Luka 10 - Nyaa Shɔɔ Ɓɔɔ Laa a Ɓɛɛ

Yeesɔ shong zang ɓɔɔ ri dũng wu ɓɛɛ, laa taati tu kopi

¹ Ka knti vuu keɓe Yeesɔ zɔ̃ngkɔ zang laa taati tu kopi a ɓakɛ ri ziti, ziti, a shongko ri ka rɛɛ gari nɛɛ nɔng piti, piti ɓɔɔ wu naa daarɛ ɓɛɛ.

² A kɔɔ ri tɔɔ, “Zee daa naa yeenang tɔ, a zang yeenang haa kaa takpang. Nɔɔ gaa Kpanti Laa ɓɔɔ wukɔ zang jaa ɓɛɛ ta, wu shong zang zee yeenang ka jaa ɓiɓɛ.

³ Nɔɔ dita, n shong nɔɔ naa mɛ̀ɛrɛ́ ka teteng zaa wisi.

⁴ Nɔ́ɔ tuu duku saka tɛ̃ɛnang nɛɛ duku zanti daanang, nɛɛ koodoo ɓɔɔ, ka naa kpang. Nɔ́ɔ ti suukãng ka nɔng ɓɔɔ nɔɔ jee zang nyaa ka gbalang kpang.

⁵ Gãa ɓɔɔ nɔɔ hãa nyaa kagn piti, nɔɔ jee zang nyaa nɛɛ, ‘Nɔɔ nwang tɔ̃ɔ.’

⁶ Naa zang ɓɔɔ shing jĩng ka nwannang tɔ̃ɔ nɛɛ kagn gãa kaɓa, naa nwang ditɔ naa ɓɔɔ nɔɔ kɔɔ ɓɛɛ. Naa zang kaɓa kagn kpang naa nwang nɔngkɔ kpang.

⁷ Nɔɔ nwang ka gãa gbete kaɓa kɔ, nɔ́ɔ shaa vuu, nɔ́ɔ ti ɓoo mii ɓoonang ɓɔɔ ri a nɔɔ ɓɛɛ. Ka ruu ɓɔɔ, zang sɔ̀ɔrɔ́ zang shonang doo ɓi katɔ ɓɛɛ. Nɔ́ɔ dɔ̃sɔ gãa kpang.

⁸ Gari ɓɔɔ nɔɔ hãa nyaa kagn piti, zang nɛɛ ta nɔɔ katɔ, nɔɔ shaa vuu piti ɓɔɔ ri a nɔɔ ɓɛɛ.

⁹ Nɔɔ masɛ zang kɔnang ɓɔɔ ka yeti gari kaɓa katɔ. Nɔɔ ti kɔɔ ri nɛɛ, ‘Diki ɓɔɔ Laa roo Kpanti a tɔ kaa naabm.’

¹⁰ Gari ɓɔɔ nɔɔ daa kagn, zang gari kaɓa nɛɛ ta nɔɔ kpang, nɔɔ sɔɔrɔ boo gãa ɓarɛ, nɔɔ kɔɔrɔ ri nɛɛ,

¹¹ ‘Rùu wàa nɔɔ tapuru gari manɛ ɓɔɔ ka doo ɓuru tɔ, tɔɔ zang zi kati nɛɛ Laa naa jɛ̃ɛ nɔɔ ruu ditɔ’. Danggn wu ning nɔɔ kpang, Kpanti roonang Laa a naabm tɔ.

¹² N kɔ̀ɔ́ nɔɔ, ka diki ɓɔɔ Laa naa jɛ̃ɛ zang ruu, jĩng dannang zang gari kaɓa naa ɓa ɓɔɔ zang gari Sɔɔdom katɔ.

Jĩng dannang zang gari ɓɔɔ ri kasɛ nɛɛ ri yaa vuu shi kpang ɓarɛ kpang ɓɛɛ.

