Zang Shonang Yeesɔ 8 - Nyaa Shɔɔ Ɓɔɔ Laa a Ɓɛɛ

Shaawulu dang zang ɓɔɔ ri dũng Laa jĩng

¹ Shaawulu kasɛ nyaa kagn ka ɓɔɔ zang nyɔ Istifanu vɔrɔ ɓɛɛ. Ka diki kaɓa zang gaayu ɓɔɔ zang dang zang ɓɔɔ ri dũng Laa jĩng ka Urushalima. Zang ɓɔɔ ri shing danggn tɔ, zang tantɛ ri ka tipi Yahudi nɛɛ tipi Samariya nandon. Ɓi rɛɛ zang shonang Yeesɔ kɔ ri nwang ɓarɛ shɛ̃ɛning.

² Zang ɓɔɔ ri bang Laa nɛɛ yeti gbete ri gbãa Istifanu, ri kaa wu nyavɔ gbãng gbãng.

³ Shaawulu kãa ɓi gbalang ɓɔɔ nɛɛ wu ningsi zang ɓɔɔ ri dũng Laa ɓɛɛ, dɔ̃ɔ gbete. Dàarɛ́ ka gãa gãa, yiki zang varɛ nɛɛ zang soro, wu daa looro ri ka sãa.

Zang daa ráng yee Laa ka Samariya

⁴ Zang ɓɔɔ ri shing danggn tɔ ɓɔɔ ri tantɛ nɛɛ nɔng piti piti ri rangkɛ Ruu Laa ka nɔng ɓɔɔ ri daarɛ ɓɛɛ.

⁵ Filibu daa ka gari ɓɔɔ ka tipi Samariya, daa kɔɔ zang ruu Kirisi ka nɔngkɔ.

⁶ Ɓɔɔ zang ɓɔɔ ri kpalɛ zɔɔ, ri tãa vuu ɓɔɔ wu kɔɔyi, a ri ti zi vuu ɓɔɔ zang zirɛ zang mã naa ka danggn ɓɔɔ wu palɛ ɓɛɛ, ri ɓaa shoo kaa tɔ̃ɔ tɔ̃ɔ.

⁷ Suru shi kpang, ri mɛɛrɛ nyaa ka lapa ka ɓɔɔ ri nwangkɛ nɛɛ bii zang ɓɛɛ. Zang ɓɔɔ ri kàa katɔ, nɛɛ zang ɓɔɔ bii ɓarɛ vɔ katɔ, zang ti masɛ ri jong.

⁸ Zang tãa tĩnang ka gari kaɓa dɔɔli.

⁹ Yɔɔ ɓɔɔ kagn ka gari kaɓa, zang ɓaa wu nɛɛ Siman. Bɛ̀ɛ́ hɛ̃ɛ paa. Palɛ vuu ɓɔɔ zang zirɛ zang mã naa ka danggn dɔɔli, a kɔɔrɔ zang nɛɛ wu ɓi zang bang.

¹⁰ Zang ɓɔɔ ri ka gari nandon, zang bang nɛɛ wujɛ, ri ɓaa shoo ka nyaa ɓiɓɛ. Ri kɔ̀ɔrɔ́ nɛɛ, “Yɔɔ keɓe ɓi naa vuu palɛnang Laa ɓɔɔ zang ɓaa nɛɛ, ‘Naa vuu palɛnang ɓɔɔ bang dɔɔli ɓɛɛ.’ ”

¹¹ Ri dũng wu, ka ruu ɓɔɔ, diki bee tɔ, ɓɔɔ wu pàlɛ́ ri vuu ɓɔɔ ri zirɛ ri mã naa ka danggn nɛɛ paa hɛ̃ɛnang ɓiɓɛ ɓɛɛ.

¹² Ɓɔɔ ri shing danggn ka Ruu Tɔ̃ɔ kpanti roonang Laa ɓɔɔ Filibu kɔɔ ri, a ɓɔɔ kaa nung Yeesɔ Kirisi, zang palɛ ri batizima, zang varɛ nɛɛ zang soro nandon.

¹³ Siman nɛɛ yuu ɓiɓɛ shing danggn jong ka knti ɓɔɔ zang palɛ wu batizima tɔ, ràkɛ́ kaa nɛɛ Filibu diki diki. Siman mã naa ka danggn, ka ruu vuu ɓɔɔ zang zirɛ zang mã naa ka danggn ɓɔɔ wu zìlí Filibu palɛ ɓɛɛ.

