Titi 1 - Mahou

Twaali o

¹ A fáanan Pɔli la, míin Ala yɛ bháalakɛdhye ne, óni Ɛnza Ngílisi yɛ́ céladhye ŋo. Aa né cé ké a wɛ́ɛ mɔɔn mínnu tá ké olu á lá a la óni ké ii tínɲan o lɔ o mín ni téeɲan o á kée,

² ké i yéesiinin ŋan kɛ́ ɲáanmanɲan wɛ́ɛbhɛɛ o sɔɔ le. Ala mín ndɛ́ fwɔnɲan fɔla, óo dínɲanlɔtɛɛ wɛ́ɛbhɛɛ o láheli o ta án ɲɛn, ke dínɲan mán lá bha.

³ Aa wáati mín nzíi oo se mínngɛ, án ngísibhaa Ala o, óo a saaninkan ŋo yáa mɔɔn olu la lákawanin o lɔ. Ala é o mín ngɛ́ɛfa ne la.

⁴ Kɛ a dí Tite man, nyénjɛ gbútuu o lánanya kée ŋo lɔ: ké án Nvá Ala óni Ɛnza Ngílisi, án ngísibhaa yɛ nɛ́nmɛn óni láha o á kɛ́ í fɛ́.

Bháala mín ŋé kɛ́ɛfa Tite man

⁵ Ni í tó Kɛlɛti le, ke kó mínnu mán i ɲánbhɔ bha ké íi olu ɲanbhɔ, ke íi Egilizi olu mɔɔn kɔɔ olu lɔ lasii só o bɛ́ la, óyoo ní a fɔ í yɛ ɲán mín mán.

⁶ O mɔɔn kɔɔ mín nú wé, sɔ ngóo ngɛ́nan kɛ olu la, muso kée ne á kɛ o kunman; i dhyé ŋolu a kɛ lánanbhaa le, mɔɔn si mán nan mínnu yɛ sɔ ngóo nvɔ bha, i kɛ́nan kɛ́ mɔɔn mulutunin nu le.

⁷ Tínɲan in ne, i wɛɛ mɔɔn mínnu bhyaa ɲɛ́n, kɛ Ala ta bháala o kɛ, mɔɔn sí manngan kɛ sɔ ngóo nzɔɔ olu la: ké a kɛ́nan a yɛ́ɛ lɔ bwóɲan, a kɛ́nan kɛ gbúsuuba le, a kɛ́nan kɛ dɔlɔ mín maaba le, a kɛ́nan kɛ mɔɔn ɲínmanfɛɛyanin ne, a kɛ́nan kɛ mɔɔn le míin wɛ́ɛ o ɲíin nan ɲán o bɛ́ man.

⁸ Aa kɛ yɛ́tii bhɛɛbhɛɛle, kóbhɛɛ o a dhyaa a yɛ, ké áa se a yɛ́ɛlɔmyaanla, mɔɔn téenin, mɔɔn sɛ́nnɛnyanin ne, aa sé a yɛ́ɛ látaanla.

⁹ Aa i lɔ́ja kɛ to ni tínɲan kóman o le, óyoo ii a kala o la tɛ́nmɛn ne, ke aa se kɛ mɔɔn olu kala, kɛ i ládhye ni kaa nzɛ́nnɛnyanin ŋo le, óni kɛ sɔ́sɔlikɛbhaa olu yɛ fii o yáa i la.

Céla fwɔ́ɲanfɔ olu

¹⁰ Tínɲan in ne, mɔɔn mulutinin, kóman kúnnda nvɔ́bhaa olu, óni mɔɔnlanɛɛnmaa olu yɛ́ɛ á sháa lánanbhaa bhɔ́nin kɛ́ɛnlɔ ólu yɛ́ɛ cɛ́man.

¹¹ Áa o mɔɔn olu lá o mantuun, kɛ mansɔɔ i yáa bhó ŋo lɔ́lu yɛ lánanya cáan, kaa mín mánngan kɛ kɛ, ii mɔɔn olu kalanan o kaa ɲóo ŋo la, yúumu lɔ wɛ́ɛ o kósɔn.

¹² I yɛ́ɛ la céla o lɔ lée fɔ cé ko: Kɛlɛtika olu fwɔ́ɲanfɔ le le wáati bɛ, soo yóo née ile, lakɛbhɛɛ lée ile, miliya gbɛ́ɛ tɛ i la lɔ́minkɛ o le kwɔ.

¹³ O céla ó mín nvɔ, o lée tínɲan ó le. O lee kɛ, mɔɔn mínnuu wé, íi jámanngɛ olu man gbutuukɛ, ke i sɛ́nnɛnyanin ŋán kɛ lánanya o lɔ.

¹⁴ I kɛ́nan Yawudhyaa olu yɛ tɛ́ɛn ngɔ́ɔkɔɔ olu lɔ́myɛn, mɔɔn mínnu wɛ́ɛ i kwɔ́ lo tínɲan o la, i kɛ́nan olu yɛ tɔ́ ŋólu bwóɲan.

¹⁵ Kó o bɛ́ sɛ́nnɛnyanin née kɛla, mɔɔn sɛ́nnɛnyanin ŋólu bhóo. Wáa fosi sɛ́nnɛnyanin ndɛ́ kɛla, mɔɔn kɔ́sɔnin óni lananbhɛɛ olu bhóo: Olu hákii o, óni i miliya o lɔ sɛ́nnɛnyanin ndɛ́.

¹⁶ Ii fɔla kó ii Ala lɔ, wáa i kɛ́ko olu yáala kó i man Ala lɔ. I súu o mánɲin, i tɛ mɔɔn si bwóɲanla, i lo ndɛ́ shaa kóbhɛɛ kɛ.