Yɔhana 8 - Nyaa Shɔɔ Ɓɔɔ Laa a Ɓɛɛ

Jaa soro ɓɔɔ zang ĩiyi bɛ̀ɛ́ palɛ dũndũng ɓɛɛ

¹ A Yeesɔ vang ɓi ka yuu Kɔpɔ Zeetung.

² Nɛɛ gãndi zãngzãng, gbãayu tɔkn ka Gãa Laa, a zang dɔɔli ri kpálɛ̀ zɔɔ ka bii ɓiɓɛ. Nwang ka tipi a gaa ri yuu vuu tusunang kati.

³ Zang ɓɔɔ ri tusu zang Labeenang Laa nɛɛ rɛɛ zang Farisi, ri atɛ jaa soro ɓɔɔ zang ĩi ka nɔng dũndũng palɛnang ɓɛɛ. Ri daa nɛɛ jaa soro, ri daa shing wu, nɛɛ wu shii ka teteng zang ka tĩng Yeesɔ.

⁴ A ri kɔɔ Yeesɔ nɛɛ, “Maalang, jaa soro keɓe, zang ĩi wu bɛ̀ɛ́ palɛ dũndũng.

⁵ Ka yeti Labeenang ɓuru, Musa dang ruu nyaa tɔɔ ruu luku zang soro ɓɔɔ naa weɓe nɛɛ tari, wu vɔrɛ. Mɔɔ kɔɔ ruu ɓaa kaa nɛɛ viya?”

⁶ Ri lang ɓarɛ saka nɛɛ ruu kɔ ri hɛ̃ɛ ɓee, nɛɛ tɔɔ ri walɛ vuu shi kpang ɓɔɔ ri kɔɔ ka yuu ɓiɓɛ kati. A Yeesɔ ɓaa yuu ka dii, bee vuu ka tipi nɛɛ saa naa.

⁷ Ri hɛ̃ɛlɛ wu doo naa sasak, a wisi bii paa kɔɔ ri nɛɛ, “Zang gbete ka teteng manɛ ɓɔɔ palɛ vuu shi kpang gngn kpang, wukɔ wu gaayu, wu lu jaa soro keɓe nɛɛ tari.”

⁸ A ɓaa yuu tɔkn dii, bee vuu ka tipi nɛɛ saa naa.

⁹ Ɓɔɔ ri tãa ruu keɓe, ri daarɛ nandon gbete gbete. Rɛɛ zang bang kɔ ri gaayu daarɛnang shɔɔnang. Zang yaa kaa Yeesɔ ka bm nɛɛ jaa soro bìí ka nɔng ɓɔɔ wu shii ɓɛɛ.

¹⁰ Yeesɔ wisi bii paa, a hɛ̃ɛ jaa soro nɛɛ, “Ri kaa kiya, jaa soro? Zang yaa ka gn gbete ɓɔɔ dɔng mɔɔ ruu kpang ya?”

¹¹ Jaa soro kasɛ wu nyaa tɔɔ, “Zang wu gbete kpang, Maalang.” A Yeesɔ kɔɔ wu tɔɔ, “N ti dɔng mɔɔ ruu kpang kɔ doori. Dita, mɔɔ palɛ vuu shi kpang takpang.”

Yeesɔ kɔ yakɛ koo

¹² A Yeesɔ rang zang Farisi yee tɔkn tɔɔ, “Nkɔ yakɛ koo, zang ɓɔɔ nɛɛ dũ̀ng m ra ka nɔng ɓɔɔ tɔɔ katɔ kpang. Walɛ ɓi nɔng yakɛnang ɓɔɔ a zang suru bii ɓɛɛ kɔ jong.”

¹³ A zang Farisi ri kɔɔ wu nɛɛ, “Mɔɔ kɔɔ ruu ka yuu ɓaaɓɛ. Ka ruu nɔngkɔ, ruu ɓɔɔ mɔɔ kɔ̀ɔ ka yuu ɓaaɓɛ ɓi niizang kpang.”

