Galati 4 - Nyaa Shɔɔ Ɓɔɔ Laa a Ɓɛɛ

¹ Vuu ɓɔɔ n tɔ́ɔ̀ n kɔɔ keɓe. Naa jaa ɓɔɔ naa shaa vuu vɔ diiɓɛ doo jaa tɔkɔlɔng, zang palɛ wu naa jaafoo. Naa doo ka wee zang zi tɔ nɛɛ vuu piti ɓi ɓɔ̀ɔ́ ɓiɓɛ kɔ ɓee.

² Ka ɓɔɔ wu doo jaa tɔkɔlɔng, zang ɓɔɔ kagn ɓɔɔ ri gãng jĩng ka wu, a ri ti pàlɛ̀ wu vuu ɓɔɔ wu nɛ̀ɛ́ palɛ ɓɛɛ. Ri palɛ sasak, diki ɓɔɔ daa ɓiɓɛ ka zang ɓɛɛ, wu a nɛɛ mani.

³ Rùu dòo nɔngkɔ, ka ɓɔɔ bɛ̀ɛ́ ruu zũng danggn gň ka vuu Suru Laa kpang, ruu nwang ɓuru jaafoo rɛɛ nyaa dannang ɓɔɔ shɔnzang ri tusu ɓɛɛ.

⁴ A ka ɓɔɔ laa ɓɔɔ Laa shingnɛ naa arɛ, Laa naa shong nyaa nɛɛ Jaa ɓiɓɛ. Jaa keɓe jaa soro yi wu, a ti dũng nyaa ɓɔɔ Laa dang zang Yahudi nɛɛ ri dũngnɛ.

⁵ Nɛɛ tɔɔ wu ta yuu zang ɓɔɔ ri dũng nyaa dannang Laa ɓɛɛ. Tɔ̀ɔ, ruu raa wujɛ Laa kati.

⁶ Ka ruu ɓɔɔ, nɔɔ wujɛ ɓiɓɛ, Laa shong nyaa nɛɛ Suru Jaa ɓiɓɛ, nɛɛ wu nwang ka yeti manɛ. Suru ɓɔɔ kaarɛ nyaa nɛɛ, “Daa mɛɛ, Daa mɛɛ,” ɓɛɛ.

⁷ Ka ruu nɔngkɔ, nɔɔ manɛ tɔ̀ɔ́ jaafoo kpang, nɔɔ kaa jaa gãa. Naa wee nɔɔ kaa Jaa ɓiɓɛ ɓee, Laa naa a nɔɔ vuu piti ɓɔɔ wu shing wujɛ ɓiɓɛ ɓɛɛ.

Bulu gàá zang Tipi Galati

⁸ Ɓeleng bɛ̀ɛ́ nɔɔ zi Laa gn kpang, a nɔɔ nwang jaafoo vuu ɓɔɔ ri vuu gãnti kɔ shɛ̃ɛning.

⁹ A kãntang keɓe nɔɔ zi Laa tɔ kati. N kɔɔ ɓu biya, Laa zi nɔɔ tɔ kati ɓee. Ka ruu vi, nɔɔ gbãayu ka rɛɛ nyaa dannang ɓɔɔ shɔnzang ri tusu, ɓɔɔ ri lakɛ naa ka bii kpang, a naa vuu palɛnang ɓarɛ ti kagn kpang, nɔɔ nwang jaafoo ɓarɛ tɔkn viya?

¹⁰ Nɔɔ shĩili diki ka ruu vuu shaanang nɔng mung shaanang, nɛɛ rɛɛ shala ɓɔɔ, nɛɛ laa ɓɔɔ, a ɓɔɔ sáa ɓɔɔ.

¹¹ Vuu kɔ nɔɔ palɛ ɓee, shing tɔ n káa kaa vɔrɔ. Mɔɔ kɔɔ nɛɛ shonang ɓɔɔ n pálɛ̀ ka ruu manɛ shàarɛ̀ tɔ waati.

