Zang Shonang Yeesɔ 10 - Nyaa Shɔɔ Ɓɔɔ Laa a Ɓɛɛ

Koneliyu shong nyaa ka bii Bituru

¹ Zang bang sɔɔja ɓɔɔ kagn Kayisariya, zang ɓaa wu nɛɛ Koneliyu. Wukɔ zang bang vàá sɔɔja Rooma ɓɔɔ laa maani dakn mangbete, ɓɔɔ ɓi rɛɛ zang Italiya kɔ shɛ̃ɛning kagn ɓɛɛ.

² Koneliyu ɓi zang ɓɔɔ dũng Laa ɓɛɛ. Bang Laa nɛɛ zang gãa ɓiɓɛ piti. Yi rɛɛ zang Yahudi ɓɔɔ vuu ka naa ɓarɛ kpang naa ka bii, ti gaa Laa diki diki.

³ Diki ɓɔɔ kagn bɛ̀ɛ́ laa kpɛ̃ɛ tɔ, nung saka taati, Koneliyu rɔ̃kɔ. Ka rɔ̃kɔnang keɓe, zi zang nyaa shonang Laa ɓɔɔ ka lapa ɓɛɛ gbàrɛ gbàrɛ arɛ a ɓaa wu nyaa tɔɔ, “Koneliyu.”

⁴ Koneliyu ã̀tɛ zang nyaa shonang Laa ɓɔɔ ka lapa ɓɛɛ jĩng ka bii. Bii kaa wu vɔrɔ, a kasɛ nyaa tɔɔ, “Ɓu viya Kpanti.” Zang nyaa shonang Laa ɓɔɔ ka lapa, kasɛ wu nyaa tɔɔ, “Laa tãa gaanang ɓɔɔ mɔɔ gaa wu tɔ. Ti zi tɔ̃ɔ ɓɔɔ mɔɔ pàlɛ́ zang tɔ, ka ruu nɔngkɔ, danggn ɓaaɓɛ ning Laa kpang.

⁵ Shong rɛɛ zang varɛ ka Joopa ri daa ɓaa mɔɔ nyaa ka Siman ɓɔɔ zang ɓaa wu nɛɛ Bituru ɓɛɛ.

⁶ Nwàng zanti ka gãa Siman yɔɔ ɓɔɔ zaa koo vuu ɓɛɛ. Roo gãa ka nyaa waapo naabm.”

⁷ Ɓɔɔ zang nyaa shonang Laa ɓɔɔ ka lapa ɓɔɔ rang yee nɛɛ wu daa tɔ, Koneliyu ɓaa nyaa ka rɛɛ zang varɛ ziti ka teteng zang ɓɔɔ ri palɛ shonang ka gãa ɓiɓɛ, nɛɛ yɔɔ sɔɔja gbete ka teteng rɛɛ sɔɔja ɓɔɔ ri gã wu ɓɛɛ. Yɔɔ keɓe dũng doo Laa kɔ.

⁸ Kɔɔ ri vuu ɓɔɔ pálɛ̀ nandon, a shong ri kaa Joopa.

Bituru rɔ̃kɔ ka ɓɔɔ bɛ̀ɛ́ wu gàá Laa ɓɛɛ

⁹ Nɔng gãntɛ tɔ rɛɛ zang keɓe, ri yi gbalang tɔ, ri a tɔ naabm nɛɛ Joopa. Bituru vang ɓi kaa gãa lapa bɛ̀ɛ́ laa kaa dalɛ yuu nɛɛ wu gaa Laa.

¹⁰ Nyɔkɔ nyɔ wu tɔ, kasɛ vuu ɓɔɔ wu shaa ɓɛɛ. Zang nwàá wu vuu shaanang doo kana, a rɔ̃kɔ kati.

¹¹ Zirɛ lapa puuyi, vuu a kana nɛɛ lapa naa fɔ̃ɔrɔ nyaa pɛɛrɛ bang ɓɔɔ zang yaa naa nɛɛ soo ɓɔɔ zang mãlɛ ka nyaa ɓiɓɛ ɓɔɔ dɛ̃ɛti ɓɛɛ.

