Luka 14 - Nyaa Shɔɔ Ɓɔɔ Laa a Ɓɛɛ

Yeesɔ masɛ zang ka Diki Ɔ̃sɔnang

¹ Ka Diki Ɔ̃sɔnang ɓɔɔgn, Yeesɔ daa vuu shaanang ka gãa zang bang Farisi ɓɔɔ gbete, zang ɓɔɔ ri ka nɔng ri tɛ̃ɛ wu jĩng ka bii selele.

² A yɔɔ ɓɔɔ doo ɓiɓɛ nɛɛ naa pùrù katɔ, a ka bii Yeesɔ.

³ A Yeesɔ hɛ̃ɛ rɛɛ Farisi nɛɛ zang ɓɔɔ ri tusu zang Labeenang Laa tɔɔ, “Ruu Laa ɓɔɔ Musa beeyi kasɛ katɔ nɛɛ zang wu masɛ zang ka Diki Ɔ̃sɔnang ya kɔ kasɛ kpang?”

⁴ Ri kasɛ wu nyaa kpang. A Yeesɔ lee yɔɔ naa ka bii, a masɛ wu kati, a jee wu nyaa nɛɛ wu dita.

⁵ Yeesɔ hɛ̃ɛ ri tɔɔ, “Ɓu wi ka teteng manɛ, naa seesaa ɓiɓɛ, kɔ guu napo ɓiɓɛ watɛ ka yeti too ka Diki Ɔ̃sɔnang tantɛ zɔ̃nnang kpang wiya?”

⁶ Ri ti kasɛ wu nyaa kpang.

Yeesɔ tusu vuu nɛɛ zang ri tuu yuu kpang

⁷ Yeesɔ zi naa ɓɔɔ zang ɓɔɔ zang gáarɛ́ ri, ri shɛ̃ɛrɛ nɔng nwannang ɓɔɔ zang shili ɓɛɛ, a rang ri yee keɓe kati tɔɔ,

⁸ “Zang ɓɔɔ nɛɛ gáarɛ̀ mɔɔ kn sinyɛ shaanang, mɔɔ nwang ka nɔng nwannang tɔ̃ɔ kpang. Ka ruu ɓɔɔ, mɔɔ zi kpang naa zang gaarɛ zang ɓɔɔ ɓa mɔɔ katɔ kagn ɓɛɛ.

⁹ Ka ruu ɓɔɔ, zang ɓɔɔ gaarɛ nɔɔ nɛɛ kɔ̀ɔ́ mɔɔ nɛɛ, ‘Seepaa, mɔɔ yaa zang keɓe nɔng.’ Yusɛ̃ɛ tuu mɔɔ ka nɔng ɓɔɔ mɔɔ dɔ̃sɔ ka laa nwannang ɓɔɔ ka knti ɓɛɛ.

¹⁰ Zang nɛɛ gaarɛ mɔɔ tɔ, daayi mɔɔ nwang ka laa ɓɔɔ ka knti ɓɛɛ. Zang ɓɔɔ gaarɛ mɔɔ nɛɛ a tɔ, wukɔ kɔɔ mɔɔ kati nɛɛ, ‘Masang, seepaa mɔɔ nwang ka laa ɓɔɔ tɔ̃ɔ tɔ̃ɔ ɓɛɛ.’ Tɔ̀ɔ, zang ɓɔɔ zang gaarɛ ri, ri zi kati nɛɛ mɔɔ ɓáa zang bang.

¹¹ Ka ruu ɓɔɔ, zang ɓɔɔ nɛɛ tuu yuu ɓiɓɛ, zang naa sɔɔrɔ wukɔ yuu ka dii ɓɛɛ. Zang ɓɔɔ sɔɔrɔ yuu ɓiɓɛ ka dii, zang naa a wukɔ bannang jong.”

¹² A Yeesɔ ti kɔɔ zang ɓɔɔ gaarɛ wu tɔɔ, “Mɔɔ nɛɛ ɓaa zang nyaa vuu shaanang, mɔ́ɔ ɓaa nyaa ka rɛɛ ɓaa sang nɛɛ rɛɛ ɓaazung, nɛɛ rɛɛ zang ɓaaɓɛ, nɛɛ rɛɛ zang ɓɔɔ nyaa gãa manɛ gbete, ri ɓarɛ zang yíng ɓɛɛ kpang. Naa mɔɔ ɓaa ri nyaa, ri naa ɓaa mɔɔ nyaa ditɔ jong.

