Afisa 2 - Nyaa Shɔɔ Ɓɔɔ Laa a Ɓɛɛ

Laa a ruu suru bii nɛɛ bii Yeesɔ

¹ Ɓeleng ka tĩng, bɛ̀ɛ́ nɔɔ nwang manɛ naa zang ɓɔɔ ri vɔlɔ katɔ ɓɛɛ. Ka ruu ɓɔɔ, nɔɔ dũ̀ng nyaa Laa kpang, a nɔɔ ti pálɛ́ vuu shi kpang ɓɛɛ.

² Ka laa kaɓa, nɔɔ nwang manɛ nwannang keɓe kɔ, nɔɔ dũlu manɛ gbalang vuu shi kpang ɓɔ̀ɔ́ koo keɓe. Nɔɔ ɓaa shoo manɛ ka nyaa kpanti rɛɛ suru shi kpang. Suru keɓe kɔ ka yeti zang ɓɔɔ ri dũng nyaa ɓɔɔ Laa dang ɓɛɛ kpang ɓɛɛ.

³ Niizang bɛ̀ɛ́ ɓeleng ruu nandon naa rikɔ, ruu nwáng nwannang ɓuru ka doo vuu ɓɔɔ bii shɔnzang ɓuru kasɛ ɓɛɛ. A ruu palɛ vuu piti dàa naa vuu ɓɔɔ bii ɓuru kasɛ, a rɛ̃rɛnang ɓuru ti kasɛ ɓɛɛ. A gnvɔ ti shaa Laa dɔɔli, ka ruu ɓuru nɛɛ zang piti ɓɔɔ ri palɛ rɛɛ vuu keɓe ɓɛɛ.

⁴ A gn zang kɔng Laa kaa dɔɔli doo nɛɛ mani, a kasɛnang ɓɔɔ wu kasɛ ruu nɛɛ nɔɔ nɛɛ mani ti bang dɔɔli.

⁵ Ka ɓɔɔ bɛ̀ɛ́ ruu nwang naa ruu vɔlɔ katɔ, ka ruu vuu shi kpang ɓɔɔ ruu palɛ ɓɛɛ. Laa shingnɛ ruu nwang ningkãari nɛɛ Yeesɔ Kirisi. Ɓi tɔ̃ɔ ɓɔɔ Laa palɛ kɔ shingnɛ zang ta yuu manɛ.

⁶ Laa wisi ruu paa nɛɛ Yeesɔ Kirisi ka ɓɔɔ ruu shing danggn tɔ ka wu, a shing ruu nɛɛ ruu nwang nɛɛ wu ka lapa ɓɛɛ.

⁷ Laa palɛ vuu keɓe, nɛɛ tɔ̀ɔ, ka koo ɓɔɔ a ka tĩng ɓɛɛ, wu tusu tɔ̃ɔ ɓɔɔ wu palɛ ɓɔɔ daa naa gãsɛnang kpang ɓɛɛ. Ka ruu vuu ɓɔɔ Yeesɔ Kirisi palɛ ɓɛɛ.

⁸ Ka ruu ɓɔɔ, zang ta yuu manɛ ɓi ka ruu tɔ̃ɔ ɓɔɔ Laa palɛ nɔɔ, ka ruu danggn ɓɔɔ nɔɔ shing ɓɛɛ. Ɓi vuu ɓɔɔ nɔkɔ palɛ nɛɛ yuu manɛ kpang, ɓi Laa a nɔɔ waati.

⁹ Ɓi vuu ɓɔɔ nɔɔ kɔɔrɔ ruu bang bang ka yuu manɛ ka ruu ɓiɓɛ kpang, ka ruu ɓɔɔ nɔɔ walɛ ka ruu shonang ɓɔɔ nɔɔ palɛ ɓɛɛ kpang ɓɛɛ.

¹⁰ Laa kɔ mãa ruu, ka yuu ɓɔɔ ruu ɓakɛ nɛɛ Yeesɔ Kirisi, nɛɛ ruu nwang nwannang ɓɔɔ ruu palɛ shonang ɓɔɔ tɔ̃ɔ, ɓɔɔ Laa kpàlɛ̀ ruu bii, doo ka tĩng, nɛɛ ruu naa palɛ ɓɛɛ.

Rùu kaa gbete ka bii Yeesɔ

¹¹ Ka ruu nɔngkɔ, danggn wu ning nɔɔ naa ɓɔɔ nɔɔ nwáng ka tĩng ɓɛɛ kpang. Nɔɔ ɓɔɔ zang yi nɔɔ manɛ zang Yahudi kpang, ɓɔɔ zang Yahudi ri ɓaa nɔɔ nɛɛ zang ɓɔɔ ri yee shaa ka takpang ɓɛɛ. A ri ɓaa yuu ɓarɛ nɛɛ zang ɓɔɔ ri yee shaa ɓarɛ katɔ ɓɛɛ. (Vuu ɓɔɔ shɔnzang ri palɛ ka bii zang nɛɛ naa ɓarɛ ɓɛɛ.)

