Yaya 1 - MahouKóman ó wɛ́ɛ kɛ́ kɛ́ɛnɲan óni ɲaanmanɲan o lé 1 3Jónan, sannin dínɲan a lá, Kóman ó tɛ́ɛ yé. O Kóman ó tɛ́ɛ ni Ala le, o Kóman ó tɛ́ɛ Ala le lé. 2 A tɛ́ɛ ni Ala le jónan. 3 Fé ŋó bɛ́ɛ la ale le bháaka lɔ. Fé nzi tɛ́ yé min man la a bháaka lɔ. 4 Ɲáanmanɲan ó sɔ́ɔla ale lé lɔ. O ɲáanmanɲan o lé tɛ́ɛ kɛ́ɛnɲan ó bhɔ́la Adamandhye ŋólu yɛ́. 5 O kɛ́ɛnɲan óo máannan diwi ó lɔ. Wáa diwi ó mán sɔ́n a man. 6 O wáati o lɔ, Ala é cɛ lɔ cé min ndɔ́ɔ tɛ́ɛ kó Yaya. 7 Ale lée nan kɛ kɛ́ kɛ́ɛnɲan ó sɛ́ɛya le kɛ́ a kófɔ mɔɔn ólu yɛ́ ké i bɛ́ a lá kɛ́ɛnɲan ó la ale sɔ́ɔbu la. 8 Ale Yaya tɛ́ tɛ́ kɛ́ɛnɲan ó le, waa aa nan le kɛ́nan kɛ kɛ́ɛnɲan ó sɛ́ɛya lé. 9 O kɛ́ɛnɲan ó tɛ́ɛ kɛ́ɛnɲan gbúnungbu le lé, míin nan dínɲan lɔ kɛ́ kɛ́ɛn bhɔ́ mɔɔn ólu bɛ́ yɛ́. 10 A tɛ́ɛ dínɲan ó lɔ, Ala é dínɲan o la ale lé bháaka lɔ, waa dínɲan mɔɔn ólu man a lɔ. 11 Ale kóman oo nan a síya mɔɔn ólu fɛ́ yé, a síya mɔɔn ólu í bá a lɔ. 12 Waa mɔɔn min núu sɔ́n a mán, kɛ́ la a lá, aa sé dí olu mán kɛ í kɛ́ Ala dhyé nu lé. 13 O dhyé ŋólu man wóo Adamandhye ŋólu ta wóoseɲan o lɔ. Waa íi wóo Ala yɛ́ sáo ó lé lɔ. Kóman o wɛ́ɛ kɛ mɔɔn lé 14 O kóman óo kɛ́ mɔɔn lé, kɛ́nan í síi ni án ne. Án ni a yɛ́ nɔ́lɔya ó yé, dhyénjɛ kée ŋó míin sɔ́ɔ a Fá bhóo. Ale lée tínɲan ó tíi lé óni a Fánin ɲé nɛ́nmɛn ó la. 15 Yaya é gbáa kɛ fɔ kó: «Né tɛ́ɛ mín ngó fɔ́la kó a káa nan né kwɔ́, ale lée nin. Aa bwó né le, kɛ mansɔɔ sannin né a wóo, ale tɛ́ɛ yé.» 16 Án bɛ́ wɛ́ɛ lwáau shɛ́ɛman nzɔ́ɔ a yɛ́ nɛ́nmɛn ó bháaka lɔ, kɛ nɛ́nmɛn án ɲɛ́n lo ŋóo lo. 17 Ala yɛ́ sɛliya ó sɔ́ɔ Musa le sɔ́ɔbu la. Waa Ɛnza Ngílisi lée nan ni Ala yɛ́ nɛ́nmɛn ó, óni a yɛ́ tínɲan ó lé. 18 Mɔɔn si man lɛɛ kɛ́ Ala yé bha fɛ́sɛ fɛ́sɛ, Waa a Dhyénjɛ kéengboto, min ŋé Ala le, ale ni a Fá Ala é ɲɔ́ɔn nvɛ́, ale lée Ala yáa án nan. Yaya Bátizelikɛbhaa é sɛ́ɛya min ládi Ɛnza ngo o lɔ Matiyu 3.1-12 ; Maki 1.2-8 ; Luka 3.1-17 19 Yawudhyaa ólu tɛ́ wɛ́ɛ faanlɛɛɲansebhaa lɔ́lu ni Ala bhatobhomba o bháalakɛdhye ŋo lɔ́lu bhyáa kɛ́ bhɔ́ Yeluzalɛmu kɛ́ táa Yaya sáala, íi a mánɲaankɛ kó: «I lée yɛ́ɛtii lé? Yaya é í yawi kóman minnan o lée nin». 