2 Koranti 5 - Nyaa Shɔɔ Ɓɔɔ Laa a Ɓɛɛ

¹ Ruu zi tɔ, diki ɓɔɔ bii ɓuru kɔ nwàng naa putali nɛɛ tantɛ tɔ, Laa naa a ruu bii ditɔ ka lapa, ɓɔɔ ruu naa nwang kagn. Bii ɓɔɔ wu a ruu keɓe nwang ɓi dòndòng.

² Kãntang keɓe, wee ruu nwàng nɛɛ bii ɓuru ɓee, ruu tãa tĩnang kpang, ruu zaa katɔ. Ka ruu ɓɔɔ, ruu kasɛ Laa wu hãa ruu bii ɓuru kaɓa ɓɔɔ a nɛɛ lapa ɓɛɛ.

³ Ruu kasɛ ruu nwang nɛɛ bii shɔɔ ɓuru, tɔ̀ɔ, ruu nwàng kaa tɔ̀ɔ́ bii kagn kpang, kpang.

⁴ Ka wee ruu nwang doo ka bii ɓuru kɔ nwàng naa putali ɓee, ruu zirɛ mɔɔ kɔɔ nɛɛ ruu dang jĩng, a ruu zaa katɔ. Ruu tɔɔ kpang nɛɛ ruu kasɛ bii ɓuru ɓɔɔ ka koo keɓe takpang kpang. Ruu kasɛ nɛɛ zang hãa ruu bii ɓuru ɓɔɔ a nɛɛ lapa ɓɛɛ. Tɔ̀ɔ, suru bii ɓɔɔ waa nyaa kpang wu tá nɔng, wu ningsi vɔrɔ kati.

⁵ Laa kɔ nɛɛ yuu ɓiɓɛ kpàlɛ̀ ruu bii ka ruu bii kɔ̃sɔnang keɓe, a á ruu suru ɓiɓɛ nɛɛ, tɔ̀ɔ, zang zi kaa gn nɛɛ wu a ruu vuu piti ɓɔɔ wu shing ruu ɓɛɛ katɔ.

⁶ Ka ruu nɔngkɔ, diki diki ruu yaa gn naa kpang. Ruu zi tɔ nɛɛ wee ruu nwang doo ka bìí shɔnzang ɓuru ɓee, ruu nwang gn nɛɛ Kpanti Yeesɔ nɔng gbete kpang.

⁷ Ka ruu ɓɔɔ, nwannang ɓuru ɓi vuu danggn shinnang, wu vuu ɓɔɔ zang zi nɛɛ jĩng kpang.

⁸ Ruu yaa gn naa kpang. Ruu kasɛ katɔ kɔ jong, ruu yaa bii kɔ wukɔ gãa ɓuru ɓee, ruu daa nwang kaa nɛɛ Kpanti Yeesɔ.

⁹ Ruu kasɛ, naa ruu doo ka bii keɓe, naa ruu doo ka lapa, ruu palɛ vuu ɓɔɔ shing wu, wu tãa tĩnang ɓɛɛ.

¹⁰ Ka ruu ɓɔɔ, ruu nandon ruu naa shii ditɔ ka tĩng Yeesɔ Kirisi, wu jɛ̃ɛ rùu rúu. Wu jɛ̃ɛ ruu rúu, wu ti pàlɛ̀ zang ɓu vuu naa ɓɔɔ daa naa katɔ ɓɛɛ. Yeesɔ pàlɛ́ ruu vuu ka doo vuu tɔ̃ɔ nɛɛ vuu shi kpang ɓɔɔ zang ɓu palɛ ka koo keɓe ɓɛɛ.

Shonang ɓɔɔ shing zang, zang nwang zang tɔ̃ɔ ka tĩng Laa ɓɛɛ

¹¹ Ruu zi vuu ɓɔɔ zang ɓaa nɛɛ zang kaa vɔrɔ Laa tɔ, ka ruu nɔngkɔ, ruu bàkɛ́ zang piti. Laa zi ruu nung tɔ dɔ̃ɔ gbete, n ti shing gn nɛɛ, ka yeti manɛ, nɔɔ zi ruu nung tɔ gbãng gbãng.

