Yɔhana 9 - Nyaa Shɔɔ Ɓɔɔ Laa a Ɓɛɛ

Yeesɔ masɛ yɔɔ ɓɔɔ zang yi wu jĩng ringtang ɓɛɛ

¹ Yeesɔ daa kana gbalang, a zi yɔɔ ɓɔɔ zang yi wu jĩng ringtang ɓɛɛ.

² Zang ɓɔɔ ri mantɛ vuu ka bii ɓiɓɛ ri hɛ̃ɛ wu nɛɛ, “Maalang, ɓu wi palɛ vuu shi kpang, a zang yi yɔɔ keɓe jĩng ringtang wiya? Yɔɔ kɔ̀ nɛɛ yuu ɓiɓɛ ya, kɔ́ zang ɓɔɔ ri yi wu ɓɛɛ?”

³ Yeesɔ kɔɔ ri tɔɔ, “Wu yɔɔ kɔ palɛ vuu shi kpang, kpang, wu ti rɛɛ zang ɓɔɔ ri yi wu ɓɛɛ kpang. Zang yi wu jĩng ringtang, tɔ̀ɔ, zang zi naa vuu palɛnang Laa, ka ɓɔɔ palɛ shonang ka bii yɔɔ ɓɛɛ.

⁴ Rúu palɛ shonang zang ɓɔɔ shong m ɓɛɛ, bɛ̀ɛ́ doo nɔng laagɛ̃. Nɔng zĩi a kana ɓɔɔ zang palɛ shonang tɔ̀ɔ́ gbete kpang ɓɛɛ.

⁵ Wee n doo ka koo ɓee, nkɔ yakɛ koo.”

⁶ Yeesɔ kɔɔ vuu keɓe tɔ, a tu sisãa ka tipi, a tɔɔlɔ tapɔng nɛɛ mani, a bɔɔlɔ yɔɔ jĩng ringtang ka jĩng.

⁷ A kɔɔ wu nɛɛ, “Dita, mɔɔ daa sɔɔ jĩng ka too mii ɓɔɔ zang ɓaa nɛɛ Siluwa ɓɛɛ.” (Dĩiri nung keɓe ɓi, “Zang shongnɛ”.) A yɔɔ daayi, daa sɔɔ jĩng, a gbãayu, jĩng ɓiɓɛ zi nɔng kana.

⁸ Zang ɓɔɔ ri roo nyaa gãa nɛɛ wu, nɛɛ rɛɛ zang ɓɔɔ ri zi wu tɔ gn gàarɛ́ vuu ɓɛɛ, ri hɛ̃ɛyi nɛɛ, “Wee ɓu bɛ̀ɛ yɔɔ ɓɔɔ nwalɛ, gàarɛ́ vuu ɓɛɛ kpang ya?”

⁹ Zang ɓɔɔ ri kɔɔyi nɛɛ wukɔ, zang ɓɔɔ ri kɔɔ ɓarɛ nɛɛ, “Ɓi wukɔ kpang, zang nwáng wu katɔ.” A yɔɔ bii kɔɔ kaa nɛɛ yuu ɓiɓɛ nɛɛ, “Ɓi nkɔ.”

¹⁰ Ri hɛ̃ɛ wu nɛɛ, “A palɛ kaa biya mɔɔ zi nɔng kaa tɔ viya?”

¹¹ Kasɛ ri nyaa tɔɔ, “Yɔɔ ɓɔɔ zang ɓaa wu nɛɛ Yeesɔ ɓɛɛ, tɔ̀ɔ tapɔng, bɔɔlɔ m ka jĩng. A kɔɔ m nɛɛ n daa ka too mii ɓɔɔ zang ɓaa nɛɛ Siluwa ɓɛɛ, n daa sɔɔ jĩng. A n daa kati, ɓu doo ɓɔɔ n sɔɔ jĩng hn, jĩng mɛɛ zi nɔng káa tɔkn.”

¹² Ri hɛ̃ɛ wu nɛɛ, “Yɔɔ bìí ɓu kiya?” Yɔɔ kɔɔ ri nɛɛ, “N zi kpang.”

Zang Farisi ri hɛ̃ɛlɛ yɔɔ ɓɔɔ Yeesɔ masɛ wu ɓɛɛ

¹³ Ri daa nɛɛ yɔɔ ɓɔɔ bɛ̀ɛ́ jĩng ringtang, ka nɔng zang Farisi.

¹⁴ Diki ɓɔɔ Yeesɔ tɔɔ tapɔng kagn a màsɛ̀ yɔɔ jĩng nɛɛ mani, ɓi ka Diki Ɔ̃sɔnang.

