Yaya 18 - Mahou

Ɛnza myaanko ó

¹ Ɛnza ŋé wɛ́ɛ ó kóman ólu fɔ́la mínngɛ, ale ni a yɛ́ kaamɔɔndhye ŋólu táa Sedɔnlɔn kwɔ́ ó kwɔ́man, yíitu lɔ tɛ́ɛ ó ywáa ó lɔ, íi lo o kɔ́ɔnnɔn.

² Zudasi, min ngáa a yánva, ó tɛ́ɛ ó yíitu ó ywáa o lɔ, kɛ mansɔɔ Ɛnza ni a yɛ́ kaamɔɔndhye ŋólu tɛ́ɛ ɲɔ́ɔn ladhyɛnan yénɔn wáati shɛ́ɛman nɔn.

³ Faanlɛɛɲansebhaa olu kúnndii ólu ní Falizɛn ŋólu Ala bhatobhomba kúnnansiibhaa lɔ́lu ní swaasi lɔ́lu bhyáashaa. Zudasi é bhyáa i ɲɛ́n kɛ́ táa, láman ni káa lámaannin ŋólu ní kɛ́ɛkɛfe ŋólu tɛ́ɛ í bhóo.

⁴ Kó mínnu tɛ́ káa kɛ́, Ɛnza ndɛ́ɛ ó bɛ́ lɔ mínngɛ, aa í mangbaa i la kɛ́ fɔ í yɛ́ kó: «Áa yɛ́ɛtii ywáa ɲíinnan?»

⁵ Íi a yawi kó Ɛnza Nazalɛtika ó. Ɛnza ŋé fɔ í yɛ́ kó: «Né lée nin.» Zudasi, min ndɛ́ɛ a lónan mɔɔn ólu bhóo, ó tɛ́ɛ ní íle.

⁶ Ɛnza ŋé fɔ í yɛ́ mínngɛ kó: «Né lée nin,» swáasi ólu táa í kwɔ́la kɛ i bé lúuman.

⁷ O kwɔ́, aa í mánɲaankɛ íkwɔ kó: «Aa yɛ́ɛtii ywáa ɲíinnan?» Íi a yawi kó Ɛnza Nazalɛtika.

⁸ Ɛnza ŋé fɔ í yɛ́ kó: «Né wɛ́ɛ fɔ a yɛ́ ngó né lée nin. Ni áa né lé ywáa ɲíinnan, áa míinnu tó yénɔn ké íi táa.»

⁹ Ɛnza ŋé ó fɔ ké a tɛ́ wɛ́ɛ kóman min nvɔ, ó tɛ́ɛ i lafa. Aa fɔ kó: «Ii mɔɔn mínnu dí né mán, o sí mán túun.»

¹⁰ Simɔn Piyɛli é a yɛ fá ŋó bhɔ́ a foo ŋo lɔ, kɛ́ faanlɛɛɲansebhaa olu kúnndiiba ó yɛ́ bháalakɛdhye ŋó bhóobhɛɛ tóo o tɛ́ɛ a man. O bháalakɛdhye ŋó tɔ́ɔ tɛ́ɛ kó Malikusi.

¹¹ O lɔ, Ɛnza ŋé fɔ Piyɛli yɛ́ kó: «Í yɛ́ fá ŋo ló a foo ŋo lɔ. Fá o tɔ́lɔya min látɛɛ né yɛ́, i tɛ́ fɛ́ ké o wáa sé né man an?»

Ii táala ni Ɛnza ne Fáanlɛɛɲansebhaa ólu kúnndiiba ó fɛ́ yé

¹² Swaasi sɛ́ɛ óni í kúnndii óni Ala bhatobhomba kúnnansiibhaa ólu, Yawudhyaa ólu tɛ́ wɛ́ɛ mínnu bhyáashaa, olu Ɛnza myáan kɛ́ a sili.

¹³ Ii táa ni Ɛnza né Anɛn fɛ́ yé, Kayife bhyáanjɛ lé tɛ́ɛ ó lé, Kayife lé tɛ́ɛ faanlɛɛɲansebhaa olu kúnndiiba ó lé o wáati ó lɔ.

¹⁴ Ale Kayife lé tɛ́ wɛ́ɛ fɔ Yawudhyaa ólu yɛ́ kó aa físaa ké mɔɔn kée ŋan sayakɛ mɔɔn bɛ́ kósɔn.