¹² Ka yeti fɔ̃ɔrɔ keɓe, rɛɛ yɔpɔ ɓɔɔ takɛ doo dɛ̃ɛti kagn ka zɔ̃ng zɔ̃ng, nɛɛ rɛɛ vuu ɓɔɔ gɔ̃ nɛɛ buru, nɛɛ rɛɛ jaaning ɓɔɔ ri tãarɛ ka lapa ɓɛɛ.

¹³ A tãa yee kɔɔ wu tɔɔ. “Bituru, yupaa ta, mɔɔ nyɔrɛ, mɔɔ shaayi.”

¹⁴ Bituru kasɛ wu nyaa tɔɔ, “Kpang Kpanti, n shaa vuu ɓɔɔ nyaa dannang zang Yahudi zãa ruu shaanang katɔ, gngn kpang.”

¹⁵ A tãa yee tɔkn daa kaa doo ziti nɛɛ, “vuu ɓɔɔ Laa kɔɔyi nɛɛ tɔ̃ɔ, mɔɔ tɔ́ɔ̀ kpang nɛɛ shi kpang, kpang.”

¹⁶ Zang palɛ vuu keɓe nɔngkɔ dakn taati, a zang gɔ̃ vuu bìí, zang daa nɛɛ mani ka lapa.

¹⁷ Bituru rɛ̃rɛ dɔɔ kana ka yuu dĩiri rɔ̃kɔnang kɔ wu rɔ̃kɔ ɓee, a zang ɓɔɔ Koneliyu shong ri, hɛ̃ɛ nɔng gãa Siman tɔ, ri ĩi tɔ, a ri shii kaa nyaa gãa.

¹⁸ Ri ɓaa nyaa, a ri hɛ̃ɛ zang tɔɔ, “Zang zanti kagn gãa keɓe ɓɔɔ zang ɓaa nung ɓiɓɛ nɛɛ Siman, a ɓɔɔ nɛɛ Bituru ya?”

¹⁹ Bituru rɛ̃rɛ doo kana ka yuu vuu ɓɔɔ wu zi ɓɛɛ, a Suru Laa kɔɔ wu tɔɔ, “Siman, zang varɛ taati ri kãa nɔng ɓaaɓɛ.

²⁰ Kpalɛ bii, mɔɔ shooro. Mɔɔ rɛ̃rɛ gn ziti ka yuu daanang kpang. Mɔɔ daa nɛɛ ri, ka ruu ɓɔɔ, nkɔ shong ri ɓɛɛ.”

²¹ A Bituru shooro nɛɛ gãa lapa daa kɔɔ ri tɔɔ, “Nkɔ zang ɓɔɔ nɔɔ kãa wu ɓɛɛ. Nɔɔ à ka ruu viya?”

²² Ri kasɛ wu nyaa tɔɔ, “Zang bang sɔɔja ɓɔɔ zang ɓaa wu nɛɛ Koneliyu kɔ shong ruu. Koneliyu zang tɔ̃ɔ, bang Laa, a zang Yahudi nandon, ri a wu bannang dɔɔli. Zang nyaa shonang Laa ɓɔɔ ka lapa ɓɛɛ gbete, kɔɔ wu nɛɛ wu ɓaa mɔɔ nyaa ka gãa ɓiɓɛ. Nɛɛ tɔ̀ɔ wu tãa vuu ɓɔɔ mɔɔ kɔɔ ɓɛɛ.”

²³ Bituru ɓaa ri nyaa daa kaa nɛɛ ri ka yeti gãa. Ri roo kaa nɔngkɔ. Nɔng gãntɛ tɔ, a Bituru kpalɛ bii daa kaa nɛɛ ri. Zang ɓɔɔ ka teteng rɛɛ zang ɓɔɔ ri dũng Laa ka Joopa, ri daa kaa jong nɛɛ wu.

Bituru kaa gãa Koneliyu

²⁴ Nɔng gãntɛ kaa tɔkn, a ri shɛ̃ɛ Kayisariya kati. Ri daa ĩi Koneliyu nɛɛ rɛɛ ɓeezung, nɛɛ rɛɛ ɓeesang ɓɔɔ wu ɓaarɛ ri nyaa ri gã wu tɔ.