¹⁴ Yeesɔ kasɛ ri nyaa tɔɔ, “Naa n kɔɔ ruu doo ka yuu mɛɛ, ruu mɛɛ ɓi niizang kɔ nwani, ka ruu ɓɔɔ, n zi nɔng ɓɔɔ n a nɛɛ mani tɔ, n ti zi nɔng ɓɔɔ n daa gn tɔ ɓɛɛ. Nɔɔ zi nɔng ɓɔɔ n a nɛɛ mani manɛ kpang, nɔɔ ti zi nɔng ɓɔɔ n daa gn ɓɛɛ kpang.

¹⁵ Nɔɔ jɛ̃ɛ zang ruu manɛ naa ɓɔɔ shɔnzang jɛ̃ɛ ɓɛɛ. N jɛ̃̀ɛ zang ruu m kpang.

¹⁶ Naa n nɛɛ jɛ̃ɛ zang ruu doo katɔ, ruu jɛ̃ɛnang mɛɛ ɓi ɓɔɔ niizang, ka ruu ɓɔɔ, n jɛ̃ɛ zang ruu m ka bm kpang ɓɛɛ. Daa mɛɛ ɓɔɔ shong m, ɓi nɛɛ n ning.

¹⁷ Ka yeti Labeenang nyaa dannang manɛ, zang beeyi nɛɛ naa zang ziti ri kɔɔ nyaa gbete, ruu ɓarɛ ɓi niizang kɔ nwani.

¹⁸ N kɔɔ ruu ka yuu mɛɛ, a Daa ɓɔɔ shong m, ti kɔɔ ruu jong ka yuu mɛɛ.”

¹⁹ A ri hɛ̃ɛ wu nɛɛ, “Daa ɓaaɓɛ ɓu kiya?” Yeesɔ kasɛ ri nyaa tɔɔ, “Nɔɔ zi m kpang, nɔɔ ti zi Daa mɛɛ doo kpang kɔ. Naa nɔɔ nɛɛ zi m tɔ, nɔɔ nɛɛ ti zi Daa mɛɛ tɔ kɔ doori.”

²⁰ Kɔɔ ruu keɓe, bɛ̀ɛ́ tusu zang vuu ka yeti Gãa Laa, naabm nɛɛ nɔng ɓɔɔ zang tɛ̃ɛ saka ɓɔɔ zang á Laa ɓɛɛ. A zang ɓɔɔ yi wu kaa takpang, ka ruu ɓɔɔ, laa ɓiɓɛ à gn kpang ɓɛɛ.

Yeesɔ kɔɔyi nɛɛ, nɔɔ dàa nɔng ɓɔɔ n dáa ɓɛɛ kpang

²¹ Yeesɔ kɔɔ zang ɓɔɔ ri kpalɛ zɔɔ nɛɛ, “N daa kaa tɔ, nɔɔ naa kãa m, nɔɔ vɔ nɛɛ vuu shi kpang manɛ ning. Nɔng ɓɔɔ n daa gn, nɔɔ daa manɛ kpang.”

²² A rɛɛ zang bang bang zang Yahudi ri hɛ̃ɛlɛ nɛɛ, “Wee kɔɔyi nɛɛ ruu daa nɔng ɓɔɔ wu daa kpang ɓɛɛ, nyɔ yuu ɓiɓɛ kaa vɔrɔ ya?”

²³ Yeesɔ kɔɔ ri tɔɔ, “Nɔɔ manɛ zang koo keɓe, n a m nɛɛ lapa. Nɔɔ rɛ̃rɛ manɛ ka yuu vuu ɓɔɔ ka koo keɓe, n rɛ̃rɛ m nɔngkɔ kpang.

²⁴ Ka ruu nɔngkɔ, n kɔ̀ɔ́ nɔɔ nɛɛ nɔɔ vɔ nɛɛ vuu shi kpang manɛ ning. Nɔɔ nɛɛ shing danggn nɛɛ nkɔ zang ɓɔɔ n tɔɔ, nkɔ wukɔ kpang, nɔɔ naa vɔ nɛɛ vuu shi kpang manɛ.”

