Afisa 6 - Nyaa Shɔɔ Ɓɔɔ Laa a Ɓɛɛ

Nwannang wujɛ nɛɛ zang ɓɔɔ yiki ri ɓɛɛ

¹ Wujɛ, nɔɔ ɓaa shoo ka nyaa zang ɓɔɔ ri yiki nɔɔ ɓɛɛ, ka Ruu Laa. Wee vuu ɓɔɔ dàa náa palɛnang katɔ ɓɛɛ.

² Nyaa ɓɔɔ zang dangnɛ nɛɛ, “A daaɓɛ nɛɛ naaɓɛ bannang katɔ,” wukɔ shɔɔnang ka teteng nyaa ɓɔɔ Laa dangnɛ, ɓɔɔ Laa gisi nyaa anang kagn ɓɛɛ nɛɛ,

³ “Tɔ̀ɔ, vuu piti wu nwàng mɔɔ kaa tɔ̃ɔ, diki ɓaaɓɛ wu bee kati ka koo.”

⁴ Zang ɓɔɔ ri yiki wujɛ ɓɛɛ, nɔ́ɔ pálɛ̀ wujɛ manɛ vuu ɓɔɔ shing ri, yeti ɓarɛ wu làsɛ́ ɓɛɛ kpang. Nɔɔ hingti ri, ri bang ka naa ɓɔɔ zang ɓɔɔ ri dũng Laa ri mangkɛ wujɛ, a ri ti kpɛ̃ɛrɛ ri ruu ɓɛɛ.

Nwannang jaafoo nɛɛ zang gãa ɓiɓɛ

⁵ Jaafoo, nɔɔ dũng nyaa dabang gãa manɛ katɔ. Nɔɔ seng ri, nɔ́ɔ ti kaa vɔrɔ ɓarɛ gbãng gbãng. Nɔɔ palɛ vuu keɓe nɛɛ yeti gbete, naa nɔɔ shòng kaa Kirisi.

⁶ Nɔ́ɔ zi wu jĩng ɓarɛ, nɔ́ɔ pálɛ́ vuu keɓe kpang, tɔ̀ɔ, ri dɔɔ nɔɔ kati ɓɛɛ kpang. Nɔɔ palɛ vuu ɓɔɔ Laa kasɛ ɓɛɛ, nɛɛ yeti manɛ nandon, ka ruu ɓɔɔ, nɔɔ manɛ jaafoo Yeesɔ Kirisi ɓɛɛ.

⁷ Nɔɔ palɛ shonang jaafoo manɛ nyaa tabɛ̀ɛ́ kɔ shɛ̃ɛning. Nɔ́ɔ ti palɛ naa ɓɔɔ nɔɔ shǒng Kpanti Yeesɔ ɓɛɛ, wu naa ɓɔɔ nɔɔ shǒng shɔnzang kpang.

⁸ Danggn wu ning nɔɔ kpang, kpanti naa sɔɔrɔ zang ɓu doo ditɔ, jaafoo nɛɛ zang ɓɔɔ ri jaafoo kpang ɓɛɛ, ka ruu tɔ̃ɔ ɓɔɔ zang ɓu palɛ ɓɛɛ.

⁹ Dabang gãa, nɔɔ nwang doo nɔngkɔ nɛɛ jaafoo manɛ. Nɔ́ɔ kɔɔ ri vuu ɓɔɔ hing ri bii manɛ anang kpang. Danggn wu ning nɔɔ kpang, dabang gãa manɛ ɓɔɔ wukɔ ti ɓɔɔ ɓarɛ ɓi gbete ka lapa. Zang ɓɔɔ jɛ̃̀ɛ ruu ɓi jong gn dang gbete kpang ɓɛɛ.

Naa ɓɔɔ zang Kirisi naa ɓa kaka Sheetang ɓɛɛ

¹⁰ N di nyaa kaa nɛɛ ruu keɓe, naa vuu palɛnang Kpanti Yeesɔ wu shing nɔɔ, nɔ́ɔ shii nɛɛ kaka ka yuu ruu gn kɔ nɔɔ shing ka bii ɓiɓɛ ɓee.

¹¹ Nɔɔ hãlɛ vuu waa sĩiri tanang Laa, ɓɔɔ Laa a nɔɔ nandon, tɔ̀ɔ, nɔɔ shi bang kaa nɛɛ mani ka ɓɔɔ Sheetang naa kãa gbalang ɓɔɔ wu nwãarɛ nɔɔ nɛɛ vuu shi kpang ɓɛɛ.

¹² Ka ruu ɓɔɔ, ruu gáa nyaa wu nɛɛ shɔnzang kpang ɓɛɛ. Ruu gaa nyaa ɓuru nɛɛ rɛɛ suru ɓɔɔ yeti ɓarɛ shi kpang, ɓɔɔ ri ka lapa ɓɛɛ, a ɓɔɔ kaa nɛɛ rɛɛ naa vuu palɛnang, nɛɛ rɛɛ kpanti koo jaa knti keɓe ɓɔɔ tɔ̀ɔ katɔ ɓɛɛ.

