Yɔhana 3 - Nyaa Shɔɔ Ɓɔɔ Laa a Ɓɛɛ

Yeesɔ nɛɛ Nikodimu

¹ Yɔɔ zang Farisi ɓɔɔ kagn zang ɓaa wu nɛɛ Nikodimu. Nikodimu ɓi ka teteng, zang bang bang zang Yahudi.

² Yɔɔ keɓe, diki ɓɔɔ kagn daa ka bìí Yeesɔ nɛɛ zĩi. Kɔɔ Yeesɔ tɔɔ, “Maalang, ruu zi ɓuru tɔ nɛɛ mɔɔ ɓaa maalang ɓɔɔ a nɛɛ bii Laa ɓɛɛ, ka ruu ɓɔɔ, naa wu zang ɓɔɔ Laa nɛɛ wu kpang, zang ɓɔɔ zunung vuu ɓɔɔ zang zirɛ zang mã naa ka danggn kɔ mɔɔ pálɛ̀ ɓɛɛ gbete kpang.”

³ Yeesɔ kasɛ wu nyaa tɔɔ, “N kɔ̀ɔ́ mɔɔ ruu ɓɔɔ niizang kɔ nwani, naa zang yi mɔɔ tɔkn kpang, mɔɔ daa nɔng ɓɔɔ Laa naa roo kpanti kpang.”

⁴ Nikodimu hɛ̃ɛ wu tɔɔ, “Zang yi zang biya tɔkn, zang nɛɛ bang tɔ viya? Zang tú tɔkn ka yeti nàá zang, tɔ̀ɔ, nàá zang wu yi zang tɔkn daa kaa dakn ziti ya?”

⁵ Yeesɔ kɔɔ wu tɔɔ, “N kɔ̀ɔ́ mɔɔ ruu ɓɔɔ niizang kɔ nwani, naa zang yi zang nɛɛ mii, a ɓɔɔ nɛɛ bii Suru Laa kpang, zang keɓe daa nɔng ɓɔɔ Laa naa roo kpanti ɓi kpang.

⁶ Zang ɓɔɔ shɔnzang yirɛ, ɓi shɔnzang, zang ɓɔɔ Suru Laa yirɛ, ɓi ti zang suru.

⁷ Mɔ́ɔ mã naa ka danggn, ka ruu ɓɔɔ, n kɔɔ mɔɔ n tɔɔ, zang wu yi nɔɔ tɔkn ɓɛɛ kpang.

⁸ Jasung rarɛ daa ka nɔng ɓɔɔ wu kasɛ ɓɛɛ. Mɔɔ tãa naa ɓɔɔ wu rãa ɓɛɛ, a mɔɔ zi nɔng ɓɔɔ a nɛɛ mani, nɛɛ nɔng ɓɔɔ wu daa ɓɛɛ kpang. Zang piti ɓɔɔ Suru Laa yi wu, nwàng ɓi doo nɔngkɔ.”

⁹ Nikodimu hɛ̃ɛ wu tɔɔ, “Vuu keɓe nwáng lɛ̀ɛ́ bɛ̀ɛ́ nɔngkɔ viya?”

¹⁰ Yeesɔ kasɛ wu nyaa tɔɔ, “Ɓɔɔ mɔkɔ zang ɓɔɔ tusu zang Isirela vuu kɔ nwani, mɔɔ zi vuu keɓe doo kpang nɛɛ mani ya?

¹¹ N kɔ̀ɔ́ mɔɔ ruu ɓɔɔ niizang kɔ nwani, rùu ráng yee ɓuru, ka yuu vuu ɓɔɔ ruu zi tɔ ɓɛɛ. Ruu ti kɔ̀ɔ́ ɓuru vuu ɓɔɔ ruu zi nɛɛ jĩng ɓuru ɓɛɛ, a mɔɔ ta vuu ɓɔɔ ruu kɔɔ ɓɛɛ kpang.

