2 Bituru 3 - Nyaa Shɔɔ Ɓɔɔ Laa a Ɓɛɛ

Yeesɔ kɔɔ ruu nɛɛ wu gbãayu ditɔ tɔkn

¹ Masang, ɓɔɔ n kasɛ ruu manɛ dɔɔli ɓɛɛ, n bèé nɔɔ labeenang daa kaa nɛɛ weɓe doo ziti. Ka yeti labeenang ziti keɓe, n kpàa nɔɔ danggn rɛɛ vuu ɓɔɔ bɛ̀ɛ́ nɔɔ zi tɔ ɓɛɛ, tɔ̀ɔ, wu shing nɔɔ, nɔɔ rɛ̃rɛ kaa tɔ̃ɔ ka yuu rɛɛ vuu keɓe.

² N kasɛ nɛɛ danggn ruu ɓɔɔ zang nyaa shonang Laa ri kɔɔ ka tĩng doo tɛ̃ɛ tɛ̃ɛ wu ning nɔɔ kpang. Danggn nyaa dannang ɓɔɔ dabang ɓuru Yeesɔ Kirisi, ɓɔɔ wukɔ ta yuu ɓuru kɔɔ zang shonang, ɓɔɔ wu shongko ri ka bii manɛ, nɛɛ ri kɔɔ nɔɔ ɓɛɛ, wu ti ning nɔɔ kpang.

³ Vuu ɓɔɔ n kasɛ nɛɛ nɔɔ zi shɔɔnang keɓe. N kasɛ nɛɛ nɔɔ zirɛ nɛɛ ka diki ɓɔɔ koo keɓe waa nyaa kaa tɔ, zang ɓɔɔgn ri nwangkɛ nyaa, ri palɛ vuu ɓɔɔ yeti ɓarɛ kasɛ ɓɛɛ. Zang keɓe, ri naa kpaa nɔɔ katɔ.

⁴ Ri naa kɔɔrɔ nɛɛ, “Yeesɔ Kirisi kɔɔ zang nɛɛ wu gbãayu katɔ niizang, a wu kaa kiya? Dabang ɓuru ɓɔɔ ri ta Ruu Laa, ri vɔlɔ tɔ, vuu piti ɓi doo naa ɓeleng. Ɓu dòo ɓɔɔ koo gaayu katɔ dòo tɛ̃ɛ tɛ̃ɛ ɓɛɛ, vuu ɓɔɔ kɔ̃sɔ bii gn kpang.”

⁵ Zang ɓɔɔ ri kɔɔrɔ naa weɓe kaɓa, ri kasɛ kpang, nɛɛ ka tĩng tɛ̃ɛ tɛ̃ɛ nɛɛ Laa rang yee waati, a lapa nɛɛ tipi nwangsɛ bii kpang. Nwangsɛ tipi nɛɛ yeti mii, ka ruu nɔngkɔ, palɛ tipi ɓi kaa nɛɛ mii.

⁶ Laa ningsi koo ɓɔɔ tĩng shɔɔnang doo nɛɛ mii kɔ, ka laa ɓɔɔ mii bang kpayi shaa koo nandon ɓɛɛ.

⁷ A yee ɓɔɔ Laa rangnɛ kɔ shingnɛ, lapa nɛɛ tipi ɓɔɔ kãntang keɓe, wu nwangnɛ, wu gã diki ɓɔɔ waa naa lasɛ vuu ɓɔɔ ka yeti ɓiɓɛ nandon ɓɛɛ. Yaa vuu piti ka nɔngkɔ, nɛɛ diki ɓɔɔ wu naa dɔng zang piti ruu, wu ti ningsi zang ɓɔɔ ri palɛ vuu shi kpang, a ri dũng wu kpang ɓɛɛ.

⁸ Masang ɓɔɔ n kasɛ ruu manɛ dɔɔli ɓɛɛ, danggn wu ning nɔɔ vuu tɔ̃ɔ gbete keɓe kpang. Ka jĩng Laa, diki gbete ɓi naa saa labang gbete. A saa labang gbete, ɓi naa diki gbete. Ka jĩng ɓiɓɛ ri ɓarɛ gbete.

⁹ Zang ɓɔɔ ri kɔɔyi nɛɛ Laa sùu zang kãng dɔɔli, pálɛ̀ vuu ɓɔɔ wu kɔɔyi nɛɛ wu palɛ ɓɛɛ kpang. Ɓi nɔngkɔ kpang, Laa mã ɓi danggn kɔ jong nɛɛ nɔɔ. Laa yaa zang ɓi gbalang nɛɛ, wu yaa vuu shi kpang ɓɔɔ wu palɛ ɓɛɛ. Kasɛ kpang nɛɛ zang ɓɔɔ wu shaarɛ kpang, kasɛ nɛɛ zang piti ri kɔ̃sɔ yeti, ri yaa vuu shi kpang ɓɔɔ ri palɛ ɓɛɛ.