²⁵ Bituru hãa nyaa kana ka yeti gãa, a Koneliyu kpisi wu yuu. Tang nɛɛ gutu ka tĩng ɓiɓɛ, a bang wu.

²⁶ Bituru wisi wu paa, a kɔɔ wu tɔɔ, “Shii doo paa n m doo shɔnzang naa mɔkɔ.”

²⁷ Ri ráng yee kana nɛɛ zɔɔ ri daa yeti gãa, a ɓɔɔ Bituru daa ka yeti gãa daa ĩi zang ri kpalɛ zɔɔ tɔ gaagaa.

²⁸ A kɔɔ ri tɔɔ, “Nɔɔ zi tɔ, nyaa dannang zang Yahudi zãa ruu nwannang nɛɛ zang ɓɔɔ ri zang Isirela kpang ɓɛɛ katɔ. Nɛɛ ri ti daa zanti ka gãa ɓarɛ kpang. Laa tusu m, wàasɛ̀ m kpang, tɔ́ɔ, n ɓàa zang ɓɔɔ nɛɛ ri zang shi kpang, kpang.

²⁹ Ka ruu nɔngkɔ, ɓɔɔ zang shong nyaa, n laa nyaa kpang, n tantɛ anang. Ń hɛ̃ɛ nɔɔ, nɔɔ shong nyaa ka ruu viya?”

³⁰ Koneliyu kasɛ wu nyaa tɔɔ, “Diki daa lɛɛkɔ dɛ̃ɛti bɛ̀ɛ́ n ka yeti gãa mɛɛ, n gàá Laa bɛ̀ɛ́ laa naa weɓe kɔ saka taati. A zang ɓɔɔ hãa fɔ̃ɔrɔ kɔlɔ katɔ nwang nyaa a shii ka tĩng mɛɛ,

³¹ a kɔɔyi tɔɔ, ‘Koneliyu, Laa tãa gaanang ɓɔɔ mɔɔ gaa wu tɔ, danggn vuu tɔ̃ɔ ɓɔɔ mɔɔ pàlɛ́ zang ti ning wu kpang.

³² Shong nyaa ka Joopa zang daa ɓàa mɔɔ nyaa ka Siman ɓɔɔ zang ɓaa wu nɛɛ Bituru ɓɛɛ. Nwàng zanti ka gãa Siman, yɔɔ ɓɔɔ zaa koo vuu ɓɛɛ. Gãa Siman ka nyaa waapo naabm.’

³³ A n tantɛ nyaa kaa shonang ka bii ɓaaɓɛ. Mɔɔ ti pálɛ́ tɔ̃ɔ tɔ, ka ɓɔɔ mɔɔ arɛ ɓɛɛ. Wee ruu kpalɛ zɔɔ tɔ nandon ka tĩng Laa ɓee, kɔɔ ruu vuu ɓɔɔ Laa kɔɔ mɔɔ nɛɛ mɔɔ kɔɔ ruu ɓɛɛ ta.”

Ruu ɓɔɔ Bituru kɔɔ zang ɓɛɛ

³⁴ A Bituru gaa tɔɔsung yee rannang kati tɔɔ, “Niizang, n zi tɔ kati nɛɛ Laa shɛ̃ɛrɛ zang ɓi kpang.

³⁵ Ka zɔ̃ng zang kɔ ka koo nandon, zang ɓɔɔ nɛɛ kaa vɔrɔ Laa, nɛɛ ti palɛ vuu ɓɔɔ wu kasɛ, Laa ta wu ɓi katɔ.

³⁶ Laa shòng zang Isirela nyaa nɛɛ ruu ɓiɓɛ. Zang kɔɔ ri Ruu Tɔ̃ɔ Laa ɓɔɔ shing ri, ri nwang ka nyaa zɔɔ ɓɛɛ nɛɛ bii Yeesɔ Kirisi ɓɔɔ wukɔ kpanti zang piti ɓɛɛ.

