Luka 4 - Nyaa Shɔɔ Ɓɔɔ Laa a Ɓɛɛ

Sheetang gãsɛ Yeesɔ

¹ Ɓɔɔ Yeesɔ gbãayu kana nɛɛ Rang Urudung, nɛɛ Suru Laa ka bii ɓiɓɛ, a Suru Laa dɔ̃ wu ka waala.

² Sheetang gãsɛ wu ka waala kaɓa sasak diki laa ziti, nɛɛ wu palɛ vuu shi kpang. Ka diki kaɓa, shaa vuu ɓɔɔ ka nyaa kpang. A nyɔkɔ naa nyɔ wu kati.

³ A Sheetang kɔɔ wu tɔɔ, “Mɔkɔ nɛɛ Jaa Laa, kɔɔ tari keɓe ta, wu ri borodi.”

⁴ A Yeesɔ kasɛ wu nyaa tɔɔ, “Ruu Kpanti Laa kɔɔyi tɔɔ, ‘Wu vuu shaanang kɔ shing shɔnzang nwáng ningkãari kpang.’ ”

⁵ A Sheetang tuu wu, vang nɛɛ wu ka nɔng ɓɔɔ bee ka lapa ɓɛɛ, a tusu wu koolaa ɓɔɔ ka bm bm ɓɛɛ shàlok nandon.

⁶ A kɔɔ wu tɔɔ, “N a mɔɔ naa ka yuu koolaa keɓe nɛɛ vuu ɓɔɔ ka yeti ɓarɛ nandon, ka ruu ɓɔɔ, zang a m tɔ ɓɛɛ. N ti a zang piti ɓɔɔ yeti mɛɛ kasɛ ɓɛɛ katɔ.

⁷ Ka ruu nɔngkɔ, naa mɔɔ tang nɛɛ gutu, mɔɔ dɔɔ m, vuu keɓe piti naa nwang kaa ɓɔɔ ɓaaɓɛ.”

⁸ A Yeesɔ kasɛ wu nyaa tɔɔ, “Ruu Kpanti Laa kɔɔyi tɔɔ, ‘Shɔnzang wu dɔɔ Kpanti Laa ɓiɓɛ kɔ shɛ̃ɛning, nɛɛ wu ti bang wukɔ gbete.’ ”

⁹ A Sheetang tuu Yeesɔ daa nɛɛ wu ka Urushalima, a daa shing wu ka sɔ̃ngsɔ̃ng yuu Gãa Laa, a kɔɔ wu tɔɔ, “Mɔkɔ nɛɛ Jaa Laa, shɛ̃ɛ ta tipi nɛɛ nɔng kiɓi,

¹⁰ ka ruu ɓɔɔ, ruu Kpanti Laa kɔɔyi tɔɔ, ‘Laa kɔ̀ɔ́ zang nyaa shonang ɓiɓɛ ɓɔɔ ka lapa ruu ditɔ ka yuu ɓaaɓɛ, ri naa ta mɔɔ ka naa ɓarɛ, ka gbalang.’

¹¹ ‘Mɔɔ nɛ̀ɛ́ nyɔ doo ɓaaɓɛ ka tari ɓɛɛ.’ ”

¹² A Yeesɔ kasɛ wu nyaa tɔɔ, “Kpanti Laa ti kɔɔyi tɔɔ, ‘Zang ɓɔɔ wu gãsɛ Laa ɓɔɔ wukɔ Kpanti zang ɓɛɛ kpang.’ ”

¹³ Sheetang hangsɛ nyaa vuu ɓɔɔ wu kasɛ nɛɛ wu gãsɛ Yeesɔ nɛɛ mani tɔ nandon, a seepaa daayi, yaa Yeesɔ kaa gbongkarɛ.

Yeesɔ gaayu shonang ɓiɓɛ ka Galili

¹⁴ Yeesɔ gbãayu ka Galili, naa vuu palɛnang Suru Laa nɛɛ wu ning. Nyaa ɓiɓɛ sãlɛ nɔng ka tipi kaɓa nandon.

¹⁵ Yeesɔ tusu zang vuu ka gãa zɔɔ kpalɛnang ɓarɛ, a zang ri dɔ̀ɔ́ wu dɔɔli.

Zang bɛ̃ɛ Yeesɔ ka Nazara

¹⁶ A Yeesɔ naa a ka gari Nazara, nɔng ɓɔɔ wu bang kagn ɓɛɛ. Daa kaa naa ɓasidi ka gãa zɔɔ kpalɛnang zang Yahudi, ka Diki Ɔ̃sɔnang ɓarɛ. A seepaa kati nɛɛ wu gã Ruu Laa.