¹³ Mɔɔ nɛɛ tɔɔ mɔɔ a zang vuu shaanang, gáarɛ́ zang ɓɔɔ vuu ka naa ɓarɛ kpang, nɛɛ zang ɓɔɔ kàa katɔ, nɛɛ zang ɓɔɔ doo shãa katɔ, nɛɛ zang ɓɔɔ jĩng ringtang ɓɛɛ.

¹⁴ Laa naa a mɔɔ tĩnang tãanang ditɔ, ka ruu ɓɔɔ, ri naa ɓàa mɔɔ nyaa ɓarɛ kpang ɓɛɛ. Laa naa shu mɔɔ ɓi kaa diki ɓɔɔ Laa naa wisi zang ɓɔɔ ri ɓaa shoo ka yee ɓiɓɛ paa nɛɛ saa ɓɛɛ.”

Zang ɓɔɔ zang gáarɛ̀ ri ka ruu vuu shaanang ɓɛɛ

¹⁵ Ɓɔɔ zang gbete ɓɔɔ nwang nɛɛ Yeesɔ ka nɔng vuu shaanang tãa naa weɓe, kɔɔ wu tɔɔ, “Tĩnang tãanang ɓi ɓɔɔ zang ɓɔɔ naa shaa vuu shaanang ka nɔng ɓɔɔ Laa roo Kpanti ɓɛɛ.”

¹⁶ Yeesɔ kasɛ wu nyaa tɔɔ, “Yɔɔ ɓɔ̀ɔ́gn nwãa vuu shaanang gaagaa, a gaarɛ zang gaagaa.

¹⁷ Laa ɓɔɔ zang shaa vuu shaanang kagn a tɔ, a shong zang shonang ɓiɓɛ nɛɛ ri daa kɔɔrɔ zang ɓɔɔ wu gaarɛ ɓɛɛ ta nɛɛ, ‘Nɔɔ a ta, zang hangsɛ vuu shaanang tɔ’.

¹⁸ Zang ɓɔɔ yɔɔ gáarɛ́ ri, ri gaa tɔɔsung yuu zɔ̃ng kɔnang gbete, gbete. Zang tĩng shɔɔnang kɔɔ zang nyaa shonang yɔɔ tɔɔ, ‘N daa zi doo nɔng jaa lannang ɓɔɔ n hoo ɓɛɛ. Mɔɔ daa kɔɔ wu nɛɛ n zɔ̃ɔrɔ wu katɔ yeti ɓiɓɛ wu lasɛ kpang, n a kpang.’

¹⁹ A zang doo knti tɔɔ, ‘N hoo napo jaa lannang kopi, n daa gãsɛ ri doo katɔ, mɔɔ daa kɔɔ wu nɛɛ n zɔ̃ɔrɔ wu katɔ, yeti ɓiɓɛ wu lasɛ kpang, n a kpang.’

²⁰ Zang ɓɔɔ ti kɔɔ tɔkn tɔɔ, ‘N shing soro doo nɛɛ doo, ka ruu nɔngkɔ, n a kpang.’

²¹ A zang shonang yɔɔ gbãayu daa kɔɔ wu vuu ɓɔɔ zang kɔɔrɔ ɓɛɛ. A gnvɔ shaa yɔɔ gãa, a kɔɔ zang shonang ɓiɓɛ tɔɔ, ‘Dita nyaa gbalang, nɛɛ boo gãa ɓɔɔ ka gari piti, mɔɔ ɓaarɛ zang ɓɔɔ vuu ka naa ɓarɛ kpang, nɛɛ zang ɓɔɔ ri kàa katɔ, nɛɛ zang jĩng ringtang, a ɓɔɔ zang ɓɔɔ doo shãa katɔ ɓɛɛ.’

²² A zang shonang yɔɔ naa a tɔkn kɔɔ wu tɔɔ, ‘Dabang, n palɛ vuu ɓɔɔ mɔɔ kɔɔ m ɓɛɛ tɔ, nɔng ti yaa doogn.’

