1 Koranti 10 - Nyaa Shɔɔ Ɓɔɔ Laa a Ɓɛɛ

Nɔɔ yaa vaka ta

¹ Manzung, n kasɛ danggn wu ning nɔɔ vuu ɓɔɔ palɛ rɛɛ dabang ɓuru, ɓɔɔ ri dũng Musa ɓɛɛ kpang. Sãmbong ɓɔɔ kagn sɔ̀ɔ ri tĩng. A ri ti ra ka tipi waati, ri ta waapo ɓɔɔ zang ɓaa nɛɛ Waapo ɓɔɔ mii ɓiɓɛ nwɛ̃ɛri ɓɛɛ.

² Ka ɓɔɔ ri ra ka dii sãmbong, a ri ti rarɛ ri ta waapo, zang palɛ ri batizima. Batizima kaɓa, tusu kati nɛɛ, ri ɓarɛ zang ɓɔɔ dũng Musa kɔ nandon.

³ Ri nandon ri shaa vuu shaanang kaɓa, ɓɔɔ a nɛɛ bii Laa ɓɛɛ.

⁴ Ri nandon ri ɓooro mii ɓɔɔ Laa a ri ɓɛɛ. Mii ɓɔɔ ri ɓoo ɓɛɛ, nwang nɛɛ yeti tari ɓɔɔ daarɛ nɛɛ ri ka ɓɔɔ ri rakɛ ka jĩngti ɓɛɛ. Tari kaɓa wukɔ Yeesɔ Kirisi nɛɛ yuu ɓiɓɛ.

⁵ Ri nandon ri zi tĩnang ɓɔɔ Laa shingnɛ, ri tãa ɓɛɛ katɔ, a ri dɔɔli ri palɛ vuu ɓɔɔ lasɛ Laa yeti doo nɛɛ mani. Ka ruu nɔngkɔ, ri vɔlɔ ka jĩngti. Vɔrɔ ɓarɛ tantɛ nɛɛ nɔng piti piti.

⁶ Vuu kɔ ri palɛ doo tɛ̃ɛ tɛ̃ɛ ɓee, nwàng ɓi kaa vuu ɓɔɔ ruu zirɛ ɓɔɔ shaarɛ ruu nyaa nɛɛ tɔ̀ɔ, ruu shing jĩng kaa tɔ̀ɔ́ vuu shi kpang palɛnang naa ɓɔɔ rɛɛ dabang ɓuru ri palɛ doo tɛ̃ɛ tɛ̃ɛ ɓɛɛ kpang.

⁷ Nɔ́ɔ bang vaka naa ɓɔɔ zang ɓɔɔ ka teteng ɓarɛ ri bang ɓɛɛ kpang. Zang bèe ka yeti labeenang Laa nɛɛ, “Zang keɓe ri nwang ka tipi, ri shaa vuu shaanang a ri ɓoo saa. A ri seepaa ri sɔ dang.”

⁸ Ruu pálɛ̀ nɔɔ dũndũng naa ɓɔɔ zang ɓɔɔ ka teteng ɓarɛ ri pálɛ́ ɓɛɛ kpang. Zang kaɓa ri palɛ dũndũng, a Laa nyɔ shɔnzang labang dakn bmati tu taati vɔrɔ ka laa gbete.

⁹ Zang ɓɔɔ ka teteng rɛɛ dabang ɓuru ɓɔɔ ka tĩng tɛ̃ɛ tɛ̃ɛ, ri gãsɛ Laa nɛɛ tɔ̀ɔ, ri zi vuu ɓɔɔ naa wu palɛ ɓɛɛ. Ka ruu nɔngkɔ, Laa shing sɔkɔ, sɔkɔ yiki ri. Ruu gãsɛ Laa ɓuru jong naa rikɔ kpang.

¹⁰ Zang ɓɔɔ ka teteng ɓarɛ, ri gɔ̃ɔrɔ yee, a zang nyaa shonang Laa ɓɔɔ ka lapa ɓɔɔ wukɔ nyɔkɔ zang vɔrɔ, arɛ naa nyɔ̀kɔ̀ ri vɔrɔ. Ruu gɔ̃ɔrɔ yee naa ɓɔɔ ri palɛ ɓɛɛ kpang.

¹¹ Vuu kɔ palɛ ri doo tɛ̃ɛ tɛ̃ɛ ɓa, nwàng ɓi kaa vuu ɓɔɔ shaarɛ zang nyaa nɛɛ, tɔ̀ɔ, ri palɛ kaa waasɛ̃ ɓɛɛ. Zang bèe vuu keɓe ka yeti labeenang nɛɛ tɔ̀ɔ, zang shaarɛ ruu nyaa nɛɛ mani. Ka ruu ɓɔɔ, rùu nwàng ɓuru kaa làa ɓɔɔ diki ɓɔɔ koo waa nyaa kagn a naabm tɔ ɓɛɛ.

