2 Koranti 8 - Nyaa Shɔɔ Ɓɔɔ Laa a Ɓɛɛ

Zang ɓɔɔ ri dũng Laa, á zang ɓɔɔ ri dǎng jĩng ka tipi Yahudi vuu

¹ Manzung ɓuru ɓɔɔ ri dũng dòo Laa kɔ ɓɛɛ, ruu tɔɔ ruu kɔ̀ɔ́ nɔɔ ruu vuu tɔ̃ɔ ɓɔɔ Laa pàlɛ̀ zang ɓɔɔ ri dũng wu ka tipi Makidoniya ɓɛɛ.

² Naa wee manzung ɓuru ɓɔɔ ri ka Makidoniya ri dang jĩng tɔ gbãng gbãng ɓee, ri tãa tĩnang doo nɛɛ mani diki diki. Naa wee vuu naa ɓarɛ kagn kpang tingkiring ɓee, ri a zang vuu doo nɛɛ mani nɛɛ yeti gbete.

³ N kɔ̀ɔ́ nɔɔ, ri a vuu ɓɔɔ ri zunung anang katɔ ɓɛɛ, vuu ɓɔɔ ri alɛ ɓa ɓɔɔ ri nɛɛ a ɓɛɛ katɔ. Zang ɓɔɔ mã ri nyaa kagn kpang.

⁴ Ri gàa ruu, ri ti bàkɛ̀ ruu nɛɛ ruu yaa ri jong ri yi zang ɓɔɔ ri dũng doo Laa kɔ, ɓɔɔ ri ka tipi Yahudi naa jong ka bii.

⁵ Vuu ɓɔɔ ri pálɛ́ ɓa ɓɔɔ ruu shing gn katɔ. Ri gaayu ri a Kpanti Yeesɔ yuu ɓarɛ, a ri ti naa a ruu yuu ɓarɛ kaa jong naa ɓɔɔ Laa kasɛ ɓɛɛ.

⁶ Bɛɛ Titu gaayu tɔ, kpálɛ́ vuu ɓɔɔ nɔɔ alɛ waati nɛɛ yeti gbete, a ruu kɔɔ wu nɛɛ wu yaa kpang, wu hangsɛ shonang bìí katɔ.

⁷ Ka vuu piti, nɔɔ ɓa zang ɓɔɔ ri dũng Laa ɓɔɔ nimbang tɔ. Nɔkɔ ka ting, ka danggn ɓɔɔ nɔɔ shing ka bii Yeesɔ Kirisi, ka naa ɓɔɔ nɔɔ kɔɔrɔ zang Ruu Tɔ̃ɔ Laa ɓɛɛ. Ka naa ɓɔɔ nɔɔ zi ruu ɓɔɔ niizang, ka ɓɔɔ nɔɔ kasɛ shonang palɛnang katɔ ɓɛɛ, a ɓɔɔ ti ka naa ɓɔɔ nɔɔ kasɛ ruu. Ka ruu nɔngkɔ, n kasɛ nɔkɔ nɔ́ɔ sɔɔ tĩng ka shonang keɓe, ɓɔɔ tusu nɛɛ nɔɔ kàsɛ̀ zang katɔ ɓɛɛ.

⁸ N dang nɔɔ wu nyaa kpang. N kasɛ nɛɛ n gãsɛ zang kasɛnang manɛ nɛɛ ɓɔɔ zang ɓɔɔ ri dũng doo Laa kɔ. Tɔ̀ɔ, n zirɛ nɛɛ niizang kɔ nwani ɓɛɛ.

⁹ Nɔɔ zi tɔ̃ɔ ɓɔɔ Kpanti ɓuru Yeesɔ Kirisi pàlɛ̀ ruu ɓɛɛ tɔ. Yeesɔ ɓi jaa ying ka vuu suru, a risi yuu ɓiɓɛ nwang zang ɓɔɔ vuu ka naa ɓiɓɛ kpang ka ruu manɛ, nɛɛ tɔ̀ɔ, nɔɔ nwang wujɛ ying kati.

¹⁰ Vuu ɓɔɔ n zi ka yeti mɛɛ keɓe, nɔɔ hangsɛ vuu ɓɔɔ nɔɔ gaayu sáa ɓɔɔ ta. Wu nɔkɔ gaayu vuu keɓe palɛnang shɛ̃ɛning kpang, nɔkɔ gaayu kasɛnang nɛɛ nɔɔ palɛ katɔ.

¹¹ Nɔɔ palɛ shonang bìí ta, nɔ́ɔ hangsɛ. Nɔɔ làábii hangsɛnang naa ɓɔɔ nɔɔ gaayu palɛnang. Nɔɔ palɛ shonang bìí nɛɛ vuu ɓɔɔ ka naa manɛ kãntang ɓɛɛ.

