Maraku 5 - Nyaa Shɔɔ Ɓɔɔ Laa a Ɓɛɛ

Zang ɓɔɔ suru shi kpang ka bii ɓiɓɛ dɔɔli ɓɔɔ Yeesɔ masɛ ɓɛɛ

¹ Yeesɔ nɛɛ zang ɓɔɔ ri mantɛ vuu ka bii ɓiɓɛ, ri ta mii waapo tɔ ka dang ɓɔɔ ka tipi zang Ganasara ɓɛɛ.

² Ɓɔɔ Yeesɔ nwangnɛ yeti tonsi hn, yɔɔ ɓɔɔ suru shi kpang ka bii ɓiɓɛ, a kaa nɛɛ nɔng yuu saa ka bii Yeesɔ.

³ Yɔɔ kaɓa nwalɛ ɓi ka nɔng yuu saa. Zang ɓɔɔ zunung wu mãanang nɛɛ saka kagn gbete tɔkn kpang.

⁴ Lɔɔrɔ koo vuu ɓɔɔ zang zaayi, zang mã wu nɛɛ mani. Wu ti kakɛ saka ɓɔɔ zang ta naa nɛɛ doo ɓiɓɛ nɛɛ mani ɓɛɛ, diki, diki. Zang ɓɔɔ zunung wu yitinang kagn gbete kpang.

⁵ Rakɛ ka nɔng yuu saa, ti vang ɓɔɔ kɔpɔ nɛɛ zĩi ɓɔɔ nɛɛ laagɛ̃. Diki, diki kaarɛ nyaa, wu ti gbãnkɛ bii nɛɛ tari.

⁶ Ɓɔɔ zi Yeesɔ nɛɛ nɔng beebang, yurɛ naa tang nɛɛ gutu ka tĩng ɓiɓɛ.

⁷ A mɛɛ nyaa ka lapa tɔɔ, “Mɔɔ kãa vi ka bii mɛɛ viya? Yeesɔ Jaa Kpanti Laa? N zɔɔrɔ mɔɔ katɔ nɛɛ nung Laa, mɔɔ dang m jĩng kpang.”

⁸ Kɔɔ nɔngkɔ, ka ruu ɓɔɔ, Yeesɔ kɔɔ nɛɛ, “Suru shi kpang, nwang ta mɔɔ yaa wu bii ɓɛɛ.”

⁹ A Yeesɔ hɛ̃ɛ wu tɔɔ, “Zang ɓaa nung ɓaaɓɛ nɛɛ viya?” Kasɛ Yeesɔ nyaa tɔɔ, “Zang ɓaa nung mɛɛ nɛɛ Dɔɔli, ka ruu ɓɔɔ ruu dɔɔli ɓɛɛ.”

¹⁰ A gaa Yeesɔ sasak, nɛɛ wu hing ri nɛɛ tipi kaɓa kpang.

¹¹ Ka diki kaɓa bɛ̀ɛ́ gãnya ɓɔɔ ri shaa kagn ka doo kɔpɔ naabm gaagaa.

¹² A suru shi kpang ri gaa Yeesɔ nɛɛ, “Yaa ruu ta, ruu daa hãlɛ nyaa ka bii gãnya kaɓa.”

¹³ A yàa suru shi kpang gbalang, a ri nwangnɛ, ri daa hãlɛ nyaa ka bii gãnya. Gãnya kɔ gaagaa nung labang ziti ɓa, ri yuku, ri naa soo nyaa rang ɓɔɔ hɛ̃ɛrɛ, ri daa ɔ̃ɔrɔ ka yeti mii nandon.

¹⁴ Zang ɓɔɔ ri shaa gãnya, ri yuku, ri daa kɔɔ zang gari bang nɛɛ zang ɓɔɔ ri roo gãa ka gari tɔkɔlɔng vuu ɓɔɔ Yeesɔ palɛ ɓɛɛ. A zang nwangkɛ nɛɛ ri naa zi vuu ɓɔɔ palɛ ɓɛɛ.

¹⁵ Ɓɔɔ ri a tɔ ka bii Yeesɔ, ri naa zi zang ɓɔɔ bɛ̀ɛ́ suru shi kpang ka bii ɓiɓɛ, nwang tɔ ka nɔngkɔ, hãa vuu tɔ ka bii, raa shɔnzang tɔ̃ɔ tɔ tɔkn. A ri kaa vɔrɔ.