¹² Ka laa kaɓa, bɛ̀ɛ́ nɔɔ shing danggn gň ka bii Yeesɔ Kirisi kpang. Bɛɛ nɔɔ manɛ zang zanti, ka tipi Isirela, a nɔɔ manɛ ka teteng zang Laa kpang. Rɛɛ nyaa ɓɔɔ Laa mã nɛɛ zang ɓiɓɛ, a á ri nyaa kagn, ɓi ɓɔɔ manɛ kpang. Nɔɔ nwang manɛ ka koo keɓe, vuu ɓɔɔ zang shing gn kagn ɓɛɛ kpang, a Laa manɛ ti kagn kpang.

¹³ A kãntang keɓe, ka ɓɔɔ nɔɔ shing gn tɔ nɛɛ Yeesɔ Kirisi ɓɛɛ, nɔɔ ɓɔɔ bɛ̀ɛ́ nɔɔ naabm nɛɛ Yeesɔ kpang, zang atɛ nɔɔ tɔ naabm ka ruu zĩi ɓiɓɛ.

¹⁴ Ka ruu ɓɔɔ, Kirisi nɛɛ yuu ɓiɓɛ shing ruu tɔ, ruu nwang kaa nyaa zɔɔ, ka ɓɔɔ wu shíng zang Yahudi nɛɛ zang ɓɔɔ ri zang Yahudi kpang ri nwang kaa gbete ɓɛɛ. Wukɔ jili vuu ɓɔɔ basɛ ri, a ri shing jĩng nɛɛ zɔɔ kpang ɓɛɛ.

¹⁵ Shing tɔ zang pálɛ̀ shonang tɔ̀ɔ́ nɛɛ nyaa dannang zang Yahudi nɛɛ vuu ɓɔɔ nyaa dannang keɓe kasɛ piti ɓɛɛ kpang. Palɛ nɔngkɔ nɛɛ tɔ̀ɔ, wu shingnɛ zɔ̃ng zang piti keɓe, ri nwang shɔnzang ɓɔɔ shɔɔ dɔ̃ɔ gbete, ka ɓɔɔ wu a zang bii ɓiɓɛ, zang nyɔ wu vɔrɔ ɓɛɛ. Ka naa weɓe kɔ, wu shing ri, ri nwang ka nyaa zɔɔ.

¹⁶ Ka vɔrɔ ɓɔɔ Yeesɔ Kirisi vɔ ka yuu laa, wukɔ ningsi jĩng ɓɔɔ bɛ̀ɛ́ ri shing nɛɛ zɔɔ kpang ɓɛɛ. Zɔ̃ng zang ziti keɓe, Yeesɔ ɓakɛ ri yuu nɛɛ bii laa ɓɔɔ zang ɓáa wu naa kagn ɓɛɛ, a sũuru ri tɔkn nɛɛ Laa.

¹⁷ A Kirisi arɛ, naa kɔɔ zang piti Ruu Tɔ̃ɔ ɓɔɔ shingnɛ zang ri nwang ka nyaa zɔɔ ɓɛɛ. Kɔɔ nɔɔ ɓɔɔ nɔɔ zang Isirela kpang ɓɛɛ, ɓɔɔ bɛ̀ɛ́ nɔɔ naabm nɛɛ Laa kpang ɓɛɛ, a ti kɔɔ zang Yahudi ɓɔɔ ri ɓarɛ naabm nɛɛ wu ɓɛɛ jong.

¹⁸ Nɛɛ bii Yeesɔ Kirisi, ruu nandon ruu walɛ gbalang anang ka tĩng Daa nɛɛ bii Suru gbete keɓe.

¹⁹ Ka ruu nɔngkɔ, nɔɔ ɓɔɔ nɔɔ zang Isirela kpang, nɔɔ tɔ̀ɔ́ zang zanti, a ɓɔɔ zang koolaa ɓɔɔgn kpang. Nɔɔ manɛ zang gbete nɛɛ zang Laa, Daa manɛ kaa gbete, wukɔ Laa.

²⁰ Nɔɔ nwang manɛ naa gãa ɓɔɔ zang mãa ɓɛɛ, a zang shonang Yeesɔ nɛɛ zang nyaa shonang Laa, rikɔ ɓarɛ kaa doo gãa ɓɔɔ zang loo ka tipi ɓɛɛ. Yeesɔ Kirisi nɛɛ yuu ɓiɓɛ, ɓi kaa tari ɓɔɔ yiti gãa ɓɛɛ.

²¹ Kpanti Yeesɔ kɔ yiti gãa bìí dɔ̃ɔ gbete, a gãa bii bangnɛ, wu raa Gãa tɔ̃ɔ Laa ka bii ɓiɓɛ.

²² Zang mãa nɔɔ kana jong ka bii ɓiɓɛ nɔng gbete, tɔ̀ɔ, nɔ́ɔ raa gãa ɓɔɔ Laa nwàng kagn nɛɛ bii Suru ɓiɓɛ ɓɛɛ.