Filipi 4 - Nyaa Shɔɔ Ɓɔɔ Laa a Ɓɛɛ

Ruu ɓɔɔ Bulu kɔɔ zang ɓɔɔ ri dũng Laa ɓɛɛ

¹ Rɛɛ manzung ɓɔɔ n kasɛ nɔɔ katɔ gbãng gbãng, n shing jĩng n kasɛ nɔɔ zinang. Nɔkɔ shing m n tãa tĩnang, n ti dɔɔ bii nɛɛ nɔkɔ. Rɛɛ masang ɓɔɔ n kasɛ nɔɔ dɔɔli ɓɛɛ, nɔɔ shii nɔngkɔ gbãng gbãng ka bii Laa.

² Ruu ɓɔɔ n kɔ̀ɔ́ Afodiya nɛɛ Sitiki keɓe. N gaa ri gbãng gbãng, n zɔ̃ɔrɔ ri katɔ, ri nwang ka nyaa zɔɔ, ka ruu ɓɔɔ, ri ɓarɛ zang Kpanti Yeesɔ ɓɛɛ.

³ N gaa mɔɔ katɔ, zang ɓɔɔ palɛ shonang nɛɛ n, a ti ɓaa shoo ka nyaa mɛɛ ɓɛɛ. Mɔɔ yì rɛɛ zang soro keɓe naa ka bii, ka ruu ɓɔɔ, ri nɛɛ n, ruu palɛ shonang, a ruu ti dang jĩng nɛɛ zɔɔ, ka ɓɔɔ ruu, kɔɔrɔ zang Ruu Tɔ̃ɔ Laa ɓɛɛ. Naa ɓɔɔ Kilema nɛɛ rɛɛ wusang shonang mɛɛ, ɓɔɔ Laa bée nung ɓarɛ tɔ nandon ka yeti labeenang ɓiɓɛ, ɓɔɔ wu beere nung zang ɓɔɔ ri walɛ suru bii ɓɔɔ waa nyaa kpang tɔ, kagn ɓɛɛ.

⁴ Nɔɔ ɓɔɔ nɔɔ ɓakɛ yuu tɔ nɛɛ Kirisi ɓɛɛ, nɔɔ tãa tĩnang diki diki. N paasɛ nɔɔ kɔɔnang tɔkn, nɔɔ tãa tĩnang.

⁵ Nɔɔ yaa nwannang manɛ ɓɔɔ nɔɔ yi tĩng ka vuu ɓɔɔ ɓi ɓɔɔ manɛ ɓɛɛ kpang, wu nwang vuu ɓɔɔ zang piti ri zi ɓɛɛ kati. Kpanti Kirisi yaa kaa tɔkɔlɔng a kaa tɔ.

⁶ Nɔɔ kpãa yuu manɛ ka ruu vuu ɓɔɔ kpang, nɔɔ kɔ̀ɔrɔ̀ Laa vuu ɓɔɔ nɔɔ kasɛ ɓɛɛ kɔ jong. Nɔ́ɔ gàa Laa ka ɓɔɔ nɔɔ rang yee nɛɛ wu, nɔɔ ti zãa wu.

⁷ Naa nɔɔ palɛ nɔngkɔ, yeti valɛnang ɓɔɔ a nɛɛ bii Laa, ɓɔɔ ɓa naa ɓɔɔ shɔnzang zi naa ɓɔɔ nwang ɓɛɛ katɔ, naa gãng jĩng ka ɓoro manɛ nɛɛ rɛ̃rɛnang manɛ, tɔ̀ɔ, vuu ɓɔɔ wu lee nɔɔ naa kaa tɔ̀ɔ́ bii kpang, ɓɔɔ nɔɔ zang Yeesɔ Kirisi ɓɛɛ.

Nɔɔ rɛ̃rɛ ka yuu rɛɛ vuu keɓe

⁸ Rɛɛ manzung, ruu ɓɔɔ n gɔɔ nyaa nɛɛ mani keɓe. Nɔɔ rɛ̃rɛ ka yuu rɛɛ vuu ɓɔɔ niizang ɓɛɛ, ɓɔɔ daa naa ɓɔɔ zang seng katɔ ɓɛɛ. Rɛɛ vuu ɓɔɔ teetee ɓɛɛ, vuu ɓɔɔ shi kpang kagn kpang ɓɛɛ, vuu ɓɔɔ shi dɔɔli ɓɛɛ, vuu ɓɔɔ zang kasɛ, a zang ti a wu bannang katɔ ɓɛɛ, vuu nandon ɓɔɔ daa naa dɔɔnang katɔ ɓɛɛ.

⁹ Vuu ɓɔɔ nɔɔ kpɛ̃ɛrɛ, kɔ́ nɔɔ tarɛ ka bii mɛɛ, kɔ́ nɔɔ nɛɛ tãa ka nyaa mɛɛ, kɔ́ ɓɔɔ nɔɔ zi ka nwannang mɛɛ ɓɛɛ, nɔɔ palɛ wukɔ. Laa ɓɔɔ shingnɛ yeti zang wu valɛ ɓɛɛ, naa nwang ditɔ nɛɛ nɔɔ.

Bulu zãa zang gari Filipi

¹⁰ N tãa tĩnang dɔɔli ka ruu ɓɔɔ n zang Kpanti Yeesɔ ɓɛɛ, ka ruu ɓɔɔ, diki ɓa tɔ dɔɔli, nɔɔ yi m naa kana bii tɔkn. N zi tɔ nɔɔ rɛ̃rɛ ruu mɛɛ katɔ, a nɔɔ walɛ gbalang ɓɔɔ nɔɔ yi m naa kaa tɔ̀ɔ́ bii ɓɛɛ kpang.

¹¹ N kɔɔ ruu keɓe, wu ka ruu ɓɔɔ vuu ɓɔɔ n kasɛ kagn ɓɛɛ kpang. Ka ruu ɓɔɔ, n kpɛ̃ɛrɛ yuu mɛɛ tɔ nɛɛ, vuu wu daa m katɔ, naa nwannang mɛɛ doo naa viya?

¹² Ǹ zi naa ɓɔɔ n palɛ, n nwangnɛ, vuu ka naa mɛɛ kpang ɓɛɛ tɔ. N ti zi naa ɓɔɔ n nwang vuu mɛɛ kagn gaagaa tɔ. Naa doo ka zɔ̃ng nwannang kiya, n kpɛ̃ɛrɛ yuu mɛɛ tɔ. Naa nyɔkɔ nyɔ m, naa n puu doo katɔ, naa vuu kagn dɔɔli, naa vuu kagn kpang, n zi naa ɓɔɔ n shii gbãng gbãng tɔ.

¹³ N zunung ɓɔɔ n palɛ rɛɛ vuu keɓe katɔ piti, nɛɛ naa vuu palɛnang ɓɔɔ Yeesɔ a m ɓɛɛ.

¹⁴ Naa doo nɔngkɔ, nɔɔ palɛ tɔ̃ɔ ka ɓɔɔ nɔɔ yi m naa ka bii ka ɓɔɔ n dàng jĩng ɓɛɛ.

¹⁵ Nɔɔ zang Filipi, nɔɔ nɛɛ yuu manɛ nɔɔ zi tɔ, nɛɛ ka diki ɓɔɔ n gaayu ɓɔɔ n kɔɔrɔ zang ruu tɔ̃ɔ Laa, n gaayu nɛɛ laa ɓɔɔ n yupaa n yaa Makidoniya ɓɛɛ, nɔkɔ yi m naa ka bii shɛ̃ɛning. Zang ɓɔɔ ri dũng Laa ɓɔɔ, ri ɓakɛ yuu nɛɛ n, ka nɔng zɔɔ vuu alɛnang nɛɛ talɛnang, kpang.

¹⁶ Ka ɓɔɔ n ka gari Tesalonika, nɔɔ yi m naa ka bii, ɓa doo gbete katɔ, ka ɓɔɔ vuu ka naa mɛɛ kpang ɓɛɛ.

¹⁷ N shing jĩng mɛɛ wu ka vuu ɓɔɔ nɔɔ a m ɓɛɛ kpang. N kasɛ m nɛɛ, Laa wu palɛ nɔɔ tɔ̃ɔ, ka ruu ɓɔɔ, nɔɔ yi m naa ka bii ɓɛɛ.

¹⁸ Nɔɔ a m vuu piti ɓɔɔ daa naa katɔ ɓɛɛ tɔ. Nɔɔ ti gisi vuu ɓɔɔ tɔ dɔɔli ɓa vuu ɓɔɔ n shing gn ɓiɓɛ tɔ. Ɓɔɔ Abafaroditu atɛ m vuu ɓɔɔ nɔɔ alɛ wu. Vuu bìí daa m katɔ, vuu ɓɔɔ n kasɛ ɓɛɛ takpang. Vuu keɓe nwang naa vuu ɓɔɔ á sɛ̃ɛ tɔ̃ɔ ɓɛɛ, vuu ɓɔɔ zang dɔɔ Laa ɓɔɔ shingnɛ Laa tãa tĩnang ɓɛɛ.

¹⁹ Laa mɛɛ, vuu naa ɓiɓɛ kagn dɔɔli, ɓɔɔ wu a zang nɛɛ bii Yeesɔ Kirisi ɓɛɛ, a nɔɔ vuu ɓɔɔ nɔɔ kasɛ ɓɛɛ ditɔ nandon.

²⁰ Zang ri a Laa ɓɔɔ wukɔ Daa ɓuru, bannang dòndòng. Nɔngkɔ.

Bulu hangsɛ zang nyaa jeenang

²¹ Jee m zang ɓɔɔ Yeesɔ Kirisi zɔ̃ngkɔ ri, nɛɛ ri nwang zang ɓiɓɛ nyaa. Zang ɓɔɔ ri dũng Laa, ɓɔɔ ri nɛɛ n ka nihn, ri jee nɔɔ nyaa.

²² Zang Laa ɓɔɔ ri ka nihn nandon ri jee nɔɔ nyaa. Zang ɓɔɔ ri nwang ka yeti gãa kpanti Kayisa kɔ ri jee nɔɔ nyaa gbãng gbãng.

²³ Kpanti Yeesɔ Kirisi wu palɛ nɔɔ tɔ̃ɔ.