¹⁶ Zang ɓɔɔ ri zi vuu ɓɔɔ Yeesɔ pàlɛ̀ zang ɓɔɔ bɛ̀ɛ́ suru shi kpang ka bii ɓiɓɛ nɛɛ gãnya, ri kɔɔrɔ zang kati.

¹⁷ A zang kaɓa, ri gaa tɔɔsung Yeesɔ gaanang kati, nɛɛ wu dita, wu yaa ri tipi ɓarɛ.

¹⁸ Yeesɔ váng tonsi kana, a zang ɓɔɔ suru shi kpang nwangkɛ nɛɛ bii ɓiɓɛ, gaa wu nɛɛ wu daa nɛɛ wu ning.

¹⁹ A Yeesɔ kasɛ kpang. Yeesɔ kɔɔ wu tɔɔ, “Dita gãa, mɔɔ daa kɔɔ rɛɛ ɓaazung vuu ɓɔɔ Laa pàlɛ̀ mɔɔ ɓɛɛ. Nɛɛ naa ɓɔɔ gn ɓaaɓɛ kɔng Laa ɓɛɛ.”

²⁰ A daayi, daa ka yeti Dekapoli rɛɛ gari kopi, a gaa tɔɔsung ɓɔɔ wu kɔɔrɔ zang vuu ɓɔɔ Yeesɔ pàlɛ̀ wu ɓɛɛ kati. Zang piti ɓɔɔ ri tãa vuu ɓɔɔ wu kɔɔyi, ri mã naa ka danggn.

Jaa Yayiru ɓɔɔ Yeesɔ wisi paa nɛɛ vɔrɔ nɛɛ Jaa soro ɓɔɔ lee naa ka nyaa fɔ̃ɔrɔ Yeesɔ ɓɛɛ

²¹ Yeesɔ naa ta waapo tɔ ka dang tɔkn nɛɛ tonsi. Ɓɔɔ doo ka nyaa waapo, zang ri kpalɛ zɔɔ ka bii ɓiɓɛ gaagaa, ri kiiri wu nyaa ka teteng.

²² A zang bang gãa zɔɔ kpalɛnang zang Yahudi ɓɔɔ gbete, ɓɔɔ zang ɓaa nɛɛ Yayiru, arɛ naa tang nɛɛ gutu ka tĩng Yeesɔ,

²³ a gaa wu tɔɔ, “Jaa mɛɛ zang soro ɓɔɔ tɔkɔlɔng, vuu palɛ katɔ nung vɔrɔ gbete. Arɛ mɔɔ daa ĩi wu naa ɓaaɓɛ jong ka bii, tɔ̀ɔ, bii wu yaa wu nɔng.”

²⁴ A Yeesɔ daa ka nɛɛ wu ning. Zang dɔɔli ri dũuru wu kati. Ri ti kpalɛ wu bii kana.

²⁵ A jaa soro ɓɔɔ kagn, zĩi kpaa wu daa saa kopi tu ziti.

²⁶ Jaa soro kaɓa, dang jĩng tɔ ka naa zang ɓɔɔ ri palɛ zang bii dɔɔli, wɔsɔ vuu ɓiɓɛ tɔ nandon, kɔnang ɓiɓɛ daa nɛɛ tĩng kɔ jong.

²⁷ Ɓɔɔ wu tãa nyaa Yeesɔ tɔ, ka ruu nɔngkɔ, seepaa, a ka knti Yeesɔ ka teteng zang, a lee naa ka nyaa fɔ̃ɔrɔ ɓiɓɛ.

²⁸ Kɔɔ ka yeti ɓiɓɛ tɔɔ, “Naa n lee naa ka fɔ̃ɔrɔ ɓiɓɛ kɔ shɛ̃ɛning, kɔnang mɛɛ waa nyaa katɔ.”

²⁹ A zĩi ɓɔɔ kpaa wu tantɛ kaa dɔnnang. A tãa ka bii ɓiɓɛ nɛɛ kɔnang ɓiɓɛ waa nyaa tɔ.

