Yɔhana 12 - Nyaa Shɔɔ Ɓɔɔ Laa a Ɓɛɛ

Zang tũuru Yeesɔ nung ka Bɛtani

¹ Diki nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ, yaa kaa mangbete, a Yeesɔ daa ka Bɛtani. Daa ka gãa Liyazaru, yɔɔ ɓɔɔ wu wisi paa nɛɛ saa ɓɛɛ.

² Zang nwãa wu vuu shaanang laarang. Mata kɔ basɛ ri vuu shaanang. Liyazaru ti ka teteng zang ɓɔɔ ri shaa vuu shaanang nɛɛ Yeesɔ ɓɛɛ.

³ A Marayamu tuu nung ɓɔɔ shaa nyaa dɔɔli, ɓɔɔ ti a sɛ̃ɛ tɔ̃ɔ, ɓɔɔ zang palɛ nɛɛ dĩiri laa ɓɔɔ zang ɓaa nɛɛ naadi kɔ shɛ̃ɛning ɓɛɛ. Túu nung, a tungku ka doo Yeesɔ, ti alɛ doo bìí nɛɛ suuyuu ɓiɓɛ. Sɛ̃ɛ nung ta yeti gãa kaa gbayi gbayi.

⁴ Zang gbete ka teteng zang ɓɔɔ ri mantɛ vuu ka bii Yeesɔ, ɓɔɔ zang ɓaa wu nɛɛ Yahuda Isikariyoti, ɓɔɔ wukɔ naa nyɔ yuu Yeesɔ, lasɛ yeti ka ruu vuu ɓɔɔ Marayamu palɛ ɓɛɛ, a kɔɔyi tɔɔ,

⁵ “Zang nɛɛ mãlɛ́ nung keɓe zang basɛ rɛɛ zang ɓɔɔ vuu kaa naa ɓarɛ kpang saka bìí kpang ka ruu viya? Nung keɓe naa zang hoo dinari laa maani dakn taati katɔ.”

⁶ Kɔɔ ruu keɓe, wu ka ruu ɓɔɔ gn zang ɓɔɔ vuu ka naa kpang, kɔng wu katɔ kpang. Ɓi ka ruu ɓɔɔ, wu shɔngɓɔ ɓɛɛ. Wukɔ yiti duku ɓɔɔ ri tɛ̃ɛ saka ɓarɛ kagn, lee ɓɔɔ ti ɓɔɔrɔ saka kagn katɔ ɓɛɛ.

⁷ Yeesɔ kɔɔyi tɔɔ, “Yaa jaa soro ka nɔngkɔ. Shing nung keɓe ka ruu diki ɓɔɔ zang naa gbãa m ɓɛɛ.

⁸ Zang ɓɔɔ vuu ka naa ɓarɛ kpang, ri ɓarɛ kagn teteng manɛ diki diki. N naa nwáng m tɔ̀ɔ́ nɛɛ nɔɔ kpang.”

Zang kãa gbalang nɛɛ zang nyɔ Liyazaru vɔrɔ

⁹ Zang Yahudi dɔɔli ri tãa nyaa nɛɛ Yeesɔ ka Bɛtani a ri daayi. Ri dàa ka ruu Yeesɔ kɔ shɛ̃ɛning kpang, nɛɛ ri daa zi ɓɔɔ kaa Liyazaru ɓɔɔ Yeesɔ wisi wu paa nɛɛ sàa ɓɛɛ.

¹⁰ Rɛɛ zang bang bang zang ɓɔɔ ri dɔɔ vuu ka Gãa Laa, ri mangnɛ, nɛɛ ri nyɔ Liyazaru vɔrɔ jong.

¹¹ Ka ruu ɓɔɔ, zang Yahudi dɔɔli, ri yaa ri kana, ri shing danggn kaa bii Yeesɔ ka ruu Liyazaru kɔ ɓɛɛ.

Yeesɔ vang seesaa daa ka Urushalima

¹² Nɔng naa gãntɛ tɔ, a zang dɔɔli ɓɔɔ ri a nɔng nyaalaa shaanang, ri tãa nyaa nɛɛ Yeesɔ a kana Urushalima.

