Yɔhana 21 - Nyaa Shɔɔ Ɓɔɔ Laa a Ɓɛɛ

Yeesɔ nwang nyaa ka zang manziti, ka teteng zang ɓɔɔ ri mantɛ vuu ka bii ɓiɓɛ ɓɛɛ

¹ Nɛɛ knti, Yeesɔ nwang nyaa ka bii zang ɓɔɔ ri mantɛ vuu ka bii ɓiɓɛ, ɓɔɔ bɛ̀ɛ́ ka nyaa waapo ɓɔɔ zang ɓaa nɛɛ Tiberiya ɓɛɛ. Tusu ri yuu ɓiɓɛ naa weɓe.

² Siman Bituru nɛɛ Tooma ɓɔɔ zang ɓaa wu nɛɛ Jaa bãnang nɛɛ Natanalu, yɔɔ gari Kaana ɓɔɔ ka tipi Galili ɓɛɛ, nɛɛ wujɛ Zebedi ziti, a ɓɔɔ zang ɓɔɔ ri mantɛ vuu doo ka bii Yeesɔ kɔ, ri ziti, ri nɛɛ zɔɔ ka nɔng gbete.

³ Siman Bituru kɔɔ ri tɔɔ, “N daa dòo jaazĩi yinang.” Ri kɔɔ wu tɔɔ, “Ruu daa nɛɛ mɔɔ ning.” Ri dàá kaa nɛɛ wu ka yeti tonsi. Ri tɛ̃ɛ jang nɛɛ zĩi sasak nɔng gãntɛ nɛɛ mani, ri yi vuu ɓɔɔ kpang.

⁴ Bɛ̀ɛ́ laa ĩi naa kana, Yeesɔ naa shii ka nyaa waapo. Zang ɓɔɔ ri mantɛ vuu ka bii ɓiɓɛ ri zi kaa takpang nɛɛ Yeesɔ kɔ kpang.

⁵ A hɛ̃ɛ ri tɔɔ, “Rɛɛ masang, nɔɔ yi jaazĩi kpang ya?” Ri kasɛ wu tɔɔ, “Ruu yi jaazĩi wu gbete kpang.”

⁶ A kɔɔ ri tɔɔ, “Nɔɔ tɛ̃ɛ jang manɛ ka kagn tonsi ɓɔ̀ɔ́ nakn nɔɔ yi jaazĩi katɔ.” A ri tɛ̃ɛ jang kati, ri zunung ɓɔɔ ri gɔ̃rɛ ri atɛ ka yeti tonsi takpang, ka ruu ɓɔɔ, yi jaazĩi tɔ dɔɔli ɓɛɛ.

⁷ Yɔɔ ɓɔɔ mantɛ vuu ka bii Yeesɔ ɓɔɔ Yeesɔ kasɛ wu dɔɔli ɓɛɛ, kɔɔ Bituru tɔɔ, “Ɓi Kpanti Yeesɔ.” Ɓɔɔ Bituru tãayi nɛɛ ɓi Kpanti, lu fɔ̃ɔrɔ ɓɔɔ biling ɓiɓɛ ka bii (ka ruu ɓɔɔ, bɛ̀ɛ́ tùlù fɔ̃ɔrɔ katɔ ɓɛɛ.) A shɛ̃ɛ ka yeti mii nɛɛ wu daa ka bii Yeesɔ.

⁸ Zang ɓɔɔ ri mantɛ vuu ka bii Yeesɔ ɓɔɔ nimbang kaɓa, rikɔ a ka nyaa dang gãnggãng ka yeti tonsi. Ri gɔ̃ jang ɓɔɔ jaazĩi yi nyaa katɔ ka naa ning. Bɛɛ ri bee tɔ̀ɔ́ nɛɛ nyaa waapo kpang, nàá zang dĩi doo laa maani kɔ nwani.

⁹ Ri a tɔ nyaa waapo, a ri zirɛ zang tèe waa tɔ nɛɛ shekere. Jaazĩi kagn yuu waa, a borodi ti kagn nɔng.

¹⁰ Yeesɔ kɔɔ ri tɔɔ, “Nɔɔ atɛ jaazĩi ka teteng jaazĩi ɓɔɔ nɔɔ yi kãntang ɓɛɛ.”

¹¹ Siman Bituru vang tonsi daa gɔ̃ jang, a nɛɛ mani ka nyaa gãnggãng. Jang yi nyaa katɔ nɛɛ jaazĩi bang bang, nung laa maani tu laa ziti tu kopi tu taati. Jang yi nyaa katɔ naa weɓe, a lɔɔsɔ kaa takpang.

¹² Yeesɔ kɔɔ ri tɔɔ, “Nɔɔ arɛ nɔɔ shaa vuu shaanang.” A zang gbete ka teteng zang ɓɔɔ ri mantɛ vuu ka bii ɓiɓɛ, hɛ̃ɛ wu kaa tɔ̀ɔ́ nɛɛ “Mɔkɔ wiya?” Kpang, ka ruu ɓɔɔ ri zi tɔ nɛɛ ɓi Kpanti Yeesɔ kɔ ɓɛɛ.

¹³ Yeesɔ arɛ naa tuu borodi, a ri, a á ri jaazĩi doo nɔngkɔ.

¹⁴ Ɓu doo ɓɔɔ Yeesɔ yupaa nɛɛ sàa, nwang nyaa tɔ ka bii zang ɓɔɔ ri mantɛ vuu ka bii ɓiɓɛ, daa kaa nɛɛ weɓe doo taati.