¹⁷ A zang a wu labeenang Laa ɓɔɔ Ishaya zang nyaa shonang Laa bee ɓɛɛ, a kãlɛ, puuyi, a ka nɔng ɓɔɔ zang beeyi nɛɛ,

¹⁸ “Suru Kpanti Laa kagn bii mɛɛ, Laa zɔ̃̀ng m nɛɛ n rang zang ɓɔɔ vuu ka naa kpang yee tɔ̃ɔ ɓiɓɛ. Shong m nɛɛ n kɔɔ zang ɓɔɔ zang mã ri ka sãa, nɛɛ zang yaa ri naa tɔ. Nɛɛ n ti kɔɔ zang jĩng ringtang nɛɛ ri zi nɔng ta. Nɛɛ n ti yaa zang ɓɔɔ zang dang ri jĩng ɓɛɛ, naa.

¹⁹ Nɛɛ n ti kɔɔ zang nɛɛ diki ɓɔɔ Laa ta yuu zang ɓiɓɛ kagn a tɔ.”

²⁰ A leng labeenang bìí kati a sɔ̀ɔrɔ̀ zang ɓɔɔ palɛ shonang ka gãa kaɓa, a raa tɔɔsung nwang ka tipi. Zang ɓɔɔ ri kpalɛ zɔɔ ka gãa zɔɔ kpalɛnang kaɓa, ri tɛ̃ɛ wu jĩng ka bii nandon.

²¹ A kɔɔ ri kati tɔɔ, “Ruu Laa kɔ nɔɔ tãayi, n gã lɛɛkɔ ɓee, nwáng tɔ niizang.”

²² Zang piti rang vuu tɔ̃ɔ ka yuu ɓiɓɛ. A ri mã naa ka danggn ka ruu yee tɔ̃ɔ ɓɔɔ nwangnɛ nyaa ɓiɓɛ ɓɛɛ. A ri hɛ̃ɛyi tɔɔ, “Wee ɓu bɛɛ jaa Yusufu kpang ya?”

²³ A kɔɔ ri tɔɔ, “N zi tɔ, nɔɔ naa kɔɔ m nyaa vuu jeenang keɓe ditɔ nɛɛ, ‘Zang bii masɛnang, wu masɛ bii ɓiɓɛ ta.’ Nɔɔ ti naa kɔɔ m ɓɔɔ ditɔ nɛɛ vuu ɓɔɔ mɔɔ palɛ ka Kafanahu ɓɔɔ ruu tãayi, palɛ ta ka gari kɔ zang yi mɔɔ kagn ɓee.

²⁴ A kɔɔyi tɔɔ, ‘N kɔɔ nɔɔ ruu ɓɔɔ niizang kɔ nwani, zang kasɛ zang nyaa shonang Laa ɓi jong ka gari ɓiɓɛ kpang.’

²⁵ “Nɔɔ ɓaa shoo ta nɔɔ tãayi. Ka diki Iliya zang nyaa shonang Laa, Laa ku lapa, á zang mii lapa kpang, saa taati nɛɛ shala mangbete, ka ruu nɔngkɔ, nyɔkɔ bang naa nwang ka tipi kaɓa nandon. Suvɔ kagn Isirela dɔɔli,

²⁶ a Laa shong Iliya ka bii suvɔ ɓɔɔ ka gari Zarafa ɓɔɔ ka tipi Sidong ɓɛɛ.

²⁷ Ka diki Ilisha zang nyaa shonang Laa, zang vuu bii kagn tipi Isirela dɔɔli, a Laa masɛ zang gbete kagn teteng ɓarɛ kpang. Laa masɛ Naama yɔɔ Siriya kɔ gbete.”

²⁸ Ɓɔɔ zang piti ɓɔɔ ri ka yeti gãa zɔɔ kpalɛnang zang Yahudi ri tãa naa weɓe, gnvɔ shàa ri dɔɔli.

²⁹ Ri seepaa, ri nwangsɛ wu nɛɛ yeti gari, ri shing wu ka tĩng, ri daa nɛɛ wu ka nyaa kɔpɔ ɓɔɔ ri rooro gãa ka yuu ɓiɓɛ ɓɛɛ, nɛɛ tɔɔ ri daa zĩi wu kaa guurang.

³⁰ A sɔɔ teteng ɓarɛ, yi gbalang ɓiɓɛ daa ɓiri.