²⁵ Ri hɛ̃ɛ wu nɛɛ, “Mɔkɔ ɓu wiya?” Yeesɔ kɔɔ ri tɔɔ, “Nkɔ zang ɓɔɔ n kɔɔ nɔɔ doo ka tĩng nɛɛ nkɔ wukɔ ɓɛɛ.

²⁶ Vuu ɓɔɔ n kɔ̀ɔ́ ka yuu manɛ kagn dɔɔli, ɓɔɔ n dɔng nɔɔ ruu ka yuu ɓiɓɛ ɓɛɛ. Zang ɓɔɔ shong m suu sèé ɓi kpang, n ti kɔɔ zang koo keɓe m vuu ɓɔɔ n tãa ka nyaa ɓiɓɛ ɓɛɛ.”

²⁷ Ri zi ɓarɛ kpang nɛɛ Yeesɔ rang ri yee ɓi ka yuu Laa ɓɔɔ wukɔ Daa ɓɛɛ kpang.

²⁸ Ka ruu nɔngkɔ, kɔɔ ri nɛɛ, “Nɔɔ nɛɛ wisi m, ɓɔɔ n Jaa Shɔnzang tɔ ka yuu laa, nɔ́ɔ naa zi kati nɛɛ nkɔ wukɔ. Tɔ̀ɔ, nɔ́ɔ zi kati nɛɛ n palɛ vuu gbete nɛɛ kaka yuu mɛɛ kpang. N kɔɔ m vuu ɓɔɔ Daa kpɛ̃ɛrɛ m nɛɛ n kɔ̀ɔ ɓɛɛ.

²⁹ Zang ɓɔɔ shong m ɓi nɛɛ n, yaa m ka bm kpang, ka ruu ɓɔɔ, n palɛ vuu ɓɔɔ wu kasɛ diki, diki ɓɛɛ.”

³⁰ Zang dɔɔli ɓɔɔ ri tãa vuu kɔ Yeesɔ kɔɔrɔ ɓee, ri shing danggn ka bii ɓiɓɛ.

Zang ɓɔɔ rikɔ zɔ̃ng Ibirayi ɓɛɛ

³¹ Yeesɔ kɔɔ zang Yahudi ɓɔɔ ri shing danggn tɔ, ka bii ɓiɓɛ nɛɛ, “Nɔɔ nɛɛ yiti ruu kɔ n tusu nɔɔ ɓee gbãng gbãng, nɔɔ zang ɓɔɔ ri mantɛ vuu ka bii mɛɛ ɓɔɔ niizang kɔ.

³² Nɔɔ naa zi ruu ɓɔɔ niizang katɔ, ruu ɓɔɔ niizang keɓe, ti yaa nɔɔ naa katɔ.”

³³ Ri kasɛ wu nyaa nɛɛ, “Ruu ɓuru zɔ̃ng Ibirayi, ruu nwàng jaafoo zang ɓɔɔ, ɓuru gngn kpang. Mɔɔ kɔɔ biya nɛɛ zang yaa ruu naa katɔ viya?”

³⁴ Yeesɔ kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, zang ɓɔɔ nɛɛ huu shoo nɛɛ vuu shi kpang palɛnang, ɓi kaa jaafoo vuu shi kpang.

³⁵ Jaafoo nwáng ɓi ka gãa ɓɔɔ wu kagn dòndòng kpang, ɓi jaa kɔ nwang shɛ̃ɛning.

³⁶ Ka ruu nɔngkɔ, Jaa nɛɛ yaa nɔɔ naa tɔ, zang yaa nɔɔ tɔ dòndòng.

³⁷ N zi tɔ nɔɔ manɛ zɔ̃ng Ibirayi. A ka ruu vi nɔɔ kãa gbalang nɛɛ nɔɔ nyɔ m vɔrɔ viya? Ka ruu ɓɔɔ, nɔɔ ta ruu mɛɛ ka yeti manɛ kpang ɓɛɛ.

