2 Tesalonika 2 - Nyaa Shɔɔ Ɓɔɔ Laa a Ɓɛɛ

Ruu yɔɔ ɓɔɔ dũ̀ng nyaa dannang ɓi kpang ɓɛɛ

¹ Rɛɛ manzung, ka ruu yuu gbãanang Kpanti ɓuru Yeesɔ Kirisi nɛɛ naa ɓɔɔ zang naa kpalɛ ruu, ruu ĩi wu ɓɛɛ. Ruu gaa nɔɔ,

² sisĩng wu tantɛ nɔɔ lɔɔnang kpang. Vuu bìí wu ti kpãa nɔɔ ka yeti ka ruu ɓɔɔ zang kɔɔyi nɛɛ, Diki ɓɔɔ Kpanti ɓuru gbãayu kagn a tɔ ɓɛɛ kpang. Naa doo zang nyaa shonang Laa ɓɔɔ kagn kɔɔyi, naa ti zang ɓɔɔ palɛ Laa shonang ɓɛɛ kɔ kɔɔyi, a ɓɔɔ ti nɛɛ, ka yeti labeenang ɓɔɔ zang tɔɔ a nɛɛ bii ɓuru ɓɛɛ.

³ Nɔɔ yaa zang ɓɔɔ wu nwãarɛ nɔɔ ka gbalang ɓɔɔ kpang. Zang dɔɔli ri nɛɛ raa Laa yuu knti tɔ naa ɓɔɔ zang kɔɔ ɓɛɛ a yɔɔ ɓɔɔ dũ̀ng nyaa dannang ɓi kpang nɛɛ nwang nyaa tɔ, ɓɔɔ Laa naa ningsi wu ɓi ka waa ɓɛɛ, tɔ̀ɔ, Diki Kpanti ɓuru wu a kati.

⁴ Naa risi vuu ɓɔɔ zang ɓaa nɛɛ vaka, kɔ vuu ɓɔɔ zang bang katɔ piti, naa vuu ɓɔɔ kpang. Wu shing yuu ɓiɓɛ nɛɛ wu ɓa ri katɔ nandon. Ti naa daa ka yeti Gãa Laa wu nwang ka nɔngkɔ wu kɔɔyi nɛɛ wukɔ kaa Laa.

⁵ Danggn ning nɔɔ katɔ ya? Ɓɔɔ n doo nɛɛ nɔɔ, n kɔɔ nɔɔ vuu keɓe tɔ nandon.

⁶ Vuu ɓɔɔ ti zãa vuu keɓe palɛnang kãntang keɓe kagn, a nɔɔ ti zi vuu keɓe tɔ. Yɔɔ ɓɔɔ dũng nyaa dannang ɓi kpang keɓe naa nwang nyaa ka diki ɓɔɔ Laa zi tɔ nɛɛ wukɔ tɔ̃ɔ ɓɛɛ.

⁷ Kãntang keɓe, vuu ɓɔɔ shing zang, zang palɛ vuu shi kpang palɛ shoonang kana nɛɛ nwĩiri ka yeti shɔnzang dɔɔli. Zang ɓɔɔ maka wu, ti maka wu katɔ sasak. Zang nɛɛ naa kɔsɔ vuu bìí tɔ, tɔɔ wu naa nwangsɛ bii kati.

⁸ Tɔ̀ɔ, Laa wu nwangsɛ zang ɓɔɔ dũ̀ng nyaa dannang ɓi kpang kati. Kpanti Yeesɔ Kirisi nɛɛ a tɔ naa nyɔ wu vɔrɔ, wu ti ningsi wu nɛɛ ɔ̃kɔnang nyaa ɓiɓɛ.

⁹ Yɔɔ ɓɔɔ dũng nyaa dannang ɓi kpang keɓe, naa a nɛɛ naa vuu palɛnang Sheetang wu pálɛ́ vuu ɓɔɔ zang zirɛ zang mã naa ka danggn ɓɔɔ sèé ka zɔ̃ng zɔ̃ng ɓɛɛ.

¹⁰ Naa nwãarɛ zang ɓɔɔ ri naa shaarɛ katɔ ɓɛɛ, nɛɛ zɔ̃ng nwannang ɓɔɔ a nɛɛ bii vuu shi kpang ɓɛɛ, ka zɔ̃ng zɔ̃ng. Ri shaarɛ ka ruu ɓɔɔ ri kasɛ ruu ɓɔɔ niizang a ri ti tarɛ, tɔɔ zang ta yuu ɓarɛ kati kpang ɓɛɛ.

¹¹ Ka ruu nɔngkɔ, Laa shingnɛ ri palɛ vuu shi kpang tingkiring tɔɔ ri shing danggn kaa sèé.

¹² Laa palɛ nɔngkɔ, tɔ̀ɔ, zang piti ɓɔɔ ri shing danggn ka ruu ɓɔɔ niizang ka yuu Kpanti ɓuru Yeesɔ kpang, ri tãa ɓarɛ tĩnang vuu shi kpang ɓɔɔ ri palɛ ɓɛɛ, tɔ̀ɔ, wu kɔɔ kati nɛɛ ri palɛ vuu shi kpang tɔ.

Laa zɔ̃ngkɔ nɔɔ nɛɛ wu ta yuu manɛ

¹³ Rɛɛ manzung, ruu zã́a Laa katɔ ka diki kiya piti, ka ruu manɛ, ɓɔɔ Laa kasɛ nɔɔ katɔ ɓɛɛ. Ka ruu ɓɔɔ, Laa zɔ̃ng nɔɔ nɛɛ wu ta yuu manɛ kɔ shɔɔnang ɓɛɛ. Nɛɛ wu ta yuu manɛ nɛɛ naa vuu palɛnang Suru ɓiɓɛ, tɔ̀ɔ wu shing nɔɔ, nɔɔ nwang zang Laa, a ɓɔɔ kaa ruu danggn ɓɔɔ nɔɔ shing ka ruu ɓɔɔ niizang ɓɔɔ ka yuu Kpanti ɓuru Yeesɔ Kirisi ɓɛɛ.

¹⁴ Laa ɓaa nɔɔ nyaa nɛɛ nɔɔ nwang zang ɓiɓɛ nɛɛ Ruu Tɔ̃ɔ ɓɔɔ ruu kɔɔ nɔɔ ɓɛɛ. Ɓaa nɔɔ nyaa nɛɛ nɔɔ naa tãa tĩnang jong ka ruu bannang Kpanti ɓuru Yeesɔ Kirisi.

¹⁵ Ka ruu nɔngkɔ, rɛɛ manzung, nɔɔ shii nɛɛ kaka, nɔɔ yiti rɛɛ ruu niizang ɓɔɔ ruu tusu, ka ɓɔɔ, ruu kɔɔrɔ nɔɔ, a ruu ti bee nɔɔ ka yeti labeenang tĩng shɔɔnang ɓɛɛ, waasɛ̃.

¹⁶ Ruu gaa Kpanti ɓuru Yeesɔ Kirisi nɛɛ yuu ɓiɓɛ nɛɛ Daa ɓuru Laa ɓɔɔ ri kasɛ ruu ka tĩng, ɓɔɔ ka ruu tɔ̃ɔ ɓiɓɛ mã ruu danggn a shingnɛ ruu shing gn gbãng gbãng ɓɛɛ.

¹⁷ Wu mã nɔɔ danggn gbãng gbãng, tɔ̀ɔ, diki diki nɔɔ palɛ vuu ɓɔɔ tɔ̃ɔ, nɔɔ ti kɔɔrɔ ruu ɓɔɔ tɔ̃ɔ ɓɛɛ.