Maraku 11 - Nyaa Shɔɔ Ɓɔɔ Laa a Ɓɛɛ

Naa ɓɔɔ Yeesɔ daa ka Urushalima ɓɛɛ

¹ Ri a tɔ ka Urushalima naabm, ri ka gari Bɛtafaji nɛɛ Bɛtani ɓɔɔ ri ka doo Kɔpɔ Zeetung ɓɛɛ. A Yeesɔ shong zang ɓɔɔ ri mantɛ vuu ka bii ɓiɓɛ ziti.

² Kɔɔ ri tɔɔ, “Nɔɔ dita gari tɔkɔlɔng kɔ ka tĩng manɛ ɓa. Ɓɔɔ nɔɔ daa ka yeti gari hn, nɔɔ daa ĩi jaa seesaa zang mã ka laa, ɓɔɔ zang vang gngn kpang ɓɛɛ ditɔ. Nɔɔ kã̀lɛ́ nɔɔ a nɛɛ mani.

³ Shɔnzang ɓɔɔ nɛɛ hɛ̃ɛ nɔɔ nɛɛ, ‘Nɔɔ palɛ veɓe ka ruu viya?’ Nɔɔ kɔɔ wu nɛɛ, ‘Kpanti Yeesɔ kasɛ katɔ. Sɔ̀ɔrɔ́ nɔɔ ditɔ tantɛnang.’ ”

⁴ A ri daayi, ri daa ĩi jaa seesaa shii tɔ ka nyaa gbalang, zang mã ka nyaa gãa. A ri kãlɛ kati.

⁵ A zang ɓɔɔ ri shiiri ka nɔngkɔ, ri hɛ̃ɛ zang ɓɔɔ ri mantɛ vuu ka bii Yeesɔ tɔɔ, “Nɔɔ kã̀lɛ́ jaa seesaa kiɓi ka ruu viya?”

⁶ A zang ɓɔɔ ri mantɛ vuu ka bii Yeesɔ kɔɔ ri vuu ɓɔɔ Yeesɔ kɔɔ ri kati. Ri yaa ri, ri kãlɛ jaa seesaa, ri daa kaa nɛɛ mani.

⁷ Ri atɛ Yeesɔ jaa seesaa kati. Ri wɔɔrɔ fɔ̃ɔrɔ ɓarɛ ka dakn ɓiɓɛ, a Yeesɔ vangnɛ, nwang kagn.

⁸ Zang dɔɔli ri wɔɔrɔ fɔ̃ɔrɔ ɓarɛ ka gbalang, zang ɓɔɔ ri ti wɔɔrɔ ɓarɛ nasãng laa ɓɔɔ gɔpɔ kagn gaagaa ɓɔɔ ri kakɛ nɛɛ nyaa jaa ɓɛɛ.

⁹ Zang dɔɔli ɓɔɔ ri ka tĩng Yeesɔ, nɛɛ zang ɓɔɔ ri ti dũng wu ka knti, ri mɛɛrɛ nyaa kana lapa nɛɛ, “Zang wu dɔɔ Kpanti Laa ta. Laa a zang ɓɔɔ a ka nung ɓiɓɛ tĩnnang tãanang tɔ.

¹⁰ Kpanti ɓɔɔ zɔ̃ng daa ɓuru Dawuda naa rooyi, Laa wu shingnɛ wu nwang tɔ̃ɔ tɔ̃ɔ. Zang wu ti dɔɔ Kpanti Laa ta.”

¹¹ Yeesɔ naa shɛ̃ɛ Urushalima tɔ, a daa ka yeti Gãa Laa. A pɛ̃ɛrɛ vuu tɔ nandon, a naa nwangnɛ daa ka gari Bɛtani nɛɛ zang ɓɔɔ ri mantɛ vuu ka bii ɓiɓɛ kopi tu ziti, ka ruu ɓɔɔ, laa hãa nyaa kana ɓɛɛ.

Laa sĩiri ɓɔɔ ra jaa kpang ɓɛɛ

¹² Nɔng naa gãntɛ tɔ, ri a kana nɛɛ Bɛtani, a nyɔkɔ nyɔ Yeesɔ kati.

¹³ Zi laa sĩiri ɓɔɔ tu gɔpɔ gaagaa nɛɛ nɔng beebang, a daayi nɛɛ wu daa hã jaa ɓiɓɛ. Ɓɔɔ naa a tɔ doo ɓiɓɛ, a ĩi jaa sĩiri ka laa kpang, gɔpɔ ɓiɓɛ kɔ shɛ̃ɛning, ka ruu ɓɔɔ, wu diki ɓɔɔ laa sĩiri ra jaa kagn kpang ɓɛɛ.

¹⁴ A ku laa sĩiri nyaa ka bii tɔɔ, “Zang wu naa walɛ jĩng laa ka bii ɓaaɓɛ tɔkn kpang.” A zang ɓɔɔ ri mantɛ vuu ka bii ɓiɓɛ ri tãa vuu ɓɔɔ wu kɔɔ kati.

Yeesɔ daa ka Gãa Laa

¹⁵ Ri naa a tɔ ka Urushalima, a Yeesɔ naa tu ka yeti Gãa Laa. A gaa tɔɔsung hingkinang zang ɓɔɔ ri mãlɛ́ vuu nɛɛ zang ɓɔɔ ri hooro vuu ka yeti Gãa Laa kati. A ti zĩili teeburu zang ɓɔɔ ri kɔ̃sɔ saka nɛɛ nɔng nwannang zang ɓɔɔ ri mãlɛ́ ning koro ɓɛɛ.

¹⁶ Kasɛ nɛɛ zang ɓɔɔ wu tuu vuu wu sɔɔ yeti Gãa Laa nɛɛ mani kpang.

