1 Yɔhana 1 - Nyaa Shɔɔ Ɓɔɔ Laa a Ɓɛɛ

Yeesɔ wukɔ a zang suru bii

¹ Ruu bèé nɔɔ ruu ka yuu zang ɓɔɔ a zang suru bii ɓɛɛ. Ɓɔɔ nwang ka tĩng tɛ̃ɛ tɛ̃ɛ bɛ̀ɛ́ Laa gaayu koo mãanang gn kpang ɓɛɛ. Ruu tãa ruu ɓiɓɛ, a ruu ti zi wu nɛɛ jĩng ɓuru. Ruu pɛ̃ɛrɛ wu, a ruu ti lee wu nɛɛ naa ɓuru.

² Ɓɔɔ Laa naa nwangsɛ wu yuu, ruu zi wu, a ruu ti kɔɔ nɔɔ vuu ɓɔɔ ruu zi nɛɛ jĩng ɓuru. Ruu kɔɔ nɔɔ ruu zang ɓɔɔ nwáng nɛɛ Daa ka tĩng, a Daa naa nwàngsɛ̀ ruu wu kati.

³ Vuu ɓɔɔ ruu zirɛ, ruu ti tãayi, ruu kɔ̀ɔ́ nɔɔ wukɔ. Tɔ̀ɔ, nɔ́ɔ nwang kaa jong nɛɛ ruu ka nyaa zɔɔ tɔ̃ɔ. Ruu nwàng ɓuru ka nyaa zɔɔ tɔ̃ɔ nɛɛ Daa ɓuru Laa, nɛɛ Jaa ɓiɓɛ Yeesɔ Kirisi.

⁴ Ruu bèé nɔɔ ruu keɓe, tɔ̀ɔ, tĩnang tãanang ɓuru wu ɓee nyaa kati.

Nwannang ka gbalang ɓɔɔ Laa kasɛ ɓɛɛ

⁵ Yee ɓɔɔ ruu tãa ka nyaa ɓiɓɛ, ruu kɔɔ nɔɔ wukɔ. Laa kɔ nɔng yakɛnang, Ruu ɓiɓɛ hãa ɓi kagn nɛɛ vuu shi kpang, kpang.

⁶ Naa ruu kɔɔyi nɛɛ, ruu nwàng nɛɛ wu ka nyaa zɔɔ tɔ̃ɔ tɔ̃ɔ, a ruu ti palɛ vuu ɓɔɔ daa bii kpang, ruu suu sèé, ruu pálɛ̀ vuu ɓɔɔ Laa kasɛ ɓɛɛ kpang.

⁷ Ruu nɛɛ nwang ka nɔng ɓɔɔ yakɛ katɔ naa wukɔ, ruu nwang katɔ nyaa zɔɔ tɔ̃ɔ tɔ̃ɔ. Zĩi Jaa ɓiɓɛ Yeesɔ sɔɔ ruu vuu shi kpang ɓuru katɔ nandon.

⁸ Naa ruu kɔɔyi nɛɛ, vuu shi kpang ɓi kagn bii ɓuru kpang, ruu nwãarɛ yuu ɓuru. Rúu niizang kagn yeti ɓuru kpang.

⁹ Ruu nɛɛ kasɛ nyaa tɔɔ nɛɛ, ruu pálɛ́ vuu shi kpang tɔ, Laa ta nyaa ɓiɓɛ ɓi kpang, palɛ vuu shi kpang ɓi kpang, yàá ruu gbalang vuu shi kpang ɓɔɔ ruu palɛ ɓee katɔ. Wu ti sɔɔ ruu vuu shi kpang ɓuru nandon.

¹⁰ Naa ruu laa nyaa nɛɛ, ruu pálɛ̀ vuu ɓɔɔ shi kpang ɓuru gngn kpang, ruu ɓaa kaa Laa kɔ sèé jong. Rúu ɓiɓɛ kagn yeti ɓuru kpang.