¹³ Ri sãkɛ nasãng laa nung manja, a ri daayi nɛɛ ri daa kpisi wu yuu. Ri mɛ̀ɛrɛ́ nyaa kana lapa nɛɛ, “Zang wu dɔ̀ɔ Laa ta. Laa wu a zang ɓɔɔ a nɛɛ nung ɓiɓɛ tĩnang tãanang ta. Laa wu a kpanti zang Isirela tĩnang tãanang.”

¹⁴ Yeesɔ walɛ jaa seesaa váng kagn, naa ɓɔɔ zang bée ka yeti labeenang Laa tɛ̃ɛ tɛ̃ɛ ɓɛɛ.

¹⁵ Zang bee tɔɔ, “Nɔ́ɔ kaa vɔrɔ kpang, zang gari Siyona, kpanti manɛ a kana, váng ka dakn seesaa.”

¹⁶ Bɛɛ rɛɛ zang ɓɔɔ ri mantɛ vuu ka bii ɓiɓɛ, ri zi vuu ɓɔɔ zang bee keɓe gn kpang. Ri naa zi kaa nɛɛ knti ka ɓɔɔ bɛ̀ɛ́ zang wisi Yeesɔ paa tɔ, Laa ti a wu bannang tɔ ɓɛɛ. Ri naa kpaa danggn kati nɛɛ zang bee vuu keɓe katɔ ka yuu ɓiɓɛ, a zang ti pàlɛ̀ wu vuu bìí tɔ.

¹⁷ Zang ɓɔɔ bɛ̀ɛ́ ri nɛɛ Yeesɔ, ka diki ɓɔɔ Yeesɔ ɓaa Liyazaru nyaa nɛɛ saa, a wisi wu paa nɛɛ vɔrɔ ɓɔɔ wu vɔ ɓɛɛ, ri daa kɔ̀ɔrɔ̀ zang vuu bìí.

¹⁸ Zang dɔɔli ri daa kpisi wu yuu, ka ruu ɓɔɔ, ri tãayi nɛɛ Yeesɔ kɔ pálɛ́ vuu ɓɔɔ zang zirɛ, zang mã naa ka danggn keɓe ɓɛɛ.

¹⁹ A zang Farisi ri kɔ̀ɔrɔ̀ zɔɔ nɛɛ, “Rùu pálɛ̀ vuu ɓɔɔgn kpang tingkiring. Nɔɔ zirɛ, zang koo nandon ri daa tɔ ka bii ɓiɓɛ.”

Zang Heleni ri kãa nɔng Yeesɔ

²⁰ Zang Heleni kagn teteng zang ɓɔɔ ri daa Laa bannang ka Urushalima, ka ɓɔɔ zang daa nyaalaa shaanang ɓɛɛ.

²¹ Ri daa ka bii Filibu, Filibu ɓi yɔɔ gari Bɛsɛda ɓɔɔ ka tipi Galili ɓɛɛ. A ri kɔɔ wu nɛɛ, “Maalang, ruu kasɛ Yeesɔ zinang.”

²² Filibu daa kɔɔ Anduru, a ri daa kaa nyaa zɔɔ, ri daa kɔɔ Yeesɔ.

²³ Yeesɔ kasɛ ri nyaa tɔɔ, “Diki ɓɔɔ zang a Jaa Shɔnzang bannang kagn a tɔ.

²⁴ N kɔ̀ɔ́ nɔɔ ruu ɓɔɔ niizang kɔ nwani, naa zang ɓaa jĩng zee ka tipi kpang, nwang ɓi ka nɔngkɔ, jĩng zee gbete. Zang nɛɛ ɓaa tɔ, wu tarɛ, wu shing jĩng kaa gaagaa.

²⁵ Zang ɓɔɔ nɛɛ kasɛ suru bìí ɓiɓɛ dɔɔli, shàarɛ́ ɓi katɔ kɔ̀ jong. Zang ɓɔɔ nɛɛ kasɛ ruu suru bii ɓiɓɛ ka koo keɓe kpang, shing ɓi katɔ ka ruu suru bii ɓɔɔ waa nyaa kpang ɓɛɛ.

²⁶ Zang ɓɔɔ nɛɛ shòng m shonang, wu dũng, m ka knti. Nɔng ɓɔɔ n kagn zang shonang mɛɛ nwáng doo ka nɔngkɔ. Daa mɛɛ ti naa a zang ɓɔɔ palɛ m shonang bannang katɔ.”

