɓɔɔ zang kaayi, zang shaa nyaa kagn kpaaka kpaaka ɓɛɛ.