1 Bituru 1 - Nyaa Shɔɔ Ɓɔɔ Laa a Ɓɛɛ

Bituru jee zang ɓɔɔ ri dũng Laa nyaa

¹ Nkɔ Bituru zang nyaa shonang Yeesɔ Kirisi, n bèé nɔɔ labeenang keɓe, n jee nɔɔ nyaa, zang ɓɔɔ Laa shɛ̃ɛrɛ ri katɔ ɓɛɛ. Ɓɔɔ zang tantɛ nɔɔ nɛɛ nɔng piti piti ka rɛɛ tipi Pontu nɛɛ Galati nɛɛ Kapaadoosiya nɛɛ Asiya a ɓɔɔ tipi Bitiniya ɓɛɛ. Nɔɔ nwalɛ zanti ka nɔngkɔ ɓɛɛ.

² Nɔɔ manɛ zang ɓɔɔ Daa ɓuru Laa zi vuu ɓɔɔ nɛɛ wu palɛ nɛɛ nɔɔ tɔ, doo ka tĩng tɛ̃ɛ tɛ̃ɛ ɓɛɛ. Laa shɛ̃ɛrɛ nɔɔ nɛɛ naa vuu palɛnang Suru ɓiɓɛ, nɛɛ nɔ́ɔ nwang zang ɓiɓɛ, nɔ́ɔ ɓaa shoo ka nyaa Yeesɔ Kirisi. Zĩi Yeesɔ keɓe wu sɔ̀ɔ nɔɔ, nɔ́ɔ nwang zang tɔ̃ɔ ka tĩng Laa. Laa wu gisi nɔɔ tĩnang tãanang, wu ti shingnɛ yeti manɛ wu valɛ katɔ diki diki.

Danggn shinnang ɓɔɔ shàarɛ̀ kpang ɓɛɛ

³ Ruu dɔɔ Laa ɓɔɔ wukɔ Laa nɛɛ Daa Kpanti ɓuru Yeesɔ Kirisi ɓɛɛ. Pàlɛ̀ ruu tɔ̃ɔ gbãng gbãng, ka ruu nɔngkɔ, shingnɛ ruu nwàng zang ɓɔɔ zang yi ruu shɔɔ tɔkn ɓɛɛ, nɛɛ tɔ̀ɔ, gn shinnang ɓuru wu shàarɛ̀ kaa takpang. Ruu walɛ vuu keɓe ka ɓɔɔ zang wisi Yeesɔ paa nɛɛ sàa ɓɛɛ.

⁴ Ruu ti zi tɔ nɛɛ ruu naa walɛ vuu tɔ̃ɔ ɓɔɔ Laa shing ka lapa ɓɛɛ ditɔ. Vuu keɓe ri pũng kpang dòndòng, ri lasɛ kpang, ri ti shàarɛ̀ kpang tingkiring.

⁵ Laa ti gã nɔɔ nɛɛ naa vuu palɛnang ɓiɓɛ, nɔɔ ɓɔɔ nɔɔ shing danggn ka bii ɓiɓɛ ɓɛɛ. Tɔ̀ɔ, zang piti ri zi kati nɛɛ jĩng ɓarɛ, nɛɛ Laa ta yuu manɛ ditɔ ka diki ɓɔɔ koo waa nyaa kagn ɓɛɛ.

⁶ Ka ruu nɔngkɔ, nɔɔ tãa tĩnang ta ka ruu rɛɛ vuu kɔ Laa palɛ ɓee. Kãntang keɓe, yeti manɛ lasɛ katɔ, ka ruu ɓɔɔ, zang gãsɛ nɔɔ nɛɛ vuu gãsɛnang ka zɔ̃ng zɔ̃ng ɓɛɛ. Nɔɔ ti zi tɔ, diki ɓɔɔ zang gãsɛ nɔɔ kagn keɓe bée kpang.

⁷ Vuu gãsɛnang alɛ ka bii manɛ, tɔ̀ɔ, zang ri zi kati nɛɛ danggn ɓɔɔ nɔɔ shing ka bii Laa ɓi ɓɔɔ niizang kɔ nwani. Zinariya ɓɔɔ lasɛ katɔ ɓɛɛ, zang dɔɔ ka waa, tɔ̀ɔ, zang zirɛ nɛ́ɛ ɓɔɔ tɔ̃ɔ ɓɛɛ. Zang palɛ danggn shinnang manɛ ɓɔɔ ɓa zinariya shinang katɔ doo nɔngkɔ. Zang gãsɛ danggn ɓɔɔ nɔɔ shing ka bii Laa kãntang keɓe, ka ruu ɓɔɔ, ka diki ɓɔɔ Yeesɔ Kirisi naa nwang nyaa, zang wu dɔɔ nɔɔ, zang ti a nɔɔ bannang ka ruu danggn ɓɔɔ nɔɔ shing ɓɛɛ.