20 Yaya mán síka kɛ í yawi, aa fɔ kɛ́ gbɛ́ i yɛ́ kó: «Né tɛ́ Kílisi ó le lɛ́.» 21 Íi a mánɲaankɛ kó: «O sán ó lɔ, í lée yɛ́ɛtii le? Ii Eli le lé a?» Aa i yawi kó: «Né tɛ́ Eli lé.» I kó: «Ii célaba óle lɔ lé a?» A kó ɔn-ɔn. 22 Oo kɛ́ mínngɛ, íi fɔ a yɛ́ kó: «Ii lée yɛ́ɛtii le wɛ́, ó fɔ án ɲɛ́n, ke an ni táa o fɔ án njébhaa ólu yɛ. Ɔn-ɔn. O sán o lɔ, íi yɛ́ɛtii lé?» 23 Yaya é í yawi kó: «Mɔɔn mín ŋé cáayɛɛ kɛla wúla ó lɔ́ kó: Aa sháa olu latee Mantii ó yɛ́, né lée óle. Óyoo céla Ezayi é fɔ tɛnmɛn ne.» 24 Céladhye ŋólu tɛ́ɛ Falizɛn ne lé. 25 Íi Yaya mánɲaankɛ í kwɔ́ kó: «Ní ile tɛ́ Kílisi o le, ní ile tɛ́ Eli le, wáman Céla le, í ló ŋé mɔɔn ólu bátizela mínnɛɛn le kósɔn?» 26 Yaya é í yawi kó: «Née a bátizela jí le la. Wáa mɔɔn lɔ́ é a cɛ́man, a mán ó lɔ, 27 ale yáa nan né kwɔ́, né mánngan kɛ́ a yɛ́ sawaa yúu ó fwée.» 28 O kó míinnu bɛ́ɛ kɛ́ Betani Fá ŋó fɛ́ Zuludɛn bháji ó kwɔ́man, Yaya tɛ́ɛ mɔɔn ólu bátizela ywáa min nɔn. Ɛnza, Ala yɛ́ Saadhye ŋó 29 O lusɔgbɛ ó, Yaya é Ɛnza nantɔ ó yé a saala, aa fɔ kó: «Ala yɛ́ Saadhye ŋó lée nin, min ŋé dínɲan mɔɔn ólu yɛ́ yúumu ólu bhɔ́la yé. 30 Né tɛ́ɛ ale lé kofɔla kó mɔɔn lɔ́ yáa nan né kwɔ́ min ŋan bwó né le, kɛ mansɔɔ sannin né a wóo, ale tɛ́ɛ yé. 31 Né tɛ́ mán a lɔ, née nan kɛ́ mɔɔn ólu bátize jí o lɔ́, ké Izalayɛlidhye ŋólu a lɔ.» 32 Yaya é o sɛ́ɛya ladi í kwɔ́ kó: «Ní Ní Sɛnnɛnyanin ŋó yíitɔ o yé a ka kɛ́ bhɔ́ sángboo ó lɔ, óyoo biininngbɛ, kɛ́nan i síi a ka. 33 Né tɛ́ mán a lɔ, waa Ala min ŋé né cé kɛ́nan mɔɔn ólu bátize jí ó lɔ́, óo fɔ ɲɛ́n kó ni né kɛ́ Ní Sɛnnɛnyanin ŋó yíitɔ yé kɛ́ í síi min nga, ó tíi ó lé káa mɔɔn ólu bátize ni Ní Sɛnnɛnyanin ŋó le. 34 Ní ó yé, no ŋé o sɛ́ɛya ladi kɛ fɔ tínɲan la ngó ale lée Ala Dhyénjɛ ŋó lé.» Ɛnza ɲɛ́n kaamɔɔndhye jónan ólu 35 O lusɔgbɛ ó, Yaya tɛ́ɛ ó ywáa kée ŋó lɔ, ni a yɛ́ kaamɔɔndhye ŋólu mɔɔn fyáa lé. 36 Aa i ɲán gbáan Ɛnza ndíminndɔ ó lɔ́ tó kɛ fɔ kó: «Ala yɛ́ Saadhye ŋó lée nin.» 37 A yɛ́ kaamɔɔndhye nvyaa ólu ó myɛ́n mínngɛ, olu bhyáa Ɛnza ngwɔ́. 