¹² Mɔɔ nɛɛ kasɛ tɔ ka yeti ɓaaɓɛ nɛɛ, mɔɔ a zang vuu, Laa tãa tĩnang vuu ɓɔɔ mɔɔ a ɓɛɛ katɔ. Nɔɔ á dɔɔli naa ɓɔɔ nɔɔ zunung katɔ ɓɛɛ. Laa tɔɔ kpang nɛɛ mɔɔ a vuu ɓɔɔ ka naa ɓaaɓɛ kpang, kpang.

¹³ N tɔɔ kpang nɛɛ, n yaa zang ɓɔɔ, n shing vuu ɓɔɔ kpiti katɔ ka yuu manɛ kpang.

¹⁴ Wee vuu dòo kagn ka naa manɛ dɔɔli kãntang ɓee, naa nɔɔ yí zang ɓɔ̀ɔ ɓɔ̀ɔ́ ɓarɛ kagn kpang naa ka bii, wukɔ tɔ̃ɔ. Lee ɓɔ̀ɔ ɓɔ̀ɔ́ manɛ kagn kpang, ɓɔɔ ɓarɛ kagn dɔɔli, ri ti yi nɔɔ naa jong ka bii. Ka gbalang naa weɓe kɔ, nɔɔ palɛ zɔɔ vuu teetee.

¹⁵ Naa ɓɔɔ zang bee ka yeti labeenang Laa ɓɛɛ nɛɛ, “Zang ɓɔɔ kpálɛ̀ vuu shaanang dɔɔli, wu walɛ naa ɓɔɔ daa wu teetee ɓɛɛ. Zang ɓɔɔ nɛɛ kpalɛ ɓi tɔkɔlɔng, wu walɛ naa ɓɔɔ daa wu katɔ ɓɛɛ.”

¹⁶ Ruu zãa Laa tɔ, ka ruu ɓɔɔ shingnɛ, Titu wu kasɛ ruu manɛ gbãng gbãng naa ɓɔɔ shing m n kasɛ ruu manɛ ɓɛɛ.

¹⁷ Ɓɔɔ n tɔ́ɔ, n shong wu ka bii manɛ, bɛ̃ɛ kpang, kasɛ katɔ nɛɛ wu yi nɔɔ naa ka bii. Ka ruu nɔngkɔ, kasɛ nɛɛ yeti ɓiɓɛ nɛɛ wu daa katɔ ka bii manɛ.

¹⁸ Ruu dɔ̃ manzung ɓuru ɓɔɔ zang zi wu nung tɔ piti, ka ruu Ruu Tɔ̃ɔ ɓɔɔ ruu kɔɔrɔ zang ɓɛɛ, wu daa nɛɛ wu.

¹⁹ Wu nɔngkɔ shɛ̃ɛning kpang, zang ɓɔɔ ri dũng Laa, ri zɔ̃ng wu tɔ, nɛɛ wu rakɛ nɛɛ ruu, ka ɓɔɔ ruu daa nɛɛ vuu kɔ zang kpalɛ ɓee. Vuu kɔ ruu bàsɛ́ ɓee, tɔ̀ɔ, wu a Kpanti Yeesɔ Kirisi bannang, wu ti tusu nɛɛ ruu kasɛ katɔ ruu yi zang ɓɔɔ ri dũng doo Laa kɔ naa ka bii.

²⁰ Ruu pálɛ́ waasɛ̃, ruu kasɛ kpang, ruu shing zang ɓɔɔ ri gɔ̃ɔrɔ yee ka naa ɓɔɔ ruu básɛ́ vuu kɔ zang alɛ ruu waati ɓee kpang.

²¹ Ruu mang ɓuru ka yeti ɓuru nɛɛ ruu palɛ vuu ɓɔɔ tɔ̃ɔ ɓɛɛ. Wu ka jĩng Kpanti Yeesɔ kɔ shɛ̃ɛning kpang, ka jĩng shɔnzang jong.

²² Ka ruu nɔngkɔ, ruu shong manzung ɓuru nɛɛ ri. Ruu gãsɛ wu tɔ dɔɔli, ruu zirɛ, kasɛ katɔ wu yì zang naa ka bii. A wee shing gn tɔ ka bii manɛ gbãng gbãng ɓee, kasɛ kaa tɔ gbãng gbãng wu yi nɔɔ naa ka bii.

²³ Titu ɓi zang ɓɔɔ rakɛ nɛɛ n ɓɛɛ, palɛ shonang ɓi nɛɛ n, tɔ̀ɔ, ruu yi nɔɔ naa ka bii. Zang ziti ɓɔɔ ri daa nɛɛ wu keɓe, ri daa ɓarɛ ka nung zang ɓarɛ, shonang ɓarɛ shingnɛ, zang a Kirisi bannang.

²⁴ Ka ruu nɔngkɔ, nɔɔ tusu zang keɓe nɛɛ nɔɔ kasɛ ri katɔ. Zang ɓɔɔ ri shong ri, ri tã̀á nyaa ditɔ, ri zi kaa wukɔ nɛɛ yee bang bang ɓɔɔ ruu rangkɛ ka yuu manɛ, ɓi niizang kɔ nwani.