¹² Ka ruu nɔngkɔ, zang ɓɔɔ nɛɛ zirɛ nɛɛ wu shii ɓi katɔ nɛɛ kaka gbatagbata, wu palɛ waasɛ̃, wu nɛɛ watɛ ka ɓɔɔ zang gãsɛ wu ɓɛɛ.

¹³ Vuu gãsɛnang ɓɔɔ kagn ɓɔɔ zang gãsɛ nɔɔ nɛɛ mani, ɓɔɔ ɓi náabm̀ nɛɛ ɓɔɔ zang gãsɛ zang nandon nɛɛ mani ɓɛɛ kpang. Laa palɛ vuu ɓɔɔ wu a nyaa ɓɛɛ, ɓi katɔ. Yaa vuu gãsɛnang ɓɔɔ ɓa kaka manɛ katɔ, wu a ka bii manɛ kpang. Naa vuu gãsɛnang a ka bii manɛ, a nɔɔ kaka katɔ, ɓɔɔ nɔɔ taarɛ yuu, tɔ̀ɔ, nɔɔ walɛ gbalang ɓɔɔ nɔɔ wɔ ɓɛɛ kati.

¹⁴ Ka ruu nɔngkɔ, rɛɛ masang ɓɔɔ n kasɛ ruu manɛ katɔ ɓɛɛ, n kɔɔ nɔɔ, nɔɔ yaa vaka ta dɔ̃ɔ gbete.

¹⁵ Nɔɔ manɛ zang ɓɔɔ yàa nɔɔ shoo kagn ɓɛɛ. Nɔɔ jɛ̃ɛ ta ka yeti manɛ naa vuu kɔ n kɔɔrɔ ɓee tɔ̃ɔ ya?

¹⁶ Ka laa ɓɔɔ ruu nandon ruu shaa vuu shaanang ɓɔɔ ruu kpaa danggn Kpanti Yeesɔ kagn ɓɛɛ. Ruu zã̀a Laa ka yuu juwa. Naa ruu ɓooyi ruu ɓakɛ zɔɔ nɛɛ Kirisi ka zĩi ɓiɓɛ. Ruu nɛɛ sha borodi tɔ, ruu shaayi ruu ɓakɛ zɔɔ nɛɛ Kirisi nɛɛ bii ɓiɓɛ.

¹⁷ Ɓɔɔ ruu shaa borodi kaɓa, ruu dɔɔli, a borodi ɓɔɔ ruu shaayi, ɓi kaa gbete. Wukɔ tusu ruu nɛɛ ruu ɓuru gbete nɛɛ zɔɔ.

¹⁸ Nɔɔ rɛ̃rɛ nwannang zang Isirela karɛ. Ka nɔng ɓarɛ zang ɓɔɔ shaa yɔpɔ ɓɔɔ zang dɔɔ Laa, ri ɓakɛ zɔɔ tɔ nɛɛ Laa ɓɔɔ zang dɔɔrɔ wu yɔpɔ kaɓa ɓɛɛ.

¹⁹ N kɔ̀ɔ́ ɓu nɛɛ viya? N kɔ̀ɔ́ ɓu nɛɛ vaka vuu ɓɔɔ ya? A vuu shaanang ɓɔɔ zang a vaka palɛ vuu ɓɔɔ katɔ ya?

²⁰ Kpang, n kɔ̀ɔ́ wu nɔngkɔ kpang. N kɔɔ m tɔɔ, vuu shaanang ɓɔɔ zang ɓɔɔ ri dũ̀ng Laa kpang, ri a vaka ri a ɓarɛ suru shi kpang. Ri dɔɔ ɓarɛ Laa kpang. N kasɛ kpang nɔɔ ɓakɛ zɔɔ nɛɛ suru shi kpang, kpang.

²¹ Nɔ́ɔ ɓòo vuu ka juwa Kpanti Yeesɔ Kirisi, nɔɔ ti daa ɓóo ɓɔɔ ka juwa suru shi kpang, kpang. Nɔɔ sháa vuu shaanang Kpanti Yeesɔ Kirisi nɔɔ ti daa sháa ɓɔɔ suru shi kpang tɔkn kpang.

²² Rúu pálɛ̀ vuu ɓɔɔ shingnɛ, Kpanti Laa kaa sũnyaa nɛɛ ruu ɓɛɛ kpang. Ruu ɓa wu kaka katɔ ya?