¹³ “Jĩng dannang kagn yuu ɓaaɓɛ gari Korazing. Jĩng dannang kagn yuu ɓaaɓɛ gari Bɛsɛda, ka ruu ɓɔɔ shonang bang kɔ n palɛ nɔɔ ɓee n nɛɛ palɛ nɔngkɔ ka gari Taya nɛɛ Sidong, ri nɛɛ yaa vuu shi kpang ɓarɛ tɔ, ri nɛɛ kɔ̃sɔ yeti tɔ doo tɛ̃ɛ tɛ̃ɛ. Ri nɛɛ hãa sɛ̃ɛ fɔ̃ɔrɔ tɔ, ri nɛɛ tɛ̃ɛ pũngku tɔ ka yuu ɓarɛ. Tɔ̀ɔ, zang zi kaa gn nɛɛ ri ràa vuu shi kpang ɓarɛ yuu knti tɔ.

¹⁴ Ka diki ɓɔɔ Laa naa jɛ̃ɛ zang ruu, Laa naa dang nɔɔ jĩng ɓa ɓɔɔ zang rɛɛ gari Taya nɛɛ Sidong katɔ.

¹⁵ Zang gari Kafanahu, nɔkɔ naa ɓa rɛɛ gari ɓɔɔ nandon nɛɛ bannang ya? Kpang, Laa naa tasɛ nɔɔ ka waa kɔ jong.”

¹⁶ A kɔɔ zang ɓɔɔ ri mantɛ vuu ka bii ɓiɓɛ tɔɔ, “Zang ɓɔɔ nɛɛ ɓaa shoo ka nyaa manɛ, ɓaa shoo ka nyaa mɛɛ kɔ. Zang ɓɔɔ nɛɛ ti bɛ̃ɛ nɔɔ bɛ̃ɛ ɓi nkɔ. Zang ɓɔɔ nɛɛ ti bɛ̃ɛ m, bɛ̃ɛ ɓi zang ɓɔɔ shong m ɓɛɛ.”

Shonang ɓɔɔ zang laa taati tu kopi, tu ziti palɛ ɓɛɛ

¹⁷ Zang ɓɔɔ laa taati tu kopi tu ziti ri gbãayu. Ri kɔɔ Yeesɔ tɔɔ, “Dabang suru shi kpang ri ti ɓáa shoo ka nyaa ɓuru katɔ, ruu nɛɛ kɔɔ ri ruu tɔ ka nung ɓaaɓɛ ɓɛɛ.”

¹⁸ A kɔɔ ri tɔɔ, “N zi sheetang watɛ nɛɛ lapa naa shala ɓɔɔ mang takoti ɓɛɛ.

¹⁹ Nɔɔ zirɛ n a nɔɔ naa tɔ, nɔɔ ra ka yuu sɔkɔ nɛɛ gbuuri. Nɔɔ ti ɓa zang ɓɔɔ shing jĩng nɛɛ zang kpang yuu katɔ. Vuu ɓɔɔ kpaa nɔɔ naa ka bii kpang.

²⁰ Nɔ́ɔ tãa tĩnang ka ruu ɓɔɔ suru shi kpang ɓaa shoo ka nyaa manɛ kpang. Nɔɔ tãa tĩnang manɛ, ka ruu ɓɔɔ, zang bee nung manɛ tɔ ka lapa ɓɛɛ.”

Yeesɔ dɔɔ Laa kati

²¹ Ka laa kaɓa, Yeesɔ dɔ̀ɔ Laa kati ka ruu tĩnang tãanang ɓɔɔ suru Laa a wu ɓɛɛ. A kɔɔyi tɔɔ, “N zãa mɔɔ tɔ Dada, Kpanti lapa nɛɛ tipi ka ruu ɓɔɔ, vuu ɓɔɔ mɔɔ wàasɛ̀ zang ɓɔɔ ri zũng katɔ, mɔɔ naa tusu zang ɓɔɔ ri zi vuu kpang ɓɛɛ. Nɔngkɔ Dada, wee naa ɓɔɔ mɔɔ kasɛ nɛɛ mɔɔ palɛ ɓɛɛ kɔ.

