1 Tesalonika 4 - Nyaa Shɔɔ Ɓɔɔ Laa a Ɓɛɛ

¹ Ka ruu nɔngkɔ, rɛɛ manzung, n gisi nɔɔ ruu nɛɛ, nɔɔ kpɛ̃ɛrɛ naa ɓɔɔ nɔɔ nwang nɛɛ Laa wu tãa tĩnang manɛ tɔ ka bii ɓuru, a nɔɔ ti nwang kana nɔngkɔ kãntang. A ruu gaa nɔɔ nɛɛ nung Kpanti Yeesɔ Kirisi nɛɛ nɔɔ nɛɛ nwang nɔngkɔ sasak.

² Nɔɔ zi nyaa ɓɔɔ ruu kɔ̀ɔ nɔɔ nɛɛ naa ɓɔɔ Kpanti Yeesɔ a ruu ɓɛɛ tɔ, naa ɓɔɔ nɔɔ nwang ɓɛɛ.

³ Laa kasɛ nɛɛ nɔɔ nwang zang ɓɔɔ shi kpang ka bii ɓarɛ kpang. Nɛɛ nɔɔ ti yaa dũndũng palɛnang dɔ̃ɔ gbete.

⁴ Zang varɛ ɓu wu yiti yuu ɓiɓɛ waasɛ̃, ka gbalang tɔ̃ɔ naa ɓɔɔ Laa nɛɛ shɔnzang piti ri kasɛ katɔ ɓɛɛ.

⁵ Wu ka gbalang dũndũng palɛnang kpang, naa zang ɓɔɔ ri zi Laa kpang ɓɛɛ.

⁶ Wu roo nɛɛ soro ɓeezung kpang tingkiring. Naa rooyi, pàlɛ́ ɓeezung vuu shi kpang, ti shaa wu katɔ. Ruu kɔ̀ɔ ruu keɓe tɔ ka tĩng, a ruu shaarɛ nɔɔ nyaa gbãng gbãng nɛɛ Kpanti Laa naa dang zang ɓɔɔ ri palɛ vuu keɓe jĩng katɔ.

⁷ Laa ɓaa ruu nyaa nɛɛ ruu naa nwang ka yeti dũndũng palɛnang kpang, nɛɛ ruu nwang ɓuru naa ɓɔɔ wu kasɛ ɓɛɛ.

⁸ Ka ruu nɔngkɔ, naa zang ɓɔɔ bɛ̃ɛ vuu kɔ ruu tusu ɓee, bɛ̃ɛ ɓi shɔnzang kpang, bɛ̃ɛ ɓi Laa ɓɔɔ a ruu Suru ɓiɓɛ ɓɛɛ.

⁹ Ka ruu naa ɓɔɔ nɔɔ kasɛ rɛɛ ɓaazung ɓɔɔ ri dũng doo Laa kɔ ɓɛɛ, daa naa ɓɔɔ ruu bee labeenang ka yuu ruu keɓe kpang. Ka ruu ɓɔɔ, nɔɔ nɛɛ yuu manɛ, Laa tusu nɔɔ naa ɓɔɔ nɔɔ kasɛ zɔɔ tɔ ɓɛɛ.

¹⁰ A nɔɔ ti tusu naa ɓɔɔ nɔɔ kasɛ rɛɛ ɓaazung ɓɔɔ ri dũng doo Laa kɔ ka Makidoniya ɓɛɛ tɔ. Ka ruu nɔngkɔ, rɛɛ manzung ɓuru, ruu gaa nɔɔ nɛɛ nɔɔ palɛ nɔngkɔ sasak.

¹¹ Nɔɔ mang ka yeti manɛ nɛɛ nɔɔ nwang manɛ kikiri, nɔɔ haarɛ nyaa kpang, nɔɔ haa nyaa ka ruu zang ɓɔɔ kpang, nɔɔ pálɛ̀ shonang nɛɛ naa manɛ naa ɓɔɔ ruu kɔɔ nɔɔ ka tĩng ɓɛɛ.

¹² Ka naa weɓe kɔ, nɔɔ shing zang ɓɔɔ ri shing danggn gn kpang, ri seng nɔɔ. Nɔ̀ɔ ti shing jĩng tɔ̀ɔ́ ka bii zang ɓɔɔ, ka ruu vuu ɓɔɔ nɔɔ kasɛ ɓɛɛ kpang.

Yuu gbãanang Kpanti ɓuru

¹³ Rɛɛ manzung ɓuru, ruu kasɛ nɛɛ nɔɔ zi vuu ɓɔɔ niizang ka yuu zang ɓɔɔ ri vɔlɔ tɔ ɓɛɛ. Tɔ̀ɔ, nɔɔ lasɛ yeti kaa tɔ̀ɔ́ sasak naa zang ɓɔɔ ri shing gn ka bii Laa kpang ɓɛɛ, ri lasɛ yeti ɓɛɛ kpang.

¹⁴ Ruu shing danggn tɔ nɛɛ, Yeesɔ vɔrɛ, a yuu paa tɔkn, a ruu ti shing danggn tɔ nɛɛ, Laa naa sɔɔrɔ zang ɓɔɔ ri shing danggn ka bii ɓiɓɛ, ɓɔɔ ri vɔlɔ tɔ ditɔ jong nɛɛ Yeesɔ Kirisi.

¹⁵ Vuu kɔ ruu tusu nɔɔ ɓee, ɓi vuu ɓɔɔ Laa tusu ɓɛɛ nɛɛ, ka diki ɓɔɔ Kpanti Yeesɔ naa gbãayu, ɓɔɔ ruu doo ningkãari ka diki kaɓa, rukɔ daa ka bii ɓiɓɛ shɔɔnang, ruu yaa zang ɓɔɔ ri vɔlɔ tɔ ɓɛɛ kpang.

¹⁶ Laa naa mɛɛ nyaa nabm, a zang bang rɛɛ zang nyaa shonang Laa ɓɔɔ ri ka lapa ɓɛɛ, naa rang yee, a zang ri tãa yee vuukãng ɓɔɔ Laa jee ɓɛɛ. Tɔ̀ɔ, Kpanti Yeesɔ nɛɛ yuu ɓiɓɛ wu naa shooro kaa nɛɛ lapa zang ɓɔɔ ri shing danggn tɔ ka bii Yeesɔ a ri vɔlɔ ɓɛɛ, rikɔ yupaa ningkãari shɔɔnang.

¹⁷ Tɔ̀ɔ, ɓɔɔ ruu doo ningkãari ka diki kaɓa, Laa naa sèé ruu, daa kaa nɛɛ ruu ka yeti sãmbong, wu daa lapa nɛɛ ruu. Ruu daa kpisi kpanti Yeesɔ yuu ka lapa. Ruu nwáng kaa nɛɛ Kpanti sasak.

¹⁸ Ka ruu nɔngkɔ, nɔɔ mã zɔɔ danggn nɛɛ ruu keɓe.