Matiyu 22 - Nyaa Shɔɔ Ɓɔɔ Laa a Ɓɛɛ

Ruu kn sinyɛ

¹ A Yeesɔ rang ri yee kaa tɔkn nɛɛ nyaa vuu jeenang tɔɔ,

² “Kpanti ɓɔɔ Laa rooyi nwang naa ruu yɔɔ Kpanti ɓɔɔ palɛ jaa ɓiɓɛ ɓɔɔ varɛ vuu shaanang kn sinyɛ ɓɛɛ.

³ A naa shong zang shonang ɓiɓɛ ka bii zang ɓɔɔ wu gaarɛ, nɛɛ ri á ta, a ri bɛ̃ɛ anang kati ɓɛɛ.

⁴ “A yɔɔ kpanti ti naa shong zang shonang ɓiɓɛ ɓɔɔgn tɔkn ka bii zang ɓɔɔ wu gaarɛ ɓɛɛ nɛɛ, ‘Nɔɔ dita, nɔɔ daa kɔɔ ri nɛɛ n hangsɛ vuu shaanang palɛnang tɔ. N yele guu napo mɛɛ ɓɔɔ ɔ̃lɔ dɔɔli ɓɛɛ tɔ. N shĩili vuu shaanang tɔ. Nɔɔ a nɔng kn sinyɛ shaanang ta.’

⁵ “A zang ɓɔɔ kpanti gaarɛ kaɓa, ri yee laa ɓarɛ kagn kpang. A ri daarɛ ɓarɛ ri. Zang gbete daa ka jaa ɓiɓɛ, a ɓɔɔ gbete daa ka nɔng vuu ɓiɓɛ malɛnang.

⁶ A zang ɓɔɔ kpanti gaarɛ, ɓɔɔ ri yaa knti, ri yiki zang shonang kpanti, ri dang ri jĩng, a ri nyɔkɔ ri vɔrɔ.

⁷ A gnvɔ shaa kpanti, kpanti shong zang sɔɔja ɓiɓɛ, ri daa nyɔkɔ zang ɓɔɔ ri nyɔkɔ zang shonang ɓiɓɛ, a ri dɔɔ gari ɓarɛ nɛɛ waa kpayi kpayi.

⁸ “A Kpanti naa ɓaa nyaa ka zang shonang ɓiɓɛ ɓɔɔgn, a kɔɔ ri tɔɔ, ‘Zang hangsɛ kn sinyɛ palɛnang tɔ. A zang ɓɔɔ n gaarɛ ri, ri daa naa ɓɔɔ ri shaayi kaa takpang.

⁹ Nɔɔ dita nyaa gbabang, nɔɔ daa gaarɛ zang ɓɔɔ nɔɔ ĩi piti, ri a nɔng kn sinyɛ.’

¹⁰ A zang shonang yɔɔ ri daa ka nyaa gbabang, ri daa kpalɛ zang piti ɓɔɔ ri ĩi ɓɛɛ kati. Zang shi kpang nɛɛ ɓɔɔ tɔ̃ɔ piti. A zang ɓɔɔ zang gaarɛ, ri yi nyaa nɔng kn sinyɛ kati.

¹¹ “A yɔɔ kpanti naa arɛ, nɛɛ wu naa leng jĩng ka zang ɓɔɔ wu gaarɛ ɓɛɛ, a naa zi shɔnzang gbete ɓɔɔgn nɔngkɔ, hãa zɔ̃ng fɔ̃ɔrɔ ɓɔɔ zang kn sinyɛ shaanang, hãlɛ ka bii kpang.

¹² A hɛ̃ɛ wu tɔɔ, ‘Masang, mɔɔ palɛ bɛ̀ɛ́, mɔɔ a ka nihn, fɔ̃ɔrɔ kn sinyɛ shaanang kagn bii kpang viya?’ Yɔɔ shii tɔ wek, vuu ɓɔɔ wu kɔɔ takpang.

¹³ “A yɔɔ kpanti kɔɔ zang shonang ɓiɓɛ tɔɔ, ‘Nɔɔ yi wu ta, nɔ́ɔ ta naa nɛɛ doo. Nɔ́ɔ daa tasɛ ka biling, ka nɔng ɓɔɔ tɔ̀ɔ katɔ kɔngkɔng ɓɛɛ. Nɔng ɓɔɔ zang kaayi, zang shaa nyaa kagn kpaaka kpaaka ɓɛɛ.’ ”

¹⁴ A Yeesɔ naa hangsɛ nyaa kati tɔɔ, “Zang ɓɔɔ zang gaarɛ, ri dɔɔli, a zang ɓɔɔ zang shɛ̃ɛrɛ, ri kaa tɔ̀ɔ́ dɔɔli kpang.”

Ruu saka tipi ɓɔɔ zang shu Kpanti Kayisa ɓɛɛ

¹⁵ A zang Farisi ri daa tɔ̀ng zɔɔ ka naa ɓɔɔ ri yi wu ka yee ɓɔɔ wu rang ɓɛɛ.