Piyɛli é i lámangbɛya ko ale man Ɛnza nɔn

¹⁵ Simɔn Piyɛli ni kaamɔɔndhye gbɛ́ɛ tɛ́ wɛ́ɛ í bhyáa Ɛnza ngwɔ́. Faanlɛɛɲansebhaa olu kúnndiiba ó tɛ́ɛ o kaamɔɔndhye ŋó lɔ, óni Ɛnza ŋé lo fáanlɛɛɲansebhaa ólu kúnndiiba ó yɛ́ lú ó kɔ́ɔnnɔn.

¹⁶ Waa Piyɛli é tó lú ó lona ó lá kɛ́ɛnman. Faanlɛɛɲansebhaa olu kúnndiiba ó tɛ́ɛ kaamɔɔndhye min nɔ, óo i kwɔ́sɛɛ kɛ́ bhɔ́ muso min ndɛ́ɛ lú ó kunnansiila kɛ kóman o yɛ́, aa Piyɛli lalo.

¹⁷ Bháalakɛdhye músoman min ndɛ́ɛ lonaa ó kunnansiila, óo fɔ Piyɛli yɛ́ kó: «Ile tɛ́ɛ cɛ míin ɲɛn kaamɔɔndhye ŋo lɔ le a?» Piyɛli ŋé a yawi kó: «Né tɛ́ ó lɔ́ lé.»

¹⁸ Bháalakɛbhaa ólu ní swáasi ólu tɛ́ wɛ́ɛ tá lamaan lú ó kɔ́ɔnnɔn, kɛ mansɔɔ nɛ́nnɛn tɛ́ wɛ́ɛ kɛ́, í síininndɛ́ɛ tá ó fɛ́. Piyɛli lɔ́nin ndɛ́ɛ í cɛ́man kɛ a yɛ́ɛ lágban.

Faanlɛɛɲansebhaa ólu kúnndiiba oo Ɛnza mánɲaankɛla

¹⁹ Faanlɛɛɲansebhaa olu kúnndiiba oo Ɛnza mánɲaankɛ a yɛ́ kaamɔɔndhye ŋólu ní a yɛ́ kaa ŋó mán.

²⁰ Ɛnza ŋé a yawi kó: «Née kóman mɔɔn ólu yɛ́ gbɛ́ lɔ́, née mɔɔn ólu kála sɛ́ɛbho ŋólu kɔ́ɔnnɔn óni Ala bhatobhomba ó kɔ́ɔnnɔn, Yawudhyaa ólu bɛ́ɛ ɲɔ́ɔn nadhyɛla ywáa mínnu lɔ, né mán fósi fɔ lóonɔn.

²¹ Mínnɛɛn la ii né mánɲaankɛla ó lá? Mɔɔn mínnu tɛ́ɛ né lɔ́myɛnnan ii olu mánɲaankɛ ni fé min nvɔ, íi ó lɔ́.»

²² Ɛnza ŋé o kóman ó fɔ mínngɛ, swáasicɛ lɔ́ é a tóo cé, kɛ́ fɔ a yɛ́ kó: «Ii faanlɛɛɲansebhaa olu kúnndiiba ó lé yawila cé ŋan?»

²³ Ɛnza ŋé fɔ o swáasicɛ ó yɛ́ kó: «Ni né wɛ́ɛ kómanyoo ne fɔ, ii né yɛ́ kóman ó yóoɲanlaa ó fɔ. Ni ó tɛ́, mínnɛɛn la ii né gbasila?»

²⁴ Anɛn é a silinin ŋo tó kɛ́ a bhyáashaa faanlɛɛɲansebhaa olu kúnndiiba Kayife mán.

Piyɛli é i lámangbɛyala i kwɔ́ ko ale man Ɛnza nɔn

²⁵ Óo kɛ́ ké, Simɔn Piyɛli é a yɛ́ɛ lágban lá tá ó fɛ́. Lɔ é fɔ a yɛ́ kó: «Ile tɛ́ a yɛ́ kaamɔɔndhye ŋó lɔ le a?» Piyɛli é í lámangbɛya kó: Né tɛ́ i lɔ́ lé.

²⁶ Piyɛli tɛ́ wɛ́ɛ faanlɛɛɲansebhaa olu kúnndiiba ó yɛ́ bháalakɛdhye min ndóo kée ndɛ́ɛ mán Ɛnza myáanwaati ó lɔ, ó bhádhyemannjɛ lɔ́ é fɔ Piyɛli yɛ́ kó: «Né mán í yé yíitu ó lɔ ni Ɛnza ne a?»

²⁷ Piyɛli é fɔ íkwɔ kó ale mán a lɔ. O ywáaninngee ŋó lɔ, lónan ŋóo kóman.

