1 Koranti 16 - Nyaa Shɔɔ Ɓɔɔ Laa a Ɓɛɛ

Ruu saka ɓɔɔ zang kpalɛ, nɛɛ zang yi zang ɓɔɔ ri dũng Laa naa nɛɛ mani ɓɛɛ

¹ Ka ruu saka ɓɔɔ nɔɔ kpalɛ nɛɛ nɔɔ yi zang ɓɔɔ ri dũng doo Laa kɔ, ɓɔɔ ri ka Urushalima naa nɛɛ mani ka bii ɓɛɛ. Nɔɔ pálɛ́ doo naa ɓɔɔ n kɔɔrɔ zang ɓɔɔ ri ka rɛɛ Gãa Laa ɓɔɔ ka tipi Galati nɛɛ ri palɛ ɓɛɛ kɔ.

² Ka diki Laadi, zang ɓu wu zɔ̃ng vuu ɓɔɔ ka yeti saka ɓiɓɛ ɓɔɔ Laa a wu ɓɛɛ. Wu shingnɛ ka ruu shonang Laa palɛnang. Nɔɔ palɛ nɔngkɔ sasak tɔ̀ɔ, ka laa ɓɔɔ n naa arɛ n leng nɔɔ, nɔɔ naa kpálɛ̀ saka ɓɔɔ kaa takpang.

³ N nɛɛ naa shɛ̃ɛ nɔng manɛ tɔ, n naa bee labeenang n a zang ɓɔɔ nɔɔ shɛ̃ɛrɛ ri ɓɛɛ, n naa shong ri, ri daa nɛɛ labeenang kaɓa. Ri túu saka ɓɔɔ nɔɔ kpalɛ ɓɛɛ, ri daa nɛɛ mani ka Urushalima.

⁴ Naa dàá ɓɔɔ n dàá Urushalima jong, tɔ̀ɔ, ri ti daa nɛɛ n.

Vuu ɓɔɔ Bulu nɛɛ wu palɛ ɓɛɛ

⁵ N mangnɛ nɛɛ n dàá ka tipi Makidoniya, tɔ̀ɔ, n a nɔng manɛ kati, ka ruu ɓɔɔ n tɔ̀ɔ, n sɔ́ɔ tipi Makidoniya ɓɛɛ.

⁶ N shing jĩng nɛɛ n naa nwáng nɛɛ nɔɔ diki bee katɔ tɔkɔlɔng. Ǹ naa nwáng nɛɛ nɔɔ pũngku wu waa nyaa nɛɛ mani. N nɛɛ tɔɔ n daa kaa tɔ, nɔ́ɔ a m vuu ɓɔɔ nɔɔ yi m naa nɛɛ mani ka bii ɓɛɛ. Nɔ́ɔ ti daa shing m kaa nɔng ɓɔɔ n kasɛ daanang ɓɛɛ piti.

⁷ N kasɛ kpang nɛɛ n nwang nɛɛ nɔɔ tɔkɔlɔng, n laabìí daanang kpang. N shing jĩng nɛɛ n naa nwang nɛɛ nɔɔ diki wu bee m katɔ tɔkɔlɔng naa Kpanti Yeesɔ Kirisi nɛɛ kasɛ tɔ ɓɛɛ.

⁸ N naa nwang ka Afisa ka nihn diki nyaalaa Pentiku wu a nɛɛ mani.

⁹ Laa puu m gbalang tɔ nɛɛ n palɛ shonang bang ɓɔɔ nwang vuu tɔ̃ɔ ɓɛɛ, a zang dɔɔli ri shing jĩng kaa tɔ̀ɔ́ nɛɛ n kpang.

¹⁰ Timoti nɛɛ a tɔ ka nɔng manɛ, nɔɔ palɛ vuu naa ɓɔɔ wu tãa tĩnang ɓɛɛ. Ka ruu ɓɔɔ, pàlɛ́ Kpanti Kirisi doo shonang kɔ naa ɓɔɔ n palɛ ɓɛɛ.

¹¹ Zang ɓɔɔ wu pɛ̃ɛrɛ wu naa vĩi kpang. Nɔɔ yi wu naa kɔ jong ka bii, nɔ́ɔ a wu vuu ɓɔɔ wu daa zanti nɛɛ mani ɓɛɛ. Tɔ̀ɔ, wu yi gbalang zanti ɓiɓɛ kaa tɔ̀ɔ́ yeti ɓiɓɛ lasɛ katɔ kpang. Wu ti gbãayu wu naa ĩi m ka nihn. Ruu nɛɛ zang ɓɔɔ ri dũng Laa ka nihn ruu gã wu katɔ.

