Zang Shonang Yeesɔ 23 - Nyaa Shɔɔ Ɓɔɔ Laa a Ɓɛɛ

¹ Bulu shù zang ɓɔɔ ri jɛ̃ɛ zang ruu jĩng ka bii, a kɔɔyi tɔɔ, “Rɛɛ manzung, n palɛ shonang ka tĩng Laa nɛɛ rɛ̃rɛnang mɛɛ kalang kalang, a nɛɛ mani lɛɛkɔ keɓe.”

² A Hananiya, kpanti zang ɓɔɔ ri dɔɔ vuu ka Gãa Laa kɔɔ zang ɓɔɔ shii nɛɛ Bulu naabm nɛɛ wu nyɔ Bulu naa ka kashoo kpãng.

³ Bulu kɔɔ wu tɔɔ, “Laa nyɔ mɔɔ ditɔ jong, wukɔ mɔɔ nwang naa bii binting ɓɔɔ zang nwãa kponsi puru kagn ɓi. Mɔɔ nwang ka nɔng keɓe nɛɛ mɔɔ jɛ̃ɛ m ruu, naa ɓɔɔ nyaa dannang kɔɔ ɓɛɛ, a ɓée kpang mɔɔ ta nyaa dannang ɓaa katɔ, mɔɔ kɔɔ zang ɓaa nɛɛ zang nyɔ m.”

⁴ Zang ɓɔɔ ri shii nɛɛ Bulu naabm ri kɔɔ tɔɔ, “Mɔɔ dãa zang ɓɔɔ Laa yi wu kpanti zang ɓɔɔ ri dɔɔ vuu ka Gãa Laa ɓɛɛ ya?”

⁵ A Bulu kasɛ nyaa tɔɔ, “Rɛɛ manzung, n zi kpang nɛɛ wukɔ kpanti zang ɓɔɔ ri dɔɔ vuu ka Gãa Laa kpang. Labeenang Laa kɔɔyi tɔɔ, ‘Mɔ́ɔ rang ruu shi kpang, ka yuu zang ɓɔɔ wukɔ kpanti rɛɛ zang ɓaaɓɛ kpang.’ ”

⁶ Bulu zirɛ nɛɛ zang ɓɔɔ ri jɛ̃ɛ ruu keɓe vaa ɓarɛ ziti. Nyaa dang gbete zang Saduki, nyaa dang gbete ɓi kaa rɛɛ Farisi. A mɛɛ nyaa ka nɔng ruu jɛ̃ɛnang tɔɔ, “Rɛɛ manzung, n zang Farisi, n ti jaa rɛɛ Farisi. Zang nɛɛ zang jɛ̃ɛ m ruu ka ruu danggn ɓɔɔ n shingnɛ nɛɛ zang nɛɛ vɔ tɔ zang naa seepaa ditɔ nɛɛ saa ɓɛɛ.”

⁷ Ɓu doo ɓɔɔ wu kɔɔ vuu keɓe hn, rɛɛ zang Farisi nɛɛ zang Saduki ri gaayu nyaa haanang nɛɛ zɔɔ, a ri basɛ zɔɔ kati.

⁸ Ka ruu ɓɔɔ, zang Saduki ri kɔ̀ɔ́ ɓarɛ nɛɛ zang naa yupaa tɔ̀ɔ́ nɛɛ sàa kpang, nɛɛ zang nyaa shonang Laa ɓɔɔ ri ka lapa nɛɛ rɛɛ suru, ri ɓarɛ ti kpang ɓɛɛ. Zang Farisi ri ti kɔɔ ɓarɛ nɛɛ vuu taati keɓe kagn nandon.

⁹ Ri haa nyaa kana nabm, a zang ɓɔɔ ri zi nyaa dannang Laa dɔɔli ɓɛɛ, ɓɔɔ ri ɓarɛ ka vàá zang Farisi kɔ doori ɓɛɛ, ri shii paa, ri laa nyaa ka yuu ruu keɓe nabm, ri tɔɔ, “Ruu zi vuu shi kpang ɓɔɔ yɔɔ keɓe palɛ ɓuru kpang. A nɛɛ zang nyaa shonang Laa ɓɔɔ ka lapa, kɔ́ suru nɛɛ rang wu yee, nɔɔ zi tɔ ya?”

¹⁰ Ri haa nyaa kaa nɛɛ gnvɔ ning, ka ruu nɔngkɔ, yɔɔ zang bang sɔɔja kaa vɔrɔ nɛɛ ri nɛɛ lɔɔsɔ Bulu. Kɔɔ rɛɛ zang sɔɔja nɛɛ ri dita ka teteng ɓarɛ, ri ta Bulu nɛɛ gbãng gbãng ning, ri daa nɛɛ wu ka nɔng ɓɔɔ gãa rɛɛ sɔɔja kagn ɓɛɛ.