Pilati é sháa dila kó kɛ Ɛnza nváa

²⁸ O kwɔ́, íi bhɔ́ ni Ɛnza ne Kayife fɛ́ yé kɛ́ táa ni ále, yámaantii o kúnndii o min ndɔ́ɔ ko Pilati yɛ́ lú ó kɔ́ɔnnɔn. Oo kɛ́ sɔ́ɔjonan o man. I mán sɔ́n kɛ́ lo lú ó kɔ́ɔnnɔn, ké i kɛ́nan í yɛ́ɛ lánɔɔn kɛ́ kéeɲan ni laanan ó lé, ké íi sé kɛ́ Hɔ́lɔɲanli o ɲánlagbɛ súnman ŋó lɔ́ɔ.

²⁹ Pilati é bhɔ́ kɛ́ táa í saala kɛ́ í mánɲaankɛ kó: «Aa cɛ míin ngɛ́lɛla mínnɛɛn lé kósɔn?»

³⁰ Íi Pilati yawi kó: «Ni a tɛ́man koyoongɛ, án ndɛ́ táa a myáan kɛ́nan ale i sáala.»

³¹ O lɔ, Pilati é fɔ í yɛ́ kó: «Áa á myáan kɛ táa ni ale a gbúlu ta kítitɛɛlaa o lɔ kɛ́ kéeɲan ni Yawudhyaa ólu yɛ sɛliya ó lé.» Íi Pilati yawi kó sháa mán dí ílee mán kɛ́ mɔɔn Fáa.

³² Míin bɛ́ɛ kɛ́ ké Ɛnza ndɛ́ wɛ́ɛ a sáyako ó fɔ ɲánminman, fɔ ó tɛ́ɛ i lafa.

³³ Pilati é lo lú ó kɔ́ɔnnɔn kɛ́ Ɛnza ngíi kɛ́ a mánɲaankɛ kó: «Ile lée Yawudhyaa ólu yɛ́ mansacɛ o le a?»

³⁴ Ɛnza ŋé a yawi kó: «Ó kóman óo bhɔ́ íle gbú lé lálɔ a? Wáman ii ó myɛ́n mɔɔn léelu lá?»

³⁵ Pilati é a yawi íkwɔ kó: «Née Yawudhyaa le lé a? I yɛ́ síya óni í yɛ́ faanlɛɛɲansebhaa olu kúnndii ó léelu nan ni ile né saala, íi mínnɛɛn lé kɛ?»

³⁶ Ɛnza ŋé a yawi kó: «Né yɛ́ Mansaya ó tɛ́ dínɲan míin ndá lé. Ni né yɛ́ mansaya ó tɛ́ɛkɛ dínɲan tá lé, né yɛ́ mɔɔn ólu tɛ́ɛnan kɛ́ɛ kɛ́ né kósɔn, ké Yawudhyaa kúnndii ólu kɛ́nan né myáan, wáa né yɛ́ Mansaya ó tɛ́ dínɲan míin ndá lé.»

³⁷ Pilati é fɔ a yɛ́ kó: «Ílee mansacɛ lé le á?» Ɛnza ŋé a yawi kó: «Ile lée ó fɔ́la kó née mansa lé. Kɛ́nan dínɲan lɔ́ kɛ́ tínɲan ó fɔ. Ni wóo ó lé kósɔn, mɔɔn óo mɔɔn é tínɲan sháa ó ka, o tíi ó né ta kóman o lɔ́myɛnnan.»

³⁸ Pilati é fɔ a yɛ́ kó: «Mínnɛɛn lée tínɲan ó lé?» Pilati é ó kóman ó fɔ kɛ́ wɛ́ɛ wáati mínnɔn, aa bhɔ́ kɛ táa Yawudhyaa olu kwɔ́ kɛ́ɛnman, kɛ́ fɔ í yɛ́ kó: «Né mán cɛ míin nváa kún yé.

Yawudhyaa olu ko kɛ́ Ɛnza nváa

³⁹ Waa a lo wɛ́ɛ kɛ́ laanan le a bhóo ní mɔɔn kée lábhyaala a yɛ́ Hɔ́lɔɲanli o ɲánlagbɛ o mán, áa fɛ́ ké ní Yawudhyaa ólu yɛ́ mansacɛ ó lé lábhyaa a?»

⁴⁰ Íi gbáa kó: «Ɔn-ɔn, i kɛ́nan cɛ míin lábhyaa, wáa ii Baanabasi lé lábhyaa.» Kɛ́ɛke Baanabasi tɛ́ɛ mɔɔn Fáabhaa lé le.