¹⁵ Zang Farisi ri hɛ̃ɛ wu tɔkn naa ɓɔɔ jĩng ɓiɓɛ zi nɔng kaa tɔkn ɓɛɛ. Yɔɔ kɔɔ ri tɔɔ, Yɔɔ bɔɔlɔ m tapɔng ka jĩng, n sɔɔ jĩng mɛɛ, a n zi nɔng kati.

¹⁶ Ka teteng zang Farisi bìí, zang ɓɔɔ ri kɔɔyi nɛɛ, “Yɔɔ ɓɔɔ palɛ vuu keɓe, a ɓi nɛɛ bii Laa kpang, ka ruu ɓɔɔ dũng nyaa ɓɔɔ zang dang ka yuu Diki Ɔ̃sɔnang ɓi kpang ɓɛɛ.” Zang ɓɔɔ ri ti kɔɔ ɓarɛ, nɛɛ, “Naa yɔɔ keɓe nɛɛ zang ɓɔɔ palɛ vuu shi kpang, nɛɛ zunung ɓɔɔ wu palɛ rɛɛ vuu ɓɔɔ zang zirɛ, zang mã naa ka danggn, naa rɛɛ wee wu pálɛ̀ ɓee kpang.” A ri basɛ zɔɔ kaa nɔ́ngkɔ̀.

¹⁷ A zang Farisi ri hɛ̃ɛ yɔɔ tɔkn nɛɛ, “Wee másɛ́ jĩng ɓaaɓɛ tɔ ɓee, mɔɔ kɔɔ ɓu kaa nɛɛ vi, ka yuu ɓiɓɛ viya?” Yɔɔ kɔɔ ri tɔɔ, “Yɔɔ bìí ɓi zang nyaa shonang Laa.”

¹⁸ Rɛɛ zang Yahudi ri kasɛ gn kpang kɔ sasak. Ri kasɛ gn kpang nɛɛ bɛ̀ɛ́ yɔɔ bìí jĩng ringtang, a zang màsɛ̀ wu jĩng kpang. Ri ɓaa nyaa ka rɛɛ zang ɓɔɔ yi wu ɓɛɛ ka gbongkarɛ.

¹⁹ A ri hɛ̃ɛ ri nɛɛ, “Wee jaa manɛ ɓɔɔ nɔɔ tɔɔ nɔɔ yi wu jĩng ringtang kɔ ya? A palɛ bɛ̀ɛ́ zi nɔng kaa tɔkn viya?”

²⁰ Zang ɓɔɔ ri yi yɔɔ, ri kasɛ nyaa tɔɔ, “Ruu zi tɔ ɓi jaa ɓuru kɔ, ruu ti zi tɔ ruu yi wu jĩng ringtang.

²¹ Naa ɓɔɔ zang palɛ, zi nɔng kãntang keɓe, naa wi ti màsɛ̀ wu jĩng wiya, ruu zi ɓuru kpang. Bang tɔ, daa ɓɔɔ wu kɔɔ ruu ka yuu ɓiɓɛ tɔ. Nɔɔ hɛ̃ɛ wu ta, kɔɔ nɔɔ katɔ nɛɛ nyaa ɓiɓɛ.”

²² Rɛɛ zang ɓɔɔ yi yɔɔ ri kasɛ nyaa nɔngkɔ, ka ruu ɓɔɔ, ri kaa vɔrɔ zang Yahudi bii katɔ ɓɛɛ. Rɛɛ zang Yahudi ri kɔɔ tɔ nɛɛ, zang ɓɔɔ nɛɛ kɔɔyi nɛɛ, wu kasɛ tɔ nɛɛ Yeesɔ kɔ Kirisi, ri zãa wu gãa zɔɔ kpalɛnang daanang katɔ.

²³ Ka ruu weɓe kɔ, rɛɛ zang ɓɔɔ yí yɔɔ ri kɔɔyi nɛɛ, “Bang tɔ, daa ɓɔɔ wu kɔɔ ruu ka yuu ɓiɓɛ tɔ, nɔɔ hɛ̃ɛ wu ta.”

²⁴ Ri ɓaa yɔɔ ɓɔɔ bɛ̀ɛ́ jĩng ringtang nyaa tɔkn, daa kaa doo ziti, a ri kɔɔ wu nɛɛ, “Kɔɔ ruu ɓɔɔ niizang ɓɛɛ, ruu zi ɓuru tɔ, yɔɔ kaɓa ɓi zang ɓɔɔ palɛ vuu shi kpang ɓɛɛ.”

²⁵ Yɔɔ ɓɔɔ Yeesɔ másɛ́, kasɛ ri nyaa tɔɔ, “Naa ti zang ɓɔɔ palɛ vuu shi kpang ya, n zi kpang. Vuu ɓɔɔ n zirɛ ɓi gbete. N zi m ɓɔɔ ɓeleng, bɛ̀ɛ́ n jĩng ringtang, kãntang keɓe n zi nɔng kaa tɔ ɓɛɛ kɔ shɛ̃ɛning.”