¹⁴ Zang shonang Yeesɔ ɓɔɔ ri ka Urushalima, ri tãa nyaa nɛɛ zang Samariya ri ta Ruu Laa tɔ, ka ruu nɔngkɔ, ri dɔ̃ Bituru nɛɛ Yɔhana ka bii ɓarɛ.

¹⁵ Ri daa shɛ̃ɛ nɔng, a ri gaa zang ɓɔɔ ri shing danggn tɔ Laa, nɛɛ tɔ̀ɔ, Laa wu a ri Suru ɓiɓɛ kati.

¹⁶ Ka ruu ɓɔɔ, bɛ̀ɛ́ Suru Laa a gn ka bii zang gbete ka teteng ɓarɛ kpang ɓɛɛ. Zang palɛ ri batizima ɓarɛ doo nɛɛ nung Kpanti Yeesɔ kɔ shɛ̃ɛning.

¹⁷ Bituru nɛɛ Yɔhana ri shĩili naa kaa yuu ɓarɛ, a Suru Laa a kaa bii ɓarɛ.

¹⁸ Siman zirɛ Laa a zang Suru ɓiɓɛ ka ɓɔɔ rɛɛ zang shonang Yeesɔ ri shĩili naa ka yuu zang ɓɛɛ, ka ruu nɔngkɔ, á Bituru nɛɛ Yɔhana saka,

¹⁹ a kɔɔ ri tɔɔ, “Nɔɔ a m naa vuu palɛnang keɓe jong, tɔ̀ɔ, zang ɓɔɔ n nɛɛ shing naa ka yuu ɓiɓɛ Suru Laa wu a jong ka bii ɓiɓɛ.”

²⁰ Bituru kasɛ wu nyaa tɔɔ, “Mɔ́ɔ shaarɛ nɛɛ saka ɓaaɓɛ ning, ka ruu ɓɔɔ, mɔɔ kɔɔ nɛɛ mɔɔ hoo vuu ɓɔɔ Laa a zang waati katɔ ɓɛɛ.

²¹ Ruu ɓaaɓɛ hãa ɓi kagn ka shonang keɓe kpang, ka ruu ɓɔɔ, yeti ɓaaɓɛ ɓi tɔ̃ɔ ka tĩng Laa kpang ɓɛɛ.

²² Kɔ̃sɔ yeti ɓaaɓɛ ta, ka ruu vuu shi kpang keɓe, mɔɔ gaa Laa wu yaa mɔɔ gbalang, ka ruu ɓɔɔ, mɔɔ rɛ̃rɛ vuu shi kpang naa weɓe ɓɛɛ.

²³ Ka ruu ɓɔɔ, n zirɛ sũnyaa kagn yeti ɓaaɓɛ dɔɔli ɓɛɛ, vuu shi kpang ti ɓa mɔɔ yuu tɔ ɓɛɛ.”

²⁴ Siman kɔɔ Bituru nɛɛ Yɔhana tɔɔ, “Nɔɔ gaa m Laa jong, tɔ̀ɔ, vuu ɓɔɔ nɔɔ kɔɔyi wu palɛ m kaa tɔ̀ɔ́ gbete kpang.”

²⁵ Bituru nɛɛ Yɔhana ri kɔɔrɔ vuu ɓɔɔ Laa palɛ, a ri ti rang zang Ruu Laa tɔ, ri gbãayu ri daa Urushalima kati. Ri kɔɔrɔ zang Ruu Laa ka rɛɛ gari Samariya ka gbalang ɓɔɔ ri daa ɓɛɛ.

Filibu nɛɛ yɔɔ tipi Habasha

²⁶ Zang nyaa shonang Laa ɓɔɔ ka lapa kɔɔ Filibu tɔɔ, “Yupaa mɔɔ daa ka dii mɔɔ sɔɔ gbalang gbaala ɓɔɔ yupaa nɛɛ Urushalima daa ka Gaza ɓɛɛ.”

²⁷ Ka ruu nɔngkɔ, Filibu kpalɛ bii a daayi. Daa kana, a kpisi yuu nɛɛ yɔɔ tipi Habasha ɓɔɔ bii varɛ ɓiɓɛ vɔ katɔ ɓɛɛ, gbãayu dàá kaa tipi ɓiɓɛ. Yɔɔ keɓe zang bang kɔ nwani. Wukɔ yiti saka Kandakatu, jaa soro ɓɔɔ roo kpanti ka tipi Habasha ɓɛɛ. Dàa Urushalima nɛɛ wu daa bang Laa.