¹⁶ A ri shong zang ɓɔɔ ri mantɛ vuu ka bii ɓarɛ nɛɛ zang ɓɔɔ dũng knti Kpanti Hiridu tɔɔ, ri daa kɔɔ Yeesɔ nɛɛ, “Maalang, ruu zi tɔ, mɔɔ suu see ɓáa kpang. Mɔɔ tùsú zang ɓáa vuu ɓɔɔ niizang, ɓɔɔ Laa kasɛ nɛɛ zang wu palɛ ɓɛɛ. Ruu ɓaaɓɛ hãa ɓi kagn nɛɛ vuu ɓɔɔ shɔnzang rɛ̃rɛ ɓɛɛ kpang, ka ruu ɓɔɔ, mɔɔ ti shɛ̃ɛrɛ zang ɓáa kpang ɓɛɛ.

¹⁷ Kɔɔ ruu vuu ɓɔɔ mɔɔ zi ka yeti ɓaaɓɛ, ka yuu ruu keɓe ta. Ruu shu Kpanti Kayisa, Kpanti Rooma saka tipi katɔ ya, kɔ ruu shu kpang?”

¹⁸ Yeesɔ ti zi vuu shi kpang ɓɔɔ ri mang ka yeti ɓarɛ ɓi tɔ, a kɔɔ ri tɔɔ, “Nɔɔ zang ɓɔɔ nwãarɛ zang nɛɛ vuu palɛnang ɓɛɛ, nɔɔ gãsɛ m ka ruu viya?

¹⁹ Nɔɔ tusu m saka ɓɔɔ nɔɔ shu saka tipi nɔng ta.” A ri atɛ wu saka kati.

²⁰ A Yeesɔ hɛ̃ɛ ri tɔɔ, “Wee ɓu waa nyaating, nɛɛ nung wi ka yuu saka keɓe wiya?”

²¹ Ri kasɛ wu nyaa tɔɔ, “Ɓɔɔ Kayisa.” A Yeesɔ kɔɔ ri tɔɔ, “Nɔɔ a Kayisa vuu ɓiɓɛ ta, nɔɔ ti a Kpanti Laa ɓɔɔ ɓiɓɛ.”

²² Ɓɔɔ ri tãa naa weɓe, ri mã naa ka danggn, a ri yaa wu ri daa kati.

Zang Saduki hɛ̃ɛ Yeesɔ ruu ka yuu ruu ɓɔɔ zang wisi zang paa nɛɛ sàa ɓɛɛ

²³ Ka diki kaɓa, zang Saduki ɓɔɔ ri tɔɔ ɓarɛ nɛɛ zang nɛɛ vɔ tɔ, zang seepaa ɓi tɔ̀ɔ́ nɛɛ saa kpang, ri a ka bii ɓiɓɛ. A ri hɛ̃ɛ wu tɔɔ,

²⁴ “Maalang, Musa kɔɔ rùu tɔɔ, zang ɓɔɔ nɛɛ yi jaa kagn nɛɛ soro ɓiɓɛ kpang, nɛɛ vɔ tɔ, ɓeezung wu sɔɔrɔ soro ɓiɓɛ, tɔ̀ɔ, wu yi wu jaa kati.

²⁵ Zang varɛ ɓɔɔ kagn ka teteng ɓuru, nàá ɓarɛ yi ri manziti. Jamari ɓarɛ ɓɔɔ tĩng shɔɔnang shing soro, yi jaa nɛɛ wu kpang, a vɔrɛ yàa ɓeezung ɓɔɔ pãng ka dakn ɓiɓɛ soro ɓiɓɛ.

²⁶ A ɓeezung naa sɔɔrɔ wu, a ti yi jaa nɛɛ wu kpang, ti vɔrɛ yaa soro kaɓa. Ɓeezung knti ɓɔɔgn ti naa sɔɔrɔ soro kaɓa tɔkn, a ti yi jaa nɛɛ wu kpang, ti vɔrɛ yaa wu. Dɔ̃lɔ nɔngkɔ, daa nɔng ka yuu ɓarɛ manziti nandon.

²⁷ A jaa soro kaɓa naa vɔ kaa nɛɛ knti.

²⁸ Ka diki ɓɔɔ zang naa wisi zang paa nɛɛ sàa, jaa soro kaɓa naa nwang ɓu kaa soro wi gbete ka teteng zang manziti kɔ ri shĩili wu ɓáa wiya? Ka ruu ɓɔɔ, ri shĩili wu katɔ kɔ nandon ɓɛɛ.”

²⁹ A Yeesɔ kasɛ ri nyaa tɔɔ, “Nɔɔ ning katɔ, ka ruu ɓɔɔ nɔɔ zi labeenang Kpanti Laa, nɛɛ náa vuu palɛnang ɓiɓɛ kpang ɓɛɛ.

