Zang Shonang Yeesɔ 3 - Nyaa Shɔɔ Ɓɔɔ Laa a Ɓɛɛ

Bituru masɛ yɔɔ ɓɔɔ kàa katɔ ɓɛɛ

¹ Diki ɓɔɔgn, Bituru nɛɛ Yɔhana ri daa ka Gãa Laa, ka laa ɓɔɔ zang daarɛ Laa gaanang ɓɛɛ, ka saka taati ɓɔɔ laarang.

² Yɔɔ ɓɔɔgn, zang yí wu kàa katɔ. Zang tùurú wu diki diki, zang naa shing wu ka nyaa Gãa Laa ɓɔɔ zang ɓaa nɛɛ, “Shi Dɔɔli” ɓɛɛ. Gàarɛ́ vuu ka naa zang ɓɔɔ ri álɛ̀ ka Gãa Laa ɓɛɛ.

³ Ɓɔɔ yɔɔ bìí zi Bituru nɛɛ Yɔhana, ri hãa nyaa kaa yeti Gãa Laa, a gaa vuu ka naa ɓarɛ.

⁴ Ri shu yɔɔ jĩng ka bii, a Bituru kɔɔ wu tɔɔ, “Pɛ̃ɛrɛ ruu karɛ”

⁵ A shu ri jĩng ka bii, kɔɔ ɓi naa ri a wu vuu.

⁶ A Bituru kɔɔ wu tɔɔ, “Kɔ́pɔ̀ kagn naa mɛɛ kpang tingkiring, N a mɔɔ m vuu ɓɔɔ n nɛɛ mani ɓɛɛ. Ka nung Yeesɔ Kirisi yɔɔ gari Nazara, n kɔɔ mɔɔ, yupaa ta mɔɔ rarɛ.”

⁷ A yí yɔɔ ka naa nakn ɓiɓɛ, a yì wu naa ka paa yunang. Doo yɔɔ nɛɛ jĩng doo ɓiɓɛ tantɛ lakɛnang.

⁸ Yɔɔ zaa ka lapa, a shii nɛɛ doo, a gaayu ranang. A daa yeti Gãa Laa kaa nɛɛ rɛɛ Bituru nɛɛ Yɔhana, rárɛ̀ wu ti zaa ka lapa, ti dɔ̀ɔ́ Laa kana.

⁹ Zang ɓɔɔ ri kpalɛ zɔɔ nandon ri zì wu, ra kana, ti dɔ̀ɔ́ Laa kana,

¹⁰ a ɓɔɔ ri zi wu nung nɛɛ wukɔ yɔɔ ɓɔɔ gaarɛ vuu ɓɔɔ nwang ka nyaa Gãa ɓɔɔ Shi Dɔɔli, ri mã naa ka danggn, ka ruu vuu ɓɔɔ zang pàlɛ̀ wu ɓɛɛ.

Ruu ɓɔɔ Bituru kɔɔ zang ka yeti Gãa Laa ɓɛɛ

¹¹ Ɓɔɔ bɛ̀ɛ́ yɔɔ yi rɛɛ Bituru nɛɛ Yɔhana dòo ka naa, zang dɔɔli ri mã naa ka danggn. A ri yuku ri daa ka bii ɓarɛ, ka nɔng ɓɔɔ zang ɓaa nɛɛ putali Sulemanu ɓɛɛ.

¹² Ɓɔɔ Bituru zi zang, kɔɔ ri tɔɔ, “Rɛɛ manzung, zang Isirela nɔɔ mã naa ka danggn ka ruu vuu keɓe ka ruu viya, a nɔɔ tɛ̃ɛ rùu jĩ́ng ka bii nɔngkɔ viya? Nɔɔ kɔɔ nɛɛ ruu masɛ yɔɔ keɓe nɛɛ naa vuu palɛnang yuu ɓuru, kɔ́ ka ruu vuu tɔ̃ɔ ɓɔɔ ruu pálɛ̀ Laa ɓɛɛ ya?

¹³ Làá rɛɛ dabang ɓuru Ibirayi, nɛɛ Ishaaku, nɛɛ Yakubu kɔ a zang shonang ɓiɓɛ Yeesɔ bannang ɓɔɔ waa nyaa kpang ɓɛɛ. A nɔɔ a zang bang bang Yahudi wu nɛɛ zang nyɔ wu vɔrɔ. Nɔɔ bɛ̃ɛ wu ka tĩng kpanti Bilatu, ka ɓɔɔ Bilatu kɔ̀ɔ́yi tɔ nɛɛ wu yaa wu naa kaa tɔ ɓɛɛ.