¹⁰ Naa dòo nɔngkɔ piti, diki nɛɛ a tɔ, Kpanti Yeesɔ Kirisi naa gbãayu naa shɔngɓɔ ka diki kaɓa, zang ri naa tãa nyaa ɓɔɔ zang mɛɛ ɓɛɛ, a lapa wu ning kati. Waa wu shaa vuu ɓɔɔ ka lapa nɛɛ koo kati nandon. Tipi nɛɛ vuu ɓɔɔ ka yuu ɓiɓɛ piti naa ning katɔ nandon.

¹¹ Wee nɔɔ zi tɔ nɛɛ, vuu piti naa yaalɛ nɔngkɔ ɓee, nɔɔ nwang nwannang manɛ waasɛ̃. Nɔɔ a Laa yuu manɛ dɔ̃ɔ gbete, nɔɔ dũng wu ka vuu piti ɓɔɔ wu kɔɔ nɔɔ ɓɛɛ.

¹² Nɔɔ shing jĩng manɛ ka diki Laa, nɔ́ɔ ti palɛ vuu ɓɔɔ naa shingnɛ diki kaɓa naa a pati ɓɛɛ. Diki kaɓa, ɓɔɔ waa shaa lapa kagn, tɔ̀ɔ, wu ning kati ɓɛɛ. A waa wu ti yaalɛ vuu ɓɔɔ ka lapa nandon ɓɛɛ.

¹³ Laa kɔɔ ruu ɓuru tɔ, nɛɛ wu naa mãa lapa shɔɔ nɛɛ koo shɔɔ. Nɔng ɓɔɔ vuu piti naa nwang ɓi tɔ̃ɔ diki diki ɓɛɛ. Wee ɓi vuu ɓɔɔ ruu gã ɓɛɛ kɔ.

¹⁴ Ka ruu nɔngkɔ, masang ɓɔɔ n kasɛ ruu manɛ dɔɔli ɓɛɛ, n kɔɔ nɔɔ ka wee nɔɔ gã diki ɓɔɔ Yeesɔ a tɔkn ɓee, nɔɔ shing yuu manɛ, nɔ́ɔ nwang nwannang tɔ̃ɔ, tɔ̀ɔ Laa wu kɔɔ kpang nɛɛ, nɔɔ palɛ vuu shi kpang, kpang. Nɔɔ nwang kaa nyaa zɔɔ nɛɛ wu.

¹⁵ Nɔɔ zirɛ, Kpanti ɓuru Yeesɔ Kirisi suukãng, ka ruu ɓɔɔ, nɔ́ɔ walɛ gbalang Laa wu ta yuu manɛ kati ɓɛɛ. Manzung ɓuru Bulu ɓɔɔ ruu kasɛ ruu ɓiɓɛ katɔ ɓɛɛ, bee nɔɔ labeenang dòo nɔngkɔ, nɛɛ zũnang ɓɔɔ Laa a wu ɓɛɛ, a kɔɔ nɔɔ doo naa weɓe kɔ.

¹⁶ Ka yeti rɛɛ labeenang ɓɔɔ wu beere nandon, kɔɔrɔ zɔ̃ng vuu keɓe kɔ. Ka rɛɛ labeenang ɓiɓɛ kaɓa, ruu ɓɔɔ kagn ɓɔɔ kpãa nyaa dɔɔli ɓɛɛ. Zang ɓɔɔ ri zũng kpang, ɓɔɔ ri yiti vuu ɓɔɔ ri shing danggn kagn gbãng gbãng kpang ɓɛɛ. Ri risi ruu keɓe naa ɓɔɔgn naa ɓɔɔ ri risi ruu nimbang ɓɔɔ ka yeti labeenang Laa ɓɛɛ. Wee ri palɛ nɔngkɔ ɓee, ri shíng ɓarɛ nɛɛ Laa wu naa ningsi ri katɔ.

¹⁷ Masang ɓɔɔ n kasɛ ruu manɛ dɔɔli ɓɛɛ, ɓɔɔ manɛ nɔɔ zi vuu keɓe manɛ tɔ, ka ruu nɔngkɔ, n kɔɔ nɔɔ, nɔɔ gãng jĩng waasɛ̃. Zang ɓɔɔ ri dũng nyaa Laa kpang, ri nɛ̀ɛ́ shing nɔɔ, nɔ́ɔ palɛ vuu shi kpang ɓɔɔ ri palɛ ɓee. Rí nɛɛ ti wàlɛ́ gbalang ri shing nɔɔ, nɔ́ɔ yaa nɔng tɔ̃ɔ kɔ nɔɔ shii kagn ɓɛɛ.

¹⁸ Nɔɔ dũng manɛ Kpanti ɓuru Yeesɔ Kirisi kɔ jong, ɓɔɔ wukɔ ta yuu ɓuru ɓɛɛ. Tɔ̀ɔ, wu palɛ nɔɔ tɔ̃ɔ kaa yuu zɔɔ, yuu zɔɔ. Zinang ɓɔɔ nɔɔ zi wu, wu ti daa ka tĩng. Zang ri a wukɔ bannang dòndòng. Nɔngkɔ.