1 Timoti 3 - Nyaa Shɔɔ Ɓɔɔ Laa a Ɓɛɛ

Nwannang zang bang zang ɓɔɔ ri dũng Laa ɓɛɛ

¹ Ruu keɓe niizang kɔ nwani, zang ɓɔɔ nɛɛ kasɛ nɛɛ wu nwang zang bang zang ɓɔɔ ri dũng Laa, kasɛ ɓi shonang ɓɔɔ tɔ̃ɔ kɔ.

² Zang bang zang ɓɔɔ ri dũng Laa, wu nwang ɓi zang ɓɔɔ shi kpang kagn bii ɓiɓɛ kpang ɓɛɛ, wu gee soro gbete kɔ nwani. Wu zang ɓɔɔ yeti ɓiɓɛ lasɛ pati kpang, zang ɓɔɔ yiti yuu ɓiɓɛ waasɛ̃ ɓɛɛ. Zang ɓɔɔ zang seng wu katɔ ɓɛɛ. Zang ɓɔɔ ta zang zanti ka gãa ɓiɓɛ waasɛ̃ ɓɛɛ, ti zunung naa ɓɔɔ wu tusu zang vuu katɔ.

³ Wu zang ɓɔɔ ɓoo sàa kpang, wu zang ɓɔɔ gnvɔ ka yeti ɓiɓɛ dɔɔli kpang, gàa nyaa kpang, ti haa nyaa kpang. Wu ti zang ɓɔɔ kasɛ ruu saka dɔɔli kpang.

⁴ Wu yiti zang ɓɔɔ ri ka gãa ɓiɓɛ waasɛ̃, wu shing wujɛ ɓiɓɛ, ri ɓaa shoo ka nyaa ɓiɓɛ, ri ti seng wu katɔ.

⁵ Ka ruu ɓɔɔ, naa zang ɓɔɔ zunung ɓɔɔ wu yiti zang ka gãa ɓiɓɛ kpang, palɛ biya, wu yiti zang ɓɔɔ ri dũng Laa viya?

⁶ Wu ti zang ɓɔɔ shing danggn ka bii Laa diki bee gn kpang, kpang. Ka ruu ɓɔɔ, nɛ̀ɛ́ tuu yuu ɓiɓɛ dɔɔli, zang nɛ̀ɛ́ dɔng wu ruu naa ɓɔɔ zang dɔng Sheetang ɓɛɛ.

⁷ Wu ti nwang zang ɓɔɔ, zang ɓɔɔ ri dũ̀ng Laa kpang, ri seng wu katɔ ɓɛɛ. Ka ruu ɓɔɔ nɛ̀ɛ́ nwáng vuu dãanang ka nɔng zang, nɛ̀ɛ́ ti watɛ ka yeti jàng ɓɔɔ shɛ̃ɛtang làng ɓɛɛ.

Nwannang zang ɓɔɔ ri yi zang naa ka shonang, ka Gãa Laa ɓɛɛ

⁸ Zang ɓɔɔ ri yi zang naa ka shonang ka Gãa Laa, ri nwang nwannang ɓɔɔ tɔ̃ɔ ɓɛɛ. Ri ti nwang zang ɓɔɔ ta nyaa ziti kpang. Ri ti ɓoo saa kpang, ri ti zang ɓɔɔ ri shing jĩng ka saka kãanang kpang.

⁹ Ri ti yiti ruu niizang keɓe ɓɔɔ Laa nwangsɛ ka yuu danggn ɓɔɔ zang ɓɔɔ dũng wu ri shingnɛ, ri yaa gn naa kpang.

¹⁰ Zang gã̀sɛ̀ ri ka gbongkarɛ. Ri nɛɛ shaa vuu ɓɔɔ zang gãsɛ ri kagn keɓe tɔ, tɔ̀ɔ, zang a ri naa shonang palɛnang kati.

¹¹ Zang soro ɓarɛ ri nwang nwannang ɓɔɔ tɔ̃ɔ ɓɛɛ. Ri ràng zang kpang. Ri nwàng wu zang ɓɔɔ yeti ɓarɛ lasɛ pati kpang. Ri nwang zang ɓɔɔ zang shing gn katɔ ka bii ɓarɛ ɓɛɛ.

¹² Zang ɓɔɔ ri yi zang naa ka shonang ka Gãa Laa, zang ɓu wu gee soro gbete. Ri yiti wujɛ ɓarɛ nɛɛ zang ɓɔɔ ka gãa ɓarɛ ɓɛɛ waasɛ̃.

¹³ Zang ɓɔɔ ri yi zang naa ka shonang ka Gãa Laa, ɓɔɔ ri palɛ shonang ɓarɛ waasɛ̃, zang a ri bannang katɔ. Ri zunung ɓɔɔ ri rang ruu ka yuu danggn ɓɔɔ ri shing ka bii Yeesɔ Kirisi katɔ, nyaa zàa ri kpang.

Ruu bang, ka yuu danggn shinnang ɓuru

¹⁴ Ka wee n bee mɔɔ labeenang keɓe ɓee, n shing gn daanang ka bii ɓaaɓɛ kãntang.

¹⁵ Vuu ɓɔɔ nɛɛ suu m kã̀ng anang, labeenang keɓe, wu kɔ̀ɔ mɔɔ naa ɓɔɔ zang ri nwang ka yeti Gãa Laa ɓɛɛ. Gãa Laa keɓe, ɓi wukɔ zang ɓɔɔ ri dũng Laa ɓɛɛ. Laa ɓɔɔ nwang ɓi ningkãari dòndòng ɓɛɛ. Zang keɓe, kaa rikɔ doo gãa nɛɛ vuu ɓɔɔ yiti ruu ɓɔɔ niizang ɓɛɛ.

¹⁶ Ruu niizang ɓɔɔ Laa nwangsɛ ka yuu gbalang ɓiɓɛ kɔ ruu dũng ɓee, bang dɔɔli. Wu vuu ɓɔɔ zang laa nyaa ɓiɓɛ kpang. Yeesɔ tuu bii shɔnzang a nɔng ka koo. Suru Laa tusu nɛɛ wu ɓi zang ɓɔɔ shi kpang ka bii ɓiɓɛ kpang ɓɛɛ. Zang nyaa shonang Laa ɓɔɔ ri ka lapa, ri zi wu nɛɛ jĩng ɓarɛ. Zang ri kɔɔ ruu ɓiɓɛ ka koo piti. A zang dɔɔli ka koo ri shing danggn tɔ ka bii ɓiɓɛ. Zang tuu wu tɔ, zang daa nɛɛ wu ka lapa, ka tĩng Laa.