³⁷ Nɔɔ tãa ruu kɔ baa tipi Yahudi ɓee tɔ, ɓɔɔ zang gaayu nɛɛ tipi Galili, kaa knti ɓɔɔ Yɔhana kɔɔ zang nɛɛ ri yaa vuu shi kpang ɓɔɔ ri palɛ ɓɛɛ.

³⁸ Ruu keɓe ɓi ruu Yeesɔ yɔɔ Nazara. Ɓɔɔ Laa a wu Suru ɓiɓɛ, nɛɛ naa vuu palɛnang ɓɛɛ. Yeesɔ keɓe daarɛ nɛɛ nɔng piti piti, pàlɛ́ zang tɔ̃ɔ, ti masɛ zang ɓɔɔ suru shi kpang ka bii ɓarɛ nandon, ka ruu ɓɔɔ, Laa nɛɛ wu ɓɛɛ.

³⁹ Vuu ɓɔɔ wu pálɛ́ ka tipi Yahudi nɛɛ gari Urushalima ruu zi nɛɛ jĩng ɓuru. A ri ti nyɔ wu vɔrɔ, ka ɓɔɔ ri ɓaa wu naa ka laa ɓɛɛ.

⁴⁰ A Laa wisi wu paa nɛɛ saa ka ɓɔɔ diki daa taati ɓɛɛ. A nwangsɛ wu nɛɛ zang zi wu.

⁴¹ Wu zang piti ri zi wu kpang, ɓi rukɔ ɓɔɔ Laa shɛ̃ɛrɛ ruu katɔ kɔ zi wu shɛ̃ɛning. Rùu shaa vuu shaanang, a ruu ɓoo vuu nɛɛ wu ka knti ɓɔɔ wu seepaa tɔ nɛɛ saa ɓɛɛ.

⁴² A á ruu nyaa nɛɛ ruu kɔɔ zang Ruu Tɔ̃ɔ Laa. Rùu kɔ̀ɔ́ zang nɛɛ Laa zɔ̃ng wukɔ nɛɛ wu nwang zang ɓɔɔ naa jɛ̃̀ɛ́ rɛɛ zang ɓɔɔ vɔ katɔ, nɛɛ zang ɓɔɔ nwang doo ningkãari ruu.

⁴³ Zang nyaa shonang Laa ri kɔɔ ruu ka yuu ɓiɓɛ tɔɔ, zang ɓɔɔ nɛɛ shing danggn ka bii ɓiɓɛ, Laa yaa zang keɓe gbalang vuu shi kpang ɓɔɔ wu palɛ katɔ nandon, ka ruu nung ɓiɓɛ.”

Suru Laa a ka bii zang ɓɔɔ ri zang Isirela kpang ɓɛɛ

⁴⁴ Bituru rang yee doo kana nyaa, a Suru Laa a ka bii zang ɓɔɔ ri ɓaa shoo ka ruu ɓiɓɛ nandon.

⁴⁵ Zang Yahudi ɓɔɔ ri shing danggn ɓarɛ tɔ ɓɔɔ ri a nɛɛ Bituru nɛɛ gari Joopa, ri mã naa ka danggn, ka ɓɔɔ Laa a zang ɓɔɔ ri zang Isirela kpang Suru ɓiɓɛ jong ɓɛɛ.

⁴⁶ Ka ruu ɓɔɔ, ri tãayi zang ri rangkɛ yee nɛɛ nyaa ɓɔɔgn, ri dɔɔ Laa, ka ruu bannang ɓiɓɛ ɓɛɛ. A Bituru rang yee tɔɔ,

⁴⁷ “Zang keɓe, Laa a ri Suru ɓiɓɛ tɔ, naa ɓɔɔ a ruu ɓɛɛ. Zang ɓɔɔ zãyi rùu palɛ ri batizima nɛɛ mii kpang kagn ya?”

⁴⁸ A kɔɔyi nɛɛ, zang palɛ ri batizima nɛɛ nung Yeesɔ Kirisi. Ri gaa wu nɛɛ wu nwáng nɛɛ ri diki wu bee katɔ tɔkɔlɔng.