¹¹ Nɛɛ zĩi kpanti Yeesɔ naa shii ka kagn Bulu kɔɔ wu tɔɔ, “Mã danggn kagn. Mɔ̀ɔ kɔɔ zang ruu tɔ̃ɔ, ka yuu mɛɛ ka Urushalima keɓe, mɔɔ daa kɔɔ zang ditɔ nɔngkɔ tɔkn ka Rooma.”

Zang tɔ̀ng zɔɔ nɛɛ ri nyɔ Bulu vɔrɔ

¹² Ɓɔɔ nɔng naa gãntɛ zang Yahudi ri tɔ̀ng zɔɔ, a ri tũng zɔɔ vuu nɛɛ naa ri nyɔ Bulu vɔrɔ gn kpang, ri shaa vuu shaanang kpang, ri ti ɓoo mii kpang.

¹³ Zang ɓɔɔ ri tɔ̀ng zɔɔ keɓe ri ɓa laa ziti katɔ.

¹⁴ A ri daa ka bìí rɛɛ zang bang bang zang ɓɔɔ ri dɔɔ vuu ka Gãa Laa nɛɛ rɛɛ zang bang bang zang Yahudi, ri kɔɔ ri tɔɔ, “Ruu tũng zɔɔ vuu tɔ gbãng gbãng nɛɛ ruu nɛɛ nyɔ Bulu vɔrɔ gn kpang, nyaa ɓuru lèe vuu shaanang kpang.

¹⁵ Ka ruu nɔngkɔ, nɔɔ nɛɛ rɛɛ zang ɓɔɔ ri jɛ̃ɛ zang ruu ɓɛɛ, nɔɔ shong nyaa ta ka bii zang bang sɔɔja Rooma kãntang nɛɛ wu atɛ nɔɔ Bulu. Nɔɔ palɛ naa ɓɔɔ nɔɔ kasɛ nɛɛ nɔɔ tãa ruu ka yuu ɓiɓɛ waasɛ̃ ɓɛɛ. Ruu kpalɛ bii tɔ, ruu nyɔ wu vɔrɔ ɓuru kaa gbalang bɛ̀ɛ́ a nihn gn kpang.”

¹⁶ Jaa ɓɔɔ jaa nàá Bulu ɓɔɔ soro yi ɓɛɛ, tãa ruu ɓɔɔ nɛɛ ri waa Bulu ka gbalang ɓɛɛ, a daa ka nɔng ɓɔɔ gãa rɛɛ sɔɔja kagn ɓɛɛ, daa kɔɔ Bulu.

¹⁷ A Bulu ɓaa nyaa ka yɔɔ sɔɔja gbete, kɔɔ wu tɔɔ, “Daa nɛɛ jasang keɓe ka bii zang bang manɛ, daa kɔɔ wu vuu ɓɔɔ kagn.”

¹⁸ A yɔɔ sɔɔja daa kaa nɛɛ wu ka bii zang bang sɔɔja a kɔɔyi tɔɔ, “Yɔɔ ɓɔɔ ka sãa zang ɓaa wu nɛɛ Bulu ɓɛɛ, ɓa m nyaa kɔɔ m tɔɔ ń atɛ jasang keɓe ka bii ɓaaɓɛ. Nɛɛ vuu ɓɔɔ jasang keɓe nɛɛ wu kɔɔ mɔɔ kagn.”

¹⁹ A yɔɔ zang bang sɔɔja yi jasang bìí kaa naa, daa nɛɛ wu dang gbete, a hɛ̃ɛ wu nɛɛ nwĩiri tɔɔ, “Mɔɔ kasɛ nɛɛ mɔɔ kɔɔ m ruu viya?”

²⁰ A jasang bìí kɔɔyi tɔɔ, “Zang Yahudi ri mã zɔɔ nyaa tɔ nɛɛ ri kɔɔ mɔɔ, ɓuru mɔɔ atɛ Bulu ka tĩng zang ɓɔɔ ri jɛ̃ɛ zang ruu ɓɛɛ. Nɛɛ ri palɛ mɔɔ kɔɔ nɛɛ, zang ɓɔɔ ri jɛ̃ɛ zang ruu ri kasɛ nɛɛ ri tãa ruu ka yuu ɓiɓɛ waasɛ̃.

²¹ Mɔɔ kàsɛ̀ ɓaa kpang, ka ruu ɓɔɔ, zang kagn ri ɓa laa ziti katɔ, ri waa ka gbalang ri gã́ wu. Ri tũng zɔɔ vuu nɛɛ, ri nɛɛ nyɔ Bulu vɔrɔ gn kpang, ri shaa vuu shaanang kpang, ri ti ɓoo mii kpang. Ri kpalɛ bii tɔ, ri gã ɓarɛ kaa vuu ɓɔɔ mɔɔ kɔ̀ɔ́ ɓɛɛ.”

