Luka 24 - Nyaa Shɔɔ Ɓɔɔ Laa a Ɓɛɛ

Laa wisi Yeesɔ paa

¹ Nɔng naa gãntɛ tɔ gbete, ka knti Diki Ɔ̃sɔnang. Nɛɛ gãndi zãngzãng, rɛɛ zang soro keɓe ri daa ka yuu sàa, ri tuu nung ɓɔɔ ri palɛ ka naa ning.

² Ri daa ĩiyi, zang dɔ̃ tari tɔ nɛɛ nyaa sàa.

³ Ri tu ka yeti sàa, a ri ĩi vɔrɔ Kpanti Yeesɔ tɔ̀ɔ nɔng kpang.

⁴ Ri shi ka nɔngkɔ, ri zi vuu ɓɔɔ ri palɛ takpang. Ri rɛ̃rɛ doo naa, a ri zi zang varɛ ziti, ri shii tɔ nɛɛ fɔ̃ɔrɔ puru kalang kalang kɔlɔ katɔ, ka kagn ɓarɛ naabm.

⁵ Zang soro keɓe ri kaa vɔrɔ dɔɔli, a ri ɓaa yuu ka dii. A zang varɛ bìí ri hɛ̃ɛ ri nɛɛ, “Ka ruu vi nɔɔ kãa zang ɓɔɔ Suru kagn bii ɓiɓɛ ka nɔng ɓɔɔ zang gbãa vɔrɔ viya?

⁶ Tɔ̀ɔ́ nɔng kpang, yupaa tɔ. Nɔɔ kpaa danggn vuu ɓɔɔ wu kɔɔ nɔɔ bɛ̀ɛ́ doo ka tipi Galili ɓɛɛ.

⁷ Ɓɔɔ kɔɔ nɔɔ tɔɔ, ‘Zang naa a zang ɓɔɔ ri palɛ vuu shi kpang Jaa Shɔnzang, ri ɓaa wu naa ka laa. A lee ɓɔɔ diki daa taati, zang wisi wu paa kati.’ ”

⁸ A ri kpaa danggn yee ɓiɓɛ kati.

⁹ Ɓɔɔ ri gbãayu nɛɛ nɔng yusàa, ri kɔɔ rɛɛ zang ɓɔɔ ri mantɛ vuu ka bii ɓiɓɛ kopi ti gbete nɛɛ rɛɛ zang nimbang ɓɔɔ ri dung wu ɓɛɛ.

¹⁰ Zang soro ɓɔɔ ri kɔɔ ri vuu keɓe, ɓi rɛɛ Marayamu Magadaliya nɛɛ Yuwana nɛɛ Marayamu nàá Yakub, nɛɛ rɛɛ zang soro nimbang ɓɔɔ nɛɛ ri ɓɛɛ.

¹¹ Rɛɛ zang ɓɔɔ mantɛ vuu ka bii ɓiɓɛ keɓe, ri ɓaa shoo ɓarɛ ka ruu ɓarɛ kpang, ri kɔɔ ɓarɛ nɛɛ rɛɛ zang soro keɓe, ri shaarɛ ɓarɛ nyaa waati. Ri shing danggn ka ruu bìí kpang.

¹² A Bituru yupaa ɓiri, yurɛ daa ka nɔng yuu saa. Tangsɛ, a lengse jĩng ka yeti sàa. Zi fɔ̃ɔrɔ ɓɔɔ zang leng vɔrɔ nɔng kɔ shɛ̃ɛning. Gbãayu daa gãa, mã naa ka danggn, ka ruu vuu ɓɔɔ wu zi keɓe.

Yeesɔ nwang nyaa ka bii zang ziti

¹³ Ka diki kaɓa, zang ziti ka teteng zang ɓɔɔ ri dũng wu diki diki, ɓɛɛ nɛɛ ri daa ka jaa gari ɓɔɔ zang ɓaa nɛɛ Imawu ɓɛɛ. Naa mɔɔ yuu paa nɛɛ Urushalima mɔɔ daa kagn mɛli manziti.

¹⁴ Ri rang yee nɛɛ zɔɔ, ka yuu vuu ɓɔɔ palɛ ɓɛɛ.

¹⁵ Ka ɓɔɔ bɛ̀ɛ́ ri rang yee doo naa ka nyaa, ri ti hɛ̃ɛlɛ zɔɔ, a Yeesɔ naa ĩi ri. Ri ɓakɛ doo kaa nɛɛ zɔɔ, ri daayi.

¹⁶ A ri zi wu nung takpang, mɔɔ kɔɔ nɛɛ zang zúu ri jĩng katɔ.

¹⁷ A hɛ̃ɛ ri tɔɔ, “Nɔɔ rangkɛ yee vi nɛɛ zɔɔ ka gbalang viya?” Ri shiiyi, ri zaa katɔ.

¹⁸ A zang gbete ka teteng ɓarɛ ɓɔɔ zang ɓaa wu nɛɛ Kiliyopaa, kasɛ wu nyaa tɔɔ, “Mɔkɔ ɓaa zang zanti gbete ka Urushalima, ɓɔɔ zi vuu ɓɔɔ palɛ ka nɔng, diki bee gn kpang ɓɛɛ ya?”