¹³ Ka ruu nɔngkɔ, nɔɔ sèe vuu waa sĩiri tanang Laa ta, tɔ̀ɔ diki ɓɔɔ shi kpang keɓe nɛ́ɛ a tɔ, nɔɔ shii bang kaa nɛɛ sheetang ka ɓɔɔ wu a nyaa gaanang nɛɛ nɔɔ ɓɛɛ. Nɔɔ nɛɛ gáa nyaa tɔ nɛɛ wu, nɔɔ nɛɛ shaa wu tɔ, nɔɔ shii kaa nɛɛ doo, ka nɔng manɛ gbãng gbãng.

¹⁴ Nɔɔ kpalɛ bii katɔ nɔ́ɔ shiiyi. Ruu ɓɔɔ niizang wu nwang naa guruji ɓɔɔ nɔɔ mã ka sang ɓɛɛ. Nwannang tɔ̃ɔ manɛ naa ɓɔɔ Laa kasɛ ɓɛɛ, wu nwang naa vuu ɓɔɔ nɔɔ zuu danggn nɛɛ mani ɓɛɛ.

¹⁵ Bii ɓɔɔ nɔɔ kpalɛ nɛɛ nɔɔ daa kɔɔ zang Ruu Tɔ̃ɔ, ɓɔɔ shingnɛ yeti zang valɛ ɓɛɛ, wu nwang naa koodoo ka doo manɛ.

¹⁶ Nɔ́ɔ ti yaa danggn ɓɔɔ nɔɔ shing ka bii Laa ɓɛɛ, wu nwàng nɔɔ naa kãati diki diki. Nɔ́ɔ nɔ̀ɔ shɔ̀ng ɓɔɔ Sheetang, taka nɔɔ ɓɛɛ nɛɛ mani.

¹⁷ Nɔɔ nɛɛ kasɛ tɔ, Laa nɛɛ ta yuu manɛ tɔ, nwang nɔɔ kaa naa wàálaa ɓɔɔ nɔɔ hãa ka yuu ɓɛɛ. Ruu Laa wu nwang nɔɔ ɓi kaa naa yere bang, ɓɔɔ Suru Laa a nɔɔ ɓɛɛ.

¹⁸ Nɔɔ gaa Laa diki diki naa ɓɔɔ Suru Laa tusu nɔɔ ɓɛɛ. Nɔɔ gaa wu ka yuu vuu ɓɔɔ nɔɔ kasɛ ɓɛɛ nandon. Nɔɔ palɛ vuu keɓe nɔngkɔ, nɔ́ɔ lee kpang. Nɔ́ɔ ti gaa Laa diki diki ka ruu zang Laa nandon.

¹⁹ A nɔ́ɔ gaa m Laa jong, wu hãa m ruu ka nyaa, n nɛɛ kpalɛ bii tɔ, nɛɛ n kɔɔ zang kaa ruu ɓɛɛ. Tɔ̀ɔ, n rang yee, n nwàngsɛ̀ zang ruu niizang ɓɔɔ zang waasɛ katɔ ka yuu Ruu Tɔ̃ɔ Laa ɓɛɛ, ń kaa vɔrɔ kpang.

²⁰ Zang shong m ka ruu Ruu Tɔ̃ɔ keɓe kɔ, a zang mã m ka sãa. Ka ruu nɔngkɔ, nɔɔ gaa m Laa, wu shingnɛ, n rang yee keɓe naa ɓɔɔ n kasɛ ɓɛɛ, n kaa vɔrɔ kpang.

Nyaa jeenang ɓɔɔ Bulu di nyaa ruu nɛɛ mani ɓɛɛ

²¹ Tikiku manzung ɓuru ɓɔɔ ruu kasɛ wu dɔɔli, ɓɔɔ ti palɛ Laa shonang nɛɛ yeti gbete ɓɛɛ, naa kɔɔ nɔɔ ruu ditɔ nandon ka yuu mɛɛ. Tɔ̀ɔ, nɔ́ɔ tãa naa ɓɔɔ n nwang ɓɛɛ.

²² Ka ruu rúu keɓe kɔ, n shong wu ka bii manɛ, wu kɔɔ nɔɔ naa ɓɔɔ ruu nandon ruu nwang ɓɛɛ. Tɔɔ wu mã nɔɔ danggn kati.

²³ N gaa Daa ɓuru Laa nɛɛ Kpanti ɓuru Yeesɔ Kirisi, ri shing rɛɛ manzung ɓuru, yeti ɓarɛ wu valɛ katɔ, ri kasɛ ruu zɔɔ, ri ti yi rɛɛ manzung ɓuru naa kagn, ri shing danggn.

²⁴ N gaa Laa nɛɛ wu pàlɛ̀ zang ɓɔɔ ri kasɛ Kpanti ɓuru Yeesɔ Kirisi gbãng gbãng tɔ̃ɔ.