¹² N kɔ̀ɔ mɔɔ ruu ka yuu vuu ɓɔɔ ka koo keɓe, mɔɔ shing danggn kagn kpang, a naa n kɔɔ mɔɔ ruu kaa yuu vuu ɓɔɔ ka lapa, mɔɔ shing danggn ɓi kaa biya?

¹³ Zang ɓɔɔ vang gngn daa ka lapa kpang, ɓi nkɔ Jaa Shɔnzang ɓɔɔ n shooro nɛɛ lapa kɔ shɛ̃ɛning.”

¹⁴ Naa ɓɔɔ Musa wisi sɔkɔ ɓɔɔ zang palɛ zang kãngtɛ ka yuu laa paa ka waala, zang naa wisi m ɓɔɔ n Jaa Shɔnzang paa doo nɔngkɔ.

¹⁵ Tɔ̀ɔ, zang piti ɓɔɔ shing danggn ka bii mɛɛ, wu walɛ suru bii ɓɔɔ waa nyaa kpang kati.

¹⁶ Laa kasɛ zang ɓɔɔ ka koo keɓe dɔɔli, ka ruu nɔngkɔ, shong nyaa nɛɛ Jaa gbete ɓiɓɛ. Nɛɛ tɔ̀ɔ, zang ɓɔɔ nɛɛ shing danggn ka bii ɓiɓɛ wu shaarɛ kpang, wu wàlɛ̀ suru bii ɓɔɔ waa nyaa kpang kɔ jong.

¹⁷ Ka ruu ɓɔɔ, Laa shɔng Jaa ɓiɓɛ ka koo nɛɛ wu naa jɛ̃ɛ zang koo ruu kpang, nɛɛ wu naa ta ɓi yuu zang koo kɔ jong ɓɛɛ.

¹⁸ Zang piti ɓɔɔ nɛɛ shing danggn ka bii Jaa, zang jɛ̃ɛ wu ruu ɓi kpang. Zang ɓɔɔ nɛɛ shing danggn ka bii Jaa kpang, zang dɔng wu ruu ɓi tɔ. Ka ruu ɓɔɔ shing danggn ka bii Jaa gbete Laa kpang ɓɛɛ.

¹⁹ Laa dɔ̌ng zang ɓɔɔ bɛ̃ɛ Jaa gbete ɓiɓɛ ruu ka ruu ɓɔɔ, Laa shɔng nɔng yakɛnang ka koo, a zang ri kasɛ nɔng ɓɔɔ tɔ̀ɔ katɔ kɔ jong, ɓa nɔng yakɛnang ɓɛɛ. Ka ruu ɓɔɔ, bɛ̀ɛ́ ri pálɛ̀ ɓarɛ vuu shi kpang kɔ nwani ɓɛɛ.

²⁰ Zang ɓɔɔ pálɛ̀ vuu shi kpang, kasɛ ruu nɔng yakɛnang ɓi kpang. À nɔng ɓɔɔ yakɛ katɔ ɓi kpang, ka ruu ɓɔɔ, kasɛ nɛɛ zang zi vuu shi kpang ɓiɓɛ kpang ɓɛɛ.

²¹ Zang ɓɔɔ palɛ vuu ɓɔɔ niizang ɓɛɛ, á ɓi katɔ ka nɔng ɓɔɔ yakɛ katɔ ɓɛɛ, tɔ̀ɔ, zang zi kati nɛɛ vuu ɓɔɔ wu pálɛ̀, ɓi Laa yi wu naa kagn.

Yɔhana rang yee ka yuu Yeesɔ

²² Kaa nɛɛ knti, Yeesɔ nɛɛ zang ɓɔɔ ri mantɛ vuu ka bii ɓiɓɛ, ri daa ka tipi Yahudi. Ri daa nwang ka nɔngkɔ, ri pàlɛ́ zang batizima.