Yeesɔ rang Bituru yee

¹⁵ Ri hangsɛ vuu shaanang tɔ, a Yeesɔ ràng Siman Bituru yee tɔɔ, “Siman jaa Yɔhana, mɔɔ kasɛ m ɓa ɓɔɔ rɛɛ zang keɓe ri kasɛ m ɓɛɛ katɔ ya?” A kasɛ Yeesɔ nyaa tɔɔ, “Nn, Kpanti mɔɔ zi tɔ, n kasɛ mɔɔ katɔ.” Yeesɔ kɔɔ wu tɔɔ, “Hnti zang mɛɛ.”

¹⁶ Yeesɔ kɔɔ wu tɔkn daa kaa doo ziti tɔɔ, “Siman jaa Yɔhana, mɔɔ kasɛ m katɔ ya?” Kasɛ nyaa tɔɔ, “Nn, Kpanti mɔɔ zi tɔ, n kasɛ mɔɔ katɔ.” Yeesɔ kɔɔ wu tɔɔ, “Gãng jĩng ka zang mɛɛ”,

¹⁷ Yeesɔ kɔɔ tɔkn daa kaa doo taati tɔɔ, “Siman jaa Yɔhana mɔɔ kasɛ m katɔ ya?” Yeti Bituru lasɛ, ka ruu ɓɔɔ, Yeesɔ hɛ̃ɛ wu daa doo taati nɛɛ, “Mɔɔ kasɛ m katɔ ya?” ɓɛɛ. A kɔɔ Yeesɔ tɔɔ, “Kpanti, mɔɔ zi vuu tɔ nandon, mɔɔ zi tɔ nɛɛ n kasɛ mɔɔ katɔ.” Yeesɔ kɔɔ wu tɔɔ, “Hnti zang mɛɛ.”

¹⁸ “N kɔ̀ɔ́ mɔɔ ruu ɓɔɔ niizang kɔ nwani, mɔɔ nɛɛ doo jasang, mɔɔ kpalɛ bii nɛɛ yuu ɓaaɓɛ, mɔɔ daa nɔng ɓɔɔ mɔɔ kasɛ ɓɛɛ. Mɔɔ nɛɛ kpɛ̃ɛ tɔ, mɔɔ dĩi naa, zang ɓɔɔgn gbarɛ mɔɔ bii, wu tuu mɔɔ, wu daa nɛɛ mɔɔ ka nɔng ɓɔɔ mɔɔ kasɛ kpang ɓɛɛ.”

¹⁹ (Yeesɔ kɔɔ vuu keɓe nɛɛ tɔɔ wu tusu naa ɓɔɔ Bituru naa vɔrɛ, tɔ̀ɔ, zang dɔ̀ɔ Laa kaa gn ɓɛɛ.) Yeesɔ hangsɛ ruu keɓe kɔɔnang tɔ, a kɔɔ wu tɔɔ, “Palɛ vuu ɓɔɔ n kasɛ ɓɛɛ.”

Yeesɔ nɛɛ yɔɔ ɓɔɔ mantɛ vuu ka bii ɓiɓɛ, ɓɔɔ wu kasɛ wu katɔ ɓɛɛ

²⁰ Bituru raa jĩng ka knti, a zi yɔɔ ɓɔɔ mantɛ vuu ka bii Yeesɔ ɓɔɔ Yeesɔ kasɛ wu dɔɔli ɓɛɛ. Ɓɔɔ tiki ka danggn Yeesɔ naabm ka diki ɓɔɔ ri shaa vuu shaanang ɓɛɛ. A ti hɛ̃ɛ Yeesɔ tɔɔ, “Kpanti, wi naa nyɔ yuu ɓaaɓɛ wiya?”

²¹ Ɓɔɔ Bituru zi wu, hɛ̃ɛ Yeesɔ tɔɔ, “A yɔɔ keɓe zang naa palɛ wu ɓi viya?”

²² Yeesɔ kasɛ wu nyaa tɔɔ, “Naa n kasɛ nɛɛ wu vɔ kpang, n gbãayu nɛɛ mani, ruu ɓaa hãa kagn ya? Palɛ ɓaa vuu ɓɔɔ n kasɛ ɓɛɛ.”

²³ Ruu keɓe, baa teteng zang ɓɔɔ ri mantɛ vuu ka bii Yeesɔ nɛɛ yɔɔ keɓe vɔ ɓi kpang. Yeesɔ kɔɔ ɓi nɛɛ yɔɔ vɔ kpang, kpang, kɔɔ ɓi nɛɛ, “Naa n kasɛ nɛɛ wu vɔ kpang, ń gbãayu nɛɛ mani, ruu ɓaaɓɛ hãa kagn ya?”

²⁴ Yɔɔ ɓɔɔ mantɛ vuu ka bii Yeesɔ keɓe kɔ kɔɔrɔ vuu keɓe, wukɔ ti beeyi ka labeenang. Ruu ti zi tɔ, vuu ɓɔɔ wu kɔ̀ɔ ɓɛɛ ɓi niizang kɔ nwani.

²⁵ Vuu ɓɔɔ Yeesɔ palɛ ɓɛɛ ɓɔɔ kagn dɔɔli. Naa zang nɛɛ bee katɔ gbete gbete ka labeenang, koo keɓe nandon daa naa ɓɔɔ zang tɛ̃ɛ rɛɛ labeenang ɓɔɔ zang beere kagn ɓɛɛ kpang.