1 Tesalonika 2 - Nyaa Shɔɔ Ɓɔɔ Laa a Ɓɛɛ

Shonang Bulu ka Tesalonika

¹ Rɛɛ manzung, nɔɔ nɛɛ yuu manɛ nɔɔ zi tɔ nɛɛ, lennang ɓɔɔ ruu leng nɔɔ, nwàng nɔɔ vuu tɔ̃ɔ katɔ.

² Nɔɔ zi naa ɓɔɔ zang dang ruu jĩng, a zang dãlɛ ruu ka Filipi tɔ, a ruu naa a ka bii manɛ ka Tesalonika. Zang dɔɔli nɛɛ ri zãa ruu Ruu Tɔ̃ɔ kɔɔnang ka gari manɛ, a Laa mã ruu danggn doo nɛɛ mani, a ruu kɔɔ nɔɔ Ruu Tɔ̃ɔ ɓɔɔ a nɛɛ bii ɓiɓɛ ɓɛɛ.

³ Ka ɓɔɔ ruu kãa gbalang nɛɛ nɔɔ ta Ruu Tɔ̃ɔ Laa, ruu sùu nɔɔ sèé kpang. Ruu mang vuu shi kpang kagn yeti ɓuru ka yuu manɛ kpang. Ruu ti tɔɔ kpang nɛɛ ruu nwãarɛ zang ɓɔɔ kpang.

⁴ Ruu kɔɔrɔ ruu ɓuru naa ɓɔɔ Laa kasɛ nɛɛ ruu kɔɔ ɓɛɛ kɔ jong. Ka ruu ɓɔɔ, Laa zirɛ ruu daa naa ɓɔɔ wu a ruu Ruu Tɔ̃ɔ ɓiɓɛ tɔ ruu daa kɔɔ zang ɓɛɛ. Ruu tɔɔ kpang nɛɛ ruu rang yee tɔ̀ɔ zang ri tãa tĩnang kpang, ruu kasɛ ɓuru nɛɛ Laa ɓɔɔ wukɔ zi vuu ɓɔɔ ka yeti ɓuru tɔ wu tãa tĩnang.

⁵ Nɔɔ zi tɔ̃ɔ tɔ̃ɔ nɛɛ ɓɔɔ ruu a ka bii manɛ, ruu a wu nɛɛ nyaa tãa kpang. Ruu rang nɔɔ yee wu naa ɓɔɔ shingnɛ ruu walɛ vuu ɓɔɔ ruu kasɛ ɓɛɛ kpang, Laa zi yeti ɓuru tɔ.

⁶ Ruu tɔɔ kpang nɛɛ ruu shing nɔɔ, nɔɔ dɔɔ ruu kpang, a ruu ti kãa gbalang ɓɔɔ zang ɓɔɔ ri dɔ̀ɔ ruu ɓɛɛ kpang.

⁷ Wee ruu zang shonang Kirisi ɓee, ruu nɛ̀ɛ́ hɛ̃ɛlɛ nɔng vuu ɓɔɔ ruu kasɛ ɓɛɛ katɔ ka naa manɛ. A ruu palɛ nɔɔ kaa tɔ̀ɔ́ hakaka kpang, ruu yiti nɔɔ naa ɓɔɔ nàá jaa gãng jĩng ka wujɛ ɓiɓɛ ɓɛɛ.

⁸ Ka ruu ɓɔɔ, ruu kasɛ nɔɔ katɔ ɓɛɛ, ruu kpalɛ bii tɔ ruu kɔɔ nɔɔ wu Ruu Tɔ̃ɔ Laa kɔ shɛ̃ɛning kpang, ruu ti vɔ ka ruu manɛ ka ruu ɓɔɔ ruu kasɛ nɔɔ katɔ gbãng gbãng.

⁹ Rɛɛ manzung, n tɔɔ n kpàá nɔɔ danggn. Nɔɔ zi naa ɓɔɔ ruu palɛ shonang dɔɔli tɔ. Ruu pálɛ́ shonang nɛɛ zĩi nɛɛ laagɛ̃, ruu walɛ vuu shaanang ɓuru, tɔ̀ɔ ruu kpãa nɔɔ kaa takpang, ka ɓɔɔ ruu kɔɔ nɔɔ Ruu Tɔ̃ɔ ɓɔɔ ka yuu Laa ɓɛɛ.

¹⁰ Nɔ̀ɔ nɛɛ Laa, nɔɔ zi naa ɓɔɔ ruu nwang nɛɛ nɔɔ ɓɔɔ nɔɔ dũng Laa ɓɛɛ tɔ. Ka nwannang ɓuru, ruu mang shi kpang ka yeti ɓuru kpang, ruu nwàng tɔ̃ɔ. Zang ɓɔɔ kagn teteng manɛ ɓɔɔ ri kɔɔyi nɛɛ ruu pálɛ̀ vuu shi kpang kagn kpang.

