Kolosi 2 - Nyaa Shɔɔ Ɓɔɔ Laa a Ɓɛɛ

¹ N kasɛ nɛɛ nɔɔ zi naa ɓɔɔ n palɛ shonang nɛɛ kaka mɛɛ nandon, ka ruu manɛ, nɛɛ zang ɓɔɔ ri ka gari Lawodikiya, a ɓɔɔ zang ɓɔɔ ri zi m gngn nɛɛ jĩng ɓarɛ kpang ɓɛɛ.

² N palɛ nɔngkɔ, tɔ̀ɔ, ń mã ri danggn kati. Tɔ̀ɔ zɔɔ kasɛnang ɓarɛ wu ɓakɛ ri yuu kaa nɔng gbete, tɔ̀ɔ ri zi vuu ɓɔɔ kagn ɓɛɛ kaa nyaa kiiri. Ri ti zi vuu ɓɔɔ Laa waasɛ katɔ keɓe, ɓɔɔ ɓi wukɔ Kirisi ɓɛɛ.

³ Ɓɔɔ Laa waasɛ zũnang nɛɛ vuu zinang nandon ka bii ɓiɓɛ ɓɛɛ.

⁴ N kɔɔ nɔɔ ruu keɓe tɔ, zang ɓɔɔ wu nwáarɛ̀ nɔɔ nɛɛ nyaa laanang sèé kpang, naa nyaa keɓe shi doo naa viya?

⁵ Ka ruu ɓɔɔ, naa wee n nɛɛ nɔɔ kpang ɓee, n nɛɛ nɔɔ ka suru. N tãa tĩnang ka ɓɔɔ n zi naa ɓɔɔ nɔɔ palɛ vuu teetee, a nɔɔ ti shii gbãng gbãng ka danggn ɓɔɔ nɔɔ shing ka bìí Kirisi ɓɛɛ.

Nɔ̀ɔ nwang naa zang ɓɔɔ ri shing danggn ka bii Yeesɔ ɓɛɛ

⁶ Wee nɔɔ tá Yeesɔ Kirisi tɔ, nɛɛ wu nwang Kpanti manɛ ɓee, nɔɔ nwangnɛ, nɔɔ ɓakɛ yuu nɛɛ wu.

⁷ Nɔɔ ɓáa saara manɛ ka bii ɓiɓɛ, tɔ̀ɔ, nɔɔ bang kati. Tɔ̀ɔ, nɔɔ shii ka gbãng gbãng ka danggn ɓɔɔ nɔɔ shing ɓɛɛ, naa ɓɔɔ zang tusu nɔɔ ɓɛɛ. Nɔɔ ti zãa Laa ka yeti manɛ diki diki.

⁸ Nɔɔ gãng jĩng kagn, zang ɓɔɔ nɛ̀ɛ́ nwãarɛ nɔɔ nɛɛ zũnang ɓɔɔ a nɛɛ bìí shɔnzang, ɓɔɔ nwàng zang vuu tɔ̃ɔ kpang ɓɛɛ. Zũnang ɓɔɔ nwáng ɓi nɛɛ vuu ɓɔɔ dabang ri tusu ka tĩng a ɓɔɔ nɛɛ nyaa dannang sèé ɓɔɔ shɔnzang ri túsù ɓɛɛ, wu nɛɛ bii Yeesɔ Kirisi kpang ɓɛɛ.

⁹ Ka ruu ɓɔɔ, nwannang Laa nandon ɓi ka bii shɔnzang Yeesɔ kɔ ɓɛɛ,

¹⁰ a zang a nɔɔ vuu piti tɔ, nyaa kiiri ka ɓɔɔ nɔɔ ɓakɛ yuu nɛɛ wu ɓɛɛ. Yeesɔ kɔ zang bang ka yuu rɛɛ kpanti nɛɛ rɛɛ zang bang bang.

¹¹ Ka ɓɔɔ nɔɔ ɓakɛ yuu nɛɛ wu, zang yee nɔɔ shaa, wu zɔ̃ng shaa ɓɔɔ shɔnzang ri yée ɓɛɛ kpang. Ɓi zɔ̃ng shaa yeenang Yeesɔ Kirisi, ɓɔɔ ɓi kaa yuu ɓuru, ɓɔɔ wu tà nɛɛ naa bii ɓuru ɓɔɔ kasɛ ɓi vuu shi kpang palɛnang ɓɛɛ.

¹² Ka ruu ɓɔɔ, ka ɓɔɔ zang palɛ nɔɔ batizima, nwang naa ɓɔɔ zang gbãa nɔɔ katɔ nɛɛ Yeesɔ Kirisi ɓɛɛ. Kaa batizima kɔ nwàng naa ɓɔɔ zang ti wisi nɔɔ paa jong nɛɛ Yeesɔ, ka ruu danggn ɓɔɔ nɔɔ shing ka naa vuu palɛnang Laa ɓɔɔ wisi wu paa nɛɛ saa ɓɛɛ.