³⁸ N kɔɔ nɔɔ m vuu ɓɔɔ n zi ka nɔng Daa mɛɛ ɓɛɛ. A nɔɔ palɛ manɛ vuu ɓɔɔ nɔɔ tãa ka nyaa daa manɛ ɓɛɛ.”

³⁹ Ri kasɛ wu nyaa tɔɔ, “Daa ɓuru ɓi Ibirayi.” Yeesɔ kasɛ ri nyaa tɔɔ, “Naa nɔɔ nɛɛ wujɛ Ibirayi, nɔɔ nɛɛ palɛ vuu ɓɔɔ Ibirayi pálɛ́ ɓɛɛ.

⁴⁰ Kãntang keɓe, nɔɔ kãa gbalang nɛɛ nɔɔ nyɔ m vɔrɔ, ɓɔɔ nkɔ zang ɓɔɔ kɔɔ nɔɔ ruu ɓɔɔ niizang ɓɔɔ n tãa ka nyaa Laa ɓɛɛ. Ibirayi pálɛ̀ rɛɛ vuu ɓɔɔ naa weɓe ɓi kpang.

⁴¹ Nɔɔ pálɛ̀ manɛ rɛɛ vuu ɓɔɔ daa manɛ pálɛ́ ɓɛɛ.” Ri kasɛ wu nyaa tɔɔ, “Laa nɛɛ yuu ɓiɓɛ, ɓi wukɔ Daa ɓuru gbete. Zang yi ruu ɓuru jaa nɔng zaakn kpang.”

⁴² Yeesɔ kɔɔ ri tɔɔ, “Naa Laa kɔ nɛɛ daa manɛ niizang, nɔɔ nɛɛ kàsɛ́ ruu mɛɛ katɔ, ka ruu ɓɔɔ, n nwangnɛ bii Laa kɔ, n a ka nihn ɓɛɛ. N a m̌ anang yuu mɛɛ kpang, wukɔ shong m.

⁴³ Nɔɔ zi vuu ɓɔɔ n kɔɔ ɓɛɛ kpang ka ruu viya? Ɓi ka ruu ɓɔɔ nɔɔ kasɛ nɛɛ nɔɔ dũ̀ng vuu ɓɔɔ n kɔɔ ɓɛɛ kpang ɓɛɛ.

⁴⁴ Nɔɔ manɛ wujɛ daa manɛ sheetang, a nɔɔ ti kasɛ manɛ nɛɛ nɔ́ɔ palɛ vuu ɓɔɔ daa manɛ kasɛ ɓɛɛ. Daa manɛ nyɔ̀kɔ̀ zang vɔrɔ ɓi doo ka tĩng. Ruu ɓiɓɛ hãa ɓi kagn nɛɛ ruu ɓɔɔ niizang kpang. Ka ruu ɓɔɔ, niizang ɓi kagn yeti ɓiɓɛ kpang ɓɛɛ. Náa suu sèé, palɛ ɓi vuu ɓɔɔ ka yeti ɓiɓɛ kɔ nwani, ka ruu ɓɔɔ ɓi zang sèé, a sèé ti nwàng ɓi nɛɛ bìí ɓiɓɛ kɔ nwani ɓɛɛ.

⁴⁵ “N kɔ̀ɔ́ nɔɔ m ruu ɓɔɔ niizang, ka ruu nɔngkɔ, nɔɔ shíng danggn ka bii mɛɛ kpang.

⁴⁶ Zang gbete kagn teteng manɛ, ɓɔɔ túsù vuu shi kpang, ɓɔɔ nɔɔ tɔɔ n palɛ ɓɛɛ ya? N nɛɛ kɔ̀ɔ́ vuu ɓɔɔ niizang, a nɔɔ shing danggn ka bii mɛɛ kpang ka ruu viya?

