2 Timoti 4 - Nyaa Shɔɔ Ɓɔɔ Laa a Ɓɛɛ

¹ N gàa mɔɔ nɛɛ nung Laa nɛɛ ɓɔɔ Yeesɔ Kirisi ɓɔɔ naa jɛ̃ɛ zang ɓɔɔ ri vɔlɔ tɔ, nɛɛ zang ɓɔɔ ri doo ningkãari ruu ɓɛɛ. Ka ruu ɓɔɔ, Yeesɔ Kirisi naa nwang nyaa ditɔ, naa roo kpanti, ka ruu nɔngkɔ, n kɔɔ mɔɔ ruu keɓe.

² Kɔ̀ɔrɔ̀ zang Ruu Tɔ̃ɔ Laa, yi tĩng ɓaa ka kɔɔrɔnang, naa nɛɛ làá kɔɔnang, naa nɛɛ ti laa kɔɔnang kpang piti. Mangkɛ zang, mɔɔ ti mã̀ zang danggn. Mɔɔ mã danggn ka nɔng ɓɔɔ mɔɔ tusu zang vuu ɓɛɛ.

³ Diki naa a ditɔ, diki ɓɔɔ zang ɓaa shoo ka vuu tɔ̃ɔ ɓɔɔ zang tusu kpang. Ri dũng ɓarɛ vuu ɓɔɔ yeti ɓarɛ kasɛ ɓɛɛ. Ri kpalɛ zang ɓɔɔ ri tusu vuu, nɛɛ ri tùsù ri vuu ɓɔɔ bii sháa ri, rì kasɛ tãanang ɓɛɛ.

⁴ Ri ɓaa shoo, ka ruu ɓɔɔ niizang, ɓɔɔ ka yuu gbalang Laa ɓɛɛ kpang. Ri ɓàarɛ́ shoo ɓarɛ ka ruu gbãagbãa.

⁵ Ɓɔɔ ɓaaɓɛ, yiti yuu ɓaaɓɛ waasɛ̃ diki diki, mɔɔ nɛɛ dang jĩng, mã danggn, palɛ ɓaa shonang ɓɔɔ mɔɔ zang ɓɔɔ kɔɔrɔ zang Ruu Tɔ̃ɔ Laa mɔɔ nɛ̀ɛ́ pálɛ̀ ɓɛɛ. Pálɛ́ shonang ɓaaɓɛ nandon naa zang shonang Laa.

⁶ Ɓɔ̀ɔ́ mɛɛ, làá mɛɛ a ɓi tɔ, ɓɔɔ zang lu m, naa ɓɔɔ zang lu laa vuu ɓɔɔ zang ɓoo katɔ ɓɛɛ. Diki a tɔ ɓɔɔ n yaa koo keɓe ɓɛɛ.

⁷ N yuu m tɔ waasɛ̃ n yurɛ n daa hangsɛ nyaa. N yaa danggn ɓɔɔ n shing ka bii Laa ɓɛɛ kpang.

⁸ Kãntang keɓe, Laa shing vuu ɓɔɔ wu a m ɓɛɛ tɔ, vuu ɓɔɔ wu a zang ɓɔɔ palɛ vuu ɓɔɔ wu kasɛ ɓɛɛ. Kpanti Yeesɔ Kirisi ɓɔɔ jɛ̃ɛ zang ruu ɓi tɔ̃ɔ, naa a m vuu keɓe ka diki ɓɔɔ wu jɛ̃ɛ zang ruu kagn ɓɛɛ. A nkɔ ka bm kpang, a zang piti ɓɔɔ ri kasɛ wu, ri gãng jĩng diki ɓɔɔ wu gbãayu kagn ɓɛɛ.

Bulu kɔɔ ruu ka yuu ɓiɓɛ

⁹ Kãa gbalang mɔɔ a ka bii mɛɛ pati,

¹⁰ ka ruu ɓɔɔ, Dema kasɛ ruu vuu koo keɓe, yaa m tɔ, daa tɔ ka gari Tesalonika. Karasika daa ka Galati, a Titu daa ɓi kaa Dalamatiya.

¹¹ Ɓi kaa Luka kɔ shɛ̃ɛning nɛɛ n, kãa nɔng Maraku, mɔɔ a nɛɛ wu, ka ruu ɓɔɔ, yi m naa katɔ ka shonang mɛɛ keɓe.

¹² N shong Tikiku ɓi ka Afisa

¹³ Mɔɔ nɛɛ a kaa tɔ, mɔɔ atɛ m fɔ̃ɔrɔ ɓɔɔ n hãa nɛɛ biling, ɓɔɔ n yaa ka nɔng Kaapu ka gari Torowasa ɓɛɛ ka naa ning. Mɔɔ ti atɛ rɛɛ labeenang kiɓi ka naa jong. Labeenang ɓɔɔ n shing danggn gbãng gbãng ɓɔɔ zang palɛ nɛɛ koo vuu ɓɛɛ.

¹⁴ Alezanda yɔɔ ɓɔɔ sã vuu ɓɛɛ palɛ m vuu shi kpang dɔɔli. Laa naa palɛ wu vuu ditɔ jong ka doo vuu ɓɔɔ wu pálɛ̀ ɓɛɛ.

¹⁵ Gãng jĩng ka wu gbãng gbãng, ka ruu ɓɔɔ, kasɛ vuu ɓɔɔ ruu kɔɔrɔ zang kpang tingkiring ɓɛɛ.

¹⁶ Ka ɓɔɔ tĩng shɔɔnang, zang ɓaa m nyaavaa ɓɛɛ, zang ɓɔɔ tà m nyaa kagn kpang. Zang ri yaa m nandon. N gaa Laa wu tɔɔ kpang nɛɛ ri palɛ vuu shi kpang tɔ kpang.

¹⁷ A Yeesɔ Kirisi yáa m kaa takpang, a m kaka, a n zunung ɓɔɔ n kɔɔrɔ zang Ruu Laa nandon. Tɔ̀ɔ, zang ɓɔɔ ri zang Yahudi kpang, ri tãa kati. A Laa tá m nɛɛ naa zang ɓɔɔ nɛɛ ri nyɔ m vɔrɔ ɓɛɛ.

¹⁸ Kpanti Yeesɔ Kirisi ta m ditɔ, ka vuu shi kpang ɓɔɔ zang nɛɛ ri palɛ m nandon. Wu daa nɛɛ n ka nɔng ɓɔɔ wu roo kpanti ka lapa ɓɛɛ. Zang ri a wu bannang ta dòndòng. Nɔngkɔ.

Bulu hangsɛ zang nyaa jeenang

¹⁹ Mɔɔ jèe m Akpiila nɛɛ ɓeeso Pirisila nyaa, nɛɛ zang ɓɔɔ ri ka gãa Onɛsiforu nandon.

²⁰ Erasitu nwàng ɓi ka Koranti, a n yaa Torofimu ka gari Miletu, ka ruu ɓɔɔ vuu pálɛ́ wu katɔ ɓɛɛ.

²¹ Kãa gbalang mɔɔ arɛ bɛ̀ɛ́ pũngku kpaa gn kpang. Yubulu, nɛɛ Pudin, nɛɛ Linu, nɛɛ Kalawudiya, ri jee mɔɔ nyaa. Manzung ɓuru, ɓɔɔ ri dũng dòo Laa kɔ ka nihn, ri jee mɔɔ nyaa jong.

²² Kpanti Yeesɔ Kirisi wu shingnɛ, mɔɔ tãa tĩnang, Laa wu palɛ nɔɔ tɔ̃ɔ nandon.