²² Zang bang sɔɔja shaarɛ yɔɔ jasang nyaa tɔɔ, “Mɔɔ kɔɔ zang ɓɔɔ nɛɛ mɔɔ kɔɔ m ruu bìí tɔ kpang.” A kɔɔ yɔɔ nɛɛ wu dita.

Zang dɔ̃ Bulu ka bii Gɔmna Filiku

²³ A zang bang sɔɔja ɓaa nyaa ka rɛɛ zang bang sɔɔja ziti, a kɔɔ ri tɔɔ, “Nɔɔ sèe sɔɔja laa maani dakn ziti, a ɓɔɔ sɔɔja ɓɔɔ ri vang gbantang laa taati tu kopi, nɛɛ sɔɔja ɓɔɔ ri yiti shalang ɓɛɛ laa maani dakn ziti. Ri kpalɛ bii, ri daa ka Kayisariya. Mɔɔ kpalɛ bii nɔɔ yupaa daanang ka saka mandɛ̃ɛti nɛɛ zĩi keɓe.

²⁴ “Mɔ́ɔ walɛ Bulu rɛɛ vuu ɓɔɔ wu vang ɓɛɛ jong. Mɔɔ yiti wu tɔ̃ɔ, mɔɔ daa a Gɔmna Filiku wu.”

²⁵ A bèe Gɔmna Filiku laa, kɔɔ wu nɛɛ:

²⁶ Nkɔ Kaladiyu Lisiya, n bee mɔɔ zang bang Gɔmna Filiku labeenang keɓe. N jee mɔɔ nyaa.

²⁷ Zang Yahudi ri yí yɔɔ keɓe, bɛ̀ɛ́ ri nɛɛ ri nyɔ wu kaa vɔrɔ. N tãa nyaa nɛɛ wu zang Rooma, a n daa nɛɛ sɔɔja mɛɛ, n daa ta wu nɛɛ naa ɓarɛ.

²⁸ N kasɛ nɛɛ n tãa vuu shi kpang ɓɔɔ ri tɔɔ wu pálɛ̀ ɓɛɛ, ka ruu nɔngkɔ, n daa nɛɛ wu ka bii zang ɓarɛ ɓɔɔ ri jɛ̃ɛ ruu ɓɛɛ.

²⁹ N zi vuu ɓɔɔ wu palɛ, ɓɔɔ daa naa ɓɔɔ zang nyɔ wu vɔrɔ kɔ́ zang loo wu ka sãa ɓɛɛ kpang. Vuu shi kpang ɓɔɔ zang tɔɔ wu palɛ, ɓi ka gbalang nyaa dannang ɓarɛ.

³⁰ N tãa nyaa nɛɛ zang Yahudi ɓɔɔ ri tɔ̀ng zɔɔ nɛɛ ri nyɔ wu vɔrɔ, ka ruu nɔngkɔ, n dɔ̃ wu ka bii ɓaaɓɛ. N kɔ̀ɔ́ zang ɓɔɔ ri kɔɔrɔ vuu ka yuu ɓiɓɛ, nɛɛ ri daa kɔɔrɔ kaa mɔkɔ.

³¹ Rɛɛ sɔɔja ri palɛ vuu ɓɔɔ wu kɔɔ ri ɓɛɛ. Ri tuu Bulu nɛɛ zĩi, ri daa nɛɛ wu sasak, ri daa ka gari Antipatiri.

³² Ɓɔɔ nɔng naa gãntɛ rɛɛ sɔɔja ɓɔɔ ri ra nɛɛ doo, ri gbãayu. Ri yaa kaa rɛɛ sɔɔja ɓɔɔ vang ka gbantang kɔ shɛ̃ɛning nɛɛ ri daa nɛɛ wu.

³³ Ri daa nɛɛ wu ka Kayisariya, ri daa a Gɔmna labeenang bìí, a ri a wu Bulu kaa naa.

³⁴ Gɔmna gã labeenang bìí, a hɛ̃ɛ Bulu nɛɛ wu zang tipi kiya? Zang kɔɔ wu nɛɛ wu yɔɔ tipi Silisiya.

³⁵ A kɔɔyi tɔɔ, zang ɓɔɔ ri kɔɔ ruu shi kpang ka yuu ɓaaɓɛ, ri nɛɛ a tɔ, tɔɔ n tãa vuu ɓɔɔ mɔɔ kɔɔ ɓɛɛ. A kɔɔ zang nɛɛ zang daa nɛɛ Bulu ka gãa kpanti Hiridu, zang gã wu katɔ.