⁴⁷ Zang ɓɔɔ ɓi zang Laa, ɓaa shoo ɓi ka Ruu Laa. Nɔɔ manɛ zang Laa kpang, ka ruu nɔngkɔ, nɔɔ kasɛ shoo ɓaanang ka ruu mɛɛ kpang.”

Yeesɔ ɓa yuu Ibirayi katɔ

⁴⁸ Zang Yahudi ri kasɛ wu nyaa tɔɔ, “Ruu ɓɔɔ ruu kɔ̀ɔyi nɛɛ mɔɔ zang tipi Samariya, suru shi kpang ti kagn bii ɓaaɓɛ, niizang kɔ nwani kɔ.”

⁴⁹ Yeesɔ kɔɔ ri tɔɔ, “Suru shi kpang ɓi ka bii mɛɛ kpang. N á m Daa mɛɛ bannang, nɔɔ a m bannang manɛ kpang.

⁵⁰ N ti kã̀á wu yuu mɛɛ bannang kpang. Zang ɓɔɔ kãa m ɓɛɛ ɓi kagn, wukɔ ti naa jɛ̃ɛ ruu ɓiri.

⁵¹ N kɔ̀ɔ́ nɔɔ, ruu ɓɔɔ niizang kɔ nwani, zang ɓɔɔ nɛɛ yiti ruu mɛɛ ka yeti ɓiɓɛ vɔ kpang dòndòng.”

⁵² Ɓɔɔ zang Yahudi ri tãa naa weɓe, ri tɔɔ, “Ruu zi tɔ kati, suru shi kpang kagn bii ɓaaɓɛ. Ibirayi vɔ tɔ, nɛɛ rɛɛ zang nyaa shonang Laa piti, mɔɔ kɔɔ ruu ɓáa nɛɛ zang ɓɔɔ nɛɛ yiti ruu ɓaaɓɛ ka yeti ɓiɓɛ, vɔ kpang ya?

⁵³ Mɔɔ ɓa dabang ɓuru Ibirayi ɓɔɔ vɔ ɓɛɛ, ɓu kaa tɔ ya? Rɛɛ zang nyaa shonang Laa, ri ti vɔlɔ jong. Mɔɔ ɓaa ɓu ka wiya?”

⁵⁴ Yeesɔ kasɛ ri nyaa tɔɔ, “Naa n á yuu mɛɛ bannang, bannang keɓe ɓi ɓɔɔ waati ɓɛɛ. Zang ɓɔɔ a m bannang ɓi Daa mɛɛ, zang ɓɔɔ nɔɔ tɔɔ wukɔ Làá manɛ ɓɛɛ.

⁵⁵ Nɔɔ zi wu gngn kpang, n zi wu m tɔ. Naa n kɔɔyi nɛɛ n zi wu kpang, n nwáng kaa zang sèé naa nɔkɔ. N zi wu m tɔ, n ti ta nyaa ɓiɓɛ kpang.

⁵⁶ Daa manɛ Ibirayi tãa tĩnang dɔɔli, ka ɓɔɔ Laa kɔɔ wu nɛɛ wu zi diki ɓɔɔ n a kagn ɓɛɛ. Ti zirɛ a tãa tĩnang dɔɔli.”

⁵⁷ Ri kɔɔ wu nɛɛ, “Saa ɓaaɓɛ daa laa ziti tu kopi gn kpang, naa mɔɔ nɛɛ zi Ibirayi tɔ ya?”

⁵⁸ Yeesɔ kasɛ ri nyaa tɔɔ, “N kɔɔ nɔɔ ruu ɓɔɔ niizang kɔ nwani, ɓɔɔ zang yi Ibirayi bɛ̀ɛ́ n m kaa gn kɔ nwani.”

⁵⁹ Ka ruu nɔngkɔ, ri yakɛ tari nɛɛ ri luku wu kaa tɔ. Waasɛ yuu ɓiɓɛ, nwang nɛɛ nwĩiri yaa Gãa Laa.