¹¹ Nɔɔ zi tɔ ruu palɛ zang ɓu ka teteng manɛ naa ɓɔɔ dáa palɛ wujɛ ɓiɓɛ ɓɛɛ.

¹² Ruu tusu nɔɔ vuu ɓɔɔ daa bii katɔ ɓɛɛ. Ruu mã nɔɔ danggn, ruu yi tĩng, ruu kɔɔ nɔɔ nɛɛ nɔɔ nwang zɔ̃ng nwannang ɓɔɔ shing Laa, Laa tãa tĩnang ɓɛɛ. Laa ɓɔɔ ɓáa nɔɔ nyaa nɛɛ nɔɔ naa nwang jong ka teteng zang ɓɔɔ wu nwang kpanti ɓarɛ ɓɛɛ, nɔɔ zi bannang ɓiɓɛ.

¹³ A vuu ɓɔɔ shingnɛ ruu zãa Laa diki diki ɓɛɛ kagn. Ruu atɛ nɔɔ ruu ɓɔɔ Laa shong nyaa nɛɛ mani ɓɛɛ, nɔɔ tãayi, a nɔɔ tarɛ. Wu naa nyaa shonang shɔnzang kpang, naa nyaa shonang Laa. Ti nyaa shonang Laa kɔ niizang. Ka ruu nɔngkɔ, Ruu Laa ti kɔ̃̀sɔ́ yeti manɛ kana ɓɔɔ nɔɔ shing danggn tɔ ɓɛɛ.

¹⁴ Rɛɛ manzung ɓuru, vuu kɔ pálɛ̀ nɔɔ ɓee, pálɛ́ zang ɓɔɔ ri dũng Laa ɓɔɔ ri ka tipi Yahudi ɓɔɔ ri ɓakɛ yuu ɓarɛ tɔ nɛɛ Yeesɔ Kirisi ɓɛɛ doo nɔngkɔ. Zang tipi manɛ dãng nɔɔ jĩng doo nɔngkɔ, naa ɓɔɔ zang Yahudi dang ri jĩng jong ɓɛɛ.

¹⁵ Zang Yahudi ɓɔɔ ri nyɔ rɛɛ zang nyaa shonang Laa nɛɛ kpanti Yeesɔ vɔrɔ, a ri ti hing ruu ɓɛɛ. Laa tãa tĩnang ɓarɛ kpang tingkiring. Ri ti shing jĩng nɛɛ zang ɓɔɔ kpang tingkiring.

¹⁶ Ri ti kãa naa ɓɔɔ ri zãa ruu gbalang ɓɔɔ ruu kɔɔ zang ɓɔɔ ri zang Isirela kpang ruu, ɓɔɔ naa ta yuu ɓarɛ katɔ ɓɛɛ. Vuu kɔ̀ ri palɛ ɓee, kɔ shingnɛ vuu shi kpang ɓɔɔ ri palɛ diki diki ɓɛɛ, ɓèe nyaa kaa kiiri. A kãntang yeti Laa lasɛ tɔ nɛɛ ri, jɛ̃ɛ ri ruu kaa tɔ.

Bulu kasɛ nɛɛ wu daa leng ri tɔkn

¹⁷ Rɛɛ manzung, zang shing ruu nɛɛ gbãng gbãng ning ruu basɛ zɔɔ nɛɛ nɔɔ diki tɔkɔlɔng. Ruu yaa nɔɔ nɛɛ bii waati, a ruu yaa rɛ̃rɛnang kaa tɔ̀ɔ́ yuu manɛ kpang. Niizang, ruu kasɛ katɔ ka yeti ɓuru gbãng gbãng, a ruu kãa gbalang ruu naa zì nɔɔ tɔkn.

¹⁸ Ruu kasɛ yuu gbãanang ka bii manɛ. N nɛɛ yuu mɛɛ, n kãa gbalang tɔ ɓa doo gbete katɔ, a Sheetang zãa ruu gbalang daanang katɔ.

¹⁹ Ruu kasɛ nɛɛ ruu naa leng nɔɔ, ka ruu ɓɔɔ, nɔkɔ zang ɓɔɔ ruu shing gn ka bii ɓarɛ ɓɛɛ. Ka ruu ɓɔɔ, ka diki ɓɔɔ kpanti ɓuru Yeesɔ Kirisi a tɔkn, nɔkɔ shing ruu, rùu rangkɛ yee bang bang ka yuu ɓuru, ruu ti tãa tĩnang ka tĩng ɓiɓɛ ɓɛɛ.

²⁰ Niizang ruu lakɛ jĩng nɛɛ nɔkɔ, nɔkɔ shing ruu, rùu tãa tĩnang.