Galati 2 - Nyaa Shɔɔ Ɓɔɔ Laa a Ɓɛɛ

Naa ɓɔɔ zang shonang Yeesɔ ri ta Bulu ɓɛɛ

¹ Sáa naa ɓa tɔ kopi tu dɛ̃ɛti, n daa Urushalima tɔkn nɛɛ Baranaba. Ruu daa nɛɛ Titu ning.

² N daayi, ka ruu ɓɔɔ, Laa kɔɔ m nɛɛ n daayi ɓɛɛ. Ka ɓɔɔ n shɛ̃ɛ nɔng, n ɓaa rɛɛ zang bang nyaa dang gbete. Ruu nwáng nɛɛ ri, a n kɔɔ ri rúu Ruu Tɔ̃ɔ ɓɔɔ n kɔɔrɔ zang ɓɔɔ ri zang Isirela kpang ɓɛɛ. N kasɛ nɛɛ shonang ɓɔɔ n pálɛ́ ka tĩng, nɛɛ ɓɔɔ n palɛ kãntang, wu shaarɛ waati kpang.

³ Titu ɓɔɔ n daa nɛɛ wu, naa wee wu zang Heleni ɓee, zang yi wu nɛɛ kaka nɛɛ wu yée shaa kpang.

⁴ Ruu keɓe gaayu ka ɓɔɔ zang varɛ ɓɔɔ ri nwãarɛ zang nɛɛ ri dũng dòo Kirisi kɔ, ri kasɛ ɓarɛ katɔ nɛɛ, zang yèe wu shaa. Zang keɓe ɓɔɔ ri shɛ̃ɛ ka teteng ɓuru nɛɛ ri zili naa ɓuru, ri ti kãa gbalang naa ɓɔɔ zang ta yuu ɓuru ka ɓɔɔ ruu ɓakɛ yuu nɛɛ Yeesɔ Kirisi ɓɛɛ, ɓee. Ri kasɛ nɛɛ ri risi ruu naa jaafoo.

⁵ Rùu yàa ri bii naa kpang nɛɛ tɔkɔlɔng ning, tɔɔ ruu yìtì nɔɔ ruu niizang ɓɔɔ ka yuu Ruu Tɔ̃ɔ Kirisi kati.

⁶ A zang ɓɔɔ zang tɔɔ ri ɓarɛ zang bang ɓɛɛ (ruu mɛɛ hãa kagn nɛɛ naa ɓɔɔ ɓeleng ri nwang ka tĩng ɓɛɛ kpang. Laa palɛ vuu ɓi jong gn dang gbete kpang). Rɛɛ zang bang kaɓa ri kɔ̀ɔ m vuu ɓɔɔ kagn shɔɔ kpang.

⁷ Ri zi ɓarɛ katɔ kɔ jong nɛɛ, Laa a m shonang tɔ nɛɛ n kɔ̀ɔ zang ɓɔɔ ri zang Yahudi kpang Ruu Tɔ̃ɔ, naa ɓɔɔ shing Bituru, nɛɛ wu kɔɔ zang Yahudi Ruu Tɔ̃ɔ ɓɛɛ.

⁸ Ka ruu ɓɔɔ, naa ɓɔɔ Laa shing Bituru nɛɛ wu nwang zang shonang Yeesɔ ka teteng zang Yahudi, Laa shing m doo nɔngkɔ nɛɛ naa vuu palɛnang ɓiɓɛ, nɛɛ n nwang zang shonang Yeesɔ ka teteng zang ɓɔɔ ri zang Yahudi kpang.

⁹ Ka ɓɔɔ rɛɛ zang keɓe, Yakub nɛɛ Bituru a ɓɔɔ Yɔhana ri zirɛ nɛɛ Laa a m shonang keɓe tɔ, ri yi naa mɛɛ nɛɛ ɓɔɔ Baranaba ri jee ruu nyaa. Ka ruu ɓɔɔ, ruu palɛ shonang gbete nɛɛ ri ɓɛɛ, ruu mã zɔɔ naa nɛɛ, ri palɛ shonang ka teteng zang Yahudi, ruu palɛ ɓuru ka teteng zang ɓɔɔ ri zang Yahudi kpang ɓɛɛ.

¹⁰ Ri kɔɔ ruu nɛɛ, danggn wu ning ruu zang ɓɔɔ vuu ka naa ɓarɛ kpang, ɓɔɔ ri ka teteng zang kaɓa kpang kɔ shɛ̃ɛning. Vuu ɓɔɔ bɛ̀ɛ́ n shing danggn palɛnang ɓee kɔ.

Bulu mangkɛ Bituru ka Antakiya

¹¹ Ɓɔɔ Bituru a ka gari Antakiya, n tá nyaa ɓiɓɛ kpang ka jĩng zang piti, ka ruu ɓɔɔ, vuu shi kpang ɓɔɔ wu palɛ waasɛ bii katɔ kpang ɓɛɛ.

¹² Ɓɔɔ zang varɛ ɓɔɔ Yakub shong ri, ri a nɔng kaɓa gn kpang, Bituru shaa vuu shaanang nɔng gbete nɛɛ manzung ɓuru ɓɔɔ ri zang Yahudi kpang ɓɛɛ. Ɓɔɔ ri naa shɛ̃ɛ nɔng, Bituru gɔ̃ bii, shaa vuu shaanang tɔ̀ɔ́ nɛɛ ri kpang, ka ruu ɓɔɔ, kaa vɔrɔ zang ɓɔɔ ri kasɛ ɓarɛ nɛɛ zang yèe zang ɓɔɔ ri zang Yahudi kpang shaa katɔ ɓɛɛ.