²³ Nɔɔ kɔɔrɔ nɛɛ, zang zãa nɔɔ vuu ɓɔɔ kagn gbete kpang. Niizang, zang zãa nɔɔ vuu ɓɔɔ kagn gbete kpang, a wu kaa tɔ̀ɔ́ vuu piti yǐ zang naa ka bii kpang. Niizang, zang zãa nɔɔ vuu ɓɔɔ kpang, a vuu kaa gn ɓɔɔ ri shíng zang, zang ri shíi nɛɛ kaka ka vuu Kpanti Yeesɔ Kirisi kpang ɓɛɛ.

²⁴ Zang ɓu wu pálɛ́ vuu ɓɔɔ yi zang ɓɔɔgn naa kaa bii ɓɛɛ, wu vuu ɓɔɔ pàlɛ́ yuu ɓiɓɛ kɔ tɔ̃ɔ gbete ɓɛɛ kpang.

²⁵ Shaa yɔpɔ ɓɔɔ zang mãlɛ́ ka lumang ɓɛɛ, mɔɔ hɛ̃ɛlɛ zang ruu ka yuu ɓiɓɛ kpang. Ka ruu ɓɔɔ, mɔɔ nɛɛ rɛ̃rɛ nɛɛ mɔɔ palɛ vuu shi kpang tɔ ɓɛɛ.

²⁶ Ka ruu ɓɔɔ, zang bèe ka yeti labeenang Laa nɛɛ, “Koo keɓe nɛɛ vuu ɓɔɔ ka yeti ɓiɓɛ piti ɓi ɓɔ̀ɔ́ Kpanti Laa ɓɛɛ”.

²⁷ Naa zang ɓɔɔ dũ̀ng Yeesɔ Kirisi ɓi kpang, ɓàa zang ɓɔɔ ka teteng manɛ nyaa nɛɛ mɔɔ naa shaa vuu shaanang ka gãa ɓiɓɛ, a mɔɔ kasɛ tɔ. Shaa vuu shaanang ɓɔɔ wu shing mɔɔ ka tĩng ɓɛɛ. Mɔɔ rɛ̃rɛ kpang nɛɛ naa mɔɔ shaayi, tɔ̃ɔ ya, kɔ shi kpang, kpang ya.

²⁸ Zang ɓɔɔgn nɛɛ naa kɔɔ mɔɔ nɛɛ, “Vuu shaanang keɓe zang báng vaka nɛɛ mani.” Mɔɔ shaa kpang, ka ruu zang ɓɔɔ kɔɔ mɔɔ kaɓa, nɛ̀ɛ́ kɔɔyi nɛɛ nɔɔ pálɛ́ vuu shi kpang tɔ.

²⁹ Mɔɔ yáa vuu shaanang kaɓa ka ruu rɛ̃rɛnang zang kaɓa, wu ka ruu rɛ̃rɛnang ɓaaɓɛ kpang. Zang ɓɔɔ kɔɔyi nɛɛ, “N yáa vuu ɓɔɔ n palɛ ɓɛɛ, nɛɛ ka ruu ɓɔɔ, zang ɓɔɔ rɛ̃rɛ nɛɛ n pálɛ̀ vuu shi kpang ka ruu viya?

³⁰ Naa n zã̀a Laa ka yuu vuu shaanang ɓɔɔ n shaa ɓɛɛ, zang ɓɔɔ ri rangkɛ m ka ruu viya? Ka ruu ɓɔɔ, n shaa vuu shaanang ɓɔɔ n zãa Laa kagn ɓɛɛ ya?”

³¹ N kàsɛ́ zang keɓe nyaa nɛɛ, ka vuu ɓɔɔ mɔɔ palɛ ɓɛɛ nandon. Naa mɔɔ shaa doo vuu, naa mɔɔ ɓoo doo vuu, palɛ ka gbalang ɓɔɔ mɔɔ a Laa bannang nɛɛ mani ɓɛɛ.

³² Palɛ waasɛ̃, mɔɔ pálɛ̀ vuu ɓɔɔ lasɛ zang ɓɔɔ yeti kpang, naa zang keɓe ri doo zang Yahudi, naa doo zang ɓɔɔ ri dũ̀ng Laa kpang, naa doo zang ɓɔɔ ri dũng Laa ɓɛɛ.

³³ Naa ɓɔɔ n kãa m gbalang n shing zang ri tãa tĩnang ka vuu piti ɓɔɔ n palɛ ɓɛɛ. N shing jĩng m ka vuu ɓɔɔ yi nkɔ naa ka bii shɛ̃ɛning kpang. N shing jĩng m ka vuu ɓɔɔ, yi zang dɔɔli naa ka bii ɓɛɛ. Tɔ̀ɔ, n atɛ ri, Laa wu ta yuu ɓarɛ kati.