¹² Rɛɛ manzung, n gàá nɔɔ katɔ, nɔɔ nwang naa ɓɔɔ n nwàng ɓɛɛ. Ka ruu ɓɔɔ, n nwáng tɔ naa nɔkɔ ɓɛɛ. Nɔɔ pálɛ̀ m vuu shi kpang ɓɔɔ kagn kpang.

¹³ Danggn wu ning nɔɔ vuu ɓɔɔ shingnɛ, n rang nɔɔ Ruu Tɔ̃ɔ ka tĩng shɔɔnang ɓɛɛ kpang. Ɓi ka ruu ɓɔɔ, vuu palɛ m katɔ ɓɛɛ.

¹⁴ A nɔɔ bɛ̃ɛ m ka ɓɔɔ n kɔng vɔrɔ ɓɛɛ kpang. Kɔnang mɛɛ nwang naa vuu ɓɔɔ gãsɛ nɔɔ katɔ ɓɛɛ. Nɔɔ ta m katɔ kɔ jong naa ɓɔɔ nɔɔ nɛɛ tà zang nyaa shonang Laa ɓɔɔ ka lapa ɓɛɛ. Nɔɔ tá m naa nkɔ Yeesɔ Kirisi nɛɛ yuu ɓiɓɛ.

¹⁵ Kãntang keɓe, ɓu vi palɛ tĩnang ɓɔɔ nɔɔ tãa gbãng gbãng kaa viya? N nɛɛ yuu mɛɛ n kɔɔ ruu keɓe katɔ nɛɛ, naa nɔɔ nɛɛ zunung katɔ, nɔɔ nɛɛ zɔ̃ngkɔ jĩng manɛ katɔ nɔɔ nɛɛ a m.

¹⁶ N nwang tɔ kaa zang ɓɔɔ nɔɔ gaa nyaa nɛɛ wu ɓɛɛ, ka ruu ɓɔɔ n kɔɔ nɔɔ ruu ɓɔɔ niizang ɓɛɛ ya?

¹⁷ Zang kaɓa, ri palɛ mɔɔ kɔ̀ɔ́ nɛɛ, ri kasɛ nɔɔ katɔ gbãng gbãng, a vuu ɓɔɔ ri mang ka yeti ɓarɛ ka yuu manɛ ɓi kaa tɔ̀ɔ́ tɔ̃ɔ kpang. Ri kasɛ ɓarɛ nɛɛ, ri basɛ teteng manɛ nɛɛ n, tɔ̀ɔ, nɔ́ɔ shòng kaa rikɔ.

¹⁸ Naa zang kasɛ ruu zang ka ruu tɔ̃ɔ ɓɔɔ zang mang ka yeti ka yuu zang, wukɔ tɔ̃ɔ. Zang wu palɛ nɔngkɔ diki diki, wu ka laa ɓɔɔ n ka nɔng shɛ̃ɛning kpang.

¹⁹ Rɛɛ manzung, n tãa kɔnang ka yuu manɛ naa ɓɔɔ jaa kɔng zang soro ɓɔɔ yi kaa jaa ɓɛɛ. N kasɛ nɛɛ zang zi nwannang Yeesɔ Kirisi ka nwannang manɛ.

²⁰ Mɔɔ kɔɔ nɛɛ n nɛ̀ɛ́ kaa nɛɛ nɔɔ kãntang keɓe, tɔ̀ɔ, n kɔ̃sɔ naa ɓɔɔ n rang nɔɔ yee ɓɛɛ. Ruu manɛ kpãa m tɔ dɔɔli.

Bulu gãsɛ vuu ka yuu Hajaratu nɛɛ Saratu

²¹ N kaaɓi, n hɛ̃ɛ zang ɓɔɔ ri kasɛ nɛɛ ri dũng nyaa dannang Laa, nɛɛ tɔ̀ɔ, ri nwang zang tɔ̃ɔ ka tĩng Laa ɓɛɛ. Nɔɔ tãa vuu ɓɔɔ nyaa dannang kɔɔ ɓɛɛ kpang ya?

