2 Timoti 2 - Nyaa Shɔɔ Ɓɔɔ Laa a Ɓɛɛ

Sɔɔja ɓɔɔ palɛ Yeesɔ Kirisi shonang, nɛɛ yeti gbete

¹ Ka ruu nɔngkɔ, Jaa mɛɛ, tɔ̃ɔ ɓɔɔ Laa pàlɛ̀ mɔɔ ɓɛɛ, wu shingnɛ mɔɔ shii nɛɛ kaka. Tɔ̃ɔ keɓe, ɓi ɓɔɔ ɓuru ɓɔɔ ruu ɓakɛ zɔɔ ɓuru tɔ nɛɛ Yeesɔ Kirisi ɓɛɛ.

² Túsú vuu ɓɔɔ mɔɔ tãayi, n túsú ka jĩng zang dɔɔli ɓɛɛ, mɔɔ tusu zang ɓɔɔ mɔɔ shing ri gn katɔ ka bii ɓɛɛ. Zang ɓɔɔ ri zunung ɓɔɔ ri tusu zang ɓɔɔ kaa jong ɓɛɛ.

³ Naa ɓɔɔ sɔɔja tɔ̃ɔ mã danggn jĩng dannang ɓɛɛ, mã danggn dòo nɔngkɔ, naa mɔɔ dang jĩng ka ruu Yeesɔ Kirisi ɓɛɛ.

⁴ Zang sɔɔja ɓɔɔ ka nyaa sĩiri, ta sĩiri tɔ̃ɔ, tɔ̀ɔ, zang bang ɓiɓɛ wu tãa tĩnang ɓiɓɛ kati. Ka ruu nɔngkɔ, mɔɔ pálɛ̀ vuu ɓɔɔ zang ɓɔɔ ri sɔɔja kpang ri pálɛ́ ɓɛɛ kpang.

⁵ Zang ɓɔɔ ri yuu jajayu nɛɛ dũ̀ng nyaa ɓɔɔ zang dang ɓɛɛ kpang, walɛ vuu ɓɔɔ ɓi kpang.

⁶ Zang ɓɔɔ lang jaa, ɓɔɔ palɛ shonang gbãng gbãng, zang wu a wukɔ vuu shaanang ɓɔɔ zang walɛ ka jaa, shɔɔnang.

⁷ Rɛ̃rɛ ka yuu vuu kɔ n kɔɔ mɔɔ ɓee waasɛ̃, ka ruu ɓɔɔ, Laa a mɔɔ gbalang ditɔ mɔɔ zi vuu ɓɔɔ kagn ɓɛɛ nandon.

⁸ Danggn Yeesɔ Kirisi ɓɔɔ zang wisi paa nɛɛ saa, wu ning mɔɔ kpang. Yeesɔ ɓɔɔ wu jaa zɔ̃ng Dawuda ɓɛɛ, naa ɓɔɔ n túsú ka yeti Ruu Tɔ̃ɔ Laa kɔ n kɔ́ɔrɔ̀ zang ɓɛɛ.

⁹ Ka ruu ɓɔɔ, n kɔɔrɔ zang Ruu Tɔ̃ɔ Laa, n dang jĩng, a zang ti mã m nɛɛ saka, mɔɔ kɔɔ nɛɛ ǹ zang ɓɔɔ palɛ vuu shi kpang ɓɛɛ. A zang mã Ruu Laa bìí, ɓi kaa tɔ̀ɔ́ katɔ kpang.

¹⁰ Ka ruu nɔngkɔ, n mã danggn vuu piti ka ruu zang ɓɔɔ Laa shɛ̃ɛrɛ ri katɔ ɓɛɛ. Tɔ̀ɔ, Laa wu ta yuu ɓarɛ kaa jong. Yuu tanang ɓɔɔ a nɛɛ bii Yeesɔ Kirisi ɓɛɛ, ɓɔɔ ti atɛ suru bii ɓɔɔ waa nyaa kpang ɓɛɛ.

¹¹ Ruu keɓe niizang kɔ nwani. Zang kɔɔyi nɛɛ, Ruu nɛɛ vɔ tɔ nɛɛ wu, Ruu ti naa nwang ditɔ ningkãari nɛɛ wu.

¹² Ruu nɛɛ mã danggn sasak, ruu naa roo kpanti nɛɛ wu. Naa ruu bɛ̃ɛ wu, ti naa bɛ̃ɛ ruu jong.

¹³ Naa ruu ɓuru zang ɓɔɔ zang shing gn ka bii ɓuru kpang, Yaa nyaa ɓɔɔ wu kɔ̀ɔ ɓi kpang. Ka ruu ɓɔɔ, sùu yuu ɓiɓɛ sèé ɓi kpang ɓɛɛ.

Zang shonang Yeesɔ ɓɔɔ palɛ shonang tɔ̃ɔ ɓɛɛ

¹⁴ Kpaa rɛɛ zang ɓaaɓɛ danggn vuu keɓe, mɔɔ ti shaarɛ ri nyaa gbãng gbãng ka tĩng Laa, nɛɛ ri gaa nyaa ka yuu ruu kpang. Nwàng zang vuu ɓɔɔ tɔ̃ɔ ɓi kpang, lasɛ zang ɓɔɔ ri tãa ɓɛɛ ɓarɛ katɔ kɔ shɛ̃ɛning.