²³ A yɔɔ gãa kɔɔ zang shonang ɓiɓɛ tɔkn tɔɔ, ‘Dita gbalang jaa, mɔɔ gɔ̃kɔ m zang, mɔɔ atɛ ri ka yeti gãa, tɔ̀ɔ, gãa mɛɛ wu yi nyaa kati.

²⁴ N kɔ̀ɔ́ nɔɔ zang gbete ɓɔɔ naa tãa vuu shaanang kagn teteng zang tĩng shɔɔnang kɔ n gaarɛ ri ɓa kpang.’ ”

Jĩng dannang zang ɓɔɔ ri dũng Yeesɔ ɓɛɛ

²⁵ Diki ɓɔɔgn zang dɔɔli ri dàarɛ́ nɛɛ wu, a raa jĩng kɔɔ ri tɔɔ,

²⁶ “Zang ɓɔɔ nɛɛ a ka bii mɛɛ, a kasɛ ruu mɛɛ ɓa ɓɔɔ wu kasɛ ruu diiɓɛ nɛɛ niiɓɛ nɛɛ ɓeeso, nɛɛ wujɛ ɓiɓɛ nɛɛ rɛɛ jaa niiɓɛ ɓɔɔ varɛ nɛɛ ɓɔɔ soro nɛɛ yuu ɓiɓɛ katɔ kpang, zunung ɓɔɔ wu nwang zang ɓɔɔ dũng m kpang.

²⁷ Zang ɓɔɔ nɛɛ kasɛ nɛɛ wu dang jĩng, wu naa vɔ naa ɓɔɔ n naa vɔ ɓɛɛ kpang, zunung ɓɔɔ wu dũng m kpang.

²⁸ “Naa zang gbete ka teteng manɛ kasɛ tɔɔ wu mãa gãa ɓɔɔ bee ka lapa, nwáng ka gbongkarɛ wu gã saka, wu zirɛ, naa daa naa ɓɔɔ wu hangsɛ nyaa gãa mãanang nɛɛ mani tɔ ɓɛɛ.

²⁹ Ka ruu ɓɔɔ, naa loo doo gãa a hangsɛ nyaa mãanang kpang, zang piti ɓɔɔ nɛɛ zirɛ, kpaa wu katɔ nɛɛ,

³⁰ ‘Yɔɔ keɓe gàa tɔɔsung gãa mãanang, hangsɛ nyaa kpang.’

³¹ Kpanti ɓɔɔ zang sĩ̀irì tanang ɓiɓɛ labang kopi nɛɛ kasɛ nɛɛ wu ta sĩ̀irì nɛɛ kpanti ɓɔɔgn, ɓɔɔ zang sĩ̀irì tanang ɓiɓɛ labang bmati. Nwang ka gbongkarɛ, wu zirɛ wu nɛɛ zunung ɓɔɔ wu naa ta sĩ̀irì nɛɛ kpanti kaɓa tɔ ɓɛɛ.

³² Nɛɛ ti zi tɔ nɛɛ sĩ̀irì kaɓa naa ɓa wu yuu katɔ, shɛ̃ɛrɛ zang ɓiɓɛ, wu shong ri, ri sũuru zɔɔ nɛɛ kpanti kaɓa bɛ̀ɛ́ à gn naabm kpang.

³³ Dũnnang mɛɛ, nwang ɓi doo nɔngkɔ. Zang ɓɔɔ nɛɛ yaa vuu ɓiɓɛ piti kpang, zunung ɓɔɔ wu nwáng zang ɓɔɔ dũng m kpang.

Tãa ɓɔɔ shi ta kpang ɓɛɛ

³⁴ “Tãa ɓi tɔ̃ɔ, a lanang tãa nɛɛ takpang, zang zunung ɓɔɔ zang palɛ, wu la tɔkn takpang.

³⁵ Shi ɓi takpang tingkiring. Daa naa ɓɔɔ zang tɛ̃ɛ ka jaa kpang, ti daa naa ɓɔɔ zang vang ka dòndòng kpang. Zang ɓɔɔ shoo ɓiɓɛ nɛɛ kagn, wu tãayi.”