¹⁹ A hɛ̃ɛ ri nɛɛ “Ɓu vi palɛ viya?” A ri kasɛ wu nyaa nɛɛ, “Vuu ɓɔɔ zang palɛ Yeesɔ yɔɔ Nazara, zang nyaa shonang Laa. Ɓɔɔ Laa a wu naa, nɛɛ wu palɛ vuu bang bang, nɛɛ wu ti rang zang piti yee, wu kaa vɔrɔ kpang ɓɛɛ. Zang piti a wu bannang katɔ.

²⁰ A ɓɔɔ ti, naa ɓɔɔ, rɛɛ zang bang bang ɓuru ɓɔɔ dɔɔ vuu ka Gãa Laa, nɛɛ rɛɛ zang ɓɔɔ ri doo zang ɓɔɔ jɛ̃ɛ zang ruu kɔ ɓɛɛ, ri a wu zang, nɛɛ zang nyɔ wu vɔrɔ, a zang ɓaa wu naa ka laa ɓɛɛ.

²¹ Bɛɛ ruu shing danggn ɓuru nɛɛ, wukɔ naa ta yuu zang Isirela. Ti wee kɔ shɛ̃ɛning kpang, lɛɛkɔ keɓe diki daa kaa taati ɓɔɔ zang palɛ vuu keɓe ɓɛɛ.

²² Zang soro ɓɔɔ ri kagn, ka teteng ɓuru, ri kɔɔ ruu vuu ɓɔɔ mɔɔ ãa nyaa mɔɔ tãa nɛɛ mani ɓɛɛ. Ri daa ka yuu sàa lɛɛkɔ nɛɛ gãndi zãngzãng.

²³ A ri ĩi vɔrɔ ɓiɓɛ ka yeti saa kpang. Ri gbãayu, ri kɔɔ ruu tɔɔ, ri zili zang nyaa shonang Laa ɓɔɔ ka lapa ɓɛɛ. Ri kɔɔ ri nɛɛ, Yeesɔ doo ningkãari.

²⁴ Zang ɓɔɔ ka teteng ɓuru, ri daa ka yuu sàa, ri daa ĩi doo naa ɓɔɔ zang soro ri kɔɔ ɓɛɛ kɔ doori. A ri zi Yeesɔ doo kpang kɔ.”

²⁵ Yeesɔ rang ri yee tɔɔ, “Nɔɔ manɛ zang ɓɔɔ nɔɔ zũng kpang ɓɛɛ, ɓoro manɛ valɛ bii dɔɔli, ka ruu ɓɔɔ, nɔɔ shing danggn ka vuu ɓɔɔ zang nyaa shonang Laa kɔɔ kpang nandon ɓɛɛ.

²⁶ Nɔɔ zi kpang nɛɛ Kirisi dang jĩng vuu keɓe ka gbongkarɛ, tɔ̀ɔ, zang a wu bannang ɓiɓɛ kpang ya?”

²⁷ A Yeesɔ kɔɔrɔ ri vuu ɓɔɔ zang bee ka labeenang Laa ka yuu ɓiɓɛ kati. Gaayu nɛɛ labeenang ɓɔɔ Musa beere ɓɛɛ, a à nɔng ka yuu ɓɔɔ rɛɛ zang nyaa shonang Laa nandon ri beere ɓɛɛ.

²⁸ Ɓɔɔ ri a naabm tɔ nɛɛ jaa gari ɓɔɔ ri tɔɔ ri dàá ɓɛɛ, a Yeesɔ palɛ naa ɓɔɔ wu sha nɛɛ doo ɓɛɛ.

²⁹ A ri bakɛ wu nɛɛ, “Nwang nɛɛ ruu, ka ruu ɓɔɔ, kaa nɔng laarang, laa ti hãa nyaa kana ɓɛɛ.” A daayi nɛɛ wu daa nwang kaa nɛɛ ri.

³⁰ Nwangnɛ nɛɛ wu shaa kaa vuu shaanang nɛɛ ri. Tuu borodi a gaa Laa, sharɛ a á ri.

³¹ Á ri zi wu nung kati, a ningnɛ ri zi wu takpang.

³² Ri kɔɔ zɔɔ nɛɛ, “Ɓasi ka gbalang ɓɔɔ rang yee nɛɛ ruu, a ti nwangsɛ ruu dĩiri ruu vuu ɓɔɔ labeenang Laa kɔɔ ɓɛɛ, ruu tãa tĩnang ka yeti ɓuru dɔɔli.”

³³ Ri yuu paa tantɛnang ri gbãayu ka Urushalima, a ri ĩi rɛɛ zang ɓɔɔ ri mantɛ vuu ka bii ɓiɓɛ kopi tu gbete. Ri kpalɛ yuu ka nɔng gbete, nɛɛ rɛɛ zang ɓɔɔ nɛɛ ri ɓɛɛ.

³⁴ Ri kɔɔrɔ nɛɛ, “Kpanti Yeesɔ yupaa tɔ nɛɛ sàa niizang, nwang nyaa tɔ ka bii Siman.”