²² “Daa mɛɛ a m vuu piti tɔ ka naa. A zang ɓɔɔ zi Jaa kagn gbete kpang. Daa kɔ zi wu gbete. Zang ɓɔɔ ti zi Daa kagn gbete kpang, Jaa kɔ zi wu gbete nɛɛ shɔnzang piti ɓɔɔ Jaa kasɛ nɛɛ wu tusu wu Daa ɓɛɛ.”

²³ A raa jĩng kɔɔ zang ɓɔɔ ri mantɛ vuu ka bii ɓiɓɛ nɛɛ nwĩiri tɔɔ, “Tĩnang tãanang ɓi ɓɔɔ zang ɓɔɔ zi vuu ɓɔɔ nɔɔ zi ɓɛɛ.

²⁴ N kɔ̀ɔ́ nɔɔ zang nyaa shonang Laa nɛɛ rɛɛ kpanti, ri kasɛ nɛɛ ri zi vuu kɔ nɔɔ zi ɓee, a ri zi kpang. Ri nɛɛ ri tãa vuu kɔ nɔɔ tãa ɓee, ri ti tãa kpang.”

Yee ɓɔɔ Yeesɔ rang nɛɛ nyaa vuu jeenang ka yuu yɔɔ Samariya ɓɛɛ

²⁵ A yɔɔ ɓɔɔ zi labeenang Laa ɓɔɔ Musa bee ɓɛɛ dɔɔli, seepaa nɛɛ wu gãsɛ Yeesɔ. Hɛ̃ɛ Yeesɔ tɔɔ, “Maalang, naa n palɛ ɓu bɛ̀ɛ vi, n walɛ suru bii ɓɔɔ waa nyaa kpang ɓɛɛ viya?”

²⁶ A Yeesɔ kasɛ wu nyaa tɔɔ, “Labeenang Laa ɓɔɔ Musa beeyi, kɔɔ nɛɛ viya? Ɓɔɔ mɔɔ gãrɛ kɔɔ nɛɛ viya?”

²⁷ Kasɛ Yeesɔ nyaa tɔɔ, “Labeenang Laa tɔɔ, ‘Zang wu kasɛ Kpanti Laa ɓɔɔ wukɔ Kpanti zang nɛɛ yeti gbete, nɛɛ suru bii zang piti, nɛɛ kaka zang piti, nɛɛ rɛ̃rɛnang zang piti.’ Nɛɛ ‘Zang ti kasɛ ruu ɓeezung doo naa ɓɔɔ zang kasɛ bii zang ɓɛɛ kɔ.’ ”

²⁸ A Yeesɔ kɔɔ wu tɔɔ, “Mɔɔ kasɛ nyaa tɔ tɔ̃ɔ. Palɛ veɓe kɔ, mɔɔ walɛ suru bii ɓɔɔ waa nyaa kpang ditɔ.”

²⁹ A yɔɔ kasɛ nɛɛ tɔɔ zang kɔɔ nɛɛ wu zang tɔ̃ɔ, a hɛ̃ɛ tɔɔ, “Ɓu wi manzung wiya?”

³⁰ Yeesɔ kasɛ wu nyaa kati tɔɔ, “Zang ɓɔɔgn seepaa nɛɛ gari Urushalima nɛɛ wu daa ka gari Jeriko. Daa kana, a zang ɓɔɔ ri ta zang vuu nɛɛ ɓangge ri nɔ̀ɔ wu ka gbalang. Ri nyɔ wu ri talɛ vuu ɓiɓɛ, ri daayi, ri yaa wu ka nɔngkɔ nung vɔrɔ gbete.

³¹ Zang ɓɔɔ dɔɔ vuu ka Gãa Laa sɔɔ gbalang kaɓa a naa kpaa jĩng ka wu ka tipi. Ɓu doo ɓɔɔ zi wu naa weɓe, kusu waala daayi.