¹³ Bɛ̀ɛ́ ɓeleng nɔɔ nwang manɛ naa zang ɓɔɔ ri vɔlɔ katɔ ɓɛɛ, ka ruu vuu shi kpang ɓɔɔ nɔɔ pálɛ́ ɓɛɛ. A ɓɔɔ ti, ka ruu ɓɔɔ, nɔɔ manɛ zang Isirela kpang, nɔɔ zi nyaa dannang Laa kpang ɓɛɛ. A kãntang keɓe Laa a nɔɔ suru bii tɔ, naa ɓɔɔ Yeesɔ Kirisi. A ti kɔsɔ ruu vuu shi kpang ɓuru tɔ nandon.

¹⁴ Laa ningsi nyaa dannang tɔ, nɛɛ vuu ɓɔɔ wu kasɛ ɓɛɛ, a àlɛ̀ vuu shi kpang ɓɔɔ zang bee ka yuu ɓuru ɓɔɔ nɛ̀ɛ́ nwang ruu naa nyaa kɔ́pɔ́ ɓɛɛ tɔ. Ningsi tɔ nandon ka ɓɔɔ wu ɓaa vuu keɓe jong ka laa ɓɔɔ zang ɓaa Yeesɔ naa kagn ɓɛɛ.

¹⁵ Ka yuu laa kaɓa kɔ, Laa tá yuu ɓuru nɛɛ naa rɛɛ suru ɓɔɔ ri roo kpanti, pálɛ́ ri vuu yusɛ̃ɛ ka jĩng zang piti, a sèe ri naa ɓɔɔ zang sèé zang ɓɔɔ zang yiki ka nyaa sĩiri ɓɛɛ.

¹⁶ Ka ruu nɔngkɔ, zang ɓɔɔ wu dãa nɔɔ ka yuu vuu ɓɔɔ nɔɔ shaayi nɛɛ ɓɔɔ nɔɔ ɓooyi ɓɛɛ kpang. Kɔ́ ka yuu diki Laa, kɔ́ ka yuu vuu shaanang shala shɔɔ, kɔ́ ka yuu Diki Ɔ̃sɔnang.

¹⁷ Vuu keɓe nandon nwàng ɓi naa jasuru vuu ɓɔɔ a doo ka tĩng ɓɛɛ. Vuu ɓɔɔ niizang ɓi Yeesɔ Kirisi.

¹⁸ Nɔɔ yaa zang ɓɔɔ tuu yuu ɓiɓɛ nɛɛ wu ɓa nɔɔ katɔ, wu dɔng nɔɔ ruu kpang. Zang ɓɔɔ kɔɔyi nɛɛ wu zìlí vuu ka si hingro, a yi tĩng, suu sèé nɛɛ wu tuu yuu ɓiɓɛ kpang, a bang ɓi kaa rɛɛ zang nyaa shonang Laa ɓɔɔ ri ka lapa ɓɛɛ. Zɔ̃ng zang keɓe tuu yuu ɓiɓɛ, ka dalɛ waati, ka rɛ̃rɛnang ɓɔɔ wu rɛ̃rɛ naa shɔnzang ɓɛɛ,

¹⁹ di yuu ɓi tɔ̀ɔ́ ka bii Yeesɔ Kirisi ɓɔɔ wukɔ zang bang ɓuru kpang. Yeesɔ ɓɔɔ wukɔ yiti bii ɓiɓɛ nandon ka nɔng gbete, ka nɔng ɓɔɔ bii tiisi ɓɛɛ nɛɛ hĩiri, a bii bangnɛ naa ɓɔɔ Laa kasɛ wu bang ɓɛɛ.

²⁰ Nɔɔ vɔ manɛ tɔ, nɛɛ Yeesɔ Kirisi, a zang ti ta yuu manɛ tɔ, nɛɛ naa rɛɛ nyaa dannang ɓɔɔ shɔnzang ri tusu ɓɛɛ. A ka ruu vi nɔɔ nwang nwannang naa nɔɔ manɛ zang koo keɓe viya? Ka ruu vi nɔɔ dũng rɛɛ nyaa ɓɔɔ zang dangnɛ nɛɛ,

²¹ “Nɔ́ɔ yiti vuu keɓe kpang,” a ɓɔɔ nɛɛ, “Nɔ́ɔ tãa vuu keɓe ka nyaa kpang,” a ɓɔɔ nɛɛ, “Nɔ́ɔ lee naa ka vuu kaɓa kpang,” viya?

²² Vuu keɓe, ri naa shaarɛ ɓarɛ kaa tɔ, zang nɛɛ palɛ shonang tɔ nɛɛ mani ɓɛɛ. Ka ruu ɓɔɔ, ri ɓarɛ nyaa dannang shɔnzang, nɛɛ vuu ɓɔɔ shɔnzang ri tusu ɓɛɛ.

²³ Nyaa dannang keɓe, túsù bii mɔɔ kɔɔ nɛɛ zũnang kagn, ka ɓɔɔ ri shing zang nɛɛ kaka nɛɛ zang bang vuu ɓɔɔ shɔnzang kasɛ bannang ɓɛɛ. Ri suu sèé nɛɛ ri tuu yuu ɓarɛ kpang, a ri ti dang bii ɓarɛ jĩng ka ɓɔɔ ri palɛ bii hakaka ɓɛɛ. A nyaa dannang keɓe ri zunung ɓɔɔ wu zãa ri vuu ɓɔɔ bii ɓarɛ kasɛ ɓɛɛ palɛnang kaa takpang.