¹² Ruu tɔɔ kpang nɛɛ, ruu bée nɔɔ labeenang ɓɔɔ kɔɔ nɔɔ ruu ka yuu ɓuru tɔkn kpang. Ruu tɔɔ ruu a nɔɔ manɛ vuu tɔ̃ɔ ɓɔɔ shingnɛ nɔɔ tuu yuu manɛ ka ruu ɓuru ɓɛɛ. Tɔ̀ɔ, nɔ́ɔ walɛ vuu ɓɔɔ nɔɔ kɔɔ zang ɓɔɔ ri kɔɔrɔ ruu bang bang ka yuu vuu ɓɔɔ ri zi ka bii zang, wu ka yuu vuu ɓɔɔ ka yeti ɓarɛ ɓɛɛ kpang kati.

¹³ Naa shoko nɛɛ ta ruu katɔ, ɓi ka ruu Ruu Laa. Ruu nɛɛ shoko kpang, ɓi ka ruu manɛ.

¹⁴ Ɓi kasɛnang ɓɔɔ Kirisi kasɛ ruu nɛɛ mani kɔ yiti ruu. Ka ruu ɓɔɔ, ruu zi ɓuru tɔ nɛɛ, zang gbete vɔ tɔ ka ruu zang piti. Nwang ɓi kaa naa ɓɔɔ ri nandon ri vɔ jong nɛɛ wu ɓɛɛ.

¹⁵ Vɔ ka ruu zang piti, tɔ̀ɔ, zang ɓɔɔ ri doo ningkãari ri nwàng tɔ̀ɔ́, nwannang yuu ɓarɛ kpang. Ri nwang ɓarɛ kaa nwannang zang ɓɔɔ vɔrɛ, a zang wisi wu paa tɔkn ningkãari ka ruu ɓarɛ ɓɛɛ.

¹⁶ Rúu dɔ̀ng zang ɓɔɔ ruu, tɔ̀ɔ́ ka doo nwannang shɔnzang kpang. Niizang, ɓeleng ruu dɔ̀ng Yeesɔ Kirisi ruu ka gbalang kaɓa kɔ, a kãntang keɓe, ruu palɛ tɔ̀ɔ́ nɔngkɔ kpang.

¹⁷ Ka ruu nɔngkɔ, zang ɓɔɔ nɛɛ ɓakɛ yuu ɓiɓɛ tɔ nɛɛ Yeesɔ Kirisi, ɓi kaa zang shɔɔ. Gbalang nwannang gbaala ɓiɓɛ ɓa ɓi tɔ. Nwannang ka gbalang shɔɔ gaayu tɔ.

¹⁸ Ɓi Laa ɓɔɔ risi ruu, ɓɔɔ ruu shing jĩng nɛɛ wu kpang, ruu nwang wusang ɓiɓɛ kɔ, palɛ vuu keɓe nɛ bii Kirisi. A á ruu shonang nɛɛ ruu risi zang ɓɔɔ ta wu, ri nwang wusang ɓiɓɛ.

¹⁹ Vuu ɓɔɔ n kɔɔ keɓe, Laa kãa gbalang ɓɔɔ wu rìsí zang koo piti, ri nwang rɛɛ wusang ɓiɓɛ nɛɛ bii Yeesɔ Kirisi. Yaa ri gbalang vuu shi kpang ɓɔɔ ri palɛ ɓɛɛ, yiti ka yeti ɓiɓɛ kpang. A ti a ruu shonang keɓe tɔ nɛɛ, ruu kɔɔ zang, nɛɛ wu kasɛ wu rìsí zang piti, ri nwang wusang ɓiɓɛ.

²⁰ Ruu nwàng ɓuru kaa naa zang nyaa shonang Yeesɔ Kirisi, mɔɔ kɔɔ nɛɛ Laa nɛɛ yuu ɓiɓɛ bàkɛ́ zang nɛɛ bii ɓuru. Ruu gaa nɔɔ ka nung ɓɔɔ Yeesɔ nɛ̀ɛ́ gaa nɔɔ ɓɛɛ. Nɔɔ yáa Laa wu risi nɔɔ nɔ́ɔ nwang wusang ɓiɓɛ.

²¹ Yeesɔ Kirisi palɛ vuu shi kpang ɓi gngn kpang, a ka ruu ɓuru, Laa risi wu naa zang ɓɔɔ pálɛ̀ vuu shi kpang ɓɛɛ. A ka ruu vuu keɓe kɔ, yuu ɓɔɔ ruu ɓakɛ nɛɛ Yeesɔ Kirisi shingnɛ, ruu nwàng zang tɔ̃ɔ ka tĩng Laa.