³⁰ Zang nɛɛ naa wisi zang paa tɔ nɛɛ sàa, zang shing soro ɓi takpang, zang ti naa a zang wujɛ soro ɓi takpang nɛɛ zang gee ri kpang. Zang naa nwalɛ ɓi kaa naa zang nyaa shonang Kpanti Laa ɓɔɔ ri ka lapa ɓɛɛ.

³¹ Ka yuu ruu ɓɔɔ zang naa wisi zang paa nɛɛ saa ɓɛɛ, nɔɔ gã vuu ɓɔɔ Kpanti Laa kɔɔ nɔɔ ka yuu ɓiɓɛ, gngn kpang ya?

³² Kpanti Laa tɔɔ, ‘Nkɔ Laa Ibirayi, nɛɛ ɓɔɔ Ishaaku, nɛɛ ɓɔɔ Yakubu.’ Zang keɓe ri vɔlɔ tɔ doo tɛ̃ɛ tɛ̃ɛ. Wee Laa ɓaa yuu ɓiɓɛ nɛɛ wu Laa ɓarɛ ɓɛɛ, ruu zi ka wukɔ nɛɛ zang wisi ri paa tɔ nɛɛ sàa. Ka ruu ɓɔɔ, Laa ɓi Làá zang ɓɔɔ vɔ katɔ kpang, ɓi Laa zang ɓɔɔ ningkãari ɓɛɛ.”

³³ Zang ɓɔɔ ri kpalɛ zɔɔ tãa tɔ naa weɓe, ri mã naa ka danggn, ka ruu vuu ɓɔɔ wu tusu ɓɛɛ.

Nyaa dannang bang ɓɔɔ Laa dang ɓɛɛ

³⁴ Ɓu doo ɓɔɔ zang Farisi ri tãayi nɛɛ Yeesɔ yée zang Saduki yuu tɔ nɛɛ yee ɓɔɔ wu rang ɓɛɛ, a ri kpalɛ zɔɔ ka nɔng gbete.

³⁵ A zang gbete ɓɔɔ zi labeenang Laa dɔɔli ka teteng ɓarɛ, gãsɛ Yeesɔ, hɛ̃ɛ wu tɔɔ,

³⁶ “Maalang, ka yeti nyaa ɓɔɔ Kpanti Laa dangnɛ, ɓu wi bang wiya?”

³⁷ A Yeesɔ kasɛ wu nyaa tɔɔ, “Mɔ́ɔ kasɛ ruu Kpanti Laa ɓaaɓɛ nɛɛ yeti ɓaaɓɛ piti, nɛɛ suru bii ɓaaɓɛ piti, nɛɛ rɛ̃rɛnang ɓaaɓɛ piti.

³⁸ Wee nyaa bang ɓɔɔ Laa dang kɔ. Wukɔ ka tĩng.

³⁹ Ɓɔɔ ɓàng doo ɓiɓɛ, ɓi weɓe. ‘Kàsɛ̀ zang ɓɔɔ mɔɔ nwalɛ nɛɛ ri doo naa ɓɔɔ mɔɔ kasɛ bii ɓaaɓɛ kɔ.’

⁴⁰ Labeenang Kpanti Laa ɓɔɔ Musa beeyi, nɛɛ yee ɓɔɔ rɛɛ zang nyaa shonang Kpanti Laa ri kɔɔrɔ piti, di yuu ɓi ka nyaa kɔ Kpanti Laa dang ziti ɓee kɔ.”

Kirisi ɓu Jaa zɔ̃ng wiya?

⁴¹ Zang Farisi ri kpalɛ zɔɔ tɔ ka nɔng gbete, a Yeesɔ hɛ̃ɛ ri tɔɔ,

⁴² “Nɔɔ kɔɔ ɓu nɛɛ Kirisi, zang ɓɔɔ naa a ɓɛɛ ɓu wiya? Ɓu jaa zɔ̃ng wiya?” A ri kasɛ wu nyaa tɔɔ, “Jaa zɔ̃ng Dawuda.”

⁴³ Yeesɔ hɛ̃ɛ ri tɔɔ, “A ka ruu vi, Suru Laa tusu Dawuda gbalang, a zirɛ, a ɓaa Kirisi nɛɛ, ‘Kpanti’ viya? Ka ruu ɓɔɔ, Dawuda kɔɔyi tɔɔ,

⁴⁴ “ ‘Kpanti Laa kɔɔ Kpanti mɛɛ tɔɔ, “Nwang ta naa nakn mɛɛ, n shing zang ɓɔɔ ri shing jĩng nɛɛ mɔɔ kpang ditɔ, mɔɔ naa ri nɛɛ doo ɓaaɓɛ.” ’

⁴⁵ Dawuda nɛɛ ɓàa wu nɛɛ, ‘Kpanti,’ ɓu wi bang ka teteng ɓarɛ wiya?”

⁴⁶ Zang gbete ɓɔɔ zi naa ɓɔɔ wu kasɛ Yeesɔ nyaa takpang. Vuu ɓɔɔ gaayu ka diki kaɓa, zang gbete ɓɔɔ paasɛ wu ruu hɛ̃ɛnang ɓɔɔgn kpang.