³² Zang zɔ̃ng Leevi ɓɔɔ palɛ shonang ka Gãa Laa ti arɛ, naa kpaa jĩng ka wu. A ti kusu waala doo nɔngkɔ, daayi, yaa wu.

³³ “A yɔɔ Samariya ɓɔɔ tɔ̀ɔ wu daa zanti sɔɔ gbalang kaɓa, arɛ naa kpaa jĩng ka wu ka tipi, a gn ɓiɓɛ kɔng wu.

³⁴ A daa ka bii ɓiɓɛ daa sɔɔ wu nyaa vuu waa, nwãa nung kagn, a kãng kati. A tuu wu, shing wu ka dakn seesaa ɓiɓɛ a daa kaa nɛɛ wu ka gãa ɓɔɔ zang zanti ɔ̃sɔ kagn ɓɛɛ, a gãng jĩng ka wu ka nɔngkɔ.

³⁵ Nɔng naa gãntɛ, a sèe saka ɓɔɔ zang ɓaa nɛɛ dinari ɓɛɛ ziti, a zang gãa, a kɔɔ wu tɔɔ, ‘Yi m zang kɔnang keɓe naa jong ka bii. Vuu ɓɔɔ mɔɔ nɛɛ ningsi ka yuu ɓiɓɛ piti, n nɛɛ naa gbãayu tɔ, ń naa sɔ̀ɔrɔ̀ mɔɔ.’ ”

³⁶ A Yeesɔ hɛ̃ɛ yɔɔ ɓɔɔ zi labeenang Laa dɔɔli kaɓa tɔɔ, “Ɓu wi ka teteng zang taati kaɓa ɓɔɔ tusu nɛɛ wukɔ ɓeezung yɔɔ ɓɔɔ zang ɓɔɔ ri ta zang vuu nɛɛ ɓangge ri nyɔ wu ka gbalang kaɓa wiya?”

³⁷ A yɔɔ ɓɔɔ zi labeenang Laa dɔɔli kasɛ wu nyaa tɔɔ, “Yɔɔ Samariya ɓɔɔgn yɔɔ kɔng wu ɓɛɛ.” A Yeesɔ risi nyaa kɔɔ wu tɔɔ, “Dita mɔɔ daa palɛ jong naa yɔɔ Samariya kaɓa.”

Yeesɔ ka gãa rɛɛ Mata nɛɛ Marayamu

³⁸ Yeesɔ ri daa kana gbalang nɛɛ zang ɓɔɔ ri mantɛ vuu ka bii ɓiɓɛ a naa hãa nyaa ka jaa gari. A jaa soro ɓɔɔ zang ɓaa wu nɛɛ Mata, ta wu zanti ka yeti gãa ɓiɓɛ.

³⁹ Jaa nàá Mata ɓɔɔ zang ɓaa nɛɛ Marayamu nwang ka tĩng Yeesɔ tãa vuu ɓɔɔ wu tusu ɓɛɛ.

⁴⁰ A Mata nwãa bii ɓi nɛɛ shonang palɛnang. A arɛ naa kɔɔ Yeesɔ tɔɔ, “Dabang, mɔɔ yee laa ɓaa ka ɓɔɔ jaa nàá mɛɛ yàa m shonang ka bm ɓɛɛ kpang ya? Kɔɔ wu ta nɛɛ wu yi m naa ka shonang.”

⁴¹ A Yeesɔ kasɛ wu nyaa tɔɔ, “Mata, mɔɔ rɛ̃rɛ, a bii ti nwãa mɔɔ ka ruu vuu dɔɔli.

⁴² Vuu ɓɔɔ zang kasɛ ɓi gbete kɔ nwani. Marayamu ya ɓɔɔ tɔ̃ɔ ɓi tɔ. Zang ɓɔɔ ta kagn nɛɛ naa ɓiɓɛ tɔkn kpang.”