Galati 5 - Nyaa Shɔɔ Ɓɔɔ Laa a Ɓɛɛ

Nɔ́ɔ nwàng tɔ̀ɔ́ naa jaafoo kpang

¹ Kirisi ta yuu ɓuru nɛɛ ruu nwang tɔ̀ɔ́ naa jaafoo kpang. Nɔɔ yaa zang ɓɔɔ wu shingnɛ, nɔ́ɔ nwang naa zang ɓɔɔ ri jaafoo ɓɛɛ kpang. Nɔɔ nwàng tɔ̀ɔ́ jaafoo tɔkn kpang.

² Nɔɔ ɓaa shoo ka vuu kɔ nkɔ Bulu n kɔɔ nɔɔ ɓee. Naa nɔɔ kasɛ katɔ nɛɛ zang yee nɔɔ shaa naa ɓɔɔ zang Yahudi ri yee ɓɛɛ. Nɔ̀ɔ shing tɔ Kirisi ɓi tɔ̀ɔ́ vuu ɓɔɔ ka bii manɛ kpang tingkiring.

³ N shaarɛ nɔɔ nyaa tɔkn, naa zang ɓɔɔ yaayi zang yee wu shaa, wu dũng nyaa nimbang ɓɔɔ zang dang ɓɛɛ ta.

⁴ Zang ɓɔɔ ka teteng manɛ ɓɔɔ ri kãa gbalang ɓɔɔ ri nwang zang tɔ̃ɔ ka tĩng Laa nɛɛ nyaa dannang ɓɔɔ ri dũng ɓɛɛ, ri basɛ zɔɔ ɓarɛ tɔ nɛɛ Kirisi. Nɔɔ bɛ̃ɛ manɛ tɔ̃ɔ ɓɔɔ Laa palɛ zang katɔ ɓɛɛ ya?

⁵ Ɓɔɔ ɓuru, ruu shing gn ɓuru nɛɛ Laa naa shing rùu rúu nwang zang tɔ̃ɔ ka tĩng ɓiɓɛ nɛɛ naa vuu palɛnang Suru ɓiɓɛ, a ɓɔɔ ka ruu danggn ɓɔɔ ruu shing ka bii Yeesɔ ɓɛɛ. Wee vuu ɓɔɔ ruu gã ɓɛɛ kɔ.

⁶ Ruu nɛɛ ɓakɛ yuu tɔ nɛɛ Yeesɔ Kirisi, naa ruu yee shaa katɔ, naa ruu yee doo kpang, palɛ vuu ɓɔɔ ɓi kpang tingkiring. Vuu ɓɔɔ zang kasɛ ɓi danggn shinnang ɓɔɔ shing mɔɔ, mɔɔ kasɛ zang ɓɛɛ.

⁷ Bɛ̀ɛ́ nɔɔ palɛ vuu kana waasɛ̃ ka gbalang Kirisi, nɔɔ daa kana nɛɛ tĩng. Ɓu wi shing nɔɔ, a nɔɔ yaa ruu ɓɔɔ wukɔ niizang dũnnang wiya?

⁸ Vuu keɓe ɓi Laa ɓɔɔ ɓaa nɔɔ nyaa kɔ nwãarɛ nɔɔ kpang.

⁹ Zang kɔɔrɔ nyaa nɛɛ, “Yisi tɔkɔlɔng shing zũng borodi palɛnang dɔɔli ɓɔɔ zang wee ɓɛɛ, wu puuyi.”

¹⁰ Ɓɔɔ mɛɛ, sisĩng lɔɔ m ka ruu manɛ kpang. Yuu ɓɔɔ ruu kpalɛ nɛɛ nɔɔ ka bii Yeesɔ Kirisi kɔ shing m sisĩng lɔɔ m kpang. N zi tɔ, nɔɔ ta ruu ɓɔɔgn kpang, a zang ɓɔɔ kpantɛ nɔɔ jĩng keɓe, naa doo wiya, Laa naa dang wu jĩng ditɔ.

¹¹ Rɛɛ manzung, naa n kɔɔrɔ zang doo naa nɛɛ zang ri yee shaa katɔ ɓɛɛ, a zang dang m jĩng ɓi kaa ruu viya? Naa nɛɛ nɔngkɔ niizang, rúu ɓɔɔ n kɔɔrɔ zang ka yuu laa ɓɔɔ zang ɓaa Yeesɔ naa kagn nɛɛ shingnɛ zang nɛɛ hàa nyaa kpang.

¹² Zang ɓɔɔ ri kpãa nɔɔ keɓe, ri nɛ̀ɛ́ kàsɛ̀ katɔ zang ɓée ri, wukɔ nɛɛ tɔ̃ɔ.

¹³ Ɓɔɔ manɛ ɓɛɛ, rɛɛ manzung, zang ɓaa nɔɔ nyaa nɛɛ nɔ́ɔ nwang zang ɓɔɔ ri jaafoo kpang ɓɛɛ. A nɔɔ yaayi nwannang manɛ keɓe, wu yàa nɔɔ gbalang vuu ɓɔɔ bii shɔnzang manɛ kasɛ ɓɛɛ palɛnang kpang. Zɔɔ kasɛnang wu shing nɔɔ katɔ kɔ jong, nɔ́ɔ pàlɛ́ zɔɔ shonang.