Yeesɔ kɔɔ zang naa ɓɔɔ wu naa vɔ ɓɛɛ

²⁷ A Yeesɔ kɔɔyi tɔɔ, “Jĩng dannang keɓe kpãa m tɔ yeti dɔɔli. N kɔɔ ɓu kaa nɛɛ viya? N kɔ̀ɔ nɛɛ, ‘Daa mɛɛ mɔ́ɔ yaa diki keɓe wu a ka yuu mɛɛ kpang ya?’ Kpang, n a ka ruu jĩng dannang ɓɔɔ diki keɓe kɔ.

²⁸ Daa mɛɛ palɛ vuu ɓɔɔ zang a mɔɔ bannang ɓɛɛ ta.” A zang tãa yee kaa nɛɛ lapa kɔɔyi nɛɛ, “N tusu zang bannang mɛɛ tɔ, n ti paasɛ ditɔ tɔkn.”

²⁹ Zang dɔɔli ɓɔɔ ri kpalɛ zɔɔ ka nɔng, ri tãa yee bìí. Zang ɓɔɔ ri kɔɔyi nɛɛ ɓi shala mɛɛyi. Zang ɓɔɔ ri tɔɔ, “Ɓi zang nyaa shonang Laa ɓɔɔ ka lapa rang yee nɛɛ wu.”

³⁰ Yeesɔ kɔɔ ri tɔɔ, “Yèe ɓɔɔ nɔɔ tãa ɓɛɛ, ɓi ka ruu mɛɛ kpang, ɓi ka ruu manɛ kɔ.

³¹ Diki ɓɔɔ zang jɛ̃ɛ zang koo keɓe ruu a tɔ. Wee kaa diki ɓɔɔ zang nwangsɛ sheetang, kpanti koo keɓe ɓɛɛ kɔ.

³² Zang nɛɛ naa ɓaa m naa tɔ ka laa, a zang wisi m paa, tɔ̀ɔ, n naa gɔ̃ɔ zang piti, ri a ka bii mɛɛ.”

³³ Ɓɔɔ kɔɔ naa weɓe, gãsɛ ɓi zɔ̃ng vɔrɔ ɓɔɔ wu naa vɔ ɓɛɛ.

³⁴ Zang ɓɔɔ ri kpalɛ zɔɔ ɓɛɛ, ri kasɛ wu nyaa tɔɔ, “Zang bee ka yeti Labeenang nyaa dannang Laa ɓuru tɔɔ, Kirisi naa nwáng ɓi dòndòng. A mɔɔ kɔɔ ɓaa ka biya nɛɛ zang naa tuu Jaa Shɔnzang viya? Ɓi kaa wi Jaa Shɔnzang keɓe wiya?”

³⁵ Yeesɔ kasɛ ri nyaa tɔɔ, “Nɔng yakɛnang nwàng doo ka teteng manɛ diki bée katɔ tɔkɔlɔng. Nɔɔ rakɛ ta, bɛ̀ɛ́ nɔng yakɛ doo katɔ, nɔng nɛ̀ɛ́ tɔ̀ɔ́yi. Ka ruu ɓɔɔ, nɔng nɛɛ tɔ̀ɔ́ tɔ, zang ɓɔɔ ràkɛ́, zi nɔng ɓɔɔ wu daa ɓɛɛ takpang ɓɛɛ.

³⁶ Wee nɔng yakɛnang doo nɛɛ nɔɔ ɓee, nɔɔ shing danggn ka wu, tɔɔ nɔɔ yakɛ zang nɔng kati.” Yeesɔ kɔɔ vuu keɓe tɔ, a daayi. Waasɛ yuu ɓiɓɛ, zang ri zi wu kaa takpang.

Zang Yahudi ri shing danggn gń ka bii Yeesɔ kpang

³⁷ Yeesɔ palɛ vuu ɓɔɔ zang zirɛ, zang mã naa ka danggn keɓe nandon, ri zi jĩng ka bii, a ri shing danggn ka bii ɓiɓɛ kpang doo nɛɛ mani.

