Zang Shonang Yeesɔ 14 - Nyaa Shɔɔ Ɓɔɔ Laa a Ɓɛɛ

Bulu nɛɛ Baranaba ka Ikoniya

¹ Ka Ikoniya Bulu nɛɛ Baranaba ri daa yeti gãa zɔɔ kpalɛnang ka nyaa zɔɔ. Ri rang yee Laa, a zang dɔɔli, rɛɛ Yahudi nɛɛ zang Heleni ri shing danggn.

² Rɛɛ Yahudi ɓɔɔ ri bɛ̃ɛ danggn shinnang katɔ, ri dɔ̃lɔ rɛɛ zang ɓɔɔ ri zang Isirela kpang, a ri lasɛ zɔɔ nɛɛ rɛɛ zang ɓɔɔ ri shing danggn tɔ ɓɛɛ.

³ Bulu nɛɛ Baranaba ri nwang ka nihn diki ɓarɛ bee katɔ. Ri rang yee Laa ri kaa vɔrɔ kpang a Laa tusu zang nɛɛ yee tɔ̃ɔ ɓiɓɛ niizang kɔ nwani, ka ɓɔɔ yaa rɛɛ Bulu nɛɛ Baranaba ri palɛ vuu ɓɔɔ zang zirɛ zang mã naa ka danggn ɓɛɛ.

⁴ Zang gari ri basɛ zɔɔ tìng ziti. Tìng gbete ri ta nyaa zang Yahudi, a ɓɔɔ gbete ri ta ɓarɛ kaa nyaa rɛɛ zang shonang Yeesɔ.

⁵ Zang ɓɔɔ ri zang Isirela kpang nɛɛ Yahudi, ri mã zɔɔ nyaa nɛɛ rɛɛ zang bang ɓarɛ, nɛɛ ri dang rɛɛ zang shonang Yeesɔ jĩng, nɛɛ ri ti luku ri nɛɛ tari.

⁶ Zang shonang Yeesɔ ri tãa nyaa, a ri yurɛ, ri daa ka gari Lisitira nɛɛ Daabe ɓɔɔ ka tipi Likoniya ɓɛɛ. Ri ti daarɛ ka nɔng ɓɔɔ kiiri ri nyaa ka teteng ɓɛɛ.

⁷ Ri kɔ̀ɔrɔ̀ zang Ruu Laa kaa nɔngkɔ.

Zang luku Bulu ka Lisitira

⁸ Ka Lisitira yɔɔ ɓɔɔ kagn zang yi wu kàa katɔ. Ra ɓi gngn kpang.

⁹ Ɓaa shoo, tã̀á Ruu Laa ɓɔɔ Bulu kɔɔ ɓɛɛ. A Bulu shù wu jĩng ka bii, a zi danggn ɓɔɔ wu shing ɓɛɛ, daa naa ɓɔɔ zang masɛ wu tɔ.

¹⁰ A Bulu mɛɛ nyaa ka lapa tɔɔ, “Yupaa mɔɔ shii doo paa.” A yɔɔ yupaa kpãari, a gaayu ranang kati.

¹¹ A zang ɓɔɔ ri kpálɛ́, ri zi vuu ɓɔɔ Bulu pálɛ́, ri goo nyaa ka lapa nɛɛ nyaa zang Likoniya ri tɔɔ, “Vuu gãnti ri tuu bii shɔnzang ri a ka bii ɓuru.”

¹² Ri ɓaa Baranaba nɛɛ Zafasa, a ri ɓaa Bulu ɓi kaa nɛɛ Hami, ka ruu ɓɔɔ, wukɔ ráng ri yee ɓɛɛ.

¹³ Zang bang vuu gãnti ɓɔɔ zang ɓaa nɛɛ Zafasa ɓɔɔ jàá vaa ɓiɓɛ ka nyaa gãa gari ɓɛɛ. Atɛ guu napo nɛɛ rɛɛ mangwaa vuu ɓɔɔ ri mã katɔ rikiki ɓɛɛ, ka nyaa jaa vaa, ka ruu ɓɔɔ, ri nɛɛ zang ɓɔɔ ri kpalɛ zɔɔ, ri kasɛ nɛɛ ri dɔ̀ɔ́ rɛɛ zang shonang Yeesɔ katɔ ɓɛɛ.

¹⁴ Ɓɔɔ Bulu nɛɛ Baranaba ri tãa vuu ɓɔɔ ri nɛɛ ri pálɛ̀, ri lɔɔsɔ fɔ̃ɔrɔ ɓarɛ. Ri yurɛ ri daa ka teteng zang ɓɔɔ ri kpalɛ zɔɔ. Ri mɛɛ nyaa ri tɔɔ,

¹⁵ “Nɔɔ palɛ vuu keɓe ka ruu viya? Rùu ɓuru doo shɔnzang kɔ naa nɔkɔ. Ruu arɛ ruu tɔɔ ruu naa kɔ̀ɔ́ nɔɔ Ruu Tɔ̃ɔ Laa. Ruu tɔɔ nɔɔ yaa gbalang vuu ɓɔɔ nwàng nɔɔ vuu ɓɔɔ kpang keɓe. Nɔɔ a ka bii Laa ɓɔɔ ningkãari ɓɔɔ wukɔ mãa lapa nɛɛ tipi nɛɛ waapo nɛɛ vuu ɓɔɔ ka yeti ɓarɛ nandon ɓɛɛ.