²² Kɔɔyi tɔɔ, wujɛ Ibirayi ziti. Ɓɔɔ gbete jaafoo yì wu, a ɓɔɔ gbete soro ɓɔɔ ɓi jaafoo kpang yi wu.

²³ Jaa gbete ɓɔɔ jaafoo yirɛ keɓe, zang yi ɓi ka naa ɓɔɔ zang yi jaa diki diki ɓɛɛ. Ɓɔɔ gbete ɓɔɔ jaafoo kpang yirɛ keɓe, ɓi Laa a nyaa, a zang yi wu.

²⁴ Vuu keɓe nwang naa vuu ɓɔɔ zang gãsɛ vuu nɛɛ mani ɓɛɛ. Zang soro ziti keɓe, ri nwang naa nyaa ɓɔɔ Laa a ziti ɓɛɛ. Nyaa gbete a ɓi nɛɛ yuu kɔpɔ Sinayi, yiki wujɛ ɓiɓɛ ɓi jaafoo. Nyaa keɓe wukɔ Hajaratu.

²⁵ Zang gãsɛ Hajaratu ɓi nɛɛ kɔpɔ Sinayi ɓɔɔ ka tipi Arabiya ɓɛɛ. Gari Urushalima kãntang keɓe nwang ɓi kaa doo naa Hajaratu kɔ, zang yi wu tɔ jaafoo nɛɛ zang ɓɔɔ ka yeti ɓiɓɛ piti.

²⁶ A Urushalima ɓɔɔ ka lapa ɓi kaa tɔ̀ɔ́ jaafoo kpang, ɓi wukɔ nàá ɓuru.

²⁷ Labeenang kɔɔyi tɔɔ, “Zang soro ɓɔɔ yi jaa gngn kpang, tãa tĩnang ta. Tĩnang wu shing mɔɔ, mɔ́ɔ mɛɛ nyaa ka lapa, mɔ́ɔ kaayi. Mɔɔ zang soro ɓɔɔ mɔɔ tãa naa ɓɔɔ jaa kɔng zang zang nɛɛ yi kaa tɔ gngn kpang ɓɛɛ. Ka ruu ɓɔɔ, zang soro ɓɔɔ bɛ̀ɛ́ zang bɛ̃ɛ wu katɔ, ka ruu ɓɔɔ wu yi jaa kpang, wu naa yi jaa kaa gaagaa, wu ɓa jaa soro ɓɔɔ nwang nɛɛ varɛ ɓiɓɛ ɓɛɛ.”

²⁸ Kãntang keɓe rɛɛ manzung, nɔɔ manɛ kaa wujɛ Laa, ka ruu nyaa ɓɔɔ wu a ɓɛɛ. Naa ɓɔɔ Laa a nyaa a zang yi Ishaaku ɓɛɛ.

²⁹ Ka diki kaɓa, jaa ɓɔɔ zang yi naa ɓɔɔ zang yiki jaa diki diki, dang jaa ɓɔɔ zang yi nɛɛ bii Suru Laa ɓɛɛ jĩng. Kãntang keɓe, zang palɛ doo ka naa nɔngkɔ.

³⁰ A labeenang Laa kɔɔ ɓu nɛɛ viya? Kɔɔyi tɔɔ, “Nwangsɛ jaa soro ɓɔɔ jaafoo kiɓi nɛɛ jaa ɓiɓɛ ka biling. Ka ruu ɓɔɔ, jaa jaafoo basɛ vuu daa ɓarɛ nɛɛ jaa, jaa soro ɓɔɔ ɓi jaafoo kpang, kpang.”

³¹ Ka ruu nɔngkɔ, rɛɛ manzung, ruu ɓuru wujɛ jaa soro ɓɔɔ jaafoo ɓɛɛ kpang. Ruu ɓuru wujɛ jaa soro ɓɔɔ jaafoo kpang ɓɛɛ.