²³ Yɔhana ti pàlɛ́ zang batizima ɓi jong ka gari Ayinɔng ɓɔɔ nɛɛ gari Salima naabm ɓɛɛ. Ka ruu ɓɔɔ mii kagn nɔng dɔɔli ɓɛɛ. Zang ri daarɛ ka bii ɓiɓɛ a ti palɛ ri batizima.

²⁴ (Bɛɛ zang loo Yɔhana gn ka sãa kpang.)

²⁵ Zang ɓɔɔ ri mantɛ vuu ka bii Yɔhana ɓɔ̀ɔ, ri gáa tɔɔsung nyaa laanang nɛɛ yɔɔ Yahudi ɓɔɔgn ka ruu bii sɔɔnang naa ɓɔɔ dáa ɓarɛ tùsù ri ɓɛɛ.

²⁶ A ri daa ka bii Yɔhana ri kɔɔ wu nɛɛ, “Maalang, yɔɔ ɓɔɔ ɓeleng mɔɔ nɛɛ wu ka rang Urudung dang, ɓɔɔ mɔɔ kɔɔ rúu tɔ̃ɔ ka yuu ɓiɓɛ ɓɛɛ, pàlɛ́ zang batizima kana. Zang ri daarɛ kana bii ɓiɓɛ nandon.”

²⁷ A Yɔhana kasɛ ri nyaa tɔɔ, “Laa nɛɛ a zang vuu kpang, zang walɛ vuu ɓɔɔ kpang.

²⁸ Ɓeleng n kɔɔ m nɔngkɔ, nɔɔ ti tãa tɔ, N tɔɔ, ‘Ɓi nkɔ Kirisi kpang, Laa shong m ka tĩng ɓiɓɛ.’

²⁹ Sinyɛ ɓeevɛ ɓi wukɔ zang sinyɛ. Sinyɛ ɓeevɛ ɓeesang ɓɔɔ shiiyi, ɓaa shoo, tãa tĩnang dɔɔli nɛɛ tãa yee sinyɛ ɓeevɛ tɔ ɓɛɛ. N tãa tĩnang m doo nɔngkɔ. Tĩnang mɛɛ ti daa ɓi tɔ kiiri.”

³⁰ Bannang ɓiɓɛ daa ɓi ditɔ nɛɛ tĩng, n ti gbãayu m kaa nɛɛ knti kɔ jong.

Zang ɓɔɔ a nɛɛ lapa ɓɛɛ

³¹ Zang ɓɔɔ a nɛɛ lapa wukɔ ɓa zang piti, zang ɓɔɔ ɓi zang koo yi wu, ɓi ɓɔ̀ɔ́ koo. Ti ráng yee ɓi naa zang koo keɓe. Zang ɓɔɔ a ɓi nɛɛ lapa wukɔ ɓa zang ɓi piti.

³² Zang keɓe rang yee ka yuu vuu ɓɔɔ wu zirɛ, a ti tãa ɓɛɛ. A zang ɓɔɔ ta vuu ɓɔɔ wu kɔɔ ɓɛɛ, kagn gbete kpang.

³³ Zang ɓɔɔ nɛɛ ta rúu ɓiɓɛ, tusu zang tɔ, nɛɛ vuu ɓɔɔ Laa kɔɔ ɓɛɛ ɓi niizang.

³⁴ Ka ruu ɓɔɔ, zang ɓɔɔ Laa shongnɛ, rang ɓi doo yee Laa kɔ ɓɛɛ. Laa a wu Suru ɓiɓɛ, di nyaa kpang.

³⁵ Daa kasɛ Jaa katɔ, a yaa vuu piti ka naa ɓiɓɛ.

³⁶ Zang ɓɔɔ nɛɛ shing danggn ka bii Jaa, wàlɛ̀ Suru bii ɓɔɔ waa nyaa kpang tɔ. Zang ɓɔɔ nɛɛ bɛ̃ɛ Jaa wàlɛ̀ suru bii ɓɔɔ waa nyaa kpang ɓi kpang. Jĩng dannang kagn yuu ɓiɓɛ ning.