²⁶ A ri hɛ̃ɛ wu nɛɛ, “Pàlɛ̀ mɔɔ viya? Puu mɔɔ jĩng biya?”

²⁷ Yɔɔ kasɛ ri nyaa tɔɔ, “N kɔɔ nɔɔ tɔ, doo ɓasi ɓɛɛ, nɔɔ ɓaa shoo kagn kpang. Nɔɔ kasɛ nɛɛ nɔɔ tãa kaa tɔkn ka ruu viya? Nɔɔ kasɛ nɛɛ nɔɔ nwang kaa zang ɓɔɔ ri mantɛ vuu ka bii ɓiɓɛ jong ya?”

²⁸ Ri dãlɛ wu, a ri kɔɔ wu nɛɛ, “Ɓi mɔkɔ zang ɓɔɔ mantɛ vuu ka bii yɔɔ kaɓa shɛ̃ɛning. Ruu ɓuru zang ɓɔɔ ri mantɛ vuu ka bii Musa ɓɛɛ.

²⁹ “Ruu zi ɓuru tɔ, nɛɛ Laa rang yee nɛɛ Musa. Ɓɔɔ yɔɔ kaɓa ruu zi nɔng ɓɔɔ wu a ɓi nɛɛ mani kpang.”

³⁰ Yɔɔ kasɛ nyaa, “Wee vuu ɓɔɔ zang mã naa ka danggn ɓɛɛ. Yɔɔ kaɓa masɛ jĩng mɛɛ. Nɔɔ kɔɔ biya nɛɛ nɔɔ zi nɔng ɓɔɔ wu a nɛɛ mani kpang viya?

³¹ Ruu zi ɓuru tɔ, nɛɛ Laa ɓaa shoo ɓi jong ka vuu ɓɔɔ zang ɓɔɔ ri palɛ vuu shi kpang ri kɔɔ ɓɛɛ kpang, ɓáa shoo ɓi ka vuu ɓɔɔ zang ɓɔɔ ri bang wu, ri ti palɛ vuu ɓɔɔ wu kasɛ, ri kɔɔ ɓɛɛ.

³² Ɓu dòo ɓɔɔ koo gaayu katɔ ɓɛɛ, ruu tãa gngn nɛɛ zang ɓɔɔ másɛ̀ zang ɓɔɔ zang yi wu jĩng ringtang kpang.

³³ Naa yɔɔ keɓe nɛɛ a nɛɛ nɔng Laa kpang, nɛɛ zunung vuu keɓe palɛnang kpang.”

³⁴ Ri kasɛ nyaa tɔɔ, “Ɓɔɔ zang yi mɔkɔ ka yeti vuu shi kpang kirik, mɔɔ nɛɛ mɔɔ tusu rukɔ vuu ya?” Ri hing wu ka biling.

³⁵ Yeesɔ tãa nyaa nɛɛ zang hing yɔɔ ɓɔɔ wu másɛ̀ tɔ. Yeesɔ kãa wu, naa ĩi wu, a hɛ̃ɛ wu nɛɛ, “Mɔɔ shing danggn tɔ ka bii Jaa Shɔnzang ya?”

³⁶ Yɔɔ kasɛ nyaa tɔɔ, “Jaa Shɔnzang bìí ɓu wiya? Kɔɔ m ta, n shing danggn ka bii ɓiɓɛ.”

³⁷ Yeesɔ kɔɔ wu tɔɔ, “Mɔɔ zi wu tɔ, wukɔ ti rang yee nɛɛ mɔɔ.”

³⁸ A yɔɔ kɔɔ wu tɔɔ, “Kpanti, n shing danggn tɔ.” A bang Yeesɔ kati.

³⁹ Yeesɔ kɔɔyi tɔɔ, “N à ka koo keɓe nɛɛ n naa basɛ teteng zang. Tɔ̀ɔ, zang ɓɔɔ ri jĩng ringtang ri zi nɔng. Zang ɓɔɔ ri zi nɔng katɔ jĩng ɓarɛ wu zuuyi.”

⁴⁰ Ɓɔɔ rɛɛ zang Farisi ɓɔɔ ri nɛɛ wu, ri tãa naa weɓe, ri hɛ̃ɛ wu nɛɛ, “Wee jĩng ɓuru zuu ɓu kaa tɔ jong ya?”

⁴¹ Yeesɔ kɔɔ ri tɔɔ, “Naa jĩng manɛ nɛɛ zuu katɔ, zang nɛɛ kɔ̀ɔ kpang nɛɛ nɔɔ palɛ vuu shi kpang tɔ kpang. Ka ruu ɓɔɔ, nɔɔ kɔɔyi nɛɛ nɔɔ zi nɔng manɛ katɔ, vuu shi kpang manɛ nwáng tɔ ka bii manɛ ka nɔngkɔ.”