¹⁴ Vuu ɓɔɔ nyaa dannang nandon ri kɔɔyi, daa ɓi gbete nɛɛ ɓɔɔ kɔɔyi tɔɔ, “Kasɛ ruu shɔnzang naa ɓɔɔ mɔɔ kasɛ yuu ɓaaɓɛ ɓɛɛ.”

¹⁵ A naa nɔɔ palɛ vuu naa yɔpɔ kpaasi, nɔɔ lasɛ zɔɔ yeti, a nɔɔ ti shing zɔɔ nyaa vuu waa ka bii. Nɔɔ gãng jĩng waasɛ̃ nɔɔ nɛ̀ɛ́ ningsi zɔɔ dɔ̃ɔ gbete.

Vuu ɓɔɔ Suru Laa kasɛ, nɛɛ vuu ɓɔɔ bii shɔnzang kasɛ ɓɛɛ

¹⁶ Vuu ɓɔɔ n kɔɔ nɔɔ keɓe. Nɔɔ yaa Suru Laa wu tusu nɔɔ naa ɓɔɔ nɔɔ nwang nwannang ɓɛɛ. Nɔ́ɔ tɔɔ kpang nɛɛ nɔɔ palɛ vuu ɓɔɔ bii shɔnzang manɛ kasɛ ɓɛɛ kpang.

¹⁷ Ka ruu ɓɔɔ, vuu ɓɔɔ bii ɓuru kasɛ daa gbete nɛɛ vuu ɓɔɔ Suru Laa kasɛ ɓɛɛ kpang. A vuu ɓɔɔ Suru Laa kasɛ ti daa jong gbete nɛɛ ɓɔɔ bii ɓuru kasɛ ɓɛɛ kpang kɔ ɓɛɛ. Vuu ziti keɓe ri shing jĩng nɛɛ zɔɔ kpang. Ka ruu nɔngkɔ, mɔɔ zunung vuu ɓɔɔ mɔɔ kasɛ palɛnang kaa takpang.

¹⁸ Naa Suru Laa kɔ sɔ̀ɔ́ mɔɔ tĩng mɔɔ ɓaa tɔ̀ɔ́ jaafoo vuu ɓɔɔ nyaa dannang kasɛ ɓɛɛ kpang.

¹⁹ Vuu ɓɔɔ bii shɔnzang pálɛ̀, waasɛ bii ɓi katɔ kpang. Vuu keɓe ɓi rooronang nɛɛ wujɛ soro, nɛɛ sãnsãnrãng, nɛɛ dũndũng palɛnang.

²⁰ Vaka bannang nɛɛ nvaa shaanang. Zang ri shing jĩng nɛɛ zɔɔ kpang, ri gaa nyaa, ri kaa sũnyaa, gnvɔ shàá ri, ri kasɛ vuu yuu ɓarɛ. Ri basɛ zɔɔ ka vaa vaa.

²¹ Ri shing jĩng ka vuu zɔɔ, ri ɓoo sàa, sàa palɛ ri, a ri gaarɛ zɔɔ ri shaa vuu shaanang dɔɔli nɛɛ rɛɛ zɔ̃ng vuu ɓɔɔ naa weɓe dɔɔli. N shaarɛ nɔɔ nyaa kãntang keɓe naa ɓɔɔ n shaarɛ nɔɔ tɔ ka tĩng ɓɛɛ, zang ɓɔɔ ri palɛ zɔ̃ng vuu keɓe, ri daa nɔng ɓɔɔ Laa roo kpanti kpang.

²² A Suru Laa shing zang ɓiri, zang wu kasɛ zang, zang wu tãa tĩnang, yeti zang wu valɛ katɔ, zang wu mã danggn, zang wu palɛ zang tɔ̃ɔ, zang wu pàlɛ̀ vuu ɓɔɔ tɔ̃ɔ ɓɛɛ, zang wu nwang zang ɓɔɔ zang shing danggn katɔ bii ɓiɓɛ.

²³ Zang wu tuu yuu ɓiɓɛ kpang, wu ti yiti yuu ɓiɓɛ waasɛ̃. Nyaa dannang ɓɔɔ zãa vuu ɓɔɔ naa weɓe palɛnang, ɓi kagn kpang.

²⁴ Zang ɓɔɔ nɛɛ ɓi kaa zang Yeesɔ Kirisi yáa vuu ɓɔɔ bii shɔnzang kasɛ ɓɛɛ palɛnang ɓi tɔ nandon.

²⁵ Suru Laa a ruu suru bii tɔ, ka ruu nɔngkɔ, wukɔ wu ti tusu ruu naa ɓɔɔ ruu nwang nwannang ɓuru ɓɛɛ.

²⁶ Ruu lakɛ jĩng kpang, ruu zarɛ zɔɔ kpang, ruu ti kaa sũnyaa nɛɛ zɔɔ kpang.