³⁵ A zang ziti keɓe kɔɔ ri naa vuu ɓɔɔ palɛ ka gbalang ɓɔɔ ri daa Imawu ɓɛɛ, nɛɛ naa ɓɔɔ Yeesɔ tusu ri yuu ɓiɓɛ ka ɓɔɔ wu shaa borodi ɓɛɛ.

Yeesɔ nwang nyaa ka bii zang ɓɔɔ ri mantɛ vuu ka bii ɓiɓɛ ɓɛɛ

³⁶ Ɓɔɔ ri kɔɔ zang vuu keɓe doo naa, Yeesɔ nwang nyaa, naa shii ka teteng ɓarɛ. A kɔɔyi tɔɔ, “N kaaɓi jong.”

³⁷ Ri kaa vɔrɔ, ri tɔɔ naa ri zi ɓarɛ raanang.

³⁸ A hɛ̃ɛ ri tɔɔ, “Nɔɔ kaa vɔrɔ viya? A nɔɔ ti hɛ̃ɛlɛ nyaa ka yeti manɛ nɔngkɔ viya?

³⁹ Nɔɔ pɛ̃ɛrɛ doo mɛɛ, nɛɛ naa mɛɛ, ɓi nkɔ. Nɔɔ lee m nɛɛ naa, nɔɔ zirɛ, ka ruu ɓɔɔ, kaka nɛɛ yɔpɔ ɓi kagn bii raanang, naa wee ka bii mɛɛ ɓee, kpang ɓɛɛ.”

⁴⁰ Kɔɔ vuu keɓe tɔ, a tusu ri naa ɓiɓɛ nɛɛ doo ɓiɓɛ.

⁴¹ Ɓɔɔ vuu bìí kpãa ri doo ka yeti, ka ruu tĩnang ɓɔɔ ri tãa ɓɛɛ. A ri ti kasɛ gn kpang kɔ sasak, ka ruu ɓɔɔ, vuu bìí nwang naa nɔngkɔ niizang kpang ɓɛɛ. A Yeesɔ hɛ̃ɛ ri nɛɛ, “Vuu shaanang kagn nɔng manɛ ka nihn ya?”

⁴² Ri a wu jaa jaazĩi ɓɔɔ zang nwãa katɔ ɓɛɛ,

⁴³ a tarɛ shaa ka tĩng ɓarɛ ka nɔngkɔ.

⁴⁴ A rang yee nɛɛ ri tɔɔ, “Wee yee mɛɛ ɓɔɔ n ràng nɔɔ bɛ̀ɛ́ n doo nɛɛ nɔɔ ning ɓɛɛ. N kɔɔ nɔɔ nɛɛ, vuu ɓɔɔ zang bee ka yuu mɛɛ ka yeti labeenang nyaa dannang Laa ɓɔɔ Musa, nɛɛ labeenang rɛɛ zang nyaa shonang Laa, a ɓɔɔ labeenang kpanti Dawuda ɓɔɔ zang ɓaa nɛɛ Zabura ɓɛɛ, nwang ditɔ niizang nandon.”

⁴⁵ A á ri naa, tɔɔ, ri zi vuu ɓɔɔ ka labeenang Laa ɓɛɛ kati.

⁴⁶ A kɔɔ ri nɛɛ, “Wee vuu ɓɔɔ zang bee ɓɛɛ, Kirisi dang jĩng, wu ti vɔrɛ, diki nɛɛ daa tɔ taati, wu yupaa nɛɛ sàa.

⁴⁷ Zang kɔɔ zang koo piti Ruu Laa, nɛɛ nung ɓiɓɛ kɔ, nɛɛ zang yaa vuu shi kpang, ri kɔ̃sɔ yeti ɓarɛ, tɔ̀ɔ, Laa wu yaa ri gbalang vuu shi kpang ɓarɛ. Zang naa gaayu nɛɛ Urushalima.

⁴⁸ Nɔ́ɔ kɔɔ zang vuu ɓɔɔ nɔɔ zi ɓɛɛ nandon.

⁴⁹ N shong nɔɔ nyaa, vuu ɓɔɔ Daa mɛɛ kɔɔyi nɛɛ wu a nɔɔ ɓɛɛ. Nɔ́ɔ nwang ka gari Urushalima ka gbongkarɛ, Suru Laa wu a ka yuu manɛ.”

Yeesɔ gbãayu ka bii diiɓɛ

⁵⁰ A nwang nɛɛ yeti gari nɛɛ ri, naabm nɛɛ Bɛtani. A see naa ka lapa, gaa Laa nɛɛ, Laa wu palɛ ri tɔ̃ɔ jong.

⁵¹ A ɓɔɔ bɛ̀ɛ́ gàá ri Laa doo naa, zang tuu wu zang daa nɛɛ wu ka lapa.

⁵² Ri bang wu, ri tãa tĩnang dɔɔli. A ri gbãayu ri daa gari Urushalima,

⁵³ ri dàarɛ́ yeti Gãa Laa diki diki, ri zãa Laa.