Bìoball air-loidhne

Titi 3 - Mahou

Lánanbhaa olu táamankɛ séɲan o

¹ A fɔ́ lánanbhaa olu yɛ ko ii i mányii mansa olu ni faanman olu yɛ, ii olu bwóɲan, i lɔ́bhyɛnin ŋan kɛ́ kɛ kóbhɛɛ kɛ.

² Ké i kɛ́nan kóman yóo nvɔ́ mɔɔn lɔ mán, ké kɛɛ kɛ́nan dhyaa i yɛ, wáa ké ii kɛ mɔɔn yósoswaanyanin ne, ké ii yáa mɔɔn olu bɛ́ la óo i yóso o man bwó.

³ Kɛ mansɔɔ jónan, hákii tɛ́ tɛ án néelu man án ndɛ́ tɛ mɔɔn sí bwóɲanla, án no ndɛ́ɛ le óyoo mɔɔn mínnu wɛ́ɛ túun. Án ndɛ́ɛ nɛ́li yóo ŋo bɛ́ súu, óni dhyáaɲɛnngo o bɛ́ súu le ta yɔ ne. Án ndɛ́ɛ yóo ne, óni ɲánngbo le tɛ́ɛ án ne. Mɔɔn tɔ olu tɛ́ɛ gbó án ɲɛ́n le, án née tɛ́ɛ gbó mɔɔn tɔ olu yɛ le.

⁴ Wáa Ala míin án ngísibhaa o le, óo a yɛ nɛ́nmɛn o yáa án nan mínngɛ, óni mɔɔnninnvin ŋolu a dí a yɛ tɛ́nmɛn ne kɛ tinmin,

⁵ aa án mbwási. A mán án née bwási án ne ta kóbhɛɛ o kósɔn, aa án mbwási le, kɛ mansɔɔ án hínnɛn lée a lɔ. Aa tinmin kwóli o le mán, kɛ án mbwási, óni kɛ án ŋwóo kokwaa kɛ, aa tinmin Ní Sɛnnɛnyanin ŋo le mán, kɛ án mbwási kɛ ɲáanmanɲan kwáa dí án mán.

⁶ Ala é tinmin án bwásibhaa Ɛnza Ngílisi le mán kɛ Ní Sɛnnɛnyanin ŋo dí án mán shɛ́ɛman ne.

⁷ O ɲán o le mán, án ɲíin é a man óo án ɲáan ɲáanmanɲan wɛ́ɛbhɛɛ o sɔ́ɔ, kɛ mansɔɔ a tɛ́ wɛɛ án nátee a yɛ nɛ́nmɛn o bháaka lɔ.

⁸ O kóman o lée tínɲan o le. Ŋwɛ́ɛn fé mín nvɔ́ nin, ní fɛ ké íi o fɔ́ íkwɔ, ké mɔɔn mínnu lánin ɲé Ala la, ké olu a kóbhɛɛ kɛ o le ɲán ɲíin. O káɲin mɔɔnninnvin ŋolu mán, tɔɔn lo ŋé o lé la.

⁹ Wáa á kɛ́nan á yɛ́ɛ bhyáa kiti lɔ́koo ŋolu lɔ, mɔɔn kɔ́ɔkɔɔ olu tɔ́ɔ olu, kíti olu, óni kɛ kiti kɛ Nváa Musa yɛ tɔ ŋolu ka. O bɛ́ɛ fúu lé le, o lo ndɛ́ fóyi ɲanla.

¹⁰ Mɔɔn míin lánanbhaa olu fáanan ɲɔ́ɔnnan, íi i sɛ́ɛmansɔɔ o tíi o yɛ síɲan kée, síɲan fyáa, o kɛ́ wɛɛ íi a tíi o bhyáa i láman kɛ a gbɛ.

¹¹ Íi lɔ ŋóo mɔɔn súu míin wé o tɛ sháabhɛɛ ka, yúumu tɔ lée wé, a tíi gbú wɛɛ a yɛ́ɛ bhyaa ko lɔ.

Pɔli yɛ ládhyɛli labha ŋolu

¹² Ɲáan Atemasi wáman Tishiki cé í mán. Ní mín ngɛ sé í fɛ́ yénɔn, íi i lɔ́ja kɛ nan nzɔɔ Nikopoli, kɛ mansɔɔ ŋwɛ́ɛn a latɛɛ, ngɛ́ɛ tɛɛ nɛ́nnɛn ko wáati o kɛ yénɔn le ɲán.

¹³ Íi i lɔ́ja kɛ sɛliya kaamɔɔn Zenasi óni Apolɔsi lɔdhyɛman, ké i kɛ́nan dɛ́sɛ fóyi la, i yɛ táaman o kɔ́ɔnnɔn.

¹⁴ Án mádhye lánanbhaa cɛ́man ní musoman ŋolu kákan né kɛ i lɔ́ja kɛ i lée kóbhɛɛkɛ o la, ké mínnu gbɛ́ya gbútuu o lɔ, ké ii olu lɔdhyɛman. Ní i kɛ a kɛ cé, tɔɔn yáa kɛ i la.

¹⁵ Né ní mɔɔn óo mɔɔn é kéene olu bɛ́ɛ í twáala. Án ndwáanva lánanbhaa olu bɛ́ twaa án ɲɛn. Ké Ala yɛ nɛ́nmɛn o á kɛ́ án mbɛ́ fɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan