Filipi 2 - Nyaa Shɔɔ Ɓɔɔ Laa a Ɓɛɛ

Nɔɔ nwang naa Yeesɔ

¹ Wee nɔɔ shing danggn tɔ ka bii Kirisi ɓee, danggn shinnang keɓe zàrɛ́ nɔɔ kana, nɛɛ nɔɔ kasɛ ruu zɔɔ ya? Kasɛnang ɓɔɔ wu kasɛ nɔɔ mã nɔɔ danggn katɔ ya? A nɔɔ ti nwang ka nyaa zɔɔ nɛɛ Suru Laa ya? Nɔɔ kasɛ katɔ ka yeti manɛ nɛɛ nɔɔ pálɛ̀ zɔɔ tɔ̃ɔ ya? A gn zɔɔ ti kɔng nɔɔ katɔ ya?

² N gaa nɔɔ katɔ rɛ̃rɛnang manɛ wu daa gbete, nɔ́ɔ kasɛ ruu zɔɔ katɔ, nɔ́ɔ ti ɓakɛ yuu nɛɛ zɔɔ, nɔ́ɔ kasɛ nyaa zɔɔ katɔ, tɔ̀ɔ, n tãa tĩnang kaa nyaa kiiri.

³ Nɔ́ɔ kàsɛ̀ wu yuu manɛ kɔ shɛ̃ɛning kpang, nɔ́ɔ ti tuu yuu manɛ kpang. Risi yuu ɓaaɓɛ naa vuu ɓɔɔ kpang, mɔɔ zì zang ɓɔɔ naa ri ɓa mɔɔ katɔ.

⁴ Zang ɓu wu shing jĩng ka vuu ɓɔɔ yeti ɓiɓɛ kasɛ ɓɛɛ kɔɔ shɛ̃ɛning kpang, wu shing jĩng jong ka vuu ɓɔɔ ɓeezung kasɛ ɓɛɛ.

⁵ Rɛ̃rɛnang ɓɔɔ nɔɔ rɛ̃rɛ ka yeti manɛ wu nwang naa ɓɔɔ Yeesɔ Kirisi rɛ̃rɛ ɓɛɛ.

⁶ Yeesɔ nwang naa Laa ka vuu piti, a tɔɔ kaa takpang nɛɛ wu gãsɛ yuu ɓiɓɛ nɛɛ Laa nɛɛ gbãng gbãng ning kpang.

⁷ Yaa vuu keɓe nandon, a risi yuu ɓiɓɛ naa jaafoo kɔ jong. A tuu bii shɔnzang, zang yi wu naa ɓɔɔ zang yi jaa shɔnzang ɓɛɛ.

⁸ Ka ɓɔɔ wu shɔnzang, sɔɔrɔ yuu ɓiɓɛ ka dii a ti kasɛ nɛɛ zang nyɔ wu vɔrɔ. Vɔ vɔrɔ ɓɔɔ zang ɓaa zang naa ka laa ɓɛɛ.

⁹ Ka ruu nɔngkɔ, Laa tuu wu a wu bannang ɓɔɔ bang dɔɔli, a ti a wu núng ɓɔɔ ɓa nung zang piti ɓɛɛ.

¹⁰ Tɔ̀ɔ, zang nɛɛ tãa nung Yeesɔ tɔ zang piti, ri tang ka tipi ri báng wu. Naa zang tãa nung keɓe ka lapa, naa ka koo keɓe, naa doo ka tipi dii ɓɛɛ.

¹¹ Zang ɓu ti kɔɔyi nɛɛ nyaa ɓiɓɛ, ka shoo zang piti, nɛɛ Yeesɔ Kirisi kɔ Kpanti ɓiɓɛ. Wu ti naa a Laa ɓɔɔ wukɔ Daa ɓuru bannang.

Nɔɔ nwang naa sàng ɓɔɔ yakɛ nɔng ɓɛɛ, ka koo keɓe

¹² Ka ruu nɔngkɔ, masang ɓɔɔ n kasɛ nɔɔ dɔɔli ɓɛɛ, naa ɓɔɔ nɔɔ ɓaa shoo ka nyaa mɛɛ diki diki, bɛ̀ɛ́ n doo nɛɛ nɔɔ ɓɛɛ, nɔɔ ɓaa shoo kaa nyaa mɛɛ gbãng gbãng ka wee kãntang n tɔ̀ɔ́ nɛɛ nɔɔ kpang ɓee. Nɔɔ yi tĩng nɔ́ɔ palɛ vuu ɓɔɔ shingnɛ yuu manɛ ɓɔɔ Laa ta tɔ ɓɛɛ, wu nwang kaa nyaa kiiri. Nɔɔ palɛ vuu keɓe nɛɛ vɔrɔ kaanang nɛɛ bii zaanang.

¹³ Ka ruu ɓɔɔ, Laa kɔ shing mɔɔ, nɛɛ mɔɔ kasɛ vuu ɓɔɔ wu kasɛ palɛnang ɓɛɛ. Wukɔ ti shingnɛ, mɔɔ zunung ɓarɛ palɛnang.

¹⁴ Nɔɔ palɛ vuu piti, nɔ́ɔ gɔ̃ɔrɔ yee kpang, nɔ́ɔ ti laa nyaa kpang.

¹⁵ Tɔ̀ɔ, nɔ́ɔ nwang kaa zang ɓɔɔ zang tɔɔ kpang, nɛɛ ri palɛ vuu shi kpang tɔ kpang, a ri ti tɔ̃ɔ dɔ̃ɔ gbete ɓɛɛ. Tɔ̀ɔ, nɔ́ɔ nwang kaa wujɛ Laa, ɓɔɔ shi kpang ka bii ɓarɛ kpang ɓɛɛ. Ka wee nɔɔ nwang ka teteng zang koo keɓe, ɓɔɔ ri sɔɔ gbalang gbete jong kaara kpang, ri ti palɛ vuu shi kpang ɓee. Nɔ́ɔ nwang kaa teteng ɓarɛ ka koo keɓe naa sang ɓɔɔ yakɛ nɔng ɓɛɛ.

¹⁶ Tɔ̀ɔ, nɔ́ɔ ti kɔɔ zang ruu ɓɔɔ a zang suru bii ɓɛɛ. Naa nɔɔ palɛ nɔngkɔ, ka diki ɓɔɔ Yeesɔ Kirisi naa gbãayu, n naa tãa tĩnang, ka ruu ɓɔɔ, n naa zi kaa wukɔ nɛɛ n nyɔ bii ka nɔng shonang ka dalɛ waati kpang ɓɛɛ.

¹⁷ Danggn ɓɔɔ nɔɔ shing ka bii Yeesɔ Kirisi nwang naa vuu ɓɔɔ nɔɔ dɔɔ Laa ɓɛɛ. Naa zang tɛ̃ɛ zĩi mɛɛ doo ka yuu vuu kɔ nɔɔ dɔɔ Laa ɓee, n tãa m tĩnang nɛɛ nɔɔ.

¹⁸ Daa naa ɓɔɔ nɔɔ tãa tĩnang jong tɔ. Nɔɔ kpalɛ yuu nɛɛ n, ruu tãa tĩnang.

Bulu shong Timoti nɛɛ Abafaroditu

¹⁹ Naa Kpanti Yeesɔ nɛɛ kasɛ tɔ, n tantɛ Timoti shɔɔnang ditɔ ka bii manɛ. Tɔ̀ɔ, nɛɛ gbãayu tɔ ka bii mɛɛ, ruu manɛ ɓɔɔ wu naa kɔɔ m, wu mã m danggn kati.