³⁸ Vuu keɓe palɛ ɓi naa ɓɔɔ Ishaya zang nyaa shonang Laa kɔɔ ka tĩng tɛ̃ɛ tɛ̃ɛ ɓɛɛ. Ishaya kɔɔyi tɔɔ, “Kpanti, ɓu wi shing danggn ka ruu ɓɔɔ rùu kɔɔ ɓɛɛ wiya? Ɓu wi ti zi naa vuu palɛnang ɓaaɓɛ wiya?”

³⁹ Ishaya kɔɔ tɔkn tɔɔ, ri shing danggn kpang ka ruu ɓɔɔ,

⁴⁰ “Laa zuu ri jĩng katɔ, a ti zãa yeti ɓarɛ vuu zinang katɔ. Nɛɛ tɔɔ, jĩng ɓarɛ wu zi nɔng kaa takpang Yeti ɓarɛ ti zi vuu kpang. Ka ruu ɓɔɔ, ri nɛɛ gbãayu ka bii ɓiɓɛ, nɛɛ wu ta yuu ɓarɛ ɓɛɛ.”

⁴¹ Ishaya kɔɔ vuu keɓe, ka ruu ɓɔɔ, zi bannang Yeesɔ ɓɛɛ, a rang ruu ka yuu ɓiɓɛ.

⁴² A zang bang bang zang Yahudi dɔɔli, ri shing danggn ka bii Yeesɔ. A ri nwangsɛ yuu ɓarɛ kaa takpang, ka ruu ɓɔɔ, ri kaa vɔrɔ zang Farisi ɓɛɛ. Ri kasɛ nɛɛ zang zãa ri gãa zɔɔ kpalɛnang daanang kpang.

⁴³ Ri kasɛ ɓɔɔ shɔnzang dɔɔ ri, ɓa ɓɔɔ Laa dɔɔ ri katɔ.

Yeesɔ kɔɔ naa ɓɔɔ zang naa jɛ̃ɛ zang ruu ɓɛɛ

⁴⁴ A Yeesɔ mɛɛ nyaa ka lapa kɔɔyi tɔɔ, “Zang ɓɔɔ nɛɛ shing danggn ka bii mɛɛ, shing danggn wu ka bìí mɛɛ kɔ gbete kpang. Shing danggn ka bii zang ɓɔɔ shong m ɓɛɛ.

⁴⁵ Zang ɓɔɔ nɛɛ zi m tɔ, zi zang ɓɔɔ shong m tɔ.

⁴⁶ N a ka koo keɓe, tɔ̀ɔ n yakɛ zang nɔng, tɔ̀ɔ zang ɓɔɔ nɛɛ shing danggn ka bii mɛɛ wu nwang tɔ̀ɔ́ nɔng ɓɔɔ tɔ̀ɔ katɔ kpang.

⁴⁷ Zang ɓɔɔ nɛɛ tãa ruu mɛɛ, nɛɛ yiti ka yeti ɓiɓɛ kpang, n dɔng wu ruu kpang, ka ruu ɓɔɔ, n arɛ nɛɛ n naa dɔng zang koo ruu kpang ɓɛɛ. N arɛ nɛɛ n ta yuu zang koo katɔ kɔ jong ɓɛɛ.

⁴⁸ Zang ɓɔɔ nɛɛ bɛ̃ɛ m, nɛɛ ti ta ruu mɛɛ kpang, zang ɓɔɔ dɔng wu ruu kagn. Ruu mɛɛ ɓɔɔ n kɔɔ ɓɛɛ, wukɔ naa dɔng wu ruu ka diki ɓɔɔ koo waa nyaa ɓɛɛ.

⁴⁹ Ka ruu ɓɔɔ, n ráng wu yee yuu mɛɛ kpang ɓɛɛ. Daa mɛɛ ɓɔɔ shong m kɔ, kɔɔ m vuu ɓɔɔ n dàa kɔɔ ɓɛɛ, nɛɛ naa ɓɔɔ n dàa kɔ̀ɔ́ ɓɛɛ.

⁵⁰ N zi tɔ vuu ɓɔɔ Daa kɔɔyi, á zang suru bii ɓɔɔ waa nyaa kpang ɓɛɛ. Ka ruu nɔngkɔ, vuu ɓɔɔ n kɔɔ ɓɛɛ, n kɔɔ m doo vuu ɓɔɔ Daa mɛɛ kɔɔ m nɛɛ n kɔɔ ɓɛɛ kɔ.”