⁸ Nɔɔ zi Yeesɔ gngn nɛɛ jĩng manɛ kpang, nɔɔ kasɛ ruu ɓiɓɛ doo nɛɛ mani, a nɔɔ ti shing danggn tɔ ka bii ɓiɓɛ, ka ruu nɔngkɔ, nɔɔ tã̀a tĩnang ka yeti manɛ dɔɔli ɓa ɓɔɔ zang kɔ̀ɔ́ nɛɛ nyaa ɓɛɛ katɔ.

⁹ Naa nɔɔ shing danggn ka bii Yeesɔ Kirisi nɔngkɔ sasak, Laa ta yuu manɛ, a nɔɔ suru bii ɓɔɔ waa nyaa kpang.

¹⁰ Zang nyaa shonang Laa kɔ̀ɔ zang ruu doo ka tĩng tɛ̃ɛ tɛ̃ɛ, ka yuu vuu tɔ̃ɔ ɓɔɔ Laa kɔɔyi, nɛɛ wu a nɔɔ ɓɛɛ. Zang nyaa shonang Laa keɓe ri kãa nɔng, ri hɛ̃ɛlɛ zang nɛɛ ri zǐ vuu ɓɔɔ kagn ka yuu naa ɓɔɔ Laa ta yuu zang ɓɛɛ.

¹¹ Suru Kirisi ɓɔɔ nwang ka yeti ɓarɛ kɔɔrɔ ri naa ɓɔɔ Kirisi naa dang jĩng, tɔ̀ɔ, zang naa a wu bannang kati ɓɛɛ. Ri kãa nɔng, ri kasɛ nɛɛ ri zi làa ɓɔɔ zang naa pálɛ̀ vuu keɓe kagn, nɛɛ naa ɓɔɔ zang naa pálɛ̀ ɓɛɛ.

¹² A Laa tusu ri nɛɛ ri pàlɛ́ ɓi yuu ɓarɛ shonang kpang, ri pàlɛ́ ɓi nɔkɔ. Kãntang keɓe, zang ɓɔɔ ri kɔ̀ɔrɔ̀ nɔɔ Ruu Laa, ri kɔɔ nɔɔ rɛɛ vuu keɓe tɔ, naa ɓɔɔ Suru Laa ɓɔɔ à nɛɛ lapa a ri naa ɓɛɛ. Zang nyaa shonang Laa ɓɔɔ ri ka lapa, ri kasɛ nɛɛ ri zi rɛɛ vuu keɓe jong.

Nwannang zang ɓɔɔ ri zang Laa ɓɛɛ

¹³ Ka ruu nɔngkɔ, nɔɔ yiti yuu manɛ waasɛ̃ nɔɔ kpalɛ bii tɔ̃ɔ. Nɔɔ ti shing manɛ gn dɔ̃ɔ gbete ka vuu ɓɔɔ Laa naa a nɔɔ ɓɛɛ, ka diki ɓɔɔ Yeesɔ Kirisi naa nwang nyaa ɓɛɛ.

¹⁴ Ka ruu ɓɔɔ, nɔɔ wujɛ ɓɔɔ ɓaa shoo katɔ ka yee ɓɛɛ. Nɔɔ yaa vuu ɓeleng nɔɔ kasɛ palɛnang bɛ̀ɛ́ nɔɔ zi Ruu Tɔ̃ɔ Laa gn kpang ɓɛɛ ta.

¹⁵ Naa ɓɔɔ Laa ɓɔɔ ɓaa nɔɔ nyaa nɛɛ, nɔɔ nwang zang ɓiɓɛ, palɛ vuu shi kpang ɓi kpang, nɔ́ɔ palɛ vuu shi kpang doo kpang kɔ, ka nwannang manɛ ka vuu ɓɔɔ nɔɔ palɛ piti.

¹⁶ Naa ɓɔɔ zang bée ka tĩng tɛ̃ɛ tɛ̃ɛ ka yeti labeenang Laa ɓɛɛ nɛɛ, “Nɔ́ɔ pálɛ̀ vuu shi kpang ka nwannang manɛ kpang, ka ruu ɓɔɔ, shi kpang ɓi kagn bii mɛɛ kpang tingkiring ɓɛɛ.”