²⁰ Timoti kɔ gbete, rɛ̃rɛnang ɓiɓɛ daa gbete nɛɛ ɓɔɔ mɛɛ, wukɔ ti kasɛ ruu manɛ gbãng gbãng.

²¹ Zang nimbang ri nandon, zang ɓu rɛ̃̀rɛ́ ɓi ka yuu vuu ɓɔɔ a wu tĩnang ɓɛɛ, ri rɛ̃̀rɛ̀ ɓarɛ ka yuu Yeesɔ Kirisi kpang.

²² A nɔɔ nandon, nɔɔ zi tɔ nɛɛ Timoti tusu tɔ nɛɛ wu ɓi zang tɔ̃ɔ. N nɛɛ wu, ruu kɔɔrɔ zang Ruu Tɔ̃ɔ Laa ka nyaa zɔɔ. Ka shonang kɔ ruu palɛ ɓee, dũng m, naa ɓɔɔ jaa dũng daa ɓiɓɛ ɓɛɛ.

²³ Ka ruu nɔngkɔ, n shing jĩng nɛɛ n shong wu ka bii manɛ tantɛnang, n nɛɛ zi naa ɓɔɔ vuu nwalɛ ka nɔng mɛɛ ka nihn tɔ ɓɛɛ.

²⁴ N shing gn ka bii Laa nɛɛ n nɛɛ yuu mɛɛ n naa tantɛ anang ditɔ ka bii manɛ.

²⁵ N zi ka jĩng mɛɛ tɔ̃ɔ, n shong manzung ɓuru Abafaroditu ɓɔɔ ruu palɛ shonang nɛɛ zɔɔ, a ruu ti ta sĩiri ka bii zɔɔ nɛɛ wu ɓɛɛ. Ɓɔɔ nɔɔ shong wu nɛɛ wu naa yi m naa ka bii ɓɛɛ.

²⁶ Kasɛ ka yeti ɓiɓɛ gbãng gbãng nɛɛ wu zi nɔɔ nandon tɔkn. Vuu bìí kpãa wu dɔɔli, ka ruu ɓɔɔ, nɔɔ tãayi nɛɛ vuu pálɛ́ wu katɔ ɓɛɛ.

²⁷ Niizang, bɛ̀ɛ́ vuu palɛ wu katɔ, yaa tɔkɔlɔng nɛɛ vɔ tɔ. A gn ɓiɓɛ kɔng Laa, nwang naa ɓɔɔ gn mɛɛ kɔng Laa jong ɓɛɛ. Tɔ̀ɔ, vuu ɓɔɔ wu lasɛ m yeti tɔ̀ɔ́ ka wee vuu ɓɔɔ kpãa m, kiiri m nyaa ka teteng ɓee kpang.

²⁸ Ka ruu nɔngkɔ, n kasɛ katɔ gbãng gbãng n shong wu, wu naa ĩi nɔɔ, tɔɔ nɔ́ɔ tãa tĩnang nɔɔ nɛɛ zi wu tɔ tɔkn ɓɛɛ. Tɔ̀ɔ, yeti mɛɛ wu valɛ kaa jong.

²⁹ Nɛɛ shɛ̃ɛ nɔng manɛ tɔ, nɔɔ ta wu waasɛ̃, nɔ́ɔ tãa tĩnang, ka ruu ɓɔɔ, ɓi doo zang ɓɔɔ dũng Laa kɔ naa nɔkɔ ɓɛɛ. Zang ɓɔɔ naa weɓe, daa naa ɓɔɔ nɔɔ seng wu tɔ.

³⁰ Ka ruu ɓɔɔ, yaa tɔkɔlɔng nɛɛ vɔrɛ ka nɔng ɓɔɔ wu palɛ Yeesɔ Kirisi shonang ɓɛɛ. Mãlɛ́ yuu ɓiɓɛ nɛɛ tɔ̀ɔ, wu hangsɛ shonang ɓɔɔ nɔɔ nɛɛ pàlɛ̀ m ɓɛɛ.