³⁰ Yeesɔ tantɛ zinang nɛɛ, naa zang masɛnang ɓɔɔ Laa a wu, masɛ zang ɓɔɔ tɔ. A raa jĩng hɛ̃ɛ zang ɓɔɔ ri dũng wu ɓɛɛ tɔɔ, “Ɓu wi, lee naa ka fɔ̃ɔrɔ mɛɛ wiya?”

³¹ A zang ɓɔɔ ri mantɛ vuu ka bii ɓiɓɛ hɛ̃ɛ wu tɔɔ, “Mɔɔ zi tɔ nɛɛ zang dɔɔli ri kpalɛ mɔɔ bii, a mɔɔ ti hɛ̃ɛ doo nɛɛ mani Ɓu wi lee m naa ka bii wiya?”

³² Yeesɔ dũng jĩng nɛɛ wu zi kaa zang ɓɔɔ lee wu naa ka bii ɓɛɛ.

³³ A jaa soro ɓɔɔ lee naa ka fɔ̃ɔrɔ Yeesɔ zi tantɛnang nɛɛ Yeesɔ kãa wukɔ, ka ruu nɔngkɔ, a nɛɛ vɔrɔ kaanang, bii zaa wu kana, tang ka tĩng ɓiɓɛ, a kɔɔ wu ruu vuu ɓɔɔ palɛ wu ɓɛɛ kaa nandon.

³⁴ A Yeesɔ kɔɔ wu tɔɔ, “Man jaa, danggn ɓɔɔ mɔɔ shing ka bii mɛɛ masɛ mɔɔ tɔ. Daa waasɛ̃, kɔnang ɓaaɓɛ wu waa nyaa ta.”

³⁵ Ɓɔɔ Yeesɔ rang yee doo naa nyaa, zang shonang ri a nɛɛ gãa Yayiru, ri naa kɔɔ wu tɔɔ, “Jaa ɓaaɓɛ vɔ tɔ. Mɔɔ kpãa maalang tɔ̀ɔ́ dalɛ waati kpang.”

³⁶ Yeesɔ yée laa ɓi ka ruu ɓɔɔ ri kɔɔ ɓɛɛ kpang. Kɔɔ Yayiru tɔɔ, “Mɔɔ kaa vɔrɔ kpang. Shing danggn ka bii mɛɛ.”

³⁷ Yeesɔ kɔɔ zang dɔɔli ɓɔɔ ri dũng wu nɛɛ ri shii ka nɔngkɔ. A ɓaa nyaa ka rɛɛ Bituru, nɛɛ Yakubu nɛɛ Yɔhana jaa naa Yakub kɔ shɛ̃ɛning daa nɛɛ ri.

³⁸ Ɓɔɔ ri a tɔ ka gãa Yayiru, a Yeesɔ zirɛ, zang zi zɔɔ ɓi takpang. Zang kaa kana, zang ti ɓaarɛ nyaavaa kana lapa.

³⁹ Yeesɔ daa ka yeti gãa a hɛ̃ɛ ri tɔɔ, “Nɔɔ kaarɛ ka ruu viya? Jaa vɔ ɓi ka takpang, roo ɓi katɔ waati.”

⁴⁰ A ri laarɛ wu. Yeesɔ ãatɛ zang ka biling nandon, a ɓaa nyaa ka daa jaa, nɛɛ naa jaa, nɛɛ zang ɓɔɔ ri mantɛ vuu ka bii ɓiɓɛ ɓɔɔ ri a nɛɛ wu, a daa nɛɛ ri ka nɔng ɓɔɔ jaa kagn ɓɛɛ.

⁴¹ A yi naa jaa, kɔɔ wu tɔɔ, “Talita kumi,” (Dĩiri yee keɓe ɓi, “Jaa, n kɔɔ mɔɔ, seepaa ta.”)

⁴² A jaa seepaa tantɛnang, gaa tɔɔsung rakɛnang kati. Sáa jaa kaɓa kopi tu ziti. Ɓɔɔ ri zi naa weɓe, ri mã naa ka danggn.

⁴³ A Yeesɔ shàarɛ̀ ri nyaa tɔɔ, zang ɓɔɔ wu kɔɔ zang vuu keɓe kpang. A ti kɔɔ ri tɔkn nɛɛ, ri a jaa vuu ɓɔɔ jaa shaa ɓɛɛ ta.