¹² Ka ruu jaa nàá ɓuru Apolo, n gàarɛ́ wu gbãng gbãng nɛɛ wu dũng zang ɓɔɔ ri dũng Laa, wu naa leng jĩng ka nɔɔ. A pɛ̃ɛrɛ ka jĩng ɓiɓɛ nɛɛ daa naa ɓɔɔ wu a kãntang gn kpang. Nɛɛ walɛ gbalang tɔ, a ditɔ ka nɔng manɛ.

Naa ɓɔɔ Bulu di nyaa ruu ɓiɓɛ ɓɛɛ

¹³ Nɔɔ gãng jĩng waasɛ̃. Nɔɔ shii nɛɛ kaka ka danggn ɓɔɔ nɔɔ shing ɓɛɛ. Nɔ́ɔ yaa gn naa kpang, nɔɔ lakɛ yuu kagn.

¹⁴ Ka vuu piti ɓɔɔ nɔɔ palɛ, nɔɔ pálɛ́ ka ruu ɓɔɔ, nɔɔ kasɛ zɔɔ katɔ ɓɛɛ.

¹⁵ Rɛɛ manzung, nɔɔ zi tɔ nɛɛ Sitifana nɛɛ zang ɓɔɔ ri ka gãa ɓiɓɛ rikɔ tá Ruu Tɔ̃ɔ Laa shɔɔnang ka tipi Akaya. Ri ti a yuu ɓarɛ tɔ nɛɛ ri palɛ shonang ri yi zang ɓɔɔ ri dũng Laa naa ka bii.

¹⁶ N gaa nɔɔ katɔ, nɔɔ a zang ɓɔɔ naa weɓe bannang katɔ. Nɔɔ ti seng zang ɓɔɔ ri palɛ shonang nɛɛ ri katɔ.

¹⁷ N tãa tĩnang tɔ dɔɔli ka ruu ɓɔɔ Sitifana nɛɛ Fɔtunati nɛɛ Akayiku ri a ka bii mɛɛ ka nihn ɓɛɛ. Ɓɔɔ n zi ri, nwang kaa naa n zili nɔkɔ.

¹⁸ Ri mã m danggn tɔ naa ɓɔɔ ri mã nɔɔ tɔ ɓɛɛ. Zang ɓɔɔ naa weɓe daa naa ɓɔɔ nɔɔ seng ri tɔ.

¹⁹ Zang ɓɔɔ ri dũng Laa ɓɔɔ ri ka tipi Asiya nandon, ri jee nɔɔ nyaa. Akpiila nɛɛ Pirisila, nɛɛ zang ɓɔɔ ri dũng Laa ɓɔɔ ri kpalɛ zɔɔ ka gãa ɓarɛ, ri ti jee nɔɔ nyaa jong tɔ̃ɔ tɔ̃ɔ. Ka ruu ɓɔɔ, nɔɔ nɛɛ ri gbete ka bii Kpanti Yeesɔ ɓɛɛ.

²⁰ Zang ɓɔɔ ri dũng Laa ka nihn nandon, ri jee nɔɔ nyaa. Nɔ́ɔ ti jée zɔɔ nyaa jong nɔɔ kɔ̃ng zɔɔ katɔ ka ruu nung Laa.

²¹ Nkɔ Bulu, n bee nyaa kɔ n jee nɔɔ ɓee nɛɛ naa mɛɛ.

²² Zang ɓɔɔ nɛɛ kagn ɓɔɔ kasɛ ruu Kpanti Yeesɔ Kirisi kpang, Laa wu shingnɛ wu shaarɛ dòndòng. Kpanti ɓuru Yeesɔ Kirisi, a ta.

²³ Kpanti ɓuru Yeesɔ Kirisi, wu palɛ nɔɔ tɔ̃ɔ.

²⁴ N kasɛ ruu manɛ katɔ nandon, ka ruu ɓɔɔ, ruu nandon ruu ɓakɛ zɔɔ tɔ, nɛɛ Yeesɔ Kirisi ɓɛɛ.