¹⁶ Ka koo ɓɔɔ tɛɛ tɔ ɓɛɛ, Laa yaa zang koo nɛɛ ri palɛ vuu ɓɔɔ yeti ɓarɛ kasɛ ɓɛɛ.

¹⁷ Laa bìí, ti tusu doo nɛɛ mani diki diki, nɛɛ wu kagn ka vuu tɔ̃ɔ ɓɔɔ wu palɛ ɓɛɛ. Á nɔɔ mii lapa, tɔ̀ɔ, vuu ɓɔɔ nɔɔ ɓàarɛ́ wu ra jaa kaa làá ɓarɛ. Á nɔɔ vuu shaanang, wu ti shingnɛ nɔɔ tãa tĩnang.”

¹⁸ Dòo nɛɛ ruu kɔ rɛɛ zang shonang ri kɔɔrɔ ri ɓee, zang ɓɔɔ ri kpalɛ zɔɔ ri huu shoo nɛɛ ri nɛ̀ɛ́ dɔɔ ri ɓarɛ doo vuu kɔ sasak.

¹⁹ Zang Yahudi ɓɔɔ ri a nɛɛ Antakiya ɓɔɔ ka tipi Pisidiya ɓɛɛ, ɓɔɔ ri ti a nɛɛ Ikoniya. Ri dɔ̃lɔ zang ɓɔɔ ri kpalɛ ɓɛɛ nyaa, a zang ri ta nyaa ɓarɛ, a ri luku Bulu nɛɛ tari. Ri gɔ̃ wu ka tipi ri nwangsɛ wu nɛɛ yeti gari, ri tɔɔ naa vɔ ɓi tɔ.

²⁰ Ɓɔɔ zang ɓɔɔ ri shing danggn, ri naa kpalɛ zɔɔ ri kiiri wu nyaa ka teteng, yupaa a daa yeti gari. Nɔng naa gãntɛ, a daa ka gari Daabe nɛɛ Baranaba.

Bulu nɛɛ Baranaba ri gbãayu ka Antakiya ɓɔɔ ka tipi Siriya ɓɛɛ

²¹ Bulu nɛɛ Baranaba ri kɔɔ zang Ruu Tɔ̃ɔ Laa ka Daabe, a zang dɔɔli ri shing danggn ka bii Laa. A ri gbãayu ri sɔɔ Lisitira nɛɛ Ikoniya, ri naa a ka Antakiya ɓɔɔ ka tipi Pisidiya ɓɛɛ.

²² Ri mã zang ɓɔɔ ri shing danggn tɔ danggn, ri kɔɔ ri nɛɛ ri yáa danggn kɔ ri shing ɓee kpang. Ri kɔɔyi nɛɛ, “Rùu dàng jĩng dɔɔli ka gbongkarɛ, tɔ̀ɔ, ruu daa nɔng ɓɔɔ Laa roo kpanti ɓɛɛ kati.”

²³ Ri nɛɛ shɛ̃ɛrɛ zang ɓɔɔ ri sɔ̀ɔ́ zang ɓɔɔ ri dũng Laa tĩng tɔ, ri seng nyaalaa, ri ti gaa ri Laa. Ri ti gaa Laa ɓɔɔ ri shing danggn ka bii ɓiɓɛ nɛɛ wu yiti rɛɛ zang ɓɔɔ ri dũng wu keɓe waasɛ̃.

²⁴ Bulu nɛɛ Baranaba ri tɛɛ tipi Pisidiya tɔ, ri a ka tipi Pamfiliya.

²⁵ Ri kɔɔ zang Ruu Laa ka gari Paaga, a ri tɛɛyi ri daa ka Ataliya.

²⁶ Ri váng tonsi nɛɛ nihn, ri gbãayu ka Antakiya, nɔng ɓɔɔ zang gáayú zang gaa ri Laa kagn, nɛɛ wu yiti ri ka ruu shonang kɔ ri pálɛ́ tɔ ɓee ɓɛɛ.

²⁷ Ri shɛ̃ɛ Antakiya tɔ, ri kpalɛ zang ɓɔɔ ri dũng Laa ɓɛɛ, a ri kɔɔ ri vuu ɓɔɔ Laa yi ri naa kagn ri palɛ ɓɛɛ. Naa ɓɔɔ Laa puu zang ɓɔɔ ri zang Isirela kpang gbalang tɔ jong nɛɛ ri shing danggn ka bìí ɓiɓɛ ɓɛɛ.

²⁸ A ri nwang kaa nɛɛ zang ɓɔɔ ri dũng Laa kaɓa ka nɔngkɔ, diki ɓarɛ bee katɔ.