¹⁴ “Pálɛ́ vuu shi kpang ɓi kpang, ɓi ti zang tɔ̃ɔ, nɔɔ bɛ̃ɛ wu doo nɛɛ mani. Nɔɔ gàa Bilatu nɛɛ wu pàlɛ̀ nɔɔ tɔ̃ɔ, wu yàa nɔɔ zang ɓɔɔ nyɔkɔ zang vɔrɔ kɔ naa jong.

¹⁵ Nɔɔ nyɔ zang ɓɔɔ zang wàlɛ́ suru bii ka bii ɓiɓɛ kɔ ɓɛɛ. A Laa wisi wu paa nɛɛ sàa, rùu zi wu nɛɛ jĩng ɓuru.

¹⁶ Danggn shinnang ka nung Yeesɔ kɔ masɛ yɔɔ kɔ nɔɔ zi nɛɛ jĩng, a nɔɔ ti zì wu nung tɔ ɓee. Ɓi nung Yeesɔ nɛɛ danggn shinnang ka bii ɓiɓɛ kɔ masɛ yɔɔ keɓe dɔ̃ɔ gbete, naa wee nɔɔ zi ɓee.

¹⁷ “Rɛɛ manzung, n zi tɔ, vuu ɓɔɔ nɔɔ nɛɛ rɛɛ zang bang manɛ, nɔɔ pálɛ́ Yeesɔ, wu nɛɛ gbã́a kpang.

¹⁸ Laa kɔɔ ɓi tɔ doo tɛ̃ɛ tɛ̃ɛ nɛɛ nyaa rɛɛ zang nyaa shonang ɓiɓɛ nandon, nɛɛ Kirisi naa dang jĩng katɔ. Vuu keɓe ɓèe ɓi kaa nyaa ruu keɓe kɔ.

¹⁹ Ka ruu nɔngkɔ, nɔɔ kɔ̃sɔ yeti manɛ ta, nɔɔ gbãayu kaa bii Laa, tɔ̀ɔ, wu yaa nɔɔ gbalang vuu shi kpang manɛ kati.

²⁰ Tɔ̀ɔ, Laa wu yaa nɔɔ gbalang nɔɔ ɔ̃sɔ kati. Wu ti shong Kirisi ɓɔ Laa shing wu ka ting nɛɛ wukɔ naa ta yuu manɛ ɓɔɔ wukɔ Yeesɔ ɓɛɛ.

²¹ Yeesɔ keɓe nwang doo ka lapa ka gbongkarɛ diki ɓɔɔ Laa naa risi vuu piti, wu raa kaa naa ɓɔɔ tĩng shɔɔnang tɔkn, wu a nɛɛ mani. Diki ɓɔɔ Laa kɔɔ nɛɛ nyaa zang nyaa shonang ɓiɓɛ, ɓɔɔ ri pálɛ̀ vuu shi kpang ɓarɛ kpang, ɓɔɔ ri nwang doo ka tĩng tɛ̃ɛ tɛ̃ɛ ɓɛɛ.

²² “Musa kɔɔyi tɔɔ, ‘Laa naa zɔ̃ng zang nyaa shonang ɓiɓɛ ditɔ, nɛɛ teteng rɛɛ manzung manɛ, naa ɓɔɔ wu zɔ̃ng m ɓɛɛ. Nɔɔ ɓaa shoo, ka vuu ɓɔɔ, wu kɔɔ nɔɔ ɓɛɛ nandon.

²³ Zang ɓɔɔ nɛɛ ɓaa shoo ka nyaa zang nyaa shonang Laa kaɓa kpang, zang nwángsɛ́ wu katɔ nɛɛ teteng zang Laa, zang nyɔ wu vɔrɔ.’

²⁴ Niizang, zang nyaa shonang Laa nandon, ɓɔɔ ri kɔɔ zang Ruu Laa ɓɛɛ, gàayú nɛɛ yuu Samayila nɛɛ zang nyaa shonang Laa ɓɔɔ ri álɛ́ ka knti ɓiɓɛ, ri kɔɔrɔ ruu tɔ, ka yuu rɛɛ diki keɓe.

²⁵ Nɔkɔ kaa wujɛ rɛɛ zang nyaa shonang Laa keɓe. Nɔkɔ ti tà vuu ɓɔɔ Laa a nyaa, nɛɛ wu a rɛɛ dabang manɛ ɓɛɛ kati. Laa kɔɔ Ibirayi tɔɔ, ‘N a zang koo keɓe nandon tĩnang tãanang nɛɛ bii zɔ̃ng ɓaaɓɛ kɔ.’

²⁶ Laa wisi zang shonang ɓiɓɛ paa tɔ, a shong wu kaa bii manɛ kɔ shɔɔnang, tɔ̀ɔ, wu a nɔɔ tĩnang tãanang ka ɓɔɔ wu shing nɔɔ nandon, nɔɔ yaa gbalang vuu shi kpang manɛ ɓɛɛ.”