2 Koranti 3 - Nyaa Shɔɔ Ɓɔɔ Laa a Ɓɛɛ

Zang shonang Nyaa Shɔɔ ɓɔɔ Laa a ɓɛɛ

¹ Nwàng kaa naa ɓɔɔ ruu dɔɔ yuu ɓuru tɔkn ɓɛɛ ya? Ruu ɓuru naa zang ɓɔɔ kpang. Ruu kasɛ labeenang ɓɔɔ kɔɔ zang ruu ka yuu ɓuru nɛɛ ruu zang ɓɔɔ ri dũng Laa niizang ɓɛɛ kpang. Ruu kasɛ zang ɓɔɔ wu bee nɔɔ labeenang keɓe kpang, ruu ti kasɛ nɛɛ naa manɛ kpang.

² Nɔɔ nɛɛ yuu manɛ, nɔkɔ labeenang ɓɔɔ kɔɔ zang ruu ka yuu ɓuru ɓɛɛ. Labeenang keɓe, zang bèe ka yeti manɛ tɔɔ, zang piti ri zi kati, ri ti gãrɛ.

³ Nɔɔ tusu tɔ nɛɛ, nɔkɔ labeenang keɓe ɓɔɔ Yeesɔ Kirisi nɛɛ yuu ɓiɓɛ beeyi ɓɛɛ, a shong nyaa kaa nɛɛ mani nɛɛ bii ɓuru. Bee labeenang keɓe nɛɛ mii vuu ɓɔɔ zang bee laa nɛɛ mani ɓɛɛ kpang. Bee ɓi nɛɛ Suru Laa ɓɔɔ ningkãari ɓɛɛ. Bee wu ka rɛɛ tari pɛkɛtɛ ɓɔɔ zang bee vuu kagn ɓɛɛ kpang. Beere ɓi ka yeti shɔnzang.

⁴ Ruu kɔɔrɔ vuu keɓe, ka ruu ɓɔɔ, Yeesɔ Kirisi shingnɛ, ruu yaa gn naa ka bii Laa kpang ɓɛɛ.

⁵ Vuu ɓɔɔ kagn ka bii ɓuru, ɓɔɔ shingnɛ ruu kɔɔyi nɛɛ, ruu zunung shonang keɓe palɛnang katɔ kpang. Kaka ɓuru a ɓi nɛɛ bii Laa.

⁶ Wukɔ a ruu kaka, ruu palɛ wu shonang naa ɓɔɔ nyaa dannang shɔɔ kɔɔ ɓɛɛ. Wu nyaa dannang shɔɔ ɓɔɔ zang bee katɔ ɓɛɛ kpang, ɓi ɓɔɔ Suru Laa. Nyaa dannang ɓɔɔ zang bee katɔ, nyɔ zang ɓi vɔrɔ, a Suru Laa a zang ɓi suru bii.

⁷ Zang bee nyaa dannang kaɓa ɓi ka tari, a bannang Laa tusu bii katɔ ka diki ɓɔɔ wu a zang nyaa dannang kaɓa ɓɛɛ. Waa nyaating Musa yakɛ ka ruu bannang keɓe. Naa dòo wee yakɛnang waa nyaating Musa shaarɛ katɔ ɓee, yakɛnang bìí kɔlɔ dɔɔli, daa ɓɔɔ zang Isirela ri shing jĩng ka waa nyaating Musa kpang.

⁸ Bannang Laa nɛɛ tusu bii, ka ɓɔɔ Laa a zang nyaa dannang ɓɔɔ nyɔ zang vɔrɔ katɔ ɓɛɛ naa weɓe. A bannang ɓɔɔ tusu bii ka ɓɔɔ zang nwangsɛ nyaa dannang shɔɔ keɓe, ɓa ɓɔɔ tĩng shɔɔnang kaɓa bannang katɔ kpang ya?

⁹ Naa nyaa dannang ɓɔɔ nyɔkɔ zang vɔrɔ a nɛɛ bannang ning. A bannang nyaa dannang shɔɔ ɓɔɔ ta yuu zang naa nwáng ɓi kaa biya?

¹⁰ Niizang, vuu ɓɔɔ ɓeleng bannang ɓiɓɛ kagn, nwang tɔ naa vuu ɓɔɔ kpang, ka ruu ɓɔɔ bannang ɓɔɔ kãntang ɓa wu tɔ ɓɛɛ.

¹¹ Ka ruu ɓɔɔ, naa vuu ɓɔɔ tɛɛ katɔ nɛɛ a nɛɛ bannang ning, bannang vuu ɓɔɔ nwang ɓi dòndòng keɓe ɓa ɓɔɔ vuu ɓɔɔ tɛɛ katɔ kaɓa katɔ.

¹² Ka ruu ɓɔɔ, ruu shing gn naa weɓe, ruu rang yee, nyaa zàa ruu kpang.

¹³ Ruu ɓuru naa Musa ɓɔɔ zùu vuu ka yuu, ka ruu ɓɔɔ, zang Isirela ri nɛɛ zi yakɛnang bannang Laa, ɓɔɔ shaarɛ kana ka waa nyaating ɓiɓɛ ɓɛɛ kpang.

¹⁴ Niizang, yeti ɓarɛ kpãa nyaa vuu zinang katɔ. Vuu ɓɔɔ yirɛ, a nɛɛ mani lɛɛkɔ, zang zùu yeti ɓarɛ doo nɛɛ sɛ̃ɛ fɔ̃ɔrɔ ɓɔɔ Musa zúu yuu ɓiɓɛ nɛɛ mani ɓɛɛ. Ri nɛɛ gã labeenang ɓɔɔ nyaa dannang ɓɔɔ gbaala kagn, ri zi vuu ɓɔɔ kagn ɓɛɛ kpang. Zang nɛɛ raa zang ɓɔɔ dũng kaa Laa tɔ, tɔ̀ɔ, Kirisi wu puu zang sɛ̃ɛ fɔ̃ɔrɔ ɓɔɔ zuu zang jĩng kaɓa kati.

¹⁵ Naa dòo lɛ̀ɛ́kɔ keɓe, zang nɛɛ gã ri nyaa dannang Musa, sɛ̃ɛ fɔ̃ɔrɔ keɓe zùu yeti ɓarɛ doo katɔ.

¹⁶ Zang nɛɛ raa jĩng ka bìí Kpanti Laa, Kirisi wu puu zang sɛ̃ɛ fɔ̃ɔrɔ keɓe kati.

¹⁷ Kpanti Laa keɓe, ɓi wukɔ Suru. Zang ɓɔɔ Suru Kpanti Laa nɛɛ kagn bii ɓiɓɛ, zang keɓe wɔ ɓi tɔ.

¹⁸ Ɓɔɔ ruu dũng Laa nɔngkɔ, sɛ̃ɛ fɔ̃ɔrɔ keɓe zùu jĩng ɓuru kpang, ruu zi bannang Kpanti Laa katɔ. Bannang keɓe, ɓɔɔ a nɛɛ bii Kpanti Laa ɓɔɔ ɓi suru ɓɛɛ, rìsí ruu kana, tɔ̀ɔ, ruu nwang naa wukɔ. Ti gìsí ruu bannang ɓɔɔ naa ɓɔɔ ɓiɓɛ gbãng gbãng ɓɛɛ kana, ka yuu zɔɔ, yuu zɔɔ.