¹⁷ Nɔɔ nɛɛ gàá Laa, nɔɔ ɓáa wu nɛɛ, “Daa” nɛɛ nɔngkɔ, nɔɔ kaa vɔrɔ ɓiɓɛ ka nwannang tɔ̃ɔ manɛ ka vuu piti ɓɔɔ nɔɔ palɛ, ka wee nɔɔ nwang zanti ka koo keɓe ɓee. Ka ruu ɓɔɔ, Laa ɓɔɔ wukɔ Daa manɛ, dɔ̀ng zang ruu ɓi gn dang gbete kpang, ka naa ɓɔɔ wu palɛ vuu ɓiɓɛ ɓɛɛ.

¹⁸ Nɔɔ zi tɔ nɛɛ, Yeesɔ Kirisi ta yuu manɛ nɛɛ tɔɔ nɔɔ yaa rɛɛ vuu ɓɔɔ rɛɛ dabang manɛ ri palɛ, ɓɔɔ daa naa kpang ɓɛɛ. Yeesɔ ta yuu manɛ nɛɛ rɛɛ vuu ɓɔɔ lasɛ katɔ naa rɛɛ zinariya nɛɛ azurufa kpang.

¹⁹ Ta yuu manɛ ɓi nɛɛ zĩi bii ɓiɓɛ ɓɔɔ ɓa vuu piti katɔ ɓɛɛ. Yeesɔ Kirisi nwàng naa jaa mɛ̀ɛrɛ́ ɓɔɔ zang zɔ̃ngnɛ nɛɛ zang dɔ̀ɔ́ Laa ɓɛɛ. Ɓi zang tɔ̃ɔ, shi kpang ɓi kagn bii ɓiɓɛ kpang.

²⁰ Ɓɔɔ bɛ̀ɛ́ Laa mãa koo gn kpang, Laa zɔ̃ng Yeesɔ Kirisi nɛɛ wu ta yuu zang nɔngkɔ. A kãntang keɓe, ka wee koo waa nyaa kaa tɔ ɓee, Laa nwangsɛ wu, ka ruu manɛ kɔ.

²¹ Nɔɔ shing danggn ka bii Laa ka ruu ɓiɓɛ kɔ. Laa ɓɔɔ wisi wu paa nɛɛ sàa, a á wu bannang ɓɛɛ. Ka ruu nɔngkɔ, nɔɔ shing danggn, a nɔɔ ti shing jĩng ka bii Laa.

²² Nɔɔ nwangsɛ vuu shi kpang ɓɔɔ ka yeti manɛ tɔ, ka ruu ɓɔɔ, nɔɔ dũng Ruu Laa ɓɛɛ. A nɔɔ ti kàsɛ̀ ruu zang ɓɔɔ ri dũng doo Laa kɔ kana niizang. Nɔɔ kàsɛ́ ruu zɔɔ nɔngkɔ gbãng gbãng, nɛɛ yeti manɛ nɛɛ kaka manɛ piti.

²³ Nɔɔ zi tɔ nɛɛ Laa yi nɔɔ tɔ shɔɔ tɔkn, nɛɛ bii ruu ɓiɓɛ ɓɔɔ a zang suru bii ɓɛɛ. Ruu ɓiɓɛ keɓe shing zang katɔ, zang palɛ vuu wu nwang ɓi dòndòng. Ɓi shɔnzang ɓɔɔ vɔ katɔ kɔ yi nɔɔ kpang, ɓi Laa ɓɔɔ vɔ ɓi jong kpang kɔ a nɔɔ suru bii keɓe nɛɛ yuu ɓiɓɛ.

²⁴ Ɓi naa ɓɔɔ zang bée ka yeti labeenang Laa ka tĩng tɛ̃ɛ tɛ̃ɛ ɓɛɛ nɛɛ, “Shɔnzang piti ri nwang naa wisi Shinang ɓarɛ ɓi naa mangwaa wisi, wisi nɛɛ tɔɔrɔ tɔ, mangwaa wu lɔɔyi ɓɛɛ.

²⁵ A Ruu Laa nwang ɓi dòndòng.” Ruu keɓe ɓi wukɔ Ruu Tɔ̃ɔ Laa ɓɔɔ zang kɔɔ nɔɔ ɓɛɛ.