Kolosi 4 - Nyaa Shɔɔ Ɓɔɔ Laa a Ɓɛɛ

¹ Dabang gãa, nɔɔ pàlɛ́ jaafoo manɛ vuu ɓɔɔ tɔ̃ɔ, a ti daa naa katɔ ɓɛɛ. Danggn wu ning nɔɔ kpang, dabang gãa manɛ ɓi doogn kɔ ka lapa.

Bulu kɔɔ ri nɛɛ ri gaa Laa jong

² Nɔɔ gaa Laa diki diki, nɔɔ gãng jĩng waasɛ̃, nɔɔ ti zãa wu.

³ Nɔɔ ti gàa rùu Laa jong, tɔ̀ɔ, Laa wu pùu ruu gbalang tɔ̃ɔ jong, ruu rang zang yee ɓiɓɛ. Ruu kɔ̀ɔ zang vuu ɓɔɔ bɛ̀ɛ́ zang waasɛ katɔ ka yuu Kirisi ɓɛɛ. Ka ruu ɓɔɔ, wee zang mã m ka sãa kãntang ɓee, zang mã m ka ruu vuu keɓe kɔ ɓɛɛ.

⁴ Nɔ́ɔ gàa Laa wu shing m n kɔɔ vuu keɓe waasɛ̃ naa ɓɔɔ n nɛ̀ɛ́ kɔ̀ɔ ɓɛɛ.

⁵ Nɔɔ palɛ vuu nɛɛ zũnang ka bii zang ɓɔɔ ri dũ̀ng Laa kpang ɓɛɛ. Naa ri yàa nɔɔ gbalang tɔkɔlɔng, nɔɔ kɔɔ ri ruu kagn waasɛ̃.

⁶ Yee manɛ wu nwang tɔ̃ɔ diki diki, nyaa manɛ wu tɛ̃ɛ tãa kɔ shɛ̃ɛning. Nɔ́ɔ ti zi naa ɓɔɔ nɔɔ kasɛ zang ɓu nyaa tɔ̃ɔ ɓɛɛ.

Nyaa jeenang ɓɔɔ Bulu di nyaa nɛɛ mani ɓɛɛ

⁷ Manzung ɓuru Tikiku ɓɔɔ ruu kasɛ wu dɔɔli, ɓɔɔ palɛ shonang nɛɛ yeti gbete, a ti doo zang shonang Kpanti Yeesɔ kɔ nɛɛ ruu ɓɛɛ, naa kɔɔ nɔɔ ruu ditɔ ka yuu mɛɛ nandon.

⁸ N shong wu ka bii manɛ, ka ruu ɓɔɔ, n kasɛ wu kɔɔ nɔɔ naa ɓɔɔ ruu nandon ruu nwang ɓɛɛ, tɔ̀ɔ, sisĩng wu valɛ nɔɔ kati.

⁹ Ri a nɛɛ Onesimu, manzung ɓuru ɓɔɔ ruu kasɛ wu dɔɔli a ti palɛ vuu nɛɛ yeti gbete ɓɛɛ. Ɓɔɔ ɓi zang manɛ kɔ ɓɛɛ. Ri naa kɔɔ nɔɔ vuu piti ɓɔɔ palɛ ruu ka nihn ɓɛɛ.

¹⁰ Arisitaku ɓɔɔ zang mã jong ka sãa nɛɛ n ɓɛɛ, jee nɔɔ nyaa. Maraku ɓɔɔ dabang ɓarɛ gbete nɛɛ Baranaba ɓɛɛ, jee nɔɔ nyaa jong. (N kɔɔ nɔɔ ruu tɔ ka yuu ɓiɓɛ nɛɛ, nɛɛ a tɔ, nɔɔ ta wu waasɛ̃.)

¹¹ Jashuwa, ɓɔɔ zang ɓaa wu nɛɛ Jusitu ɓɛɛ, jee nɔɔ nyaa jong. Zang taati keɓe rikɔ zang Yahudi ɓɔɔ ri kɔ̃sɔ yeti tɔ, ri palɛ shonang nɛɛ n ka ruu kpanti roonang Laa, a ri ti yi m naa tɔ ka bii gbãng gbãng ɓɛɛ.

¹² Epafara ɓɔɔ dòo zang manɛ kɔ, a ti pàlɛ́ Yeesɔ Kirisi shonang, jee nɔɔ nyaa, gaa Laa ka ruu manɛ gbãng gbãng, gaa wu nɛɛ, wu shing nɔɔ, nɔ́ɔ shii nɛɛ kaka, nɔ́ɔ zũng danggn, nɔ́ɔ ta ruu ɓiɓɛ katɔ, ka ɓɔɔ nɔɔ palɛ vuu ɓɔɔ wu kasɛ dɔ̃ɔ gbete ɓɛɛ.

¹³ N kɔɔ ruu katɔ tɔ̃ɔ ka yuu shonang ɓɔɔ wu pálɛ̀ gbãng gbãng ka ruu manɛ ɓɛɛ. A ɓɔɔ ka ruu zang ɓɔɔ ri ka gari Lawodikiya nɛɛ gari Hirapoli.

¹⁴ Luka, zang gãnang ɓuru, nɛɛ Dema ri jee nɔɔ nyaa.

¹⁵ Nɔ́ɔ kɔɔ manzung ɓuru ɓɔɔ ri ka gari Lawodikiya nɛɛ, ruu jee ri nyaa. A ɓɔɔ jaa soro ɓɔɔ zang ɓaa wu nɛɛ Nimfa ɓɛɛ, nɛɛ zang ɓɔɔ ri dũng Laa ɓɔɔ ri kpalɛ zɔɔ ka gãa ɓiɓɛ ɓɛɛ.

¹⁶ Nɔɔ nɛɛ gã labeenang keɓe tɔ, zang wu daa gã̀ zang ɓɔɔ ri dũng Laa ka gari Lawodikiya jong. Nɔɔ ti gã labeenang ɓɔɔ zang shong nɔɔ nyaa nɛɛ mani nɛɛ gari Lawodikiya jong.

¹⁷ Nɔ́ɔ ti kɔɔ Akipu nɛɛ, “Shing jĩng, mɔɔ hangsɛ shonang ɓɔɔ mɔɔ ta ka bii Kpanti Yeesɔ katɔ.”

¹⁸ Nkɔ Bulu, n bèe nyaa jeerenang keɓe nɛɛ naa mɛɛ. Danggn wu ning nɔɔ kpang, nɔɔ gàa m Laa katɔ, ka ruu ɓɔɔ, n doo ka sãa ɓɛɛ. Laa wu pàlɛ̀ nɔɔ tɔ̃ɔ.