1 Timoti 4 - Nyaa Shɔɔ Ɓɔɔ Laa a Ɓɛɛ

Zang ɓɔɔ ri tusu vuu see ɓɛɛ

¹ Suru kɔɔ tɔ faarik nɛɛ, diki a ditɔ, zang ɓɔɔ ri naa yaa danggn ɓɔɔ ri shing ka bii Laa ɓɛɛ. Ri naa ɓaa shoo ka nyaa rɛɛ suru shi kpang ɓɔɔ nwãarɛ zang ɓɛɛ. Ri naa dũng vuu ɓɔɔ suru shi kpang ri tusu ɓɛɛ.

² Ɓi zang sèé ɓɔɔ ri nwãarɛ zang, nɛɛ vuu palɛnang kɔ ri tusu zang zɔ̃ng vuu keɓe. Zang keɓe ri rɛ̃̀rɛ́ ɓarɛ ka vuu ɓɔɔ Sheetang kasɛ ɓɛɛ.

³ Zang ɓɔɔ ri kpɛ̃ɛrɛ zang nɛɛ, soro geenang shi kpang. Nɛɛ vuu shaanang ɓɔɔ kagn, ri ti shaa kpang. Vuu shaanang ɓɔɔ Laa mãarɛ, nɛɛ tɔɔ zang ɓɔɔ ri dũng wu, ɓɔɔ ri ti zi ruu ɓɔɔ niizang tɔ, ri tarɛ ri ti zãa wu kati ɓɛɛ.

⁴ Vuu ɓɔɔ Laa mãa piti ɓi tɔ̃ɔ, nɔ́ɔ bɛ̃ɛ vuu ɓɔɔ kpang. Nɔɔ ta vuu piti, nɔɔ zãa wu.

⁵ Ka ruu ɓɔɔ, vuu shaanang piti, ɓi Ruu Laa shingnɛ wu nwang tɔ̃ɔ, a ɓɔɔ kaa Laa ɓɔɔ ruu gàa ka nɔng shaanang ɓɛɛ.

Zang shonang tɔ̃ɔ ɓɔ̀ɔ́ Yeesɔ Kirisi

⁶ Naa mɔɔ kɔɔ rɛɛ ɓaazung, ɓɔɔ ri dũng doo Laa kɔ ruu keɓe diki diki, mɔɔ nwang zang shonang tɔ̃ɔ ɓɔ̀ɔ́ Yeesɔ Kirisi. Mɔɔ ti alɛ ɓaa suru bii ɓaaɓɛ ruu niizang ɓɔɔ zang kɔ̀ɔ́ ka yuu danggn shinnang, nɛɛ vuu ɓɔɔ zang tùsù mɔɔ, a mɔɔ yiti gbãng gbãng ɓɛɛ.

⁷ Yaa gbalang ruu gbãagbãa ɓɔɔ daa naa kɔɔrɔnang kpang kaɓa katɔ. Mɔɔ kãa ɓaa gbalang ɓɔɔ mɔɔ nwang zang ɓɔɔ dũng Laa niizang.

⁸ Pĩirinang ɓi tɔ̃ɔ, ka ruu ɓɔɔ, shing bii ɓaaɓɛ lakɛ katɔ ɓɛɛ. Naa mɔɔ kpɛ̃ɛrɛ yuu ɓaaɓɛ vuu Suru Laa, nwang mɔɔ tɔ̃ɔ, ka gbalang naa bm bm. Nwǎng mɔɔ tɔ̃ɔ ka nwannang ɓuru kãntang keɓe, ti naa nwàng mɔɔ tɔ̃ɔ ka ɓɔɔ koo naa waa nyaa ɓɛɛ.

⁹ Ruu keɓe niizang kɔ nwani, ti daa naa ɓɔɔ zang piti tarɛ ri shing danggn gn tɔ.

¹⁰ Ka ruu nɔngkɔ, rùu palɛ shonang, a ruu ti takɛ bii, ka ruu ɓɔɔ, ruu shing danggn ka bii Laa ɓɔɔ ningkãari, ɓɔɔ wukɔ ta yuu zang piti ɓɛɛ. Tá yuu zang ɓɔɔ ri shing danggn tɔ kɔ gbãng gbãng.

¹¹ Kɔɔ ri ruu keɓe, mɔɔ ti tusu ri vuu keɓe diki diki.

¹² Mɔ́ɔ yaa zang ɓɔɔ wu risi mɔɔ naa vĩi, ka ruu ɓɔɔ, mɔɔ doo jasang ɓɛɛ kpang. Nwang ɓaa zang ɓɔɔ, zang ɓɔɔ ri dũng Laa ri kpɛ̃ɛrɛ́ vuu ka bii ɓaaɓɛ ɓɛɛ. Ri kpɛ̃ɛrɛ vuu ka yee ɓɔɔ mɔɔ rang ɓɛɛ, nɛɛ vuu ɓɔɔ mɔɔ palɛ, nɛɛ naa ɓɔɔ mɔɔ kasɛ zang ɓɛɛ, ka danggn ɓɔɔ mɔɔ shing ɓɛɛ, a ɓɔɔ kaa nwannang tɔ̃ɔ ɓaaɓɛ.

¹³ A yuu ɓaaɓɛ ka nɔng ɓɔɔ mɔɔ kpalɛ zang yuu, mɔɔ gã ri labeenang Laa ɓɛɛ, mɔɔ kɔ̀ɔrɔ̀ zang Ruu Laa, mɔɔ ti tusu zang ɓɔɔ ri dũng Laa vuu. N a nɛɛ mani.

¹⁴ Palɛ shonang nɛɛ vuu ɓɔɔ Suru Laa a mɔɔ ɓɛɛ, mɔɔ yaa kpang. Ɓɔɔ wu a mɔɔ ka ɓɔɔ zang nyaa shonang ri rang yee, a zang bang Gãa Laa ri shìng mɔɔ naa ka yuu ɓɛɛ.

¹⁵ Palɛ vuu keɓe, mɔɔ shing yuu ɓaaɓɛ kagn gbãng gbãng, tɔɔ zang piti ri zi naa ɓɔɔ mɔɔ daa nɛɛ tĩng kati.

¹⁶ Gãng jĩng ka yuu ɓaaɓɛ, mɔɔ ti gãng jĩng, ka vuu ɓɔɔ, mɔɔ tusu ɓɛɛ. Palɛ rɛɛ vuu keɓe diki diki. Ka ruu ɓɔɔ, mɔɔ nɛɛ palɛ tɔ, mɔɔ ta yuu ɓaaɓɛ nɛɛ ɓɔɔ zang ɓɔɔ ri tãa vuu ɓɔɔ mɔɔ kɔɔ ɓɛɛ katɔ ɓɛɛ.