²⁸ A gbãayu kana, vang ka yuu kɛkɛ ɓɔɔ gbantang gɔ̃ ɓɛɛ. Ɓɔɔ wu nwang ka yeti kɛkɛ, gã labeenang ɓɔɔ Ishaya zang nyaa shonang Laa bee ɓɛɛ.

²⁹ A Suru Laa kɔɔ Filibu tɔɔ, “Daa ka nɔng kɛkɛ kaɓa naabm, mɔɔ ra ka kagn ɓiɓɛ.”

³⁰ A Filibu yurɛ daa ka bii kɛkɛ daa tãayi yɔɔ gã labeenang Ishaya zang nyaa shonang Laa. A Filibu hɛ̃ɛ wu tɔɔ, “Mɔɔ zi vuu kɔ mɔɔ gã ɓɛɛ ɓu tɔ ya?”

³¹ Yɔɔ zang bang keɓe kasɛ wu nyaa tɔɔ, “Zang ɓɔɔ nɛ́ɛ kɔɔ m dĩiri ɓiɓɛ kpang, n zi biya?” A kɔɔ Filibu nɛɛ wu vang ta, wu naa nwang nɛɛ wu ka yeti kɛkɛ,

³² Nɔng ɓɔɔ yɔɔ kaɓa gãrɛ keɓe, Nwáng naa mɛ̀ɛrɛ́ ɓɔɔ zang daa nɛɛ mani ka nɔng yeenang ɓɛɛ, a puu nyaa ɓiɓɛ kpang. Nwang naa jamɛ̀ɛrɛ́ ɓɔɔ zang kpang shãngti ɓiɓɛ, kaa nyaa kpang ɓɛɛ.

³³ Zang pálɛ́ wu vuu yusɛ̃ɛ a zang ɓɔɔ ti jɛ̃̀ɛ́ wu ruu tɔ̃ɔ kpang. Zang ɓɔɔ zunung ɓɔɔ wu kɔɔ zang ruu ka yuu zɔ̃ng ɓiɓɛ kpang. Ka ruu ɓɔɔ, zang nyɔ wu vɔrɔ bɛ̀ɛ́ diki ɓiɓɛ ka koo keɓe waa nyaa gn kpang ɓɛɛ.

³⁴ Yɔɔ ɓɔɔ bii varɛ ɓiɓɛ vɔ katɔ kaɓa, hɛ̃ɛ Filibu tɔɔ, “Kɔɔ m jong, zang nyaa shonang Laa rang ruu ka yuu wiya? Ka yuu ɓiɓɛ ya, kɔ ka yuu zang ɓɔɔgn?”

³⁵ A Filibu puu nyaa, gaayu nɛɛ ruu zang nyaa shonang Laa keɓe ɓɔɔ yɔɔ gã ɓɛɛ, a kɔɔ yɔɔ Ruu Tɔ̃ɔ Kpanti Laa kati ka yuu Yeesɔ.

³⁶ Ri daa kana ka gbalang, a ri naa a ka nɔng ɓɔɔ mii kagn ɓɛɛ. Yɔɔ ɓɔɔ bii varɛ ɓiɓɛ vɔ katɔ keɓe kɔɔyi tɔɔ, “Mii keɓe, palɛ m batizima ta.”

³⁷ [Filibu kɔɔ wu tɔɔ, “Naa mɔɔ shing danggn ka bii Laa nɛɛ yeti ɓaaɓɛ nandon, n palɛ mɔɔ batizima katɔ.” Yɔɔ kasɛ wu nyaa tɔɔ, “N shing danggn tɔ, nɛɛ Yeesɔ Kirisi wukɔ Jaa Laa.”]

³⁸ A kɔɔ zang ɓɔɔ raa nyaa gbantang nɛɛ kɛkɛ wu shiiyi. Filibu nɛɛ yɔɔ ɓɔɔ bii varɛ ɓiɓɛ vɔ katɔ, ri shooro kaa nɛɛ yeti kɛkɛ, ri daa ka yeti mii, a Filibu palɛ wu batizima kati.

³⁹ Ri nwang tɔ nɛɛ yeti mii, a Suru Laa tuu Filibu daa nɛɛ wu. Yɔɔ zang bang keɓe, zi Filibu takpang, a yi gbalang daanang ɓiɓɛ, tã̀a tĩnang dɔɔli.

⁴⁰ Filibu daa nwang nyaa ka gari Azotu. A riki rɛɛ gari nandon, kɔɔrɔ zang Ruu Tɔ̃ɔ Laa, a nɛɛ mani ka Kayisariya.