¹⁵ Pálɛ́ vuu ɓɔɔ mɔɔ zunung katɔ nandon, tɔ̀ɔ, mɔɔ nwang zang ɓɔɔ Laa kɔɔ ruu tɔ̃ɔ tɔ ka yuu ɓiɓɛ kati. Zang shonang ɓɔɔ yusɛ̃ɛ shonang ɓiɓɛ tuu wu kpang ɓɛɛ. Zang ɓɔɔ nwàngsɛ́ zang dĩiri Ruu Laa tɔ̃ɔ tɔ̃ɔ ɓɛɛ.

¹⁶ Mɔɔ ɓaa shoo ɓaa ka yee sãnsãnrãng ɓɔɔ zang rangkɛ ɓɛɛ kpang. Ruu ɓɔɔ naa weɓe, shing zang, zang yaa gbalang Laa kaa beebang.

¹⁷ Zɔ̃ng yee keɓe nwang ɓi naa nɔɔrɔ ɓɔɔ shaa ɓi katɔ kɔ jong ɓɛɛ. Zang ziti ka teteng zang ɓɔɔ ri túsù zɔ̃ng yee keɓe, ɓi rɛɛ Himinaya nɛɛ Filetu.

¹⁸ Ri yaa gbalang ɓɔɔ niizang tɔ, ri kpantɛ zang ɓɔɔ ri shing danggn tɔ jĩng, ri kɔɔrɔ ri nɛɛ, Laa wisi zang paa ɓi tɔ̀ɔ́ nɛɛ saa kpang.

¹⁹ A doo gãa ɓɔɔ Laa loo ɓɛɛ, shii ɓi katɔ katakata, zang zĩiti kpang. Zang bee vuu keɓe ka bii ɓiɓɛ nɛɛ, “Laa zi rɛɛ zang ɓɔɔ ri ɓarɛ ɓɔɔ ɓiɓɛ tɔ”. A “Zang ɓɔɔ nɛɛ kɔɔyi nɛɛ, wu ɓɔɔ Kpanti Laa, wu yaa gbalang vuu shi kpang ɓɔɔ wu palɛ katɔ.”

²⁰ Ka yeti gãa bang, juwa kagn ɓɔɔ zang palɛ nɛɛ zinariya ɓɔɔ nɛɛ azurufa kɔ shɛ̃ɛning kpang. Zang pálɛ̀ ɓɔɔ nɛɛ laa, a zang mãa ɓɔɔ nɛɛ tapɔng. Zang shing ɓɔɔ ɓi ka ruu vuu shaanang ka nɔng mung, ɓɔɔ zang palɛ shonang ɓi nɛɛ mani diki diki.

²¹ Zang ɓɔɔ nɛɛ palɛ rɛɛ vuu shi kpang keɓe kpang nandon, nwang ɓi naa juwa Zinariya ɓɔɔ zang shaa vuu shaanang kagn ka lee mung ɓɛɛ. Juwa keɓe, shi zang ɓiɓɛ ka jĩng dɔɔli. Zang ɓiɓɛ palɛ shonang tɔ̃ɔ piti nɛɛ mani katɔ.

²² Yaa vuu ɓɔɔ bii jasang kasɛ ɓɛɛ, mɔɔ kãa ɓaa gbalang ɓɔɔ mɔɔ nwang tɔ̃ɔ ka tĩng Laa ɓɛɛ, mɔɔ shing danggn ka bii Laa. Mɔ́ɔ kasɛ ruu zang ɓɔɔ ri dũng dòo Laa kɔ ɓɛɛ. Mɔ́ɔ nwang ka nyaa zɔɔ nɛɛ ri. Palɛ vuu keɓe nɔng gbete nɛɛ zang ɓɔɔ ri dũng Laa nɛɛ yeti gbete ɓɛɛ.

²³ Ruu ɓaaɓɛ wu hãa kagn nɛɛ ruu shoko kɔɔrɔnang nɛɛ nyaa laanang kpang. Mɔɔ zi tɔ ri shingnɛ zang ri haa nyaa.

²⁴ Zang ɓɔɔ pálɛ̀ Laa shonang wu hàa nyaa ɓi kpang. Wu nwáng ɓi zang ɓɔɔ palɛ zang piti tɔ̃ɔ ɓɛɛ. Wu ti nwáng zang tɔ̃ɔ ɓɔɔ tusu zang vuu, mã danggn katɔ ɓɛɛ.

²⁵ Wu kɔsɔ zang ɓɔɔ ri bɛ̃ɛ wu nɛɛ gnvɔ ning kpang. Naa Laa nɛɛ kasɛ, ri naa walɛ gbalang ɓɔɔ ri kɔ̃sɔ yeti, ri árɛ̀, ri zi ruu ɓɔɔ niizang katɔ ɓɛɛ.

²⁶ Shoo naa lu ri ditɔ, ri wɔ nɛɛ naa suru shi kpang ɓɔɔ lang saka yi ri kagn, a shing ri, nɛɛ ri palɛ vuu ɓɔɔ wu kasɛ ɓɛɛ.