38 Ɛnza ŋé í ɲán yɛ́ɛman kɛ́ í yé a kwɔ́ mínngɛ, aa i mánɲaankɛ kó: «Aa mínnɛɛn lé ɲíinnan?» Íi a yawi kó: «Alabi, i yɛ́ ywáa óo mín?» Alabi o kɔɔ ó tɔ́ɔ kó kaamɔɔn. 39 Aa fɔ i yɛ kó: «Aa nan ndáa, a yáa a ywáa yé.» Ii táa ni a lé kɛ́ a yɛ́ ywáa ó yé. Ywáala tɛ́wɛɛ se. Ii tó ni a lé o lo ŋó la. 40 Mɔɔn fyáa mínnu tɛ́ wɛ́ɛ Yaya yɛ kóman ó myɛ́n kɛ́ bhyáa Ɛnza ngwɔ́, ó kée ndɛ́ɛ Simɔn Piyɛli bhádhyemannjɛ Andele lé. 41 Aa í lateeya kɛ́ táa fɔ a bhádhyemannjɛ Simɔn yɛ́ kó: «Án ŋwɛ́ɛn Kílisi o yé». O kɔ́ɔ ó kó Ala yɛ́ mɔɔn lɔtɔnmɔnnin ŋó. 42 Íi táa Ɛnza nzaala. Ɛnza ŋé a mánfɛɛ fulututu kɛ́ fɔ a yɛ́ kó: «Ii Yaya dhyénjɛ Simɔn lé le. Án ɲáan í kíi kó Sefasi». Gɛlɛkikan ŋó lɔ, o lée Piyɛli lé. Filipu ni Natanayɛli é bhyáala Ɛnza ngwɔ 43 O lusɔgbɛ ó, Ɛnza ŋé a látɛɛ kɛ táa Galile mala ó lɔ. Aa bhyɛ Filipu lé, kɛ́ fɔ a yɛ́ kó: «Bhyáa né kwɔ́.» 44 Filipu ni Andele óni Piyɛli míinnu bɛ́ tɛ́ɛ Bɛtisayidaka lé le. 45 Filipu é bhyɛ Natanayɛli kɛ́ fɔ a yɛ́ kó: «Mɔɔn min ngo fɔnin ɲé Musa yɛ Sɛliya sɛ́wɛ óni Céla ólu yɛ́ sɛ́wɛ ólu kɔ́ɔnnɔn, án ŋwɛ́ɛn a yé. Ɛnza Nazalɛtika le ko yé, Yusufu dhyénjɛ.» 46 Natanayɛli kó: «Fémɛɛ ŋé sé kɛ́ bhɔ́ Nazalɛti a?» Filipu é a yawi kó: «nan sa, ke i legbu ŋa a yé.» 47 Ɛnza ŋé Natanayɛli nantɔ ó yé a saala, aa fɔ kó: «Míin ŋé Izalayɛlidhye né lé gbútuukɛ, Nánmaanmɔɔn tɛ́.» 48 Natanayɛli kó: «Ii né lɔ mín?» Ɛnza ŋé a yawi kó: «Sanni Filipu aa í kíi, né ɲán tɛ́ɛ i lá fígisun ŋó kɔ́ɔ.» 49 Natanayɛli é a yawi kó: «Kaamɔɔn, ii Ala Dhyénjɛ le lé, ile lée Izalayɛli yɛ́ mansa o lé.» 50 Ɛnza ŋé fɔ a yɛ́ kó: «Ní fɔ mínngɛ ngó ní í yé fígisun ŋó kɔ́ɔ, í wɛ́ɛ lá né lá kɛ́ɛ. I káa fé gbɛ́ɛlu yé mínnu káa tínmin míin nga.» 51 Ɛnza ŋé fɔ íkwɔ kó: «Tínɲan in ne, a yáa sángboo ó lálakanin ɲé kɛ́ Ala yɛ́ malɛɛka ólu yɛ́ɛtɔ óni í yíitɔ o yé mɔɔn Dhyénjɛ ó ka.» |
© (Active), Wycliffe Bible Translators, Inc. All rights reserved.
Wycliffe Bible Translators, Inc.