Yeesɔ masɛ zang ɓɔɔ suru shi kpang ka bii ɓiɓɛ ɓɛɛ

³¹ Yeesɔ seepaa daa ka gari Kafanahu ɓɔɔ ka tipi Galili ɓɛɛ. Nwáng tɔ ka nɔngkɔ, a naa daa ka gãa zɔɔ kpalɛnang zang Yahudi ka Diki Ɔ̃sɔnang ɓarɛ, daa tusu ri vuu.

³² A ri mã naa ka danggn, ka ruu naa ɓɔɔ wu tusu ri vuu ɓɛɛ. Tusu zang vuu, mɔɔ kɔ̀ɔ́ nɛɛ zi tɔ nɛɛ vuu ɓɔɔ wu kɔɔyi wukɔ niizang.

³³ Ka gãa zɔɔ kpalɛnang zang Yahudi kaɓa, zang ɓɔɔ suru shi kpang ka bii ɓiɓɛ kagn. A mɛɛ nyaa nabm ka lapa tɔɔ,

³⁴ “Ayii. Yeesɔ yɔɔ Nazara, ruu, ɓaaɓɛ hãa kagn nɛɛ ruu ya? Mɔɔ arɛ nɛɛ mɔɔ naa nyɔkɔ ruu katɔ ya? N zi mɔɔ tɔɔ, mɔkɔ zang shonang Laa ɓɔɔ a nɛɛ bii Laa ɓɛɛ.”

³⁵ A Yeesɔ mangkɛ suru shi kpang tɔɔ, “Vɔ̃ nyaa ta, mɔɔ nwáng nɛɛ yeti ɓiɓɛ.” A suru shi kpang tuu wu, loo wu ka tipi ka jĩng zang piti. A nwangnɛ, yàa wu bii kati, palɛ wu vuu ɓɔɔ kpang.

³⁶ Zang piti ɓɔɔ ri kpalɛ zɔɔ, ri mã naa ka danggn. Ri hɛ̃ɛlɛ zɔɔ tɔɔ, “Wee ɓi lɛ̀ɛ́ yee kiya? Mangkɛ suru shi kpang, kɔɔ ri nɛɛ ri nwang ta nɛɛ yeti zang, a ri nwangkɛ, ri yaa zang bii.”

³⁷ A nyaa Yeesɔ sãlɛ nɔng ka tipi kaɓa nandon.

Yeesɔ masɛ zang dɔɔli

³⁸ A Yeesɔ seepaa yaa gãa zɔɔ kpalɛnang kaɓa, a daa ka gãa Siman, ka laa kaɓa, Siman ɓeekpeng ɓɔɔ yi soro ɓiɓɛ roo katɔ nɛɛ bii zaa wu katɔ. A ri gaa wu nɛɛ wu masɛ wu.

³⁹ A Yeesɔ daa ka bii Siman ɓeekpeng, a daa shii paa ka yuu ɓiɓɛ, a mangkɛ bii ɓɔɔ zaa wu kati, a bii yaa wu nɔng kati. A Siman ɓeekpeng seepaa kaa tantɛnang, kãa ri vuu shaanang.

⁴⁰ Laa daa tɔ ka nyaa vàa, zang piti ɓɔɔ zang kɔnang ɓarɛ kagn, ri atɛ ri ka bii Yeesɔ. A Yeesɔ shĩli ri naa ka yuu nandon, a masɛ ri kati.

⁴¹ A suru shi kpang ti nwangkɛ kaa nɛɛ bii zang dɔɔli. Ri mɛɛrɛ nyaa kana nɛɛ, “Mɔkɔ Jaa Laa.” A mangkɛ ri, kasɛ nɛɛ ri rang yee ka yuu ɓiɓɛ kpang, ka ruu ɓɔɔ, ri zi tɔ nɛɛ wukɔ Kirisi ɓɛɛ.

⁴² Yeesɔ seepaa kaa nɛɛ gãndi, a daa ka nɔng ɓɔɔ zang kagn kpang ɓɛɛ. A zang ri kãa Yeesɔ, ri kãa Yeesɔ, ri daa ĩi wu ka nɔng ɓɔɔ wu kagn ɓɛɛ. A ri gàa wu nɛɛ wu yaa tipi ɓarɛ kpang.

⁴³ A Yeesɔ kɔɔ ri tɔɔ, “Laa shong m nɛɛ n rang yee tɔ̃ɔ kpanti roonang ɓiɓɛ ka rɛɛ gari ɓɔɔgn jong.”

⁴⁴ A seepaa daayi daa rangkɛ zang yee Laa ka gãa zɔɔ kpalɛnang zang Yahudi ɓɔɔ ka tipi Yahudi ɓɛɛ nandon.