¹⁷ A tusu zang vuu, kɔɔ ri tɔɔ, “Labeenang Kpanti Laa kɔɔ kpang nɛɛ ‘Gãa mɛɛ zang naa ɓaa ɓi nɛɛ, Gãa Laa gaanang zang koolaa piti kpang ya?’ Nɔɔ raayi nwang kaa nɔng ɓɔɔ shɔngɓɔ ri kpalɛ zɔɔ kagn ɓɛɛ ka ruu viya?”

¹⁸ A zang bang bang zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, ri tãayi, a ri gaa tɔɔsung gbalang ɓɔɔ ri naa nyɔ wu vɔrɔ ɓɛɛ kãanang kati. Ri kaa vɔrɔ Yeesɔ ka ruu ɓɔɔ, zang ɓɔɔ ri kpalɛ zɔɔ piti, ri mã naa ka danggn, ka ruu vuu ɓɔɔ wu tusu ɓɛɛ.

¹⁹ Laa naa hãa nyaa tɔ, Yeesɔ nɛɛ zang ɓɔɔ ri mantɛ vuu ka bii ɓiɓɛ, ri nwangkɛ ka nɛɛ yeti gari.

Ruu laa sĩiri ɓɔɔ ra jaa kpang ɓɛɛ

²⁰ Nɔng naa gãntɛ tɔ, ri gbãayu kana, a ri zi laa sĩiri ɓɔɔ Yeesɔ ku wu nyaa ka bii, vɔ tɔ nɛɛ yuu paa daa ka dĩiri ɓiɓɛ nandon.

²¹ A Bituru naa kpaa danggn, a kɔɔyi tɔɔ, “Kpanti, zirɛ, laa sĩiri ɓɔɔ mɔɔ nɛɛ ku wu nyaa ka bii vɔ tɔ!”

²² A Yeesɔ kasɛ ri nyaa tɔɔ, “Nɔɔ shing danggn ka bii Kpanti Laa ning.

²³ N kɔɔ nɔɔ ruu ɓɔɔ niizang kɔ nwani, zang ɓɔɔ shing danggn ka bii Laa, yaa danggn naa kpang, shing danggn nɛɛ vuu ɓɔɔ wu kɔɔyi naa nwang ditɔ nɔngkɔ. Naa zang kaɓa kɔɔ kɔpɔ keɓe nɛɛ, ‘Ruu ta nɛɛ bii ɓaaɓɛ, mɔɔ daa watɛ ka mii waapo, Laa naa pàlɛ́ wu katɔ.’

²⁴ Ka ruu nɔngkɔ, n kɔɔ nɔɔ vuu piti ɓɔɔ nɔɔ gaayi, nɔɔ shing danggn nɛɛ nɔɔ wàlɛ̀ tɔ, Laa a nɔɔ katɔ.

²⁵ Nɔɔ nɛɛ seepaa tɔ nɛɛ nɔɔ gaa Laa, nɔɔ yàá zang ɓɔɔ palɛ nɔɔ vuu shi kpang gbalang katɔ. Tɔ̀ɔ, Daa manɛ Kpanti Laa ɓɔɔ ka lapa, wu yàa nɔɔ gbalang vuu shi kpang manɛ kaa jong.” [

²⁶ Naa nɔɔ yàa zang gbalang vuu shi kpang ɓarɛ kpang, Daa manɛ ɓɔɔ ka lapa naa yàa nɔɔ ɓɔɔ manɛ doo kpang kɔ.]

Zang hɛ̃ɛ Yeesɔ ka ruu naa vuu palɛnang ɓiɓɛ

²⁷ A ri naa a kaa tɔkn ka Urushalima. Yeesɔ ra kana yeti Gãa Laa, a zang bang bang zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, nɛɛ zang bang bang zang Yahudi, ri a ka bii ɓiɓɛ.

²⁸ A ri hɛ̃ɛ wu tɔɔ, “Mɔɔ palɛ vuu keɓe nandon nɛɛ naa kiya? Ɓu wi a mɔɔ naa vuu keɓe palɛnang wiya?”

²⁹ Yeesɔ kasɛ ri nyaa tɔɔ, “N kaaɓi, n hɛ̃ɛ nɔɔ ruu jong gbete, nɔɔ nɛɛ kɔɔ m tɔ, n ti kɔɔ nɔɔ naa ɓɔɔ n palɛ vuu keɓe nɛɛ mani ɓɛɛ.

³⁰ A hɛ̃ɛ ri tɔɔ, ɓu wi a Yɔhana naa batizima ɓɔɔ wu pàlɛ́ zang wiya? Laa a wu yaa, kɔ shɔnzang a wu? Nɔɔ kɔɔ m ta.”

³¹ A ri gaa tɔɔsung nyaa laanang ka naa ɓarɛ, ri tɔɔ, “Naa ruu kɔɔ wu nɛɛ Laa a wu, naa hɛ̃ɛ ruu nɛɛ, ‘A ka ruu vi, nɔɔ shing danggn ka yuu Yɔhana kpang viya?

³² Rúu ti kɔɔ wu kpang nɛɛ, shɔnzang a wu kpang.’ ” (Ri kɔɔ nɔngkɔ, ka ruu ɓɔɔ, ri kaa vɔrɔ zang ɓɛɛ. Zang piti ri shing danggn tɔ nɛɛ Yɔhana ɓi zang nyaa shonang Laa).

³³ A ri kasɛ Yeesɔ nyaa tɔɔ, “Ruu zi kpang.” A Yeesɔ ti kɔɔ ri tɔɔ, “N ti kɔɔ nɔɔ naa ɓɔɔ n palɛ vuu keɓe nɛɛ mani doo kpang kɔ.”