Galati 6 - Nyaa Shɔɔ Ɓɔɔ Laa a Ɓɛɛ

Nɔɔ yi zɔɔ naa ka bii

¹ Rɛɛ manzung, naa zang ɓɔɔ ka teteng manɛ nɛɛ palɛ zɔ̃ng vuu shi kpang ɓɔɔ kagn. Nɔɔ ɓɔɔ Suru Laa kagn bii manɛ, nɔɔ sɔɔrɔ wu tɔkn ka gbalang. Nɔ́ɔ sɔ́ɔrɔ̀ wu kaa tɔ̀ɔ́ nɛɛ hakaka kpang. Zang ɓu wu gãng jĩng ka yuu ɓiɓɛ, wu nɛɛ palɛ vuu shi kpang jong.

² Vuu ɓɔɔ nɛɛ kpãa zang ɓɔɔ ka teteng manɛ, nɔɔ yi zɔɔ naa kagn. Naa nɔɔ pálɛ̀ nɔngkɔ, nɔɔ dũng nyaa ɓɔɔ Yeesɔ Kirisi dang ɓɛɛ tɔ.

³ Naa zang ɓɔɔ tuu yuu ɓiɓɛ nɛɛ wu vuu ɓɔɔ, a ɓeekpang wu ɓi vuu ɓɔɔ kpang, zang keɓe nwãarɛ ɓi yuu ɓiɓɛ.

⁴ Zang ɓu wu gãsɛ vuu ɓɔɔ wu palɛ ɓɛɛ katɔ nɛɛ yuu ɓiɓɛ. Nɛɛ tɔ̃ɔ, wu tãa tĩnang ka ruu vuu ɓɔɔ wu palɛ ɓɛɛ. Wu gãsɛ nɛɛ vuu ɓɔɔ, zang ɓɔɔgn palɛ ɓɛɛ kpang.

⁵ Ka ruu ɓɔɔ, zang ɓu palɛ ɓi shonang, ɓɔɔ Laa a wu nɛɛ wu palɛ ɓɛɛ.

⁶ Zang ɓɔɔ zang kpɛ̃̀ɛrɛ́ wu ruu gbalang Laa dũnnang, wu basɛ vuu tɔ̃ɔ ɓɔɔ ka naa ɓiɓɛ nɛɛ zang ɓɔɔ kpɛ̃ɛrɛ wu ɓɛɛ.

⁷ Nɔɔ nwãarɛ yuu manɛ kpang. Laa ɓi zang ɓɔɔ zang risi wu naa shoko kpang. Vuu ɓɔɔ mɔɔ ɓayi, mɔɔ naa yee ɓaa doo wukɔ.

⁸ Naa zang ɓɔɔ ɓaa vuu shi kpang ɓɔɔ bii shɔnzang ɓiɓɛ kasɛ ɓɛɛ, ti naa nwǎng wu ɓi vɔrɔ. Zang ɓɔɔ nɛɛ ɓayi, nɛɛ tɔɔ Suru Laa wu tãa tĩnang, naa nwǎng wu suru bii ɓɔɔ waa nyaa kpang ɓɛɛ.

⁹ Ruu lee tɔ̃ɔ palɛnang kpang. Ka ruu ɓɔɔ, ruu nɛɛ leeyi, ruu nɛɛ yaa kpang, diki a ditɔ ɓɔɔ naa nwǎng ruu vuu tɔ̃ɔ ɓɛɛ.

¹⁰ Ka ruu nɔngkɔ, diki diki naa ɓɔɔ ruu zunung katɔ ɓɛɛ, ruu pàlɛ̀ zang piti tɔ̃ɔ. Ruu pàlɛ̀ manzung ɓuru ɓɔɔ ri shing danggn tɔ ka bii Laa kɔ tɔ̃ɔ gbãng gbãng.

Bulu di nyaa shaarɛnang nɛɛ nyaa jeenang.

¹¹ Nɔɔ zi vuu kɔ n bee nɔɔ nɛɛ naa mɛɛ bang kɔsɔrɔ kɔsɔrɔ ɓee.

¹² Ɓi zang ɓɔɔ ri dɔ̀ɔ́ bii nɛɛ vuu ɓɔɔ ri palɛ nɛɛ jĩng zang wu zirɛ ɓɛɛ, ri kãa gbalang nɛɛ ri mã nɔɔ nyaa nɛɛ kaka, nɛɛ nɔ́ɔ yee shaa. Ri palɛ ɓarɛ, ka ruu ɓɔɔ, ri kasɛ nɛɛ zang dang ri jĩng naa ɓɔɔ zang ɓaa Yeesɔ Kirisi naa ka laa kpang ɓɛɛ.

¹³ Naa doo zang ɓɔɔ ri yee shaa, ri dũng nyaa ɓɔɔ zang dang ɓɛɛ kpang. Ri kasɛ ɓarɛ nɛɛ nɔɔ yee shaa, nɛɛ tɔ̀ɔ ri tuu yuu ɓarɛ kati nɛɛ nɔɔ kasɛ tɔ zang yee nɔɔ shaa tɔ.

¹⁴ Ɓɔɔ mɛɛ, n kɔɔrɔ ruu bang bang m ka yuu laa ɓɔɔ zang ɓaa Kpanti ɓuru Yeesɔ Kirisi naa kagn kɔ shɛ̃ɛning. Ka ruu ɓɔɔ, laa keɓe kɔ shingnɛ, vuu ɓɔɔ ka koo nwàng m vuu ɓɔɔ kpang. Mɔɔ kɔɔ nɛɛ zang ɓaa vuu keɓe tɔ ka yuu laa ɓɔɔ zang ɓaa Yeesɔ kagn ɓɛɛ. N ti nwang m kaa zang ɓɔɔ yaa rɛɛ vuu koo tɔ ɓɛɛ.

¹⁵ Naa zang yee shaa katɔ, naa zang yee shaa doo kpang, ɓi vuu keɓe kɔ kpãa m kpang. Vuu ɓɔɔ ɓa weɓe, ɓi naa ɓɔɔ Laa kɔ̃sɔ ruu tɔ, ruu nwang zang shɔɔ tɔ ɓɛɛ.

¹⁶ Zang piti ɓɔɔ ri nwang nwannang naa ɓɔɔ n kɔɔ ɓɛɛ, ɓɔɔ rikɔ zang ɓɔɔ Laa shɛ̃ɛrɛ ri ɓɛɛ, Laa wu shingnɛ yeti ɓarɛ wu valɛ, a gn ɓarɛ wu ti kɔng wu katɔ.

¹⁷ N hangsɛ nyaa ruu keɓe nɛɛ, zang ɓɔɔ wu kpãa m takpang, ka ruu ɓɔɔ, nyaa nɔɔrɔ kɔ ka bii mɛɛ, wukɔ tusu nɛɛ n m jaafoo Yeesɔ Kirisi.

¹⁸ Rɛɛ manzung, n gaa Kpanti ɓuru Yeesɔ Kirisi wu palɛ nɔɔ nandon tɔ̃ɔ. Nɔngkɔ.