¹³ Manzung ɓuru, zang Yahudi ɓɔɔ nimbang ɓɔɔ ri ka nɔng, ri gaayu vuu palɛnang nɛɛ yeti gbete kpang kaa jong nɛɛ Bituru. A ri nwãarɛ Baranaba kaa jong nɛɛ vuu ɓɔɔ ri palɛ nɛɛ yeti gbete kpang ɓɛɛ.

¹⁴ Ɓɔɔ n zirɛ ri yi gbalang kaarara ka doo ruu niizang ɓɔɔ ka yeti Ruu Tɔ̃ɔ Kirisi kpang, n kɔɔ Bituru ka tĩng ɓarɛ nandon n tɔɔ, “Mɔɔ zang Yahudi, a mɔɔ nwàng kaa tɔ̀ɔ́ naa zang Yahudi kpang. Mɔɔ nwang ɓaa naa zang ɓɔɔ ri zang Yahudi kpang ɓɛɛ. A ka ruu vi, mɔɔ kãa gbalang mɔɔ shing zang ɓɔɔ ri zang Yahudi kpang, ri nwang nwannang zang Yahudi nɛɛ gbãng gbãng ning viya?”

Zang ta yuu zang ka ruu danggn ɓɔɔ ri shing ɓɛɛ

¹⁵ Niizang, zang yi ruu ɓuru zang Yahudi, ruu wu zang ɓɔɔ ri zang Yahudi kpang, ɓɔɔ ri palɛ ɓarɛ vuu shi kpang ɓɛɛ kpang.

¹⁶ Naa dòo nɔngkɔ, ruu zi ɓuru tɔ nɛɛ shɔnzang nwáng zang tɔ̃ɔ ka tĩng Laa ka ruu danggn ɓɔɔ wu shing ka bii Yeesɔ Kirisi kɔ shɛ̃ɛning, wu ka ruu ɓɔɔ zang keɓe palɛ vuu ɓɔɔ nyaa dannang kasɛ ɓɛɛ kpang. Ruu shing danggn tɔ jong ka bii Yeesɔ Kirisi, tɔ̀ɔ, ruu nwang zang tɔ̃ɔ ka tĩng Laa nɛɛ bii danggn ɓɔɔ ruu shing ka bii Kirisi ɓɛɛ. Wu ka ruu ɓɔɔ, ruu palɛ vuu ɓɔɔ nyaa dannang kasɛ ɓɛɛ kpang. Ka ruu ɓɔɔ, zang nwàng zang tɔ̃ɔ ɓi jong ka tĩng Laa, ka ɓɔɔ zang palɛ vuu ɓɔɔ nyaa dannang kasɛ ɓɛɛ kpang.

¹⁷ Nɛɛ nɔngkɔ, a wee ruu kãa gbalang ruu nwang zang tɔ̃ɔ ka tĩng Laa ka ɓɔɔ ruu ɓakɛ yuu nɛɛ Kirisi ɓee, zang nɛɛ naa ĩiyi ruu ɓuru doo zang ɓɔɔ ri palɛ vuu shi kpang naa zang ɓɔɔ ri zang Yahudi kpang ɓɛɛ. Nwáng ɓu kaa naa Yeesɔ kɔ shing zang, zang palɛ vuu shi kpang ya? Wu nɔngkɔ kpang.

¹⁸ Naa n bɛ̃ɛ rɛɛ nyaa dannang zang Yahudi ka ruu ɓɔɔ zunung ɓɔɔ ri shing m n nwang zang tɔ̃ɔ ka tĩng Laa kpang. N palɛ m wu vuu ɓɔɔ Laa tãa tĩnang mɛɛ katɔ ɓɛɛ kpang, n nɛɛ shing gn tɔkn nɛɛ nyaa dannang keɓe ta yuu mɛɛ katɔ ɓɛɛ.

¹⁹ Ɓi rɛɛ nyaa dannang keɓe kɔ shingnɛ n zirɛ nɛɛ n vɔ katɔ, ka ruu ɓɔɔ, n dũng ri nandon kpang ɓɛɛ. Ka ruu nɔngkɔ, n shing danggn tɔ̀ɔ́ ka ri kpang, tɔ̀ɔ, n walɛ suru bii ka bii Laa.

²⁰ Zang ɓaa m naa m tɔ laa nɛɛ Kirisi, ɓi tɔ̀ɔ́ nkɔ nwang ningkãari kpang. Ɓi kaa Kirisi ɓɔɔ ka bii mɛɛ kɔ nwang ningkãari. Nwannang kɔ n nwang kãntang ɓee, n nwang m kaa nɛɛ danggn ɓɔɔ n shing ka bii Jaa Laa ɓɔɔ kasɛ m, a á zang yuu ɓiɓɛ, nɛɛ zang nyɔ wu vɔrɔ ka ruu mɛɛ ɓɛɛ.

²¹ N bɛ̃ɛ tɔ̃ɔ ɓɔɔ Laa pàlɛ̀ m ɓɛɛ kpang. Naa shɔnzang nwang zang tɔ̃ɔ ka tĩng Laa nɛɛ bii nyaa dannang katɔ, nwang ɓi kaa naa ɓɔɔ